အရောင်ပြောင်းသွားသော နှလုံးသား - မင်းလူ

 

အရောင်ပြောင်းသွားသော နှလုံးသား

၁

အဓိပတိလမ်းပေါ်မှနေ၍ သစ်ပုပ်ပင်ကြီးကို လှမ်းကြည့်မိသည်။

သစ်ပုပ်ပင်ကြီး၏ အရွက်မရှိသော အကိုင်းများမှာ ဖဲကြိုးဝါကလေးတွေ ချည်ထားသည်။ လေတွင် တလူလူလွင့်လျက်ပါ။
“အို”
မိကျော်သည် ကျွန်တော့်ကို ပြန်ချစ်ကြောင်း အသိပေးလိုက်ခြင်းပင် ဖြစ်ပါသည်။

ကျွန်တော့်ကိုချစ်လျှင် သစ်ပုပ်ပင်ကြီးမှာ ဖဲကြိုးဝါကလေးတွေ ချည်ထားပါဟု ကျွန်တော် မှာထားခဲ့ပါသည် မဟုတ်လား။

သစ်ပုပ်ပင်ကြီးနားကို လျှောက်သွားသည်။ သစ်ပုပ်ပင်ကြီးတွင်သာ မဟုတ်ပါ။ အပင်ခြေရင်းက စက္ကူပန်းပင်ခြုံတွင်ပါ ဖဲကြိုးဝါကလေးတွေ ချည်ထားပါသည်။ ခပ်လှမ်းလှမ်းက မြက်ခင်းပေါ်မှာ ဖဲကြိုးဝါတစ်စ။

ထိုဖဲကြိုးဝါစကလေးကို ကျွန်တော် ကောက်ကိုင်ကြည့်သည်။ ဖဲကြိုးဝါ မဟုတ်တော့ဘဲ ထဘီအထက်ဆင်စကြီး ဖြစ်နေလေသည်။

သစ်ပုပ်ပင်ပေါ်သို့ အလန့်တကြား မော့ကြည့်မိသည်။ အကိုင်းများမှာ ဖဲကြိုးဝါတွေ မရှိတော့ပါ။ အပင်ခွဆုံက သစ်ခေါက်ဘုလုံးကြီးမှာသာ အထက်ဆင်စ အနက်ကြီး ချည်ထားသည်ကို တွေ့ရလေသည်။



၂

ကျွန်တော် လန့်နိုးလာသောအခါ ချစ်ဝင်းကို သူ့စားပွဲမှာ ထိုင်နေသည်ကို တွေ့ရသည်။ သူသည် မီးသေနေသော ငွေစံပယ် ဆေးပေါ့လိပ်ကြီးကို ကိုင်လျက် သူ့ရှေ့ကနံရံရှိ ဂျပန်မပုံ ပြက္ခဒိန်ကို ငေးကြည့်နေသည်။ အေးမြင့်၏ အိပ်ရာဆီမှ လူးလှိမ့်သံကို ကြားရသည်။
“ဟင်း”
အေးမြင့်၏ သက်ပြင်းချသံ။

သူတို့နှစ်ယောက်စလုံးသည် နှလုံးသားနှင့် ပတ်သက်၍ ကျဆုံးနေကြသူနှစ်ယောက် ဖြစ်ပါသည်။ ချစ်ဝင်းသည် ချိုချိုကို စာလိုက်ပေးသည်။ ချိုချိုက “လုပ်မနေပါနဲ့” ဟု ပြောလွှတ်လိုက်သည်။ အေးမြင့်သည် ခင်မြင့်ကြည်ကို စကားလိုက်ပြောသည်။ ခင်မြင့်ကြည်က “ဖိနပ်ပဲရမယ်” ဟု ပြောလွှတ်လိုက်လေသည်။ ထို့ကြောင့် သူတို့ ဆွေးနေကြခြင်း ဖြစ်ပါသည်။

ကျွန်တော်ကဖြင့် မဆွေးသေးပါ။ မဆွေးသေးပါဟု ဆိုသောကြောင့် မကြာမီ ဆွေးလိမ့်မည်ဟု မယူဆစေလိုပါ။ လွန်ခဲ့သော နှစ်ရက်ကပင် ကျွန်တော်သည် မိကျော်ကို အောင်မြင်စွာ စာပေးခဲ့ပါသည်။ မိကျော် ကျောင်းကအပြန် ဘတ်စ်ကားပေါ်မှာ ပေးလိုက်ခြင်း ဖြစ်ပါသည်။ ဘတ်စ်ကားပေါ်မှာ ဖြစ်သောကြောင့် မိကျော် ငြင်းလို့မရပါ။ ယူသွားရပါသည်။ ဘယ်လောက်များ ပိုင်လိုက်လှပါသလဲ။ ဟိုနှစ်ကောင်နှင့် တခြားစီပါ။

သူတို့ကို ကျွန်တော့်အိပ်မက်အကြောင်း ပြောပြပါသည်။
“မင်းအိပ်မက်က နိမိတ်မကောင်းဘူးကွ”
ချစ်ဝင်းနှင့် အေးမြင့်က ဝေဖန်ပါသည်။ အမှန်တော့ သူတို့ပြောသလို မဟုတ်နိုင်ပါ။ သူတို့သည် ကျွန်တော် စာပေးဖြစ်သည်ကို မနာလိုဖြစ်နေကြခြင်းပါ။ သူခိုးသေဖော်ညှိ အမြီးပြတ်သော မြေခွေးလိုဖြစ်ပါသည်။ ကျွန်တော်သည် မိကျော်ကိုပေးလိုက်သော စာထဲမှာ ရေးသားထားသည်ကလည်း သိပ်မိလိုက်လှပါသည်။ ကြည့်ပါလေ။

နှင်းဆီပန်းကလေးတွေ ဖျားတဲ့အခါ
နေမင်းက ဆေးကုပေးတယ်
ကြယ်ကလေးတွေ ဖျားတဲ့အခါ
လမင်းက ဆေးကုပေးတယ်
ကိုယ့်နှလုံးသား ဖျားတဲ့အခါ
မိကျော်က ဆေးကုပေးပါနော်

ဟေ့.... ဟေ့၊ ဒီလိုစာမျိုးကို ဖတ်ရတဲ့အခါ ဘယ်မိန်းကလေးကများ ကျွန်တော့်ကို မချစ်ဘဲ နေနိုင်လိမ့်မှာတဲ့လဲ။



၃

“သူ့ကို တို့ သူငယ်ချင်းလိုပဲ ခင်ချင်တယ်”
မိကျော်ခေါ် ခင်စန်းကျော်၏ အဖြေ။ ကျွန်တော် ဘာပြန်ပြောရမည်မှန်း မသိပါ။ ကျွန်တော့်စိတ်ကူးထဲမှာတုန်းက တစ်မျိုးပါ။ ပုဂံလမ်းထိပ်ကနေပြီး မိကျော်ကို စောင့်မည်၊ မိကျော် ၁၆ ကားပေါ်က ဆင်းလာသောအခါ ကျွန်တော့်စာကိစ္စကို မေးမည်။ ထိုအခါ မိကျော်သည် ရှက်သဖြင့် ခေါင်းငုံ့ထားလိမ့်မည်။ ကျွန်တော်က အတင်းမေးသောအခါတွင်မှ....

ခုတော့ဖြင့် ဒီလိုမဟုတ်ပါ။ မိကျော်သည် ဘတ်စ်ကားပေါ်မှဆင်းပြီး ကျွန်တော့်ကိုတွေ့လျှင် ရှက်ကြောက်ခြင်း အလျဉ်းကင်းသော မျက်နှာဖြင့် ပြောလိုက်ခြင်း ဖြစ်ပါသည်။ အမှန်တော့လည်း သူ ကျွန်တော့်ကို ကြောက်ရန် မလိုပါ။ ကျွန်တော်တို့သည် ဆယ်တန်းမှာတုန်းက တစ်တန်းတည်း နေလာခဲ့ကြပါသည် မဟုတ်လား။ သို့ရာတွင် ကျွန်တော်ကတော့ သူ့ကို ကြောက်နေပါသည်။ ကျွန်တော်၏ စိတ်ကူးထဲက စကားများသည် မရှိတော့ပြီ၊ တုန်ယင်ထစ်ငေါ့သော စကားများသည်သာ။
“တို့ကို.. တို့ကို စိတ်ဆိုးသွား....”
“စိတ်တော့ ဆိုးချင်တယ်၊ ဒါပေမယ့် မဆိုးတော့ပါဘူး”
“ဒါဖြင့်ရင် ဟိုဥစ္စာ”
“နောက်တစ်ခါတော့ ဒီလိုထပ်လုပ်ရင်တော့ စိတ်ဆိုးမိလိမ့်မယ် ထင်တယ်”



၎

“နင့်အခြေအနေက သိပ်အဆိုးကြိး မဟုတ်သေးပါဘူးဟယ်”
ခင်အေးသန်းက ပြောလေသည်။

ရန်ကုန်တက္ကသိုလ်၏ ပန်းချီခန်းမသည် ကျွန်တော်တို့ စတည်းချရာ နေရာဖြစ်သည်။ အတန်းမရှိသောအချိန်၊ အတန်းပြီးသောအချိန် သို့မဟုတ် အတန်းလစ်နေသော အချိန်များတွင် ကျွန်တော်တို့သည် ပန်းချီခန်းမမှာ ထိုင်ကြသည်။
“ဆက်လုပ်စမ်းပါကွာ၊ ဖြစ်ပါတယ်၊ ငါ့တုန်းကဆိုရင် မင်းထက်တောင် အခြေအနေ ဆိုးသေးတယ်၊ နောက်တော့လည်း ဖြစ်သွားတာပါပဲ”
ဘာဘာကျော်သည် ကျွန်တော့်ကို အားပေးသလိုလိုနှင့် ကြွားပြန်သည်။ ကြွားလည်း ကြွားစရာပါ။ ခုဆိုလျှင် သူ့ကောင်မလေးသည် သူ့ကို ထမင်းဘူးထဲက ထမင်းကိုလည်း ကျွေးသည်။ ပိုက်ဆံကိုလည်း ချေးသည်။ (မှတ်ချက်၊ ဘယ်တော့မှ ပြန်မဆပ်ပါ) ကျွန်တော်တို့ပင်လျှင် သူ့ထမင်းဘူးကို ကပ်စားရသေးသည်။ သူ့ကောင်မလေးချေးသော ပိုက်ဆံဖြင့် လက်ဖက်ရည် ကပ်သောက်သည်။

တကယ်တော့မူ ကျွန်တော်သည် နာမည်ကြီးထမင်းငတ် ဖြစ်ပါသည်။ ဒီစကားကလေးသည် ကျွန်တော်တို့ ပန်းချီခန်းမအတွက် အဓိပ္ပာယ်များစွာ ရှိပါသည်။

“အကြင်သူတစ်ယောက်သည် မိန်းကလေးတစ်ယောက်၏ အချစ်ကို ရသည်ဖြစ်အံ့၊ ထိုသူသည် ထိုမိန်းကလေး၏ ထမင်းဘူးကိုပါ ရတော့သည်သာ”

သူတို့သည် ထိုရရှိလာသော ထမင်းဘူးကို တစ်ယောက်တည်း ဘယ်တော့မှ မစားတတ်၊ ပန်းချီခန်းမသို့ မရရအောင် ယူလာတတ်သည်။ သူငယ်ချင်းတွေကို ခွဲဝေကျွေးတတ်သည်။ ပန်းချီခန်းက လူများသည် ဆင်းရဲမွဲတေနေကြသူများ မဟုတ်ကြပါ။ သို့ရာတွင် ငွေတော့ဖြင့် အမြဲ ပြတ်လပ်နေတတ်ကြသည်။ ထို့ကြောင့်ပင် တစ်ယောက်ယောက်က မိန်းကလေးတစ်ယောက်ကို လိုက်တော့မည်ဆိုလျှင် အားရဝမ်းသာ ကူညီတတ်သည်။ ပန်းချီခန်းအတွက် ထမင်းဘူးတစ်ဘူး၊ ပိုက်ဆံချေးမည့် မိန်းကလေးတစ်ယောက် တိုးလာမည်ဖြစ်သောကြောင့် ဖြစ်ပါသည်။

ခုအချိန်မှာဖြင့် ကျွန်တော်သည် “နာမည်ကြီး ထမင်းငတ်” ဖြစ်ပါသည်။ ကျွန်တော်သည် မိကျော်၏ ထမင်းဘူးထဲမှ ထမင်းတစ်ဇွန်းကိုမျှပင် မစားဖူးသေးပါ မဟုတ်လား။ သို့ရာတွင် စိတ်ဓာတ်ဖြင့် မကျလိုက်လှသေးပါ။



၅

“မိကျော်”
“ဘာလဲ”
“တို့.... တို့ ပြောစရာတစ်ခုရှိလို့”
“ရိုးရိုးသားသား သူငယ်ချင်းလိုပြောမယ် ဆိုရင်တော့ ပြောပါ၊ ဆန်းဆန်းပြားပြား ဆိုရင်တော့ နားမထောင်ချင်ဘူး”
“အဲ.... အေးလေ၊ သူငယ်ချင်းလိုပဲ ပြောပါ့မယ်”
“ပြောလေ.... ဘာလဲ”
“ဟို.... ဟိုဥစ္စာ၊ ထမင်းဘူး ပါလာလား”
“ဒီမှာလေ၊ မတွေ့ဘူးလား”
“ဘာဟင်းလဲ”
“ငါးရံ့ခြောက်ဟင်းနဲ့ ပဲသီးကြော်”
“သြော် ဟုတ်လား၊ ဒါဖြင့် သွားတော့မယ်နော်”



၆

“သိပ်ညံ့တဲ့ကောင်ပဲကွာ၊ မိကျော်က မပြောနဲ့ဆိုပေမယ့် အတင်း မရမက ပြောပေါ့ကွ”
“ဟာ.... ငါကြောက်တယ်ကွ၊ မိကျော်က သိပ်စိတ်ကြီးတာနော်၊ အပြတ်ကောလိုက်ရင် ဒုက္ခ”
“ညံ့ပါပေ့ကွာ၊ မင်းနာမည်ကို ဥာဏ်ကိုကိုလို့ မှည့်ဖို့မကောင်းဘူး၊ ညံ့ကိုကိုလို့ မှည့်ဖို့ကောင်းတယ်”
“အံမာ.... မင်းတို့ကတော့ အဖြစ်ရှိလို့လား၊ လုပ်မနေပါနဲ့လို့ အပြောခံရတဲ့ကောင်နဲ့၊ ဖိနပ်ပဲရမယ်ဆိုတဲ့ ကောင်တွေကများ”
“ဟ.... ငါတို့က ဒီလို အပြောခံရပေမယ့် ဆက်လက်ကြိုးစားလျက်ပဲ၊ တစ်နေ့ကျတော့ မင်းတွေ့ရမှာပေါ့ကွာ”



၇

“မိကျော်”
“ဘာလဲ”
“တို့ ပြောစရာ တစ်ခုရှိလို့”
“သူငယ်ချင်းလို ပြောမှာလား”
“မဟုတ်ဘူး”
“ဒါဖြင့် မပြောပါနဲ့”
“ပြောရမယ် မိကျော်၊ ပြောရမယ်၊ တို့ရင်ထဲမှာ....”
“ဒီမှာ ဥာဏ်ကိုကို၊ တို့ကို နောက်တစ်ခါ ဒီစကားမျိုး လုံးဝ ထပ်မပြောပါနဲ့၊ ပြောခဲ့လို့ရှိရင်တော့ သူငယ်ချင်းအဖြစ်ကပါ ရပ်စဲလိုက်ရလိမ့်မယ်၊ ဒါပါပဲ”



၈

အရောင်ပြောင်းသွားသော နှလုံးသား

လစ်တမတ်အပြာ
အက်ဆစ်မှာ ထည့်
ပကတိ နီသွားစေသည်။
လစ်တမတ်အနီ
ဗေ့စ်ရည်မှာ ထည့်
ပကတိ ပြာသွားစေသည်။
ပန်းနုရောင် နှလုံးသား
ဘာဂုဏ်များ မြောက်လို့
အစိမ်းရောင်သို့ ပြောင်းသွားတာလည်းကွယ်။

ကျွန်တော်၏ အဆွေးကဗျာများသည် ပန်းချီခန်းမ၏ နံရံကပ်စာစောင်တွင် ပါဝင်လာခဲ့သည်။ ဓာတုဗေဒကျောင်းသူလေး မိကျော်ကို ရည်ရွယ်စပ်ထားသော ဓာတုဗေဒဆိုင်ရာ ကဗျာများ။ ကျွန်တော် ဆွေးနေကြောင်းကို ပန်းချီခန်းတစ်ခန်းလုံးက သိကြပါသည်။ အို.... သူတို့တင် မဟုတ်ပါ။ ကိုအောင်ရင် လက်ဖက်ရည်ဆိုင်က တင်ဝင်းတို့၊ ဖြူဝင်းတို့လည်း သိသည်။ အအေးဆိုင်က အမေကြည်လည်း သိပါသည်။



၉

ထိုအတောအတွင်းမှာပင် ချစ်ဝင်းနှင့် အေးမြင့်တို့၏ အချစ်ကိစ္စများ ပြေလည်သွားကြပါသည်။

ချစ်ဝင်းသည် သူ့ကိုမှ ပြန်မချစ်ရင် ကျောင်းမတက်တော့ဘူး၊ အင်းလျားကန်ထဲ ခုန်ချမည်ဟု ဆိုသောကြောင့် သနားပြီး ချစ်သွားသည်ဟု ဆို၏။ အေးမြင့်ကမူ သူ့ခေါင်းတုံးဆံထောက် ဆံပင်ကို နည်းနည်းပိုရှည်ပေးပါမည် ဟူသော ကတိဖြင့် ခင်ကြည်မြင့်၏ အချစ်ကို ရသွားပါသည်။

သူတို့သည် အဝတ်အစားအသစ်များ ချုပ်ကြပါသည်။ တစ်နေ့လျှင် ရေသုံးခါလောက် ချိုးပါသည်။ ချစ်ဝင်းဆိုလျှင် ပေါင်ဒါဘူးတစ်ဘူးပင် ဝယ်လိုက်ပါသည်။ သူတို့၏ အကြောင်းများကို ကျွန်တော့်အား ပြန်ပြောကြပါသည်။
“ခင်ကြည်မြင့် လက်ကလေးက နုနုလေးကွ”
“ဟင်.. မင်းက ခုမှ လက်ကိုင်တဲ့အဆင့်လားကွ”
“ဟေ့ကောင်၊ လက်မကိုင်လို့ ခြေထောက်ကို ကိုင်ရမှာလား”
“သြော်.. အေးမြင့် အေးမြင့်၊ ဆံပင်တိုသလောက် တုံးလှသေးပါလားကွာ၊ နှုတ်ခမ်းက ဘာလုပ်ဖို့ထားတာလဲ”
“ထမင်းစားဖို့ပေါ့ကွ”
သြော်.... သူတို့မှာဖြင့် ပျော်နိုင်ကြပါပေသည်။ ကျွန်တော့်မှာတော့ဖြင့် ..။

ချစ်ဝင်းနှင့် အေးမြင့်သည် ကျွန်တော့်ကို အားမရကြပါ။
“ဥာဏ်ကြီး၊ ဆက်လုပ်ပါကွာ၊ မင်းကလည်း ပျော့ညံ့လိုက်တာ”
“တော်ပါပြီကွာ၊ ငါ့အဖြစ်နဲ့ငါ ရှိပါစေတော့”
သို့ရာတွင် ကျွန်တော်သည် စာတစ်စောင်ကို ရေးလေသည်။



၁၀

မိကျော်
နောက်ဆုံးအကြိမ် နှောင့်ယှက်တယ်လို့ သဘောထားလိုက်ပါတော့။ ဒီတစ်ခါမှ တို့လိုချင်တဲ့ အဖြေကို မရရင် နောက်ကို ဘယ်တော့မှ မနှောင့်ယှက်တော့ပါ။ မိကျော်ပြောသလို သူငယ်ချင်းအဖြစ်ကပါ ရာသက်ပန် ရပ်စဲချင် ရပ်စဲလိုက်ပါ။ သန်းခေါင်ထက်တော့ ညဥ့်မနက်နိုင်တော့ပါ။ နက်ဖြန် မိကျော်တို့ အတန်းပြီးချိန်မှာ တို့ လာစောင့်နေမယ်။ တို့ကို ချစ်တယ်ဆိုရင် အင်္ကျီအဖြူရောင် ဝတ်ခဲ့ပါ။ အဖြူရောင်ကို ကြိုဆိုနေပါ့မယ်။

ဥာဏ်

P.S. မိကျော် မကြိုက်ဘူးဆိုလို့ တို့ ဆေးလိပ်ဖြတ်လိုက်ပါပြီ။



၁၁

အခန်းအမှတ် S.17 ရှေ့က စင်္ကြအုတ်ခုံပေါ်မှာ ထိုင်စောင့်နေသည်။ S.17 သည် ဝင်ပေါက်တစ်ခုတည်းသာရှိသော သီရေတာခေါ် အခန်းကြီးဖြစ်သည်။ တစ်ပေါက်တည်းသော ဝင်ပေါက်ကို ပိတ်ထားသဖြင့် အထဲကို မမြင်ရ။ ဆရာ၏ စာသင်သံသာ ထွက်လာသည်။

စက္ကန့်တို့သည် ပြေးလွှားနေကြသည်။ တစ်နာရီခွဲ၊ အတန်းပြီးသင့်ပါပြီ၊ ဆရာသည် သင်လို့ကောင်းတုန်း။
“အစ်ကို ဒူးယားသောက်မလား”
စီးကရက်သည် ကုလားကလေး ရောက်လာသည်။ ဝယ်မည်ပြုပြီးမှ မိကျော်ကို ကတ်ိပေးထားတာ သတိရသဖြင့် မဝယ်ဖြစ်တော့။ ကုလားကလေးသည် အင်္ကျီအဖြူ ဝတ်ထားသည်။
“မင်း ဘာဖြစ်လို့ အင်္ကျီအဖြူ ဝတ်တာလဲ”
“ကျွန်တော့်မှာ ဒီအင်္ကျီတစ်ထည်ပဲ ရှိတာ၊ ဒါပဲ ဝတ်ရမှာပေါ့ဗျာ”

တစ်နာရီ မိနစ်လေးဆယ်၊ တံခါးပွင့်လာသည်။ ဆရာ ထွက်လာသည်။ ဆရာသည် တိုက်ပုံအင်္ကျီအနက်ကို ဝတ်ထားသည်။ အထဲက ရှပ်အင်္ကျီမှာ အဖြူ။

အခန်းထဲက ကျောင်းသားကျောင်းသူများ ထွက်လာကြသည်။ ကျွန်တော် မကြည့်ရဲသဖြင့် ခေါင်းငုံ့ထားရသည်။ ကျွန်တော့်ရှေ့က လူတွေ ဖြတ်သွားကြသည်။ ခြေသံများနှင့် ကျွန်တော့်ရင်ခုန်သံသည် အတူတူ။

နှစ်လက်မ ဒေါက်မြင့်ဖိနပ် အနီကလေးကို စီးထားသည်မှာ မိကျော်၏ ခြေထောက်ကလေး။ မျက်စိကို အပေါ်သို့ တဖြည်းဖြည်း တက်ကြည့်သည်။ ထဘီ အနီရောင်။ အင်္ကျီကို ကြည့်သည်။
ဟင်.... အနီ.. အနီ။
ရက်စက်လှစွာသော အနီ။

ငွေသွင်းဌာနကို ဘယ်လိုဖြတ်ခဲ့သနည်း။ သစ်ပုပ်ပင်ကြိးကို ဘယ်လို ကွေ့ရှောင်ခဲ့သနည်း။ ဝိဇ္ဇာခန်းမကို ဘယ်လို ဖြတ်ခဲ့သနည်း။ ပန်းချီခန်းမကို ဘယ်လို ရောက်ခဲ့သနည်း။



၁၂

စောင့်နေကြသူများက မေးသည်။
“ဘယ်လိုလဲဟေ့”
“အနီတဲ့ကွာ”
ကျွန်တော်သည် စားပွဲပေါ်မှာ မျက်နှာအပ်ထားလိုက်သည်။
“ဘယ်လိုဖြစ်တာလဲဆိုတာ ပြောပါဦးဟယ်”
ယဉ်ယဉ်ထွေး၏ အသံကို ကြားရသည်။ ကျွန်တော် ခေါင်းခါလိုက်သည်။
အစ်မကြီး မျိုးမြင့်ခင်က ပြောပြန်သည်။
“ဒီလောက်လည်း ဖြစ်မနေပါနဲ့ဟယ်”
“အစ်မကြီးမှာ ခံစားတတ်တဲ့ နှလုံးသား မရှိပါဘူးဗျာ”

ပန်းချီဆွဲရာတွင် ပုံစံ စံပြအဖြစ်ထားသော အရိုးခေါင်းကြီးကို ငေးကြည့်နေမိသည်။ ဒီမှာ ခင်ဗျားကော လူ့ဘဝတုန်းက အသည်းကွဲဖူးသလား။ ကျုပ်လည်း တစ်နေ့နေ့ ခင်ဗျားလို ဖြစ်မှာပဲ။ အဲဒီအခါကျရင်..
“ဟေ့.. ဟိုမှာကြည့်စမ်း”
ချစ်ဝင်း၏ အလန့်တကြားအော်သံကြောင့် ခေါင်းထောင်ကြည့်မိသည်။
ချစ်ဝင်း ညွှန်ပြရာမှာ....
အို.... အဖြူရောင်၊ ချစ်လှစွာသော.. အဖြူရောင်။

မိကျော်သည် လက်မောင်းရင်းနားက ဖောင်းဖောင်းကလေး ဖြစ်နေသော အင်္ကျီအဇြူကလေးကို ဝတ်၍ လာနေပါသည်။ ကျွန်တော် သူ့ဆီ ထ၍ပြေးသည်။



၁၃

အခန်း A.5 နားက စွယ်တော်ပင်အောက်က ခုံတန်းကလေးမှာ ထိုင်ကြသည်။ ဘာက စပြောရမှန်း မသိ။
“မိကျော်.... အဖြူရောင်၊ တို့ကို ချစ်.. ချစ်လို့”
စကားတို့သည် ကျွန်တော့်လက်ရေးများလိုပင် မညီမညာ ထွက်လာသည်။ မိကျော် ရှက်လို့ ခေါင်းငုံ့သွားသည်။
“ခုနတုန်းက အင်္ကျီအနီ ဘာဖြစ်လို့ ဝတ်တာလဲ”
“အိမ်ကထွက်လာတုန်းက နည်းနည်းချမ်းတာနဲ့ အပေါ်က ထပ်ဝတ်လာတာ”
“တို့နဲ့ တွေ့တဲ့အချိန်မှာတော့ အင်္ကျီအနီကြီးကို ချွတ်ထားဖို့ ကောင်းပါတယ်ဟာ”
“တို့လေ.... တို့.. ရှက်လို့”

ဘာဆက်ပြောရမှန်း မသိတတ်ပြန်။ ချွေးပြန်လာသည်။ ချွေးသုတ်မည်ဟု လွယ်အိတ်ထဲက လက်ကိုင်ပုဝါကို ထုတ်သည်။ ဟော.. ဘယ်အချိန်က လက်ကိုင်ပုဝါကြားထဲ ညပ်နေမှန်း မသိရသော ခပေါင်းစီးကရက် တစ်လိပ်သည် လက်ကိုင်ပုဝါနှင့်အတူ ခုန်ထွက်လာပြီး ကျွန်တော့်ပေါင်ပေါ် လာတင်နေသည်။ မိကျော်က မိသွားပါသည်။
“ဟင်.. ဟင် ဒါကဘာလဲ”
“ခပေါင်း”
“ဒါတော့ သိတာပေါ့၊ ဒါ ဘယ်သူသောက်တာလဲ”
“တင်.. တင်ဝင်း သောက်တာ၊ အဲ.. မဟုတ်ပါဘူး၊ နန္ဒသောက်တာ”
“နန္ဒ ခပေါင်း ဘယ်တော့မှ မသောက်ဘူး၊ ဒူးယားမှသောက်တာ တို့သိတယ်၊ ဟင်း.. ဆေးလိပ်ဖြတ်ပြီလေး ဘာလေးနဲ့ တို့ကို သက်သက်ညာတာပေါ့လေ”
“မ..မဟုတ်ရပါဘူးဟာ၊ နောက်ကို တကယ် မသောက်တော့ပါဘူး”

ကျွန်တော်သည် အယောင်ယောင်အမှားမှား ဖြစ်ပြီး စီးကရက်ကို လွှင့်ပစ်ရန် နောက်သို့ လှည့်ကြည့်မိသည်။ စင်္ကြအုတ်ခုံအောက်သို့ ခေါင်းနှစ်လုံး ရိပ်ခနဲ ဝင်ပုန်းလိုက်သည်ကို တွေ့ရသည်။ မောင်စံရှားနှင့် ကင်းကောင်ကြီးတို့ လာချောင်းနေကြကြောင်း ကျွန်တော် သိလိုက်ပါသည်။

သူတို့ကို ကြွားလိုက်ရဦးမည်။ မိကျော်၏ ထမင်းဘူးထဲက ထမင်းကို အားရပါးရ စားပြလိုက်မည်။ ဒီနှစ်ကောင် သွားရည်ယိုကျသွားအောင်။

မိကျော်၏ ထမင်းဘူးကို ဖွင့်လိုက်သည်။ အထဲမှာ ထမင်းတစ်ဝက်လောက်သာ ကျန်တော့သည်။ ဟင်း လုံးဝမရှိ။ မိကျော်က ခစ်ခနဲ ရယ်သည်။
“နက်ဖြန်ကျရင် တို့ ထမင်းပိုထည့်ခဲ့မယ်”

မည်သို့ပင်ဖြစ်ပါစေ၊ ထိုနေ့မှစ၍ ပန်းချီခန်းမအတွက် ထမင်းဘူးတစ်ဘူး တိုးလာခြင်းသည် “ဝမ်းမြောက်ဖွယ်သတင်း”ပင် ဖြစ်ပါသည်။ ကောင်းချီးသြဘာ ပေးကြပါကုန်။

(ရန်ကုန်တက္ကသိုလ် ပန်းချီမိသားစုသို့ အမှတ်တရ)

(ရုပ်ရှင်ပဒေသာ၊ ဖေဖော်ဝါရီ၊ ၁၉၇၈)