ပထမဆုံးနှစ် မျှော်တလင့်လင့်

 

ပထမဆုံးနှစ် မျှော်တလင့်လင့်
သင့်ရဲ့မွေးကင်းစ ဘေဘီလေးကို ပြုစုစောင့်ရှောက်ရတာ၊ ဝေယျာဝေစ္စတွေ လုပ်ပေးရတာ ပင်ပန်းကောင်း ပင်ပန်းနိုင်ပါတယ်။ ဒါပေမယ့် မျှော်လင့်ချက်တွေ တနင့်တပိုးနဲ့မို့ မောရကောင်းမှန်း မသိဘဲ ဖြစ်နေပါလိမ့်မယ်။ ကဲ ...ဒီတော့ ကလေးလေးတစ်ယောက်ရဲ့ ပထမဆုံးတစ်နှစ်ကာလမှာ မိဘတွေ မျှော်လင့်စောင့်စားနေရတဲ့ တိုးတက်မှုလေးတွေ၊ အမူ အယာလေးတွေအကြောင်း လေ့လာကြည့်လိုက်ရအောင်။

ပြုံးတော့မှာလား!
နှစ်လလောက်န...

ီးပါး ဆက်တိုက်အိပ်ရေးပျက်ရတဲ့ညတွေ၊ ဂျီကျနေတဲ့ ကလေးကို တစ်နာရီလောက်နီးပါး ချော့မြူချီပိုးခဲ့ရတဲ့ အချိန်တွေ လွန်မြောက်တဲ့အခါ သင့်ရင်သွေးလေး ငိုတာကို မရိုးနိုင်အောင် ခဏခဏ တွေ့ဖူးနေမှာပါ။ ပြီးတော့ ဖျတ်ခနဲ ပြုံးပြသလို ဖြစ်သွားတတ်တာကို တွေ့လိုက်မိပေမဲ့ သေချာကြည့်ပြန်တော့လည်း မဟုတ်ပြန်ဘူး။ အခုအချိန်ကတော့ တကယ်ပြုံးပြတတ်တဲ့ အသက်အရွယ်ပါ။ အသက် (၂)လသား အရွယ်မှာ ကလေးက သင့်ကိုမြင်ရင် ပြုံးပြတတ်နေပါပြီ။ သင့်အသံကြားရင် သင့်မျက်နှာကိုတွေ့ရရင် ကလေးက မပြုံးဘဲ တောင့်မခံနိုင်ပါဘူး။

အိမ့်ဆည်းလည်းလေးတွေ!
ကလေးငိုသံကြားရတိုင်း သင့်အသည်းနှလုံးကို ဆုပ်ဆွဲထားသလို စိတ်မချမ်းမြေ့ ဖြစ်နေရမှာပါ။ ဘေဘီလေး (၄)လသား အရွယ်မှာတော့ သင့်တစ်ဘ၀လုံး ကြားဖူးခဲ့သမျှ အသံတွေထဲမှာ အချိုမြိန်ဆုံးလို့တောင် ထင်မိစေတဲ့ တခြား အသံတစ်သံကို သင်ကြားရပါလိမ့်မယ်။ သင့်ကလေးရဲ့ ရယ်သံလေးပါ။ သူ့ကို ရယ်အောင်လုပ်ဖို့ကလည်း လွယ်ကူပါတယ်။ မျက်နှာပြောင်မျိုးစုံ လုပ်ပြတာ၊ ကလိထိုးတာ၊ မျက်နှာပေါ်ကို လက်ဝါးအုပ်ပြီး တူတူရေ၀ါးဆိုပြီး လက်ဝါးပြန်ဖယ်ပြတာ စတဲ့ အမူအယာမျိုးစုံက ကလေးလေးကို တခစ်ခစ် ရယ်မောစေပါတယ်။

တစ်ညလုံးအိပ်ပျော်နေရင် ကောင်းမှာပဲ!
တခြားမွေးကင်းစ ကလေးတွေလိုမဟုတ်ဘဲ သင့်ကလေးက တစ်ညလုံး နှစ်နှစ်ခြိုက်ခြိုက် အိပ်ပျော်နေဖို့ဆိုတာ မဖြစ်နိုင်တဲ့အရာတစ်ခုပါ။ အခုမှ ပူပူနွေးနွေးမိဘဖြစ်လာရတဲ့ ဖေဖေ၊ မေမေ အသစ်စက်စက်တွေကတော့ ကလေးကို တစ်ညလုံး နို့ဆာလိုက်၊ ရှုးပေါက်လိုက်၊ ငိုလိုက်လုပ်နေမယ့်အစား ငြိမ်ငြိမ်လေး အိပ်ပျော်နေရင် ကောင်းမှာပဲလို့ တွေးမိပါ လိမ့်မယ်။ ဒါပေမယ့် ကလေးတစ်ယောက်ဟာ အသက် (၄)လလောက် ရောက်တဲ့အထိ တစ်ညလုံးအိပ်မနေပါဘူး။ အဲဒီလို အိပ်မနေတာကလည်း သူဟာ ကျန်းမာသန်စွမ်းတဲ့ ပုံမှန်ကလေးတစ်ယောက်ဖြစ်တယ်ဆိုတာကို ပြနေတာပါ။ အသက် (၄)လကနေ (၆)လအရွယ်လောက် ရောက်ရင်တော့ ကလေးတော်တော်များများဟာ တစ်ညလုံးနီးပါး အိပ်ပျော်နိုင်စွမ်း ရှိ လာပါတယ်။

ထိုင်တော့မှာလား!
အသက် (၅)လ၊ (၆)လ အရွယ်မှာတော့ သင့်ကလေးဟာ ၀မ်းလျားမှောက်နေနေရတဲ့အစား ကမ္ဘာကြီးကို အမြင်သစ်နဲ့ ရှုမြင်ဖို့အတွက် ထိုင်နိုင်အောင် စ,ကြိုးစားလာပါတယ်။ ဒီအရွယ်မှာ ကလေးအများစုဟာ အမှီအခိုကင်းကင်းနဲ့ မထိုင်နိုင်သေးဘဲ လက်နှစ်ဖက်ကို ကြမ်းပေါ်ထောက်လို့ အားပြုပြီး ဒါမှမဟုတ် ခေါင်းအုံးတွေ၊ ပရိဘောဂတွေဆီကို ကိုယ်ကို ကိုင်းလို့ အားပြုပြီး ထိုင်နိုင်ကြပါတယ်။ အသက် (၇)လသားကနေ (၉)လသား အတွင်းမှာတော့ ဘာကိုမှ အားမပြုဘဲ သူ့ဘာသာသူ ထိုင်တတ်လာပါတယ်။


လေးဘက်ထောက်တဲ့အရွယ်!
သင့်ကလေးကို ကိုယ်ဝန်စရှိတာနဲ့ သင့်ကိုယ်သင် တဖြည်းဖြည်း ၀ိတ်တက်လာတယ်လို့ ထင်နေမိရင်တော့ အခုဝိတ်စကျဖို့အတွက် အချိန်ကောင်းရောက်ပါပြီ။ (၈) လသားအရွယ်လောက် ရောက်တာနဲ့ ရုတ်တရက်ဆိုသလို တစ်အိမ်လုံး လှည့်ပတ်သွားနေတဲ့ သင့်ကလေးနောက်ကို လိုက်ရတာ လေ့ကျင့်ခန်းလုပ်သလိုပဲ အကျိုးရှိမှာပါ။ (၉) လသား အရွယ်ရောက်ရင် ကလေးအများစုဟာ သူတို့ရဲ့ ခြေကော လက်ကောသုံးပြီး လေးဖက်ထောက်လို့ လျှောက်သွား ကြပါတယ်။ တချို့ကလေးတွေကတော့ လုံးဝလေးဖက်မထောက်ဘဲ ၀မ်းလျားမှောက်ပြီး၊ ကိုယ်ကိုတွန့်လိမ်ပြီး တွားသွား တတ်ကြပါတယ်။ လေးဖက်ထောက်သွားတဲ့အဆင့်ဟာ ကလေးတစ်ယောက်ရဲ့ ဖွံ့ဖြိုးမှုဖြစ်စဉ်မှာ အဓိကကျတဲ့ အစိတ် အပိုင်းတော့ မဟုတ်ပါဘူး။ အဲဒီအစား ထိုင်ရင်းနဲ့ ဖင်ရွှေ့ပြီး သွားတာမျိုးနဲ့လည်း ကလေးဟာ ဖွံ့ဖြိုးမှုဖြစ်စဉ်ရဲ့ နောက် တစ်ဆင့်ကိုရောက်ဖို့ အားထုတ်တတ်ပါတယ်။

တာ့တာ!
ကလေးတစ်ယောက် တာ့တာပြတဲ့ အမူအယာဟာ အလွန်ချစ်စရာကောင်းရုံတင်မကဘဲ သူတို့တတ်မြောက်တဲ့ ဘာသာစကားနဲ့ သင့်ကို ဆက်သွယ်တာပါ။ (၉) လသားအရွယ် ကလေးတော်တော်များများဟာ အသံတွေနဲ့ ကိုယ်ဟန် အမူအယာတွေ စတင်ချိတ်ဆက်နိုင်လာပါမယ်။ သူတို့နားလည်ထားတာက တာ့တာဆိုတဲ့ အသံကြားရင် လက်ကို ဝှေ့ရမ်းပြရမယ်ဆိုတာပါ။

တွေ့တာအကုန်စားတဲ့ အရွယ်!
အသက် (၆) လသားအရွယ် ဖြည့်စွက်စာ စကျွေးခဲ့တုန်းကတော့ ကလေးက ဇွန်းနဲ့ကျွေးတာကို လက်သင့်ခံခဲ့ ပေမယ့် အခုအချိန်မှာတော့ ဇွန်းကိုမကြိုက်တော့ဘဲ ကိုယ့်ဘာသာကိုယ် စားဖို့ အသင့်ဖြစ်နေပါတယ်။ (၉) လကနေ (၁) နှစ် အတွင်းမှာ ကလေးတွေက သူတို့လက်ချောင်းလေးတွေနဲ့ လက်တွေကို ကောင်းကောင်းထိန်းပြီး အသုံးပြုတတ်လာပါတယ်။ အဲဒီတော့ အစာကျွေးရင် လက်နဲ့ကောက်ကိုင်ပြီး ပါးစပ်ထဲ ထည့်တော့တာပါပဲ။ မကောင်းတာ တစ်ခုကတော့ ကလေးတွေ က ဒီအရွယ်မှာ မြင်မြင်သမျှ အရာအားလုံးကို စူးစမ်းကြည့်ချင်စိတ် အပြည့်အ၀ရှိနေတဲ့အတွက် စားစရာရယ်မှမဟုတ်ဘဲ တွေ့သမျှ လက်လှမ်းမီသမျှ အကုန်လုံး ပါးစပ်ထဲ ကောက်ထည့်ပစ်လိုက်တတ်ပါတယ်။ ဒါကြောင့်မို့ ကလေးတွေ (၉)လ ကျော်လာပြီဆိုရင် ကလေးရဲ့ ပတ်ဝန်းကျင်၊ သူလက်လှမ်းမီသမျှ နေရာတွေမှာ ဆေးတွေ၊ အန္တရာယ်ရှိနိုင်တဲ့အရာတွေ ဘာမှ မထားဘဲ သိမ်းဆည်းထားဖို့၊ လုံခြုံမှုရှိနေအောင် လုပ်ဖို့က မိဘတွေရဲ့ တာဝန်ဖြစ်လာပါတယ်။

မတ်တပ်ရပ်လို့ လမ်းမှာပျော်!
အသက် (၁) နှစ်သားအရွယ်မှာ ကလေးအများစုဟာ အမှီအတွယ်မပါဘဲ ခဏပဲဖြစ်ဖြစ် မတ်တပ်ရပ်ကြည့်နိုင်လာ ပါတယ်။ မတ်တပ်ရပ်ပြီးတဲ့အခါ ခုံတွေ၊ စားပွဲတွေ၊ တခြားပရိဘောဂတွေကိုကိုင်ပြီး ခြေလှမ်းတွေ စလှမ်းကြည့်ပါတယ်။ ဘာကိုမှ မကိုင်မပြုဘဲ လွတ်လွတ်ကျွတ်ကျွတ် မလျှောက်နိုင်သေးခင်စပ်ကြားမှာ ကလေးတွေဟာ သူတို့ရဲ့ အချိန် တော်တော်များများကို အဲဒီလို ခြေလှမ်းလေးတွေ စလှမ်းကြည့်တာနဲ့ အချိန်ဖြုန်းကြပါတယ်။

လမ်းစလျှောက်မယ်!
ဒီအချိန်ကိုတော့ သင့်ကလေးရဲ့ ဖွံ့ဖြိုးမှု ဖြစ်စဉ်တစ်လျှောက်လုံးမှာ သရဖူအဆင့်လို့ ဆိုနိုင်ပါတယ်။ ကလေးက သူလုပ်နိုင်သမျှကို အစွမ်းကုန် လုပ်ပြလိုက်တာပါပဲ။ ဒါပေမယ့်... ကလေးတိုင်းကိုတော့ သူတို့ရဲ့ တစ်နှစ်ပြည့်မွေးနေ့မှာ လမ်းစလျှောက်မယ်လို့ မျှော်လင့်မထားပါနဲ့။ ပုံမှန်အားဖြင့် အသက် (၉) လကနေ တစ်နှစ်ခွဲအတွင်းမှာ လမ်းစလျှောက် တတ်ပါတယ်။ ကလေးအများစု ပထမဆုံး လမ်းစလျှောက်တဲ့ အရွယ်ကတော့ အကြမ်းဖျင်း အသက် (၁၃) လ အရွယ်မှာပါ။

ဖေဖေ ...မေမေ!
သင့်ကလေး ဘာပဲရေရွတ်နေပါစေ၊ သင့်နားထဲမှာ ဖေဖေ... မေမေလို့ပဲ ကြားနေပါလိမ့်မယ်။ အဲဒါ သင့်ကလေး တစ်နှစ်ပြည့်သွားပြီးတဲ့အခါ ဖြစ်လာမှာပါ။ ဒီအချိန်မှာ ကလေးတွေဟာ အနည်းဆုံး စကားလုံးတစ်လုံးကို ပြောနိုင်လာပြီး တခြားသူတွေပြောတာကိုလည်း အတုခိုးဖို့ ကြိုးစားလာပါတယ်။ မကြာခင် အချိန်မှာတော့ သင့်ရင်နှစ်သည်းချာလေး သူ့စိတ်ထဲမှာ ဘာတွေ ရှိနေတယ်ဆိုတာကို သင့်ကိုပြောပြနိုင်လာတော့မှာပါ။

Credit to Dr.သုခ