ဆယ့်နှစ်ကြိုးဝတ္ထုတိုများ - နေဝင်းမြင့် (အပိုင်း-၃)

 

ဝတ်လဲတော်ပုဆိုး ပိုးမျိုးငယ်ပါပါစ

(၁)

ကျုပ်တို့အမေများ ပြောဖူးသာ ပြောပါတယ်။ ဇာတ်ထဲပွဲထဲ၊ ဒါမှမဟုတ် ရပ်ထဲရွာထဲ ဓာတ်စက်ထဲ ဗျိုင်းတောင်သီချင်းများ ကြားလိုက်လို့ သီချင်းထဲက ‘စားတော်ဦး ငါးလူးငယ် ပါပါစ’ သောက်တော်အိုး မွှေးမျိုးငယ် ပါပါစ’ ‘ဝတ်လဲတော်ပုဆိုး ပိုးမျိုးငယ် ပါပါစ’ တို့ ဘာတို့များ ကြားလိုက်လို့ကတော့ “ဖွဟဲ့ … နိမိတ်မရှိနမာမရှိ မကောင်းသူ ပယ်၊ ကောင်းသူ ကယ်” ဆိုပြီး တံတွေးတစ်ချက် ပျစ်ခနဲ ထွေးပစ်လိုက်သာ တဲ့။ မင်္ဂလာမရှိတဲ့ သီချင်း နားနဲ့တောင်မကြားချင်ဘူး ဆိုတဲ့သဘော နေမှာပေါ့။

ကျုပ်တို့များတော့ သီချင်းတောင်မဟုတ်ပါဘူး၊ အကျိုးပေး မကောင်းပုံများ သင်္ချိုင်းထဲမှာကို နေရသာ။ သေတ္တာလာဝယ်ရင် ခေါင်းနဲ့ရွက်ပြီး လိုက်ပို့ရသာ။ သည်အလုပ်မျိုးကလည်း ဘုရားစူးရစေ့၊ တစ်သက်နဲ့တစ်ကိုယ် လုပ်ရလိမ့်မယ် တွက်ခဲ့သာလည်း မဟုတ်ဘူး။ ဒါပေမဲ့ ဘယ့်နှယ်လုပ်မလဲ၊ ဘဝအကြောင်းဆိုတော့ လုပ်ရတော့သာပဲ။ ပိုက်ဆံ ငွေစကြေးစကလေး မြက်မြက်စက်စက်ရသာလည်း တစ်ကြောင်းပေါ့လေ။ တခြားအလုပ် မလုပ်တတ်သာလည်း တစ်ကြောင်းပေါ့။

“ဟဲ့ ဒါဆို ညည်း ခေါင်းရွက်ဗျပ်ထိုး ဈေးကလေးနာကလေး ရောင်းပါလား” လို့တော့ မပြောနဲ့၊ ရလှ တစ်နေကုန် နေပူစပ်ခါး လျှောက်နိုင်မှ အစိတ်ပေါ့၊ သုံးဆယ်ပေါ့။ အကြွေးကလည်း ကျဦးမယ်၊ ပြီးတော့ ဘယ်မလဲ ငွေရင်း။

သည်အလုပ်က အကြွေးကျစရာလည်း မရှိဘူး။ ငွေရင်းလည်း မလိုဘူး။ မလုပ်ခင်က ငွေရနှင့်သာ။ ရှစ်ဆယ်လည်း ဟုတ်သယ်၊ တစ်ရာလည်း ဟုတ်သယ်။ ဝေးလို့များတော့ ဝေးသလောက် တောင်း၊ ပါးစပ်ထဲကဈေးဟာ အတည်ပဲ။ လူကို လိုက်လို့၊ ခရီးအဝေးကိုလိုက်လို့ ကြည့်တောင်းရသာပဲ။

ရလည်း ရသယ်။ ရသမှ နေ့တိုင်းကို ရသာ။ လူက နေ့တိုင်း သေနေတာ မဟုတ်လား။ ရပ်ကွက်ထဲနေတဲ့လူကတော့ မသိသာလှဘူးပေါ့။ မယုံရင် သင်္ချိုင်းထဲ နေကြည့်ပါလား။ တစ်နေ့တစ်နေ့ သေတဲ့လူ နည်း မှတ်လို့။

* * *

(၂)

သင်္ချိုင်းစပ် ကုက္ကိုပင်စောက်ကြီးအောက်က တဲကြီးထဲ နေလာရတဲ့ နှစ်ကိုပဲ ကြို့ထိုးနေပြီ။ ကျုပ်အထင် အနှစ်သုံးဆယ်ကျော်ရော့မယ်။

ကျုပ်အသက်လား၊ လေးဆယ်ကျော်လို့ ခြောက်နှစ်ထဲမှာ။ လင်လည်း သုံးဆက်ရှိပြီ။ တကယ်ပြောသာပါ။ ပထမဆုံးလင်က ဆုံးသွားရှာသာ။ သူဆုံးတော့ ကျုပ်က ငယ်ငယ်ရယ်။ နောက်လင်ကတော့ ကွဲကို ကွဲသာ။ ကျုပ် တစ်သက်နဲ့တစ်ကိုယ် လုပ်ရလိမ့်မယ်လို့ မတွက်ခဲ့တဲ့ သည်အလုပ်လည်း ဒင်းက ဇာတ်သွင်းခဲ့သာ။

အခုတော့ တစ်ခါတစ်ခါ ကျေးဇူးလည်းတင်ပါရဲ့၊ စိတ်လည်း နာသယ်။ ဘုရားစူး။ သေချင်းဆိုးလည်း ဘယ်ဆီရောက်နေမှန်းတောင် မသိဘူး။ ကျုပ်တို့သားအမိ သင်္ချိုင်းစပ်က တဲကြီးထဲ ထားပစ်ခဲ့ပြီး ထွက်သွားလိုက်သာ ဘယ်မှာ မြွေပွေးကိုက်နေသလဲတောင် မသိဘူး၊ တစ်ခါမှတောင် ပေါ်မလာဘူး။ ရှိလှပေါ့၊ လေးငါးနှစ်တော့။

ဒါပေမဲ့ ကိုစံမောင်က ကျုပ်တို့ကိုနှင်မထုတ်ရှာပါဘူး။ ‘မသောင်း လုပ်လက်စ ဆက်လုပ်ပေါ့’ တဲ့၊ ‘ဘယ်မှလည်း မသွားနဲ့’ တဲ့ ပြောရှာပါသယ်။ ကျုပ်ကလည်း မသွားပါဘူး။ တခြား ဘာသွားလုပ်တတ်မှာတုံး၊ ဟုတ်ဘူးလား။

ကိုစံမောင်တို့ကတော့ တတ်နိုင်သူတွေကိုး။ သူတို့လည်း သင်္ချိုင်းထဲနေသာပါပဲ။ ပိုက်ဆံရှိတော့ လေးပင်နှစ်ထပ်အိမ်ကြီးနဲ့ နေသယ်။ သေတ္တာမျိုးစုံကို လုပ်လည်းလုပ်၊ ရောင်းလည်းရောင်း ဆိုတော့ ချောင်လည်ပါသယ်။ အနီးအပါးက ကုက္ကိုပင်တွေ၊ မှို့ပင်တွေ ချုပ်ဝယ်ပြီး ပျဉ်ချပ်တွေဖြစ်အောင် ခွဲ၊ စပ်ဟပ်ပြီး သေတ္တာရိုက်၊ အတွင်းနဲ့အပြင်ကို ဝါတာဖလူးစ ခပ်တင်းတင်းဆွဲကပ်ပြီး ငွေရောင်ဖောက်ပန်းတွေ ကပ်၊ ပြီးရင် သေတ္တာတွေကို စီထပ်ထားလိုက်သာပဲ။

ဈေးကတော့ အမျိုးမျိုးပဲ။ လူမှသေပြီ ဆိုမှတော့ သည်သေတ္တာတွေက မသုံးမဖြစ်တွေ မဟုတ်လား။ ဝယ်ရသာပဲ။ ကြိုက်ဈေးလည်း ပေးရသာပဲ။ အသုဘကြီး ဖျာလိပ်နဲ့ပတ်ချလို့ကလည်း ရသာ မဟုတ်၊ ခြေမကြိုးဆွဲချလို့ကလည်း မဖြစ်၊ ဟုတ်ဘူးလား … လူကိုး … လူက သေတာတောင် အလှအပကြိုက်တာကလား။

ဝယ်သူလာပြီဆိုရင် ကိုစံမောင်က မလှမ်းမကမ်းက ကျုပ်တဲဘက် လှမ်းခေါ်တော့သာပဲ။ ကျုပ်လည်း သိတယ်၊ သေတ္တာဝယ်သူလာပြီ၊ ကိစ္စတော့ ပေါ်နေပြီ၊ ကျုပ် ရွက်ပို့ရတော့မယ် ဆိုသာ …

သည်တော့ မနက် မိုးလင်းသာနဲ့ တဲရှေ့က တံခါးလုပ်ထားတဲ့ ဂုန်နီဖျင်စ အသာ မ တင်ပြီး ဆေးလိပ်တစ်တို မီးညှိရင်း ကိုစံမောင့်အိမ်ဘက် လှမ်းမျှော်ကြည့်နေလိုက်သာပဲ။

သေတ္တာဝယ်သူတွေကလည်း ဟိုအလုံး ချလိုက်၊ သည်အလုံး ကြည့်လိုက်နဲ့ မြေကြီးထဲမြှုပ်ရမယ့်ပစ္စည်းတောင် အနာအဆာ ရွေးကြသေးသာ။ သေတ္တာတစ်လုံးတန်ဖိုးကလည်း သည်ခေတ် မသေးဘူး။ တကယ့်အနေကျပ် အသေကျပ်ကြီး။ တော်ရုံသေတ္တာတောင် ငါးရာကျော် ခြောက်ရာ တန်သယ်။ တချို့များ သင်္ဘောပုံ ခရစ်ယာန်သေတ္တာမှ ဝယ်သာ။

သူက နှစ်မျိုးရှိသယ်။ အဖြူနဲ့ အနက်။ အဖြူက အပျိုလူပျိုသေရင် သုံးသယ်၊ နက်က အိမ်ထောင်ရှင် သေမှ သုံးသယ်။ ကြားဖူးသာပါ။ တချို့ ပိုက်ဆံရှိတဲ့လူများကျတော့လည်း သင်္ဘောပုံနဲ့မှ … လှလည်း လှသာကိုး … လက်ကိုင်တွေနဲ့၊ ပန်းဖွားကြီးတွေနဲ့၊ မွေ့ရာနဲ့။ သည်မှာမို့လို့ပါ။ ကျုပ်တို့ အညာမှာများ ရိုးရိုးပါပဲ၊ သေသာကို ဟန်ချဲ့မနေပါဘူး။

ဘာပဲဖြစ်ဖြစ်လေ ဆေးလိပ်တစ်တိုနဲ့ ကိုစံမောင့်အိမ်ဘက် လှည့်မျှော်နေသာကိုက ကျုပ်အလုပ် မဟုတ်လား။ မျှော်ရသာပဲ။

လာလည်း လာသယ်၊ မနက် ခုနစ်နာရီ ရှစ်နာရီဆို ပေါက်လာသာပဲ။ ကိစ္စပေါ်ပြီ ဆိုရင် ပေါ်တဲ့နေ့ကတော့ သက်ပျောက်ဆွမ်း သွတ်ရတာ တို့၊ အိမ်အခင်းအကျင်း ပြင်ရရွှေ့ရတာ တို့ ဘာတို့နဲ့ မဝယ်ဖြစ်ကြဘူး။ ကျုပ်တို့လူမျိုး ထုံးစံကလည်း သုံးရက်၊ ငါးရက်၊ ခုနစ်ရက် ထားလေ့ရှိတော့ နောက်တစ်နေ့ ရောက်လာကြတော့သာပဲ။

ကာယကံရှင်ကတော့ လိုက်ခဲပါသယ်။ သည်ကိစ္စကျွမ်းကျင်သဲ့ လူ၊ ရပ်ကွက်ထဲ လုပ်ဖူးကိုင်ဖူးသဲ့ လူ လွှတ်လိုက်သာပဲ။ အဲသည်လူကလည်း ဝယ်ဖူးခြမ်းဖူးတော့ စကားသိပ် မပြောရပါဘူး၊ ဈေးနာပြောပြီးရင် ပြီးသွားသာပါပဲ။ သည်ကိစ္စ ဈေးမဆစ်ကောင်းဘူး ဆိုတော့ နည်းနည်းပါးပါး ညှိကြရုံပါပဲ။

ပြီးရင်တော့ ကိုစံမောင်က ဆေးလိပ်လေး တည်လို့၊ လက်ဖက်ရည်လေး တိုက်လို့ … သောက်ပြီးကြရင် ကျုပ် လှမ်းခေါ်သာပဲ။

“မသောင်း … ကိုင်း … ကိစ္စပေါ်လာလို့ တဲ့။ ကိုးရပ်ကွက် ကားဂိတ်ဆုံးက ရထားလမ်းနားမှာ။ ရွက်ခ ပြောလိုက်ဦး”

“ရှစ်ဆယ် ပါ။ ဒါက ထုံးစံပဲဥစ္စာ”

တချို့ကလည်း ဒီလောက်လေး ပြောလိုက်သာနဲ့ ဟ … ရွက်ခက ရှစ်ဆယ်တောင်လား၊ မဟုတ်သေးပါဘူး ဆိုပြီး တုံးပေကပ်သတ် လုပ်ချင်ကြတာလည်း ရှိရဲ့။ တချို့ကလည်း လူမှ သေပြီ ဆိုမှတော့ မဆစ်တော့ပါဘူး၊ ရော့ … အင့် … ပဲ။

ကျုပ်က ကိုစံမောင့် အားနာလို့ပါ၊ ပြောလိုက်ချင်သာ။ ဈေးများရင် တော်တို့ရွက်ကြည့်ပါလား လို့။ ဟုတ်သယ်လေ … ကားငှားကြည့်ပါလား လို့။ ကျုပ်သားတွေပြောသလို ဆိုရင် ပြာသွားမယ် …

တော်ရုံကားကလည်း မလိုက်ပါဘူး။ လိုက်ရင်လည်း ရာကျော်ပဲ။ သူတို့ကလည်း ဒါကြီးတင်ပြီးရင် ပရိတ်ရေ ပက်ရ၊ အမွှေးနံ့သာ ဖျန်းရ၊ ခေါင်းလျှော်ရည်နဲ့ တစ်ကားလုံး ဆေးရနဲ့ သိပ်သက်သာပုံ မရဘူး။

နီးရင်တော့ ဆိုက်ကားတွေက လိုက်ပို့ပါသယ်။ လူစီးဆိုက်ကားတွေကလည်း လိုက်ခဲသယ်။ ရေခဲဆိုက်ကား တို့၊ ပက်လက်ခုံဆိုက်ကားတို့မှ လိုက်သာပါ။ လိုက်ရင်လည်း လျှော့ယူဖို့ စိတ်တောင်မကူးဘူး။

ကျုပ်ရွက်ရသာကလည်း တကယ်တော့ သက်သာတယ် မထင်နဲ့။ တော်တို့ မရွက်ဖူးလို့ ရွက်ကြည့်စေချင်သယ်။

ထုံးစံအတိုင်းဆိုလို့ကတော့ သေတ္တာကို မှောက်ပြီး စ,ရွက်ကတည်းက လမ်းမှာချနားလို့ရတာ မဟုတ်ဘူး။ သေတ္တာအဖုံးကလည်း သေတ္တာပေါ် တင်ချင်တင်၊ မတင်ရင် ချိုင်းကြားညှပ်၊ လက်တစ်ဖက်က ပိုက်ပြီး ဇက်တောင့်တောင့်နဲ့ သွားရသာ တချို့အိမ်များ လေးငါးမိုင်လောက် ဝေးသယ်။ သွားရသာပဲ။

ရေဆာလို့ ချသောက်လို့လည်း မရဘူး။ ဒီဟာကြီးနဲ့ ဘယ်အိမ်က ရေတိုက်မှာလဲ။ ဇက်နာလို့လည်း ချနားလို့ မရဘူး။ နေပူလို့ သူများဈေးဆိုင်ရိပ် ခိုဖို့များ စိတ်တောင်မကူးနဲ့၊ ပါးရိုက်လိမ့်မယ်။ အယူကြီးတဲ့ ဒေသများ သေတ္တာဖုံးကို ဘယ်-ညာ ပြောင်းလို့တောင် မရချင်ဘူး။ သေတ္တာကြီးနဲ့နားရင် ရွာနာသယ် လို့ အယူရှိသာကိုး။

သွားရင်းက နောက်လည်းမလှည့်ရဘူး တဲ့။ သွားရင်းများ သူများကို တိုက်မိလို့လည်း မရဘူး။ သူများကလည်း ကိုယ့်ကို မတိုက်ရဲပါဘူး။ ကားတွေဆိုသာ ဘေးက ရှောင်မောင်းသယ်၊ ထိသွားမှာ စိုးလို့။ ကျက်သရေ မရှိလို့ ပေါ့လေ။

နောက်တစ်ခုက လိုက်ပို့ရမယ့် ရပ်ကွက်ရောက်လို့ သေတ္တာကြီး ထမ်းပြီး ဟိုအိမ်မေး သည်အိမ်မေး လို့လည်း ရသာမဟုတ်ဘူး။ ဒီတော့ ဝယ်စကတည်းက သေချာချိန်းထားရသယ်။ ကာယကံရှင်တစ်ယောက်က ထွက်ကြိုနှင့်ရသယ်။

ကာယကံရှင်က စောင့်ခေါ်သွားရင်တောင်မှ လမ်းကြိုလမ်းကြား၊ အိမ်ကြိုအိမ်ကြားက ခေါ်သွားလို့ မရဘူး။ လမ်းမက ဖြောင့်ဖြောင့် သွားရသာ။

ကာယကံရှင်အိမ် ရောက်ရင်လည်း ‘လေးလိုက်တာ’ လို့ မညည်းရဘူး ဆိုသာ ရှိသေးတယ်။ တချို့က အဲသလိုပြောရင် အားကြီး စိတ်ဆိုးသယ်။ ကျုပ်ကတော့ ရိုးရိုးပြောမိသာပါ၊ အဝေးကြီးက ရွက်လာရသာ ဇက်တွေဆိုသာ ပူထူနေသာမဟုတ်လား။

သေတ္တာထဲ ခေါင်းထည့်ရွက်သာ လေမတိုးဘာမတိုးနဲ့ ချွေးဆိုသာ ပြုတ်ထားတဲ့အတိုင်းပဲ။ သေတ္တာအဖုံးက တစ်ဖက် ဆိုတော့ စဉ်းစားသာကြည့်။ အဲသာကို လေးသယ် မပြောရဘူး တဲ့။

အကောင်းဆုံးက ဘာမှမပြောသာပါပဲ။ ကနားဖျင်းရိပ် ချပြီး ထိုင်နေလိုက်သာပဲ။ ရွက်ခပိုက်ဆံက ချေပြီးသားပါ။ ဒါပေမဲ့ လမ်းစရိတ်လေး၊ မုန့်ဖိုးလေး ပေးပါဦး ဆိုပြီး ပေထိုင်နေလိုက်ရင် ကာယကံရှင်က ထုတ်ပေးသာပဲ။

တချို့ကလည်း ‘ပေးပြီးသားပဲဗျ’ ဘာညာ နဲ့ မဆီမဆိုင် ဝင်ဟောက်ချင်သယ်။

ဘာပဲဖြစ်ဖြစ်လေ သည်လို မျက်နှာပြောင်ပြောင်နဲ့ တောင်းရသာပဲ။ ဘယ့်နှယ်လုပ်မလဲ၊ ရရင်လည်း အမြတ်၊ မရရင်လည်း ပြန်ရုံပေါ့။ မသကာ ဆေးလိပ်ခွက်ထဲက ဆေးလိပ် လေးငါးလိပ် နှိုက်ပြီး ထလာလိုက်ရင်လည်း တစ်ညစာတော့ ပြီးသွားသာပဲ။

* * *

(၃)

ကျုပ်ယောက်ျား နောက်ဆုံးကောင်အကြောင်း ကျုပ် မပြောရသေးဘူး။ နာမည်က မောင်ငယ် တဲ့။

တကယ်လည်း ကျုပ်မောင် အငယ်လောက် ရှိမှာပါ။ ကျုပ်ထက် တော်တော့်ကို ငယ်သယ်။ ဒါကြောင့်လည်း သေခြင်းဆိုးက ဆိုးချင်သာ ထင်ပါတယ်။

ယူစကတော့ သွားခေါခေါနဲ့ မျက်နှာ တင်းတိပ်တွေ ကွက်ချင်းထိုးပြီး ခါးတစ်ဖက် လိမ်၊ ခြေတစ်ဖက် ဆွဲနေသဲ့ ကျုပ်ကို သူ့ထက် အသက်ကြီးတဲ့ကြားက ယူထားသာကိုပဲ ကျေးဇူးတင်ရသေးသယ် အောက်မေ့သာ။ ဘယ်ဟုတ်မှာတုံး … မသာက အရက်သောက်ချင်သာရော၊ ဖဲကလေး ပွတ်ချင်သာရော၊ မိန်းမရွှင် နှိုက်ချင်သာရော။

မနက်မိုးလင်းရင် အရက်နဲ့ အရင် မျက်နှာသစ်သာ။ အရက်နဲ့ ပလုတ်ကျင်းသာ။ မျက်ပေါက်တွေဆိုသာ ဘယ်တော့မှမပွင့်ဘူး။ အထက်မျက်ခမ်းနဲ့ အောက်မျက်ခမ်းများ တွဲချုပ်ထားသာကမှ ချုပ်ရိုးပေါ်နေနိုင်သေးသယ်။ ရေကတော့ သူလည်း မချိုးဘူး၊ ကျုပ်လည်း မချိုးဘူး။

သင်္ချိုင်းနဲ့ခပ်ဝေးဝေးက ရေဘုံပိုင်မှာ သောက်ရေတော့ ရသယ်၊ ရေချိုးခွင့် မပေးဘူး။ ချိုးရင် ရေကဲ့ချိုး ပဲ။ အံမာ … သူက ကျုပ်ကို ရိုက်သေးနှက်သေးသာ။ ကျုပ်ကလေးတွေကိုလည်း နှိပ်စက်ချင်သေးသာ။ ဘာမှတ်လို့လဲ ဒင်းက … ဒင်းကိုယူတုန်းက ထမင်းတောင် နပ်မှန်သဲ့ကောင် မဟုတ်ဘူး။ မြေကျင်းအငှားတူးသဲ့ကောင်။ အရက်ပုလင်း ခါးထိုးပြီး နေပူကြီးထဲ ကျင်းအငှားတူးသဲ့ကောင်။ သင်္ချိုင်းထဲ နေ့တိုင်းတွေ့တော့လည်း နီးစပ်သွားသယ်ပြောပါတော့။ မရိုသေ့စကား မယူခင်က ဒင်းက ကျုပ်ကို အချောင်နှိုက်ချင်သာ။ ယူဖို့များ စိတ်ကူးခဲ့တာ မဟုတ်ဘူး။ ချဉ်ချဉ်တူးတူး သဘော ထားသာ။ ကျုပ်ကလည်း လင်နှစ်ယောက် ရခဲ့ဖူးသာပဲ၊ သိသာပေါ့။ ကျုပ်ကတော့ သံယောဇဉ်တွေဖြစ်လို့။

ကျုပ်တဲရိပ်ကလေး ခိုလိုက်၊ ကျုပ်သားလေး အရက် ဝယ်ခိုင်းလိုက်၊ ရတဲ့ပိုက်ဆံလေး ကျုပ်အပ်ထားလိုက်နဲ့ နေရင်းက ညားသာ။ ညားခါမှ ပိုဆိုးလာသယ် ပြောပါတော့။ ဘာမှကို မလုပ်တော့သာ။ မြေကျင်းတောင် မတူးတော့ဘူး။ ထိုင်စား ပဲ။ ကျုပ်သေတ္တာရွက်လို့ ရသာလေး ထိုင်စားရင်း အိမ်မှာ ဘုရင်လုပ်တော့သာ။ ကြာရင် ကြာပြန်ပြီ၊ ထမင်းဆာရင် ဆာပြန်ပြီ၊ ပိုက်ဆံမပေးရင် မပေးလို့၊ နည်းရင် နည်းလို့၊ မူးမူးနဲ့ နားအုံနားရင်း ထရိုက်ချင် ရိုက်သာ။

ကျုပ်ကတော့ ယူမိပြီကိုး၊ လင်သားကိုး။ ကျုပ်တို့မိန်းမတွေ တစ်သက်လုံး သည်လို အရိုက်အနှက်ခံလာရသာပဲ၊ ဆန်း မှတ်လို့။ စိတ်တော့ နာသယ်၊ ဘုရားစူး … ညာမပြောဘူး။ အခုတော့ ကျုပ်က အသက်ကလေးကလည်း ရလာပြီ။ မောလည်း မောသယ်။ ဒင်းကတော့ နေ့မူး ညမူးပဲ။ မနက်လည်း နေမြင့်မှ ထသယ်။ သည်ကြားထဲ မနက် မနက် အမူးနာဖြေဖို့ တဲ့၊ အရက်တစ်ပိုင်းလောက်က ဝယ်ထားရသေးသာကလား။ စိတ်ပဲ ကုန်သယ်၊ တကယ် …

လင်ရယ်မယားရယ် လို့ တစ်အောင့်တစ်နား စကားပြောရသယ်၊ စိတ်ချမ်းသာရသယ် လို့ တစ်ခါမှ မရှိသာ။

လင်ကံများ မကောင်းချက် ပြောသာပါ။ တစ်ခါတစ်ခါ သေသွားတဲ့အမေ့ကို သတိရသယ်။ သည်အလုပ်က ရှက်စရာလည်း မဟုတ်ပါဘူး၊ ကောင်းရောင်းကောင်းဝယ်ပဲ။ စာမတတ် ပေမတတ်နဲ့ သည်လောက်ပိုက်ဆံရသာ လုပ်ပျော်သဲ့ အလုပ်ပါ။

ဒါပေမဲ့ ဒါက ဒါပဲ၊ အမေများ သိရင် ရင်ကျိုးမှာပဲ။ အမေတို့က ‘စားတော်ဦး ငါးလူးငယ် ပါပါစ’ တောင် မကြားချင်ဘူး မဟုတ်လား။ ဘယ့်နှယ်လုပ်မတုံး၊ အညာကဆင်းလာကတည်းက ကိုယ့်ဘဝ ကိုယ့်အကြောင်း၊ ကိုယ့်အထုံ ကိုယ့်ရေစက် သင်္ချိုင်းထဲနေရသာ ဘယ့်နှယ်မှ မတတ်နိုင်ဘူး။ လူပြုပြင်လို့ ရ မှတ်လို့။

* * *

(၄)

အဲသည့်မနက်က ကိုစံမောင်သေတ္တာဆိုင်ရှေ့ လူသုံးလေးဦး တွေ့ကတည်းက ကျုပ်ရွက်ရတော့မယ်ဆိုတာ သိသားပဲ။ ရွက်လည်း ရွက်ရသာပါပဲ။ ခုနစ်ဆယ်နဲ့ တည့်သယ်။ သိပ်မဝေးဘဲ ခုနစ်ဆယ်ရသာ။

ဘာစိတ်ကူးပေါက်သယ် မသိဘူး၊ အိမ်ကမသာ အဲသည်မနက် အစောကြီး နိုးနေသယ်။ သူပါ လိုက်မယ် တဲ့။ လိုက် ပေါ့။ တစ်ခါမှတော့ မလိုက်ဖူးပါဘူး။ အဲသည်ညက အရက်လည်း ဝယ်မထားတော့ ကျုပ်နောက် လိုက်ရင်း အရက်ဝယ်သောက်ချင်သာလည်း ပါမှာပေါ့။

ထင်တဲ့အတိုင်းပဲ၊ သေတ္တာရွက်ဖို့တော့ သေတ္တာအဖုံးတောင် မကိုင်ချင်ဘူး၊ ရှက်လို့ တဲ့။ သေခြင်းဆိုးက မြေကျင်းတူးလာတဲ့ဘဝ မေ့သာ ပြောပါတယ်။ ဖောသွပ်ဖောရောင် မျက်နှာနဲ့ ခပ်လှမ်းလှမ်းက ခွာလိုက်ရင်း အရက်ဖိုးတစ်ဆယ် တောင်းတော့ ကျုပ်လည်း မောမောနဲ့ ပြောပစ်လိုက်သယ်။

“မောင်ငယ်ရယ် … နင့်ဟာက မလွန်ဘူးလား။ သက်သက်လိုက်လာပြီး ဒုက္ခပေးတာလား။ မိုးတောင် မလင်းသေးဘူး ကတဲ … ဒီအရေကို ဝမ်းကျချင်နေလိုက်သာ လွန်သယ်”

ဟုတ်ပါ့တော်၊ စိတ်ထဲရှိသာ ပြောပစ်လိုက်ရမှ။ သင်းကတော့ မျက်ထောင့်နီကြီးနဲ့ ကျုပ်ကို ရန်လုပ်ချင်သေးတဲ့ပုံ။ နေပူထဲလုပ်ရလို့ ကျပ်ခိုးစွဲနေတဲ့ အသားနဲ့၊ သွားခေါခေါ၊ ခါးစောင်းစောင်း၊ အသက်ကြီးကြီး မိန်းမကို သူ့မယားထင်မှာလည်း စိုးသယ်နဲ့ တူပါရဲ့။

ကျုပ်ကလည်း ခေါင်း ထည့် ရွက်ထားတဲ့ကြားကပဲ တစ်လမ်းလုံး မေတ္တာပို့သယ်။ သေတ္တာဖုံးကလည်း တစ်ဖက်က ချိုင်းကြားညှပ်ပြီး ပိုက်လာရတော့ ဒေါသတွေလည်း ထွက် ပေါ့လေ။ မသာက အကြင်နာ တစ်စက်မှမရှိသာများ ကမ်းကုန်ရော။

ပို့ရမယ့်အိမ်ရောက်လို့ ကနားဖျင်းအောက်ရောက်တော့ လူတွေဆိုသာ မနည်းဘူး။ ပိုက်ဆံကလည်း ဘာရှိသလဲ မပြောနဲ့၊ သေတ္တာမှာရေးထားတဲ့ နာမည်နဲ့ အသက်က ငယ်ငယ်ရယ်။ မီးတွေဆင်တဲ့လူက ဆင်လို့။ အဖိုးတန်ခုံတွေချတဲ့လူက ချလို့။ လုပ်တဲ့ကိုင်တဲ့လူက လုပ်လို့ကိုင်လို့။

တော်တော့်ကိုငိုထားတဲ့ မိန်းမငယ်ကလေးကလည်း ငိုတာတောင် လှနေသေးတာ မပြောနဲ့တော့။ အသားကလေးများဆိုတာ ဝင်းမွတ်လို့။ သြော် … ငယ်ငယ်ရွယ်ရွယ်နဲ့ လင်ကံဆိုးရှာတဲ့ မိန်းကလေးနှယ် လို့တောင် အောက်မေ့လိုက်သေးသယ်။

အတူတူပါပဲ၊ ကျုပ်နဲ့ဘာထူးလို့လဲ။ ကျုပ်လင်ကလည်း အသက်ရှင်နေသာပဲ ရှိသာပါ၊ သေသာနဲ့ ဘာမှမထူးပါဘူး။

“ရေလေးတစ်ပေါက်လောက် တိုက်ကြပါ”

မောလိုက်သာလည်း ဟပ်ထိုးလိုက်နေပြီ။

အဲသည်မိန်းကလေးကပဲ ရေယူပေးသယ်။ ပုလင်းထဲထည့်ထားသဲ့ ရေပါ။ ပုလင်းကရေသီးတွေ ကလည်း အေးလို့။

အေးလိုက်တဲ့ ရေ … အေးမြပြီး ချိုနေသယ်တောင် အောက်မေ့သယ်။ သြော် … ပိုက်ဆံရှိတဲ့သူများ ရေတောင် အေးအောင်လုပ် သောက်ကြသာ ပြောပါသယ်။ လမ်းစရိတ်တောင်းတော့ လေးဆယ့်ငါးကျပ်တန် တစ်ရွက် ထုတ်ပေးသယ်။

အဲသည်နေ့ပဲ နောက်တစ်ခေါက် သေတ္တာပို့တော့ နေပြင်းလှပြီ။ ဒင်းက ဘာစိတ်ကူးရသယ် မသိဘူး၊ သည်တစ်ခေါက်လည်း လိုက်မယ် တဲ့။

သည်တစ်ခါပို့သဲ့အိမ်ကတော့ ဆင်းရဲလိုက်တာ တာတေကို လံလို့။ ကနားဖျင်းလည်း မရှိဘူး၊ လူလည်း မရှိဘူး။ ကျုပ်ရွက်လာရတဲ့ သေတ္တာကြမ်းကို ကြည့်ကတည်းက အခြေအနေကို ကျုပ်က သိပြီးသားပါ။ ကာယကံရှင်ယောက်ျားကလည်း မူးနေလိုက်တာ လူမှန်းမသိဘူး။ ပါးစပ်ကလည်း အတင်ရေ … အတင်ရေ … လို့ ကျုံးကျုံးအော်နေတာက လွဲရင် ကူညီမယ့်လူလည်း မရှိဘူး။ အတင် ဆိုတာ သေသွားသဲ့ သူ့မိန်းမ နာမည်နဲ့ တူပါရဲ့။

လမ်းစရိတ်ဆိုတာလည်း ဝေးရော၊ ဘာဆေးလိပ်၊ ဘာကွာစေ့မှလည်း မရှိပါဘူး။ ကျုပ်အဖို့ကတော့ မဆန်းပါဘူး။ မြင်နေကျပဲ၊ ဖြစ်နေကျပဲ။ မောင်ငယ်ကတော့ ဆန်းနေသလား မပြောတတ်ဘူး။ စကားလည်း မပြောဘူး၊ လမ်းမှာတော့ ပိုက်ဆံ ငါးကျပ် ငါးကျပ် နှစ်ခါ တောင်းပြီး အရက်တော့ ဝင်သောက်သယ်။ ဒါပဲ။ ချိုသည်လည်း မပြောဘူး၊ ခါးသည်လည်း မပြောဘူး။

* * *

(၅)

ကြားသားမိုးကြိုး … ဘာတွေတွေးပြီး သည်စကားပြောမှန်းလည်း ကျုပ် မသိပါဘူး။ ကျုပ်နားလည်း ကျုပ် မယုံပါဘူး။ အဲသည်ညက ဒင်းပြောသာ ပြောပါသယ်။ မူးတော့ မူးနေသာပေါ့လေ။ ဒါပေမဲ့ ညားကတည်းက တစ်ခါမှ အဲသလိုမပြောဖူးဘူး။ နေပါဦး … ပြောသာ … ဘာတဲ့ …

“ကျုပ် စဉ်းစားမိတယ်။ ပိုက်ဆံရှိတဲ့လူလည်း သေတာပဲ၊ ဆင်းရဲတဲ့လူလည်း သေတာပဲ။ သေမှငိုနေလည်း အလကားပဲ။ လင်နဲ့မယား အသက်ရှင်ရတုန်း ချစ်ကြဖို့ လိုတာပဲ … ” တဲ့။

မောင်ငယ်က ဒါလောက်ပဲ ပြောသာပါ။ ဒါပေမဲ့ ကျုပ် အဲသည်ညက တစ်ညလုံး အိပ်မပျော်ဘူး။ သိပ်တော့လည်း မယုံပါဘူး၊ ဒင်း သောက်ကောင်းအောင် ပြောသာပဲ လို့လည်း တွက်ပါသယ်။ အဲသည်ညက တန်းစီအိပ်နေသဲ့ ကျုပ်ကလေးတွေကို ကြည့်ရင်းက အရင်ယောက်ျားတွေကိုလည်း အောက်မေ့မိရဲ့။ ဘာပဲဖြစ်ဖြစ် ကျုပ်ချက်ကျွေးသာ စား၊ ကျုပ်တဲထဲမှာ နေ၊ ပြီးရင် အရက်မှန်မှန် ဝယ်ပေးနေသဲ့ ရက်တွေထဲမှာ မောင်ငယ် သည်စကားမျိုး တစ်ခါမှမပြောဖူးဘူး။ အောင်မယ် … ဟုတ်တော့လည်း ဟုတ်သား။ မနက်မိုးလင်းလို့ ကိုစံမောင်တို့အိမ်ရှေ့ သေတ္တာဝယ်သူတွေလာတော့ ကျုပ်က နိုးနေနှင့်ပါပြီ။ မောင်ငယ်ကလည်း နိုးလို့ တော်ရေ့ … ပြုံးပြုံးကြီး … သိလား။

အဲသည်နေ့က သေတ္တာရွက်တော့ နေပူပြင်းပြင်းထဲမှာ ကျုပ်က သေတ္တာရွက်လို့။ ကျုပ်ရှေ့က မောင်ငယ်။ သေတ္တာအဖုံးပျဉ် ချိုင်းကြားညှပ် လိုက်လို့။ ငိုက်စိုက် ငိုက်စိုက်နဲ့။ ဖောသွပ်ဖောရောင်နဲ့၊ ဖိနပ်လည်း မပါဘူး။ ကျုပ်ရင်ထဲမတော့ တလှပ်လှပ်နဲ့။ မောလို့ မဟုတ်ပါဘူး၊ ဘာရယ်လည်း မသိပါဘူး။

ဒင်းကို … အဲလေ … မောင်ငယ်ကို အရက်ဖိုးပေးရဦးမယ်လို့လည်း တွက်သယ်။ ခမျာ … မောနေရှာပြီထင်ပါရဲ့ ပေါ့။

* * * * *

လမ်းကျဉ်းကလေး

(၁)

အစတုန်းကတော့ သည်နေရာကလေးမှာ လမ်းကျဉ်းကလေး မရှိခဲ့ဖူးပါ။

* * *

(၂)

အရင်က သည်နေရာလေးကို အာရ်အီးတီ ဂိတ်လို့ ခေါ်ခဲ့ကြဖူးသည်။ ‘ရန်ကုန် လျှပ်စစ်ဓာတ်ရထား ကုမ္ပဏီ လီမိတက်’ ဟု အဓိပ္ပာယ်ရလိမ့်မည် ထင်ပါသည်။ သို့သော် ဘယ်သူမှ အဲသလို ရှည်ရှည်ဝေးဝေး တခမ်းတနား မခေါ်ခဲ့ကြ။ အာရ်အီးတီ လို့ ပီပီသသ ခေါ်ချင်ခေါ်မည်၊ အားဒီးတီ လို့ ပေါ့ပေါ့ပါးပါး ခေါ်ချင်ခေါ်မည်။ သည်လိုနှင့် သည်နေရာကို အာရ်အီးတီ ဂိတ် ရယ်လို့ တွင်လာခဲ့သည်။

တကယ်ကတော့ အရင်က သည်နေရာမှာ ဓာတ်ရထား ရောက်ခဲ့သည် မဟုတ်။ အာရ်အီးတီ ကုမ္ပဏီပိုင် ဘတ်စ်ကားတွေ ပြေးဆွဲလို့ ခေါ်ကြတာပဲ ဖြစ်သည်။

သည့်နောက်တော့ ပုစွန်တံဆိပ် တို့၊ နဂါးတံဆိပ် တို့လို အကောင်ဗလောင်တွေကို ဂုဏ်ပြုခေါ်ဝေါ်ခဲ့သည့် ဘတ်စ်ကားတွေ ပေါ်လာသည်။ အခုတော့ ဟီးနိုးကြီး၊ ဟီးနိုးလတ်၊ နှစ်စီးတွဲဟီးနိုး၊ ရေးနိုး(တချို့က တစ်နေရးနိုး လို့ ခေါ်သည်) စသည့် ခေတ်မီကားတွေ ပြေးဆွဲသည်။ ဒတ်ဆန်း၊ ဟိုင်းလတ် စသည့် သင်္ဘောသားကားကလေးတွေလည်း ဆွဲသည်။ ဒါပေမဲ့ သည်ဂိတ်၊ သည်လမ်းဆုံက နာမည်တော့ ပြောင်းသွားခဲ့သည်။ အရင်က အာရ်အီးတီ ဂိတ်၊ အခု ဟီးနိုးဂိတ်။ အရင်က အင်္ဂလိပ်၊ အခု ဂျပန်။

* * *

(၃)

လမ်းဆုံ ဆိုမှတော့ အနည်းဆုံးက လမ်းနှစ်မြွှာရှိရတော့မည်။ သည်လမ်းဆုံမှာက လမ်းလေးမြွှာရှိသည်။

တစ်လမ်းက အနောက်ဘက်သို့ ခွဲထွက်သည်။ အင်းစိန်ဈေးကိုဖြတ်၍ အင်းစိန်ကမ်းနားကို သွားသည့်လမ်း ဖြစ်သည်။ လှိုင်မြစ် ကမ်းပါးမှာ လမ်းဆုံးသည်။ တစ်လမ်းကျတော့ အင်းစိန်ဘူတာရုံဘက်ကို ကွေ့ချိုးဝင်ရောက်သွားကာ တစ်နေရာမှာ ပြည်လမ်းမကြီးနှင့် သွားဆုံသည်။ မြောက်ဘက်စူးစူးကို ခွဲထွက်သွားသော လမ်းကတော့ ပြည်၊ မန္တလေး စသည့် မြန်မာပြည်တစ်နံတစ်လျားကို သွားရာလမ်း ဖြစ်သည်။ နောက်တစ်လမ်းကတော့ ရန်ကုန်ဘက်ကို။

သည်လမ်းဆုံက နယ်ကလာသည့်ကားများအဖို့ ရန်ကုန်မြို့ဝင်ဖြစ်၍ အမြဲတမ်း စည်ကားနေတတ်သည်။ နောက်တစ်ခုက အင်းစိန်ဈေးဘက်သို့ ကွေ့ချိုးသော (ကမ်းနားမှ ဆုံးသော) လမ်း အဝင်မှာ မီးရထားလမ်းကူး ရှိနေခြင်းကြောင့် ဖြစ်သည်။ တစ်ခါတစ်ခါ ရထားက ဘယ်ဆီနေမှန်း မသိသေး၊ ရထားတံခါးက ကြာမြင့်စွာ ပိတ်ထားတတ်သည်။ ဒါကိုလည်း အပြစ်ဆို၍ မရ။ ကြီးမားသော ထိခိုက်မှုမျိုး မဖြစ်အောင် သည်လိုလုပ်ရတာ ဖြစ်မည်။

သို့သော် ရထားတံခါးပိတ်လိုက်တာနှင့် စက္ကန့်မလပ် တိုးဝှေ့မောင်းနှင်တတ်သော ကားတွေက အတောင့်လိုက် ပိတ်ဆို့နေတတ်ကာ ကားတွေ လူတွေ ယောက်ယက်ခတ်သွားတတ်သည်။ စိတ်မရှည်နိုင်သူတွေက ကားပေါ်မှ ဆင်းကာ ဈေးကို လမ်းလျှောက်ကြသည်။ ထိုရထားလမ်း ပိတ်ဆို့မှုကြောင့် ကျန်လမ်းသုံးသွယ်ကို အသုံးပြုရသည့် ကားတွေကပါ အထိုက်အသင့် ပိတ်ဆို့ကျပ်ညပ်ကာ ဟွန်းသံ တညံညံ၊ စက်သံ တဒီးဒီး၊ မီးခိုးတွေ တလုံးလုံး ဖြစ်လာရတော့သည်။

ပြီးတော့ အင်းစိန်မြောက်ပိုင်းမှာ စက်ရုံတွေ တော်တော်များများ ရှိသည်။ ကျောင်းတွေ ရှိသည်။ ရွာပေါင်းများစွာ ရှိသည်။ သည်လူတွေကလည်း သည်လမ်းဆုံကိုပဲ ဖြတ်ရသည်။ ဘူတာရုံနှင့် နီးသဖြင့်လည်း ရထားဆင်းသူတွေ ရှိသည်။ ဘူတာဈေး (ကုန်စိမ်းဈေး) နှင့် အင်းစိန်ဈေးကြီးက ဈေးပြန်တွေ ရှိသည်။

ဆိုလိုရင်းက သည်လမ်းဆုံမှာ လူတွေ အမြဲတမ်း ပျားတူအုံတုတ်ထိုး ဖြစ်နေတတ်တာပဲ ဖြစ်သည်။ ထို့ကြောင့်လည်း သည်နေရာကလေးမှာ ကက်ဆက်သီချင်းသံ တညံညံဖြင့် ဧည့်ကြိုတတ်သော ဈေးဆိုင်ကလေးတွေ လိုအပ်စွာ ပေါ်လာရခြင်း ဖြစ်သည်။

* * *

(၄)

လူစည်ကားလာရခြင်းကို မှီ၍ နှစ် ခပ်ဝေးဝေးတုန်းက သည်နေရာမှာ ဈေးသစ်တစ်ခု ပေါ်လာခဲ့ရသည်။ ‘ဟီးနိုးဂိတ် လေဟာပြင် ဈေးသစ်’ (ဈေးထိပ်ကဆိုင်းဘုတ်အရ) ဟု ခေါ်သည်။ သည်ဈေးကိုလည်း အဲသည်လို တဖွဲ့တနွဲ့ မခေါ်ကြပြန်။ ‘ဟီးနိုးဂိတ်ဈေး’ လို့ပဲ လွယ်လွယ်ခေါ်ကြသည်။

ဈေး ဆိုလို့ ဈေးအင်္ဂါရပ်နှင့် လျော်ညီစွာ ကုန်ပစ္စည်းမျိုးစုံ၊ အထည်အလိပ်၊ ရွှေငွေရတနာ၊ မီးဖိုချောင်သုံးပစ္စည်းများ ရနိုင်သည့် ဈေးမျိုးတော့ မဟုတ်။ အဓိကက စားကုန်တွေသာ များသည်။ လက်ဖက်ရည်ဆိုင် လေးငါးဆိုင်၊ စာအုပ်ဟောင်းဆိုင် နှစ်ဆိုင်၊ စာအုပ်သစ်ဆိုင် တစ်ဆိုင်၊ အိမ်ဆောက်ပစ္စည်းဆိုင်ကလေး တချို့၊ ပြီးတော့ ထမင်းဆိုင်၊ ခေါက်ဆွဲဆိုင်၊ မိတ္တူကူးဆိုင်၊ မျက်နှာစာတန်းမှာတော့ ကွမ်းယာဆိုင်၊ ဆေးမျိုးစုံဆိုင်၊ မုန့်မျိုးစုံဆိုင်တွေ ရှိသည်။

ရန်ကုန်ဘက်က ပြန်လာသူတွေရော၊ ရန်ကုန်ဘက်ကို သွားမည့်သူတွေပါ သည်ဈေးရုံထဲက ဆိုင်တစ်ဆိုင်မှာ ခေတ္တလောက်တော့ နားနေနိုင်သည်။ ဝါသနာပါသူတွေက တစ်ခွက်တစ်ဖလား ဝင်မော့နိုင်သည်။ စာအုပ်ဝါသနာပါသူတို့ကမူ စာအုပ်သစ်တွေကို တငေးတမော ကြည့်နိုင်သည်။ စာအုပ်ဟောင်းဆိုင်တွေမှာ နှစ်သက်ရာ ရှာဖွေနိုင်သည်။ စကားပြောဝါသနာပါသူတွေကလည်း သည်နေရာကလေးမှာ ဆုံကြ၊ ပြောကြ၊ ငြင်းကြခုံကြ၊ တိုးသဲ့ကြ၊ ကျယ်လောင်ကြ။

သည်ဈေးရုံ ကလေးမှာ စိတ်ညစ်စရာ သုံးခု ရှိသည်။
တစ်ခုက ကျယ်လောင်လွန်းသော ဂီတသံ ဖြစ်သည်။ တစ်ဆိုင်နှင့်တစ်ဆိုင် အပြိုင်အဆိုင် ဖွင့်ကြတုန်းက ပိုဆိုးသည်။ ဗီရိုသေးသေး တစ်လုံးစာလောက် ရှိတတ်သော Sound Box လေးငါးလုံး တစ်ပြိုင်နက် ဖွင့်တတ်ကြခြင်း ဖြစ်သည်။

နောက်တစ်ခု … ဈေးကို ပတ်ပတ်လည် ပိတ်ဆို့ကာရံထားသဖြင့် မွန်းကျပ်ပူလောင်နေတတ်ခြင်း ဖြစ်သည်။

အတန်ငယ် ညစ်ပတ်သော ရေအိမ် တစ်တွဲကလည်း မနီးမဝေးမှာ ရှိနေသေးသည်။

စိတ်နှလုံး အပန်းဖြေဖို့ ဝင်လာသူတိုင်း သည်သုံးမျိုးကို ရရှိနေတတ်သည်။

ကျွန်တော်ကတော့ ဈေးရုံထဲက ကိုတင်ဝင်း၏ စာအုပ်ဟောင်းဆိုင်ကလေးကို ရောက်နေကျဖြစ်ရာ သည်အကြောင်းသုံးပါးနှင့် သဟဇာတ ဖြစ်နေရပြီ။

ကိုတင်ဝင်းဆိုင်ကလေးနှင့် ကပ်လျက်က လက်ဖက်ရည်ဆိုင်ကလေးမှာ ထိုင်ရင်း၊ လမ်းသွားလမ်းလာတွေကို ငေးမောရင်း၊ တိုင်ကီတစ်ခွက်ကို လူသုံးယောက် မျှဝေ မျှသောက်ရင်း၊ အစီခံမပါသော ဒူးယားကို တစ်လိပ်ပြီးတစ်လိပ် ဖွာရင်း သည်နေရာကလေးမှာ မိုးကြီးချုပ်မျှ ထိုင်နေမိတတ်သည်။

တစ်ခါတစ်ခါတော့ လူဆုံမိတတ်သည်။ တစ်ခါတစ်ခါတော့လည်း လူမရှိ။ ကျွန်တော်နဲ့ ကိုတင်ဝင်း နှစ်ယောက်တည်းပဲ ရှိသည်။

“ဒီနေ့ စာအုပ်ရောင်းရတယ်ဗျ။ လက်ဖက်ရည်သောက်ရအောင် … ”

တစ်ခါတစ်ခါ ကိုတင်ဝင်းက အဲသည်လို စိတ်လိုလက်ရ ပြောတတ်သည်။ တစ်ခါတစ်ခါတော့လည်း …

“လက်ဖက်ရည်ဆိုင်သွားဖို့ အစီအစဉ် ရှိရဲ့လား”

ဟု မေးနေတတ်သည်။

“စာအုပ်ရောင်းရတာ အဆင်ပြေရဲ့လား”

“မရောင်းရဘူးဗျ။ အင်းလေ … လူတွေက စာအုပ်နောက်ကို မလိုက်နိုင်ကြတော့ဘူးနဲ့ တူပါရဲ့ဗျာ။ စာအုပ်ထက် ဦးစားပေးရတာတွေ ရှိသေးတယ်လေ။ တစ်ခါတစ်ခါ ရောင်းရနိုးနဲ့ ထည့်လာတဲ့ ထမင်းတောင် သိုးတယ်ဗျ။ မောင်ခိုင်မာကဗျာထဲကလိုပေါ့၊ ဘာတဲ့ … ‘ထိလုမိလု၊ သတိပြုရင်း၊ ပစ်ကွင်းကိုချောင်း၊ ချက်ကောင်းကိုရွေး၊ လေးညှို့ပြင်ချိန်၊ နေလုံးမှိန်ပြီ၊ စားမြိန်တစ်ထုပ်၊ နံဟောင်ပုပ်ပြီ၊ တောအုပ်ဟေဝန်၊ ရေတံခွန်၌၊ တွံ … သင် မုဆိုး၊ မိုးကြီးချုပ်ခဲ့ပြီကော’ … ဆိုတာလေ”

တစ်ခါတစ်ခါတော့ အရွှန်းအပြက်လိုလို အလေးအနက်လိုလို သူ ပြောတတ်သည်။ စာအုပ်သည်ပီပီ စာတိုပေစ ပုံတိုပတ်စ အကိုးအထောက်တွေနှင့် သူ ပြောတတ်သည်။ ဘာပဲဖြစ်ဖြစ် သည်နေရာကလေးကို စိတ်ရတိုင်း လာထိုင်ဖြစ်ခဲ့သည်မှာ ကြာခဲ့ပြီ။

* * *

(၅)

အခုတော့ သည်လမ်းဆုံကိုဖြတ်ကာ မီးရထားလမ်းကူး ခုံးကျော်တံတားသစ် တစ်စင်း တည်ဆောက်နေသည်။ မီးရထားလမ်းကူးကို ခွ၍ ခေတ်မီ လှပသော တံတားသစ်ကြီးတစ်စင်း တည်ဆောက်နေခြင်း ဖြစ်သည်။ ထို့ကြောင့် သည်လမ်းဆုံ၏ လမ်းမြွှာတွေ အားလုံးကို တံတားတည်ဆောက်ရေးကာလအတွင်း ဖြတ်ပိတ်ထားသည်။

ဝါးကပ်တွေစီကာ လမ်းမကြီးတစ်လျှောက် ဖြတ်ပိတ်လိုက်သဖြင့် ထိုလမ်းဆုံကို ဖြတ်သန်းရသော ကားတွေက တခြားလမ်းခွဲတွေက သွားရသည်။

အင်းစိန်-ရန်ကုန် ပြေးဆွဲသော ၄၅၊ ၄၈၊ ၈၊ ၄၄၊ နှစ်စီးတွဲ၊ ဟီးနိုး၊ ဒတ်ဆန်း စသည့် ကားဂိတ်တွေလည်း သည်နေရာကဝေးရာကို ပြောင်းရွှေ့ကြရသည်။

ကားတွေက တခြားက လှည့်သွားလို့ ရသော်လည်း (သွားကြသော်လည်း) လူတွေက တစ်ကွေ့ တစ်ပတ်ကြီး သွားနေလို့ မဖြစ်၊ ရသလောက်နေရာကလေးက တိုးကာ ဝှေ့ကာ ဖြတ်သန်းတော့သည်။

ထိုအခါ
ဟီးနိုးဂိတ် မျက်နှာစာတန်းနှင့် ဝါးကပ်ထရံတွေ ကြားမှာ လမ်းကျဉ်းကလေးတစ်ကြောင်း ပေါ်လာရတော့သည်။

* * *

(၆)

အရင်က လမ်းမကြီးပေါ်က သွားချင်သလို သွား၊ ဖြတ်ချင်သလို ဖြတ်၊ လျှောက်ချင်သလို လျှောက်ခဲ့ကြသော လူတွေအားလုံး အခု ထိုလမ်းကျဉ်းကို မဖြစ်မနေ ဖြတ်ရတော့သည်။

လမ်းကျဉ်းကလေးအဝမှာ ဆိုက်ကားဂိတ်နှင့် လက်ဖက်ရည်ဆိုင်တန်းတွေ ရှိသည်။ မိုးတွေသဲသဲမဲမဲ ရွာလျှင် လမ်းကျဉ်းကလေးအဝမှာ ရေအိုင်နေတတ်သည်။ ထိုအခါ ဘောင်းဘီရှည်၊ တေက်ချီကေံစ် ကိုင်ထားသူ ဖြစ်စေ၊ ပုဆိုး-တိုက်ပုံနှင့်ဖြစ်စေ၊ ရောင်စုံ ခြေသည်းများဖြင့် ဝင်းစက်လှပနေတတ်သော ခြေထောက်ပိုင်ရှင် မိန်းမလှလေးတွေပင်ဖြစ်စေ ထိုရေအိုင်ထဲကို နင်းချလိုက်ရမည်သာ ဖြစ်သည်။

ဆယ့်လေးငါးလှမ်း ဆက်သွားလျှင်တော့ ကန့်လန့်ခံနေသော အုတ်ခုံဟောင်း နှစ်ခုကို တွေ့မည်။ အစတုန်းကတော့ သည်အုတ်ခုံဟောင်းတွေကို ဘယ်သူမှ ဂရုတစိုက် မရှိခဲ့။ အခုတော့ လမ်းကျဉ်းကလေးထဲမှာ ထိုးထိုးထောင်ထောင် ရှိလာသဖြင့် သူတို့ကို ဂရုမစိုက်လို့ မရတော့။ ကျော်ချင်လည်း ကျော်သွား၊ မကျော်ချင်လည်း ဝါးကပ်ထရံနှင့် အုတ်ခုံကြားက လူတစ်ကိုယ်စာ နေရာကလေးက ပွတ်ကာသီကာ သွားချင်သွား။

လမ်းကျဉ်းကလေး၏ တစ်ဆစ်ချိုးကွေ့နားမှာ ကြီးမားသော သစ်ငုတ်တိုဟောင်းတစ်ခု ရှိသည်။ ကွေ့ချိုးလိုက်သည်နှင့် စတင်တွေ့ရသော ဈေးဆိုင်ကလေးတွေက ဓာတ်တိုင်နှစ်တိုင်စာလောက် ရှည်သော လမ်းကျဉ်းကလေး၏ အခြားဘက်အထိ စီကာစဉ်ကာ ရှိနေတော့သည်။

လမ်းက ကျဉ်းရသည့်အထဲ ဈေးဆိုင်တွေက တစ်ဖက်တစ်ချက်ဆိုတော့ လူသွားစရာနေရာ နည်းနည်းကလေးပဲ ကျန်သည်။ လမ်းက ပိုမိုကျဉ်းမြောင်းသွားသည်။

အဲသည်အထဲမှာမှ သွားသူတွေ ရှိသည်၊ ပြန်သူတွေ ရှိသည်၊ ရပ်ရင်း ဈေးဆစ်-ဈေးဝယ်သူတွေ ရှိသည်၊ ငေးမောတွေဝေနေသူတွေ ရှိသည်၊ စဉ်းစားနေသူတွေ ရှိသည်။ နှစ်ပေါင်းများစွာကအကြောင်း၊ မနေ့တစ်နေ့ကအကြောင်း၊ မုန်းသူ့အကြောင်း၊ ချစ်သူ့အကြောင်း ပြောလက်စမဆုံးနိုင်သူတွေ ရှိသည်။

နည်းနည်းဆက်လျှောက်လျှင် စာအုပ်သစ်ဆိုင်ကလေးရှေ့ကို ရောက်မည်။ ရောင်စုံစာအုပ်တွေကို ဖျိုးခနဲဖျတ်ခနဲ ကြည့်နိုင်၊ ဝယ်နိုင်သည်။

ရှေ့မှာတော့ ဝက်သားတုတ်ထိုး ဆိုင်၊ လက်ဖက်-မြေပဲ ဆိုင်၊ စာကလေးခွေဆိုင်၊ ဝက်ဆီဖတ်ဆိုင်၊ ဓာတ်ငွေ့မီးခြစ်ဆိုင်၊ ပလတ်စတစ်လောင်းဆိုင်၊ ပုစွန်ခွက်ကြော်ဆိုင်၊ တိုဟူးဆိုင်၊ မုန့်ပေါက်စီဆိုင်၊ ပေါင်မုန့်ဆိုင်၊ အမွှေးတိုင်ဆိုင်၊ တရုတ်အရက်ဆိုင်၊ သံပရာသီး-မာလကာသီး ဆိုင် စသည် စသည်ဖြင့် ဆိုင်တန်းကလေးတွေ ရှိသည်။

စာအုပ်ဆိုင်က ကျော်လျှင်တော့ လမ်းက ပိုမိုကျဉ်းမြောင်း ဆိုးရွားလာသည်။ ထိုနေရာကလေးမှာ ရေစီးစရာမရှိတော့။ ရေတွေ ခြေမျက်စိမြုပ်လောက် အမြဲတမ်း ရှိနေတတ်သည်။ ထွက်ပေါက်မဲ့ ရေတွေက လူတွေ နင်းပါများတော့ နောက်ကျိပျစ်ချွဲနေသည်။

ပြီးတော့ ပိုပြီးဆိုးတာက ဝါးထရံတွေကို ထောက်ကန်ထားသော သင်ပေါင်းသားတိုင်တွေက လမ်းပေါ်ကထောက်ထားသဖြင့် လမ်းကျဉ်းကလေးကို ကန့်လန့်ခံထားသလို ဖြစ်နေတာပဲ ဖြစ်သည်။

နောက်ကျိပျစ်ချွဲနေသော ရေထဲမှာ လိပ်သဲကျောက် ခပ်ကြီးကြီးတွေ ရှိသည်။ စီကာရီကာ မဟုတ်၊ တောင်တစ်လုံး မြောက်တစ်လုံး။

လူတစ်ယောက်စ နှစ်ယောက်စ သွားဖို့အတွက် သိပ်အကြောင်းမဟုတ်သော်လည်း လူတွေရာပေါင်းများစွာ ဖြတ်သန်းနေတော့လည်း သည်ကျောက်တုံးတွေကို စောင့်နင်းဖို့ မဖြစ်နိုင်။ သည်တော့ ရေထဲကို နင်းရတော့သည်။

အဆိုးဆုံးက ကိုယ်ရေပြားရောဂါသည်တချို့ လမ်းကျဉ်းကလေးထဲမှာ ရှိနေခြင်းပင် ဖြစ်သည်။ သူတို့ခြေထောက်တွေကလည်း သည်ရေထဲမှာ တစ်ချိန်လုံး နစ်မြုပ်နေတတ်သည်။ ရေစပ်စပ် မြေမာမာပေါ်မှာ ဟောင်းနွမ်းပိန်ချိုင့်နေသော ဒန်ခွက်ဟောင်းကလေးတွေ ချထားတတ်ကာ မိုးသည်းသည်းမှာရော၊ နေကျဲကျဲမှာပါ မထတမ်း တောင်းရမ်းနေတတ်သည်။

တစ်ခါတုန်းကတော့ ကျွန်တော့်ရှေ့မှာပင် မိန်းကလေးတစ်ယောက် လမ်းကျဉ်းထဲမှာ လဲကျသွားဖူးသည်။ သူမက လူးလူးလှုပ်လှုပ် ကျောက်တုံးတွေပေါ်ကို ကျွန်တော့်အလျင် ဦးအောင်လုပြီး နင်းသည်။ လုတက်လိုက်သော အရှိန်ကြောင့် ဒုတိယကျောက်တုံး တစ်တုံးပေါ်ကို နောက်ခြေတစ်ဖက်က ဟန်ချက်မဲ့စွာ နင်းမိသွားသည်။ ကျောက်တုံးက တစ်ဖက်ကို လိမ့်စောင်းသွားတော့ သူမပါ လဲကျသွားသည်။ ရွှံ့ရေထဲကို ရုပ်ပျက်ဆင်းပျက် လဲကျသွားခြင်း ဖြစ်သည်။

ဘာပဲဖြစ်ဖြစ် လမ်းကျဉ်းကလေးကို ဖြတ်သန်းရသူချင်း ခဏကလေး ဖြတ်ရတုန်းမှာ တစ်ဦးနှင့်တစ်ဦး နားလည်ဖို့ပဲ လိုသည်။ တစ်ဦးကိုတစ်ဦး ညှာဖို့ပဲ လိုသည်။ ဒါပေမဲ့ တချို့က နားမလည်ကြ။ စက်ဘီးတွေက ပိုဆိုးသည်။ လမ်းက ကျဉ်းရသည့်အထဲ စက်ဘီးတွေ တွန်းဝင်လာတာ ရှိသေးသည်။ တွန်းလာရင်းက လမ်းကျဉ်းကလေးထဲမှာပဲ ရပ် စကားပြောနေကြတာ ရှိသေးသည်။ နောက် အမူးသမားတွေ … သူတို့ကိုလည်း ရှောင်ရတိမ်းရတတ်သည်။

တစ်ကိုယ်ကောင်းဆန်သော ဈေးသည်တချို့ ရှိသည်။ ရာဘာဖိနပ်တွေ တစ်ဖက်နှင့်တစ်ဖက် တဖန်းဖန်းရိုက်ကာ ဖိနပ်ကောင်းကြောင်းကို လူတွေကြားမှာ မလွတ်မလပ် လုပ်ပြနေသူတွေ ရှိသည်။ လမ်းကျဉ်းကလေးထဲမှာပဲ ဆိုင်ကြီး ခုံကြီး ခင်းကာ ရောင်းတတ်သော စားမြိန်ဆိုင်တချို့ ရှိသေးသည်။ လိုချင်မှန်းမသိ မလိုချင်မှန်းမသိ တွန်းထိုးရောင်းတတ်သော စီးကရက်သည်တွေ ရှိသည်။

ညနေစောင်းမှာတော့ လမ်းကျဉ်းကလေးတစ်ခုလုံး ပြည့်သွားတတ်သည်။ ကျောင်းဆင်းချိန်မှာ အစိမ်းရောင် မြွေနဂါးတစ်ကောင်လို လမ်းကျဉ်းကလေးက တလွန့်လွန့် ရှိနေတတ်သည်။ အလုပ်သမားတွေ လွှတ်ချိန်မှာတော့ ပြာမှိုင်းရောင် ရေစီးချောင်းကလေးနှင့် တူနေတတ်ပြန်သည်။

ကိုယ့်ကိစ္စနှင့်ကိုယ် ဆိုတော့လည်း လမ်းကျယ်ကိုရောက်ဖို့ အလုအယက်ရှိရသည်သာ။

* * *

(၇)

မိုးသားတွေ တက်လာပြန်ပြီ။ ဈေးရုံထဲမှာ မှောင်မည်းနေသည်။ မီးပျက်နေတော့ လိုတာထက်ပိုပြီး ညို့ရီမှိုင်းအုံ့နေသည်။ ကိုတင်ဝင်းဆိုင်ကလေးထဲက လှမ်းမြင်နေရသော လမ်းကျဉ်းကလေး၏ တစ်စိတ်တစ်ပိုင်းကို ကျွန်တော် ငေးနေမိလေသည်။ မီးပျက်နေသဖြင့် ကက်ဆက်သီချင်းသံတွေ မရှိ။ ကိုတင်ဝင်းက လက်ဖက်ရည်တစ်ခွက် မှာသည်။ စီးကရက်တစ်ပွဲ မှာသည်။

“ဘာငေးနေတာလဲ”

“ဘာရယ် မဟုတ်ပါဘူး”

“ဘာလဲ … ဝတ္ထုရေးချင်လို့လား။ ရေးရင် ‘လူ့ခရီး’ ဆိုပြီး ခေါင်းစဉ်တပ် ရေးစမ်းပါဗျာ။ ဒီလမ်းကျဉ်းကလေးက ဘဝကိုထင်ဟပ်တယ်ဗျ။ ဒါမှမဟုတ် ကျဉ်းမြောင်းခြင်းနဲ့ ကျယ်ပြော လွတ်လပ်ခြင်း ရသကို ပီအောင်ဖွဲ့ဗျာ”

ကျွန်တော်က ကိုတင်ဝင်း၏စကားတွေကို မကြားတစ်ချက် ကြားတစ်ချက် …

အိပ်တန်းပြန်ချိန် …
လမ်းကျဉ်းကလေးထဲမှာ တွန်းတွန်းထိုးထိုး သွားနေသော လူတွေက မိုးရိပ်ကြောင့် ပိုမိုမြန်ဆန် သွက်လက်နေသည်။ ထိုစဉ်မှာပင် မိုးတွေ ဝေါခနဲ သွန်ကျလာသည်။ ပိုမိုမည်းမှောင်သွားသည်။ အိုက်စပ် ပူလောင်နေရာမှ မိုးသက်လေကြောင့် အေးမြသလို ခံစားနေရသည်။ မိုးက သည်းသထက် သည်းလာသည်။

ကြည့်စမ်း … ထီးတွေ … ထီးတွေ …
လမ်းကျဉ်းကလေး တစ်ခုလုံး ထီးတွေနှင့် ပြည့်နှက်သွားသည်။ ပန်းချီပြပွဲတစ်ခုမှာ ပြသခဲ့ဖူးသော မိတ်ဆွေပန်းချီဆရာ၏ ‘ထီးများ’ ပန်းချီကားကို ဖျတ်ခနဲ သတိရမိပြန်သည်။

ထီးတွေက ရောင်စုံ။
အနက်တွေကတော့ များသည်။ ခရမ်း၊ အပြာ၊ အဝါ၊ အနီ၊ အစိမ်း၊ အညို၊ အကျားအကျား။ ဘေးနှစ်ဖက်နှစ်ချက်က ဈေးဆိုင်တန်းတွေက အမိုးတွေထုတ်လိုက်တော့ ထီးတွေနှင့်မလွတ်ချင်။ ပြီးတော့ လူပေါင်းများစွာတို့၏ ထီး ရာပေါင်းများစွာတို့က လမ်းကျဉ်းကလေးထဲမှာ ထိစပ်နေသည်။

လွတ်လွတ်လပ်လပ်သွားလို့ မရတော့။ တိမ်းကာယိမ်းကာ ငဲ့ကာစောင်းကာ သွားနေကြရသည်။ ငယ်ငယ်က ရေစီးမြောင်းထဲကို ဗျောက်ပွင့်တွေ မျှောတာနှင့် တူနေသည်။

အထက်စီးက ကြည့်ခွင့်ရလျှင်တော့ ထီးတန်းကို တလှုပ်လှုပ် ရွေ့မျောနေတာ တွေ့ရမည် ထင်သည်။ ဝါးထရံတွင်း တံတားအလုပ်သမားတွေဆီက ဟေးလား … ဟေးလား … ငြာသံပေးသံတွေ မိုးရေထဲကို တိုးဖြတ်လာသည်။ မိုးထဲ ရေထဲမှာ လေးလံသော အရာဝတ္ထုတစ်ခုခု ရွှေ့မ နေကြဟန် တူသည်။ ခေတ်မီလှပသော တံတားသစ်တစ်စင်းကို ထုဆစ်နေသူများ …

အခုတော့ မိုးရေပြည့် လမ်းကျဉ်းကလေးထဲမှာ ထီးရောင်စုံတွေ တရွေ့ရွေ့ … တိမ်းကာငဲ့ကာ တရွေ့ရွေ့ … ဒါကိုပဲ ကျွန်တော် ငေးနေမိခြင်း ဖြစ်လေသည်။

(ရုပ်ရှင်အမြုတေမဂ္ဂဇင်း)

* * * * *

 

 

မြေခွေး

(၁)

ကိုကျောက်စီ ဆိုတဲ့လူကို တစ်နယ်လုံးကသိကြတာတော့ မဟုတ်ဘူး။ သူနေတဲ့တဲကလေးနဲ့ တော်တော်လေးလှမ်းတဲ့ တန်းလျား လေးငါးလုံးကလူတွေ (မသကာ ရှိလှရင် လူခြောက်ဆယ်လောက်) ကပဲ သိတာပါ။

ကျောက်စီ ဆိုတဲ့နာမည်ကိုလည်း တချို့က ကျောက်စိ တဲ့၊ တချို့က ကျောက်စီ တဲ့။ ကိုကျောက်စီကလည်း ထူးလိုက်တာပါပဲ။ သူ့ဟာသူတောင် ကျောက်စိ လား၊ ကျောက်စီ လား၊ ကျောက်စည် လား သိတာမဟုတ်ဘူး။

သူ့ပုံက ကျောက်ပွင့်ကလေးတွေစီထားတဲ့ ကျောက်စီတော့ မဖြစ်နိုင်ဘူး။ ဘုန်းကြီးကျောင်းတွေက အင်ကြင်းပင်ကြီးတွေ သိပ်ကြီးသွားလို့ ကျောက်ဖြစ်သွားတဲ့အခါ လုပ်လေ့ရှိတဲ့ ကျောက်စည်းထိုးတဲ့ ကျောက်တုံးကြီးတစ်တုံးနဲ့ တူလို့ ဖြစ်ချင်းဖြစ်ရင် ကျောက်စည် ဆိုတဲ့နာမည်နဲ့က ပိုလိုက်တယ်။

ထားပါတော့၊ ကျောက်စီပဲ။ လူက မည်းလိုက်တာ သပိတ်ကိုသာ ကြည့်တော့။ ခေါင်းတုံးကလည်း အမြဲရိတ်တော့ ဦးပြည်းဟာ ဘယ်တော့မဆို ပြောင်နေလေ့ရှိတယ်။ ရုပ်ကလည်း ဇာတ်ထဲက ဘီလူးခေါင်းစွပ်ကို တွေ့ဖူးတယ် မဟုတ်လား၊ အဲဒီရုပ်မျိုး။ မျက်ခုံးနဲ့ မျက်လုံးတွေက အပေါ်ကို ထောင်တက်နေတော့ အမြဲတမ်း ရန်လိုနေတဲ့ မျက်နှာပေးက ထင်းခနဲ ပေါ်နေတတ်တယ်။

ရင်ဘတ်မှာက မင်ကြောင်ထိုးနဂါးတစ်ကောင် ရှိတယ်။ မည်းနေတဲ့ အသားပေါ်က စိမ်းဖန့်ဖန့်ဆေးမင်ရယ်၊ နဂါးအကြေးနဲ့ ဟင်္သပြဒါးအနီရယ်ဟာ ရုတ်တရက်ကြည့်ရင် မပေါ်ချင်ဘူး။ ဒါပေမဲ့ နဂါးခေါင်းကတော့ သေသေချာချာကြည့်ရင် သိပ်အနုစိတ်တဲ့ခေါင်းမျိုး ဗမာနဂါးလည်း မဟုတ်ဘူး။ အကွေးအတွန့်တွေနဲ့ အမွေးအမှင်တွေများတဲ့ စိန့်တိုင်းက နဂါးရုပ်မျိုး။

အကြေးခွံတွေအထပ်ထပ်နဲ့ နဂါးကိုယ်လုံးဟာ သူ့ ရင်ဘတ်ကတစ်ဆင့် ညာဘက်လက်မောင်းကနေ ဆင်းသွားလိုက်တာ ညာဘက်လက်ခုံပေါ်မှာ ဆုံးတယ်။ ရင်ဘတ်ကနဂါးခေါင်းက အောက်ဘက်ကို ပါးစပ်ဖြဲ လှည့်ထားတော့ ဝမ်းဗိုက်တစ်ခုလုံးနီးပါးဟာ နဂါးခေါင်းနဲ့ ပြည့်နေလေရဲ့။

“ကျောက်စီတို့ကတော့ ‘နတ်၊ ပြာ၊ တွဲ - တောင်’ တို့၊ ‘တော်၊ ကျွတ်၊ မုန်း - ရှေ့’ တို့ မဟုတ်ဘူးဗျ။ အမြဲတမ်း နဂါးခေါင်း အောက်ကိုလှည့်တယ်”

လို့ မူးလာရင် အမြဲပြောတတ်တယ်။ အမြဲပြောနိုင်ဖို့ကလည်း အမြဲမူးနေဖို့ လိုတယ် လို့လည်း တွက်ထားဟန်တူပါရဲ့။ အရက်နဲ့ မျက်နှာသစ်၊ အရက်နဲ့ ပလုတ်ကျင်း၊ အရက်နဲ့ပဲ ထမင်းစား၊ အရက်နဲ့ပဲ ခြေဆေးတယ် ဆိုတဲ့လူ။

လောလောဆယ်တော့ သူဟာ လူသူနဲ့ဝေးဝေး တောအုပ်ညို့ညို့ကြီးထဲက တဲကလေးတစ်လုံးမှာ နေတယ်။ သူ့ပတ်ဝန်းကျင်မှာ အင်မတန် နက်ရှိုင်းတဲ့ ကျင်းကြီး၊ ချိုင့်ကြီးတွေ ရှိတယ်။ အတော်အတန် ကြီးတဲ့ သစ်ပင်ကြီးတွေ ရှိတယ်။ တောင်ကုန်းမြင့်မြင့်ကြီးတွေ ရှိတယ်။ ပြီးတော့ သူ တာဝန်ယူစောင့်ရတဲ့ မြေကော်တဲ့ယန္တရားကြီးတစ်လုံးလည်း ရှိတယ်။

ဒီယန္တရားကြီးဟာ အဲသည်ပတ်ဝန်းကျင်က တောတွေ၊ တောင်ကုန်းတွေကို ဖြိုတဲ့ ယန္တရားကြီးပဲ။ ကျင်းတွေ၊ ချိုင့်တွေဟာ အဲသည် ယန္တရားကြီးရဲ့ လက်ချက်ပဲ။ အမြဲတမ်းတော့ မဟုတ်ဘူး၊ လိုအပ်တဲ့အခါ ယန္တရားမောင်းတဲ့လူ ရောက်လာပြီး ကော်တော့တာပဲ၊ ဖြိုတော့တာပဲ၊ တူးတော့တာပဲ။ မလိုအပ်တဲ့အခါ သုံးလေးလ မလာပြန်ဘူး။

ဘာပဲဖြစ်ဖြစ် ကိုကျောက်စီက ပစ္စည်းတွေမပျောက်ပျက်အောင် စောင့်ရတယ်။ စက်ကြီးက တောထဲမှာ နှစ်ပေါက်အောင်ရှိနေတတ်တော့ သူကလည်း နှစ်ပေါက် နေနေရတော့တယ်။ သည်တောထဲမှာကိုပဲ သူနေရတာ ရှစ်နှစ် ပြည့်တော့မယ်။ သောက်ရေအိုးအညှိတက် တစ်လုံး၊ သင်ဖြူးဟောင်း တစ်ချပ်နဲ့ မီးဖိုချောင်ပစ္စည်းလေး အနည်းအကျဉ်းက လွဲရင် တဲထဲမှာလည်း ဘာမှမရှိဘူး။

ယန္တရားကြီးအလုပ်ရှိတဲ့အခါ သူ အူစိုတယ်၊ ဆီလေးဘာလေးလည်း ရတယ်၊ ပိုက်ဆံလေးဘာလေးလည်း ရတယ်။ ကျန်တဲ့အချိန်ကတော့ ကလေးတွေပြောသလို လက်ချည်းပဲ။ ရတဲ့လခကလေးနဲ့ စားရတာပဲ။ တစ်လ တစ်လ ရတဲ့လခကလေးဟာ မနီးမဝေးတန်းလျားက အိမ်ဆိုင်ကလေးကို အရက်ဖိုးဆပ်တာနဲ့ ကုန်တာပါပဲ။ လဆန်းရင် ပြန်စ၊ လကုန်ရင် အတိုးဆပ် … သည်လိုနဲ့ လည်ပတ်နေတာပါပဲ။

အိမ်ဆိုင်ကလေးကလည်း အရက်ကောင်းကောင်း ရောင်းတာ မဟုတ်ဘူး၊ တာဇံလို့ ခေါ်တဲ့ ကောက်ညှင်းအရက် ခေါ်မလား၊ ထန်းလျက်အရက် ခေါ်မလား၊ အဲဒါပဲ ရတာ။ ဘာပဲဖြစ်ဖြစ် သူ့အတွက်တော့ ညနေစောင်းရင် သူ့တဲကလေးကနေ နာရီဝက်မရှိတရှိလောက် လျှောက်လာ၊ တန်းလျားခန်းတွေထဲကို ဝင်၊ တစ်ခွက်တစ်ဖလား သောက်၊ ပြီးရင် ပြန် … ဒါဟာ နေ့စဉ် သူလုပ်နေကျပဲ။

အရင်တုန်းကတော့ (သည်ယန္တရားကြီးကို လုံခြုံရေးမစောင့်ရခင်တုန်းကတော့) ဘဝ တော်တော်များများမှာ ကျင်လည်ခဲ့တာ ထားပါတော့၊ အခု ဒီဘက်ရှစ်နှစ်လောက်ကတော့ သူ့မှာ မနက်-ည သည်တန်းလျားလေးကို လာပြီး အရက်သောက်၊ ပြီးရင် ပြန်ပဲ။ တောထဲက တဲကလေးထဲမှာ ညဘက် ဒီဇယ်ဆီ မီးခွက်ကလေးနဲ့ မှိတ်တုတ်မှိတ်တုတ် နေတော့တာပါပဲ။

ခက်တာက ယန္တရားကြီးမလည်ရတာ ကြာပြန်ပြီ။ ယန္တရားမောင်းတဲ့လူကလည်း ယန္တရားမလည်တော့ မလာတော့ဘူး။ သည်တော့ သူ့မှာ တခြားဝင်ငွေလည်း မရှိဘူး။

အစားမှန်မှန် မစားတာရော၊ အရက်တွေ ထောင်းထအောင် သောက်တာရောကြောင့် သူလည်း တစ်စတစ်စ ပိန်ချုံးသထက် ပိန်ချုံးလာတယ်။

သူ ပိန်ချုံးလာတော့ သူ့ရင်ဘတ်ကနဂါးကြီးကလည်း ပိန်ချုံးလာတော့တာပဲ။ လက်တွေခြေတွေလည်း တုန်လာတယ်။ မကြာမကြာလည်း အအေးမိတယ်။ အဆုတ်ကလည်း ပွချင်တယ်။ ခြင်တွေ၊ ဖြုတ်တွေကလည်း သီးနေအောင်ကိုက်ထားတော့ အရေပြားတွေမှာလည်း အနာ့ပဆုပ်တွေ၊ ပွေးတွေ၊ ဝဲစိုတွေ၊ ညှင်းကြီးကွက်တွေနဲ့ အပြည့်ပဲ။

ရေ ဆိုတာကလည်း တူးထားတဲ့ချိုင့်တွေထဲက တင်နေတဲ့မိုးရေကို ချိုးရင် ချိုး၊ သောက်ရင် သောက်၊ ဒါပဲ။ ဘယ်ကမှ ရေသန့်သန့် မရနိုင်ဘူး။

အဲသလိုနဲ့ …
အဝါရင့်ရောင် ယန္တရားကြီးရယ်၊ တဲကလေးတစ်လုံးရယ်၊ သူရယ်၊ သူ့ရင်ဘတ်က နဂါးတစ်ကောင်ရယ်၊ ကျင်းတွေချိုင့်တွေရယ်၊ သစ်တောညို့ညို့ရယ်၊ ဖျာတစ်ချပ် ရေအိုးတစ်လုံးရယ်၊ တာဇံထည့်တဲ့ ပုလင်းလွတ် လေးငါးလုံးရယ်က လွဲရင် သူ့မှာ တွယ်တာစရာ ဘာသံယောဇဉ်မှ မရှိဘဲ နေလာတာကိုက ပြောခဲ့ပါပြီကော၊ ရှစ်နှစ်လောက်ရှိပြီ လို့။

* * *

(၂)

ရေတမာရွက် ကြမ်းကြမ်းတွေ ကြားက နှင်းဆီပွင့်တွေဟာ ရောင်စုံပဲ။ လှလိုက်တာလည်း မပြောနဲ့တော့။

အဝါလည်း ပါတယ်၊ ပန်းသွေးနုနုတွေလည်း ပါရဲ့၊ ကြက်သွေးရောင် စိုစိုဖတ်ဖတ်ကြီးတွေ ဆိုတာကလည်း မနည်းဘူး၊ နှင်းဆီရနံ့တွေကလည်း သူ့တဲကလေးထဲမှာ ကြိုင်လို့လှိုင်လို့။

လှချင်တိုင်းလှနေတဲ့ နှင်းဆီပွင့်တွေကို ကိုကျောက်စီ ငေးတောင်နေမိတယ်။ အပွင့်ရောင်စုံတွေကိုလည်း သူ့လက် ကြမ်းကြမ်းကြီးတွေနဲ့ တယုတယ ပွတ်သပ်ကြည့်မိသေးတယ်။

ကိုကျောက်စီက သူ့ရဲ့ ကတုန်ကယင်လက်တွေနဲ့ နှင်းဆီပွင့်ကလေးတွေကို အသာအယာဆွဲနုတ်တယ်။ အဝါတွေကို သတ်သတ် ဖယ်တယ်၊ ပန်းရောင်အဖူးကလေးတွေကို သီးသန့်ထားတယ်။ ကြက်သွေးရောင် နီညိုညိုအပွင့်ကြီးတွေကိုတော့ များလွန်းလို့ နှီးစမျှင်မျှင်ကလေးတွေနဲ့ အရင် စည်းတယ်။ ငါးပွင့် တစ်စည်း၊ လေးပွင့် တစ်စည်း စည်းတယ်။ ဖြစ်သင့်တာက ဆန်ကောလို၊ လင်ပန်းလို အချပ်ကြီးထဲမှာ စီပြီးထည့်ထားရမှာ။ သူ့မှာ ဆန်ကောမရှိဘူး။ သည်တော့ တောငှက်ပျောရွက်ကြီးတွေနဲ့ တစ်ရောင်စီ ခွဲထုတ်တယ်။

ရေညှိတက်နေတဲ့ သောက်ရေအိုးက ရေ တစ်ခွက် ခပ်တယ်။ တစ်ဝက်ကို သောက်တယ်။ တစ်ဝက်ကို ပန်းတွေအပေါ် ဖျန်းတယ်။ တဲအပြင်ထွက်ပြီး အလင်းရောင်ကိုကြည့်တယ်။ အချိန် ရှိသေးတယ်၊ ရှိလှမှ သုံးနာရီခွဲပဲ။

သူ နှစ်နှစ်ခြိုက်ခြိုက် ပြုံးလိုက်တယ်။ တာဇံနည်းနည်း သောက်လိုက်တယ်။ ပြီးတော့ တန်းလျားဘက်ကို နှင်းဆီဖက်တွေပိုက်ပြီး ထွက်လာခဲ့တယ်။

တစ်သက်နဲ့တစ်ကိုယ် ကိုကျော်စီ ပန်းရောင်းတာ မတွေ့ဖူးကြတဲ့ တန်းလျားထဲကလူတွေ ကိုကျောက်စီ ပန်းလာရောင်းတယ် ဆိုတော့ အထူးအဆန်းကိုဖြစ်လို့။ ဘယ်လိုဖြစ်တာလဲ၊ ဘာသဘောလဲ၊ ဘယ်လိုရည်ရွယ်ချက်နဲ့ ပန်းရောင်းဖြစ်သွားတာလဲ … အဲသလို တွေးကြတယ်။

“ကိုင်း … ပန်းတွေဗျို့ … ခြံပန်း လတ်လတ်ဆတ်ဆတ်တွေ၊ နှင်းဆီတွေ … ”

တချို့ကလည်း ရယ်ကြတယ်၊ တချို့ကလည်း သနားကြတယ်၊ တချို့ကလည်း ဒီကောင် လုပ်လာပြန်ပြီ လို့ တွက်ကြဟန်တူပါရဲ့ ခပ်တည်တည်ပဲ။

မည်းချိပ်နေတဲ့အသား၊ အင်္ကျီမပါ၊ ဖိနပ်မပါ၊ ပုဆိုးတိုတို (အဲဒီပုဆိုးကလည်း နှစ်ပေါက်ပုဆိုးပဲ)နဲ့ နှင်းဆီပန်းရောင်စုံနဲ့က ဘယ်လိုမှကို ဆက်စပ်ကြည့်လို့ မရဘူး မဟုတ်လား။

တန်းလျား ဟိုဘက်ထိပ်က ဒီဘက်ထိပ်ကို တစ်ခေါက်ပဲ လျှောက်ရတယ်၊ နှင်းဆီပန်းတွေ လုယူလိုက်သလို ကုန်သွားတယ်။

အဲသည် ဝယ်ကြတဲ့မိန်းမတွေထဲမှာ သူလာသောက်နေကျ တာဇံရောင်းတဲ့ဆိုင်က မိန်းမကိုတော့ သူ မရောင်းဘူး။ အဲဒီမိန်းမက နှင်းဆီအဝါတစ်စည်းကို လာကိုင်တယ်။ သူက အတင်းပြန်ယူလိုက်တယ်။ ဘာမှတော့ မပြောဘူး။

အဲသည်မိန်းမက “ရှင့်အရက်ကြွေးနဲ့ မနှိမ်ပါဘူး၊ ပိုက်ဆံပေးမှာပါ” လို့ ပြောတဲ့ကြားကကို သူ မရောင်းတာ။ “ခင်ဗျားကို သတ်သတ် အလကားပေးပါ့မယ်၊ နောက်မှယူပါဗျာ” လို့ပဲ ပြောတယ်။

အဲသည်မိန်းမလည်း စိတ်ဆိုးသွားတယ်နဲ့ တူပါတယ်၊ “သောက်ကြီးသောက်ကျယ်” လို့ တစ်ခွန်းပဲ ပြောပြီး ပြန်သွားတယ်။ ဒါပါပဲ၊ ကျန်တဲ့မိန်းမတွေအားလုံးကို ရောင်းလိုက်တာပါပဲ။ ဈေးထဲမှာ တစ်စည်းကို ခုနစ်ကျပ် ရှစ်ကျပ် ပေးရမယ့် အစည်းတွေကို လေးကျပ် ငါးကျပ်နဲ့ ရောင်းတော့ နှင်းဆီပန်းတွေအားလုံးဟာ ခဏကလေးနဲ့ ကုန်သွားတယ်။

ကိုကျောက်စီရဲ့ စိတ်တွေဟာလည်း ပေါ့ပါးလွတ်လပ်သွားတယ်။ အဘွားကြီးတစ်ယောက်ကတော့ လူကြီးမဟုတ်လား၊ ကိုကျောက်စီ ပန်းရောင်းတယ်ဆိုတော့ ဝမ်းသာလို့ အားပေးတဲ့အနေနဲ့ တစ်စည်းဝယ်တယ်။

“ငါ့တူ ကျောက်စီလည်း မရောင်းစဖူး ပန်းတွေဘာတွေရောင်းလို့ပါလား။ သာဓုတော် … သာဓု … ကိုယ်တော်လေးဆက်ရမယ် … မှန်း … တစ်စည်းကို ဘယ်လိုရောင်းတုံး”

လို့လည်း ပြောတယ်။ မရောင်းစဖူး ဆိုတာ အဓိပ္ပာယ်ရှိတယ်။ ကောင်းရောင်းကောင်းဝယ် လုပ်စားနေပါရောလား လို့ ပြောလိုက်တာလည်း ဖြစ်တယ်။

သူတို့သိထားတဲ့ကျောက်စီဟာ ဘယ်တုန်းကမှ ကောင်းရောင်း ကောင်းဝယ် ရှိခဲ့တာမှ မဟုတ်တာကိုး။

မနက်မိုးလင်းအောင် သောက်ပြီး သောက်ပြီးရင် စရိုက်ကြမ်းကြမ်းနဲ့ ရိုက်ဖို့နှက်ဖို့လောက် စဉ်းစားနေတဲ့လူ၊ ခိုးဖို့ဝှက်ဖို့ ကြည့်နေတဲ့လူ မဟုတ်လား။ သူ့တဲနဲ့မနီးမဝေး တောထဲမှာ ကိုးကျင်းကိုးကြောင်း လျှောက်သွားနေတဲ့ နွားတစ်ကောင်ရဲ့ တင်ပါးသားတွေချည်းပဲ ရဲတင်းနဲ့ခုတ်ယူရင် ယူလိုက်တဲ့လူ မဟုတ်လား။ တင်းပါးဆုံသား အိအိကြီးတွေ ပါမလာတဲ့ နွားတွေဟာ နည်းတာမှ မဟုတ်တာ။ ပိုင်ရှင်တွေက ကိုကျောက်စီ လက်ချက်မှန်းလည်း သိပါတယ်၊ ခက်တာက ကိုယ်တိုင်မမြင်ဘူးလေ၊ ပြေားလည်း မပြောရဲဘူးလေ။

နောက် လုပ်နေကျ ရှိသေးတယ်။ ဟိုဘက်ထိပ် ဒီဘက်ထိပ် ငုတ်ရိုက်၊ လေးခွသားရေ တင်းတင်းဆွဲချည်၊ ပြီးရင် ထစ်ကလေးတစ်ခု ခံပြီး ကြိုးနဲ့ ခပ်ဝေးဝေးကိုဆွဲထား၊ သားရေကြိုးပတ်လည်မှာ ဆန်စေ့တွေ ကြဲထား၊ စာကလေးတွေက အုပ်လိုက်ဝင်စားပြီ ဆိုတော့မှ ကြိုးနဲ့ခလုတ်ကို ဖြုတ်လိုက်ရင် စာကလေးဆယ်ကောင်လောက်ဟာ တုံးလုံးပက်လက် ကျန်ရစ်ခဲ့ရော။ ဒါဟာ ကိုကျောက်စီအတွက် အမြည်းပဲ။ အဲသည်ညနေဟာ တာဇံနဲ့ စာကလေးကင် ညနေပဲ။

သည့်အရင်ကလည်း ပန်းရန်နောက်လိုက် ဆိုပြီး တစ်ရက် နှစ်ရက် ပန်းရန်လိုက်လုပ်ဖူးတယ်။ နောက်တစ်နေ့ မလိုက်ရတော့ဘူး။ ပန်းရန်ဆရာခေါင်းဆောင်ရဲ့ ညို့သကျည်းကို ခုတ်တူနဲ့ ခုတ်ပစ်ခဲ့လို့ တဲ့။

ကိုကျောက်စီအတွက် တစ်ခုကောင်းတာက သူ့မိခင်ဌာနက သူရှိနေတဲ့တဲကလေးနဲ့ တော်တော်ကြီးဝေးတဲ့နေရာမှာ ရှိနေတာပဲ။ သည်ယန္တရားကြီးနဲ့ ကိုကျောက်စီ ရှိတဲ့နေရာကို တော်ရုံတန်ရုံ တာဝန်ရှိတဲ့လူကလည်း ရောက်လာလေ့ မရှိဘူး။ ယန္တရားကြီးကပစ္စည်း မပျောက်သရွေ့ ကိုကျောက်စီဟာ ယန္တရားနဲ့အတူရှိသလား မရှိဘူးလား၊ ဂရုတစိုက် စောင့်ကြည့်သလား မစောင့်ကြပ်ဘူးလားလည်း သိပ်စစ်ဆေးလေ့ မရှိဘူး။

သည်တော့ သူ စိတ်ကူးတည့်ရာ လုပ်လေ့ရှိတယ်။ ယန္တရားကြီးကို ပစ်ထားလေ့ရှိတယ်။ ယန္တရားကြီးကိုပစ်ထားပြီး သွားချင်ရာသွားနေတာပဲ။ လုပ်ချင်တဲ့အလုပ် ထွက်လုပ်နေတာပဲ။ လုပ်တိုင်းလည်း ဇာတ်သိမ်းက မကောင်းဘူး။ ပြဿနာနဲ့ ဆုံးတာချည်းပဲ။

တော်ရုံတန်ရုံလည်း ကိုကျောက်စီရဲ့ ပုံပန်းသဏ္ဌာန်နဲ့ သူ့ရင်ဘတ်က နဂါးကြီးကို ကြောက်လို့ မပြောဖြစ်ကြတော့ဘူး။ နောက်တစ်ခါ မဆက်ဆံတာပဲ ရှိတယ်။ သူကတော့ စုံတယ်။ မိန်းမပျက်တချို့ကို ဆက်သွယ်ပေးတဲ့ အလုပ်လည်း လုပ်တယ်၊ ဝက်သေးအိမ်နဲ့ တာဇံသယ်ပေးတာလည်း လုပ်တယ်၊ အငှား ဝက်ပေါ် နွားပေါ်ဖို့ ရဲတင်းတစ်လက်နဲ့ အသင့်စောင့်နေတတ်တာလည်း ရှိတယ်၊ ခပ်တည်တည်နဲ့ မိုက်ကြေးခွဲတတ်တာလည်း ရှိတယ်၊ တာဇံဆိုင်လေးမှာ ခွက်တစ်လုံးနဲ့ လိုက်တောင်းပြီး သူများ သောက်စားနေတဲ့အထဲက ဆိုးခနဲ ဆတ်ခနဲ နှိုက်စားလိုက်တာလည်း ရှိတယ်။

တန်းလျားထဲကလူတွေ သိတဲ့ ကိုကျောက်စီက အဲသလို ကိုကျောက်စီကိုး … အခု ပန်းရောင်းတယ် ဆိုတော့ နားမလည်နိုင်ကြဘူး။ ဘာပဲဖြစ်ဖြစ် ပန်းရောင်းတာဟာ ကောင်းတဲ့အလုပ်ပဲ။ နူးညံ့ပျော့ပျောင်းလာတဲ့ သဘောပဲ။

ကိုကျောက်စီဟာ သည်လိုနည်းနဲ့ သူ့ဘဝကို ပြုပြင်လာတယ် ဆိုရင် ပြီးတာပဲ။ လူဆိုတာ မှားတုန်းက မှားခဲ့တာပဲ။ ကောင်းလာပြီ ဆိုရင်လည်း ဘာပြောစရာရှိမလဲ ခွင့်လွှတ်လိုက်ကြရတာပဲ မဟုတ်လား။

အဲသည်ညနေက ကိုကျောက်စီ အဘွားကြီးကို ပန်းတစ်စည်း အပိုပေးတယ်။ အဘွားကြီးကို မူးမူးနဲ့ ထိုင်လည်း ကန်တော့လိုက်သေးတယ်။ သူ့အတွက်ပါ ပန်းကပ်ပေးပါ ဆိုပြီး တစ်စည်းသတ်သတ် ပေးလိုက်သေးတယ်။ အဘွားကြီးဆိုတာ သာဓုချင်း မိုးမွှန်သွားတာပဲ။

ကိုကျောက်စီ ပြန်လာတော့ လက်ထဲမှာ ငွေလေးဆယ်ကျော်ကျော် ပါလာတယ်။ တာဇံရောင်းတဲ့အိမ်ကလေးဆီကို သွားတယ်။ တာဇံရောင်းတဲ့မိန်းမက သူ့ကို ပန်းမရောင်းလို့ မကျေနပ်ပေမယ့် လက်ငင်းပေးသောက်တော့ ရောင်းတာပါပဲ။ တစ်ပိုင်းသောက်တယ်၊ တစ်ပိုင်းကို ပုလင်းငှားထည့်လာပြီး ယူလာခဲ့တယ်။ သူ့တဲကလေးထဲရောက်တော့ ထပ်သောက်တယ်။ အူလည်း မြူးနေတယ်။ ပျော်လည်း ပျော်နေတယ်။

အဲသည်ညက ကိုကျောက်စီ နှစ်နှစ်ခြိုက်ခြိုက်ကြီး အိပ်ပျော်တယ်။ ခြင်တွေ ဖြုတ်တွေ တစ်ကိုယ်လုံးမှာ သီးနေတဲ့ကြားက အိပ်မက်တွေတောင် မက်နေလိုက်သေးတယ်။

* * *

(၃)

နောက်တစ်ရက်မှာတော့ နှင်းဆီပန်းတွေ မဟုတ်ပြန်ဘူး၊ ပန်းတော့ပန်းပဲ။ ဂန္ဓမာတွေ … ရောင်စုံလည်း မဟုတ်ဘူး၊ အဖြူတွေချည်း သန့်သန့်။ ဂန္ဓမာဖြူ ပွင့်တွေဟာလည်း အပွင့်ထွားထွားကြီးတွေပါပဲ။ လှနေတာပါပဲ။

ဂန္ဓမာပွင့်တွေကိုလည်း တောငှက်ပျောဖက်နဲ့ သေသေသပ်သပ် ထုပ်တယ်။ ရေဖျန်းတယ်။ တန်းလျားဘက်ကို ထွက်ရောင်းတယ်။

“ဟော … ကိုကျောက်စီကြီး … နှင်းဆီပန်း မရတော့ဘူးလား”

“အင်း … ကနေ့ ဂန္ဓမာပဲရလာလို့ … ကောင်းလိုက်တာ၊ ဂန္ဓမာတွေ ယူပါဦး”

“နေပါဦး … ဘယ်ကယူရောင်းတာလဲ”

“ခြံက … သူငယ်ချင်းခြံက … အဝေးကြီးပါဗျာ။ မတတ်နိုင်ဘူးဗျာ၊ တစ်နေ့ နှစ်ဆယ်ကျန်ကျန် အစိတ်ကျန်ကျန် လုပ်ရတော့တာပဲ”

“ကောင်းတာပေါ့ … ဒီအစည်းကြီးက ဘယ်လိုရောင်းတုံး”

“ငါးကျပ်နဲ့ပဲ ယူ”

သည်လိုနဲ့ ဂန္ဓမာတွေလည်း ကုန်သွားတာပဲ။

အဲသည်နေ့ကလည်း ကိုကျောက်စီ မြက်မြက်ကလေးရတယ်။ ငါးဆယ်ကျော်ကျော် ရတယ်။ သည်ကနေ့ တန်းလျားကမိန်းမဆိုင်မှာ သွားမသောက်တော့ဘူး။ ကိုမောင်ကွန့် ဘီအီးဆိုင်ဘက်ကို သွားတယ်။ ပဲခြမ်းသုပ်ကလေးနဲ့ ဘီအီးတစ်ပိုင်းနဲ့ ထိုင်နေလိုက်တာ ညနေခြောက်နာရီကပ်နေပြီ ဆိုတော့မှ ထ တယ်။

အဲသည်ညက ဘီအီးသောက်လာပေမယ့် တဲကိုရောက်တော့ တာဇံနဲ့ပိတ်တယ်။ တော်တော်လေး မူးတော့မှ ရပ်တယ်။

သူ့မျက်နှာကြီးဟာ အဲသည်ညက တော်တော်ကြောက်စရာ ကောင်းနေတယ်။ အရက်မူးနေတဲ့ ဘီလူးတစ်ကောင်နဲ့လည်း တူနေတယ်။ အဲသည်ညက တဲအပြင်မှာ ထိုင်နေရင်းက ပန်းရောင်းရတဲ့ငွေတွေကို ရေတယ်။ တဲခေါင်မိုးမှာ ပိုက်ဆံခေါက်ကို ညှပ်တယ်။

ဘာစိတ်ကူးပေါက်လို့လဲ မသိဘူး၊ ကိုကျောက်စီ တဲရှေ့က ကွင်းပြင်ကို ကြည့်ရင်း ရယ်တယ်။ အားရပါးရကို ရယ်တာ။

တောတွေ၊ တောင်ကမူတွေ၊ ချိမ့်ဝှမ်းတွေ ကြားမှာ အဲသည်ညက ကိုကျောက်စီရဲ့ရယ်သံဟာ ချောက်ချားစရာ ကောင်းနေတယ်။ ကိုကျောက်စီရဲ့ဝမ်းဗိုက်ပေါ်က နဂါးကြီးဟာလည်း အဲသည်ညက မာန်စွယ်တဖွေးဖွေးနဲ့ … တလှုပ်လှုပ်နဲ့ … ထိလိုက်ရင် ပေါက်လိုက်မယ့် အစွယ်တွေနဲ့ … မျက်စောင်းတစ်ချက်ထိုးလိုက်ရင် ပြာဖြစ်သွားလောက်တဲ့ မျက်လုံးတွေနဲ့ …

နောက်နေ့တွေ နောက်နေ့တွေမှာလည်း ကိုကျောက်စီ ပန်းရောင်းထွက်တာပါပဲ။ ညနေတိုင်း တောငှက်ပျောရွက်ကလေးနဲ့ စည်းလာတဲ့ အစည်းထဲမှာ ပန်းတွေသာပြောင်းသွားတယ်၊ ပန်းတွေတော့ ပါတာချည်းပဲ။

တစ်ခါတစ်ခေါက်တော့လည်း ပန်းပြတ်သွားတာလည်း ပါတယ်။ မလာဖြစ်ဘူး။ တစ်ခါတစ်ခေါက်လည်း ဆက်တိုက်ရောင်းဖြစ်နေပြန်ရော။ ပန်းရရင် ရသလို ဆိုပါတော့။

ပန်းတွေကတော့ အမျိုးမျိုးပေါ့လေ။
တစ်ခါတစ်ခါ နှင်းဆီ၊ တစ်ခါတစ်ခါ ဂန္ဓမာ၊ တစ်ခါတစ်ခါ ဖယောင်းပန်း ရိုးတံရှည် အနီ-အဖြူ၊ တစ်ခါတစ်ခါ ဟော်လန်ဒေစီ၊ တစ်ခါတစ်ခါ အာဖရိကန်ဒေစီ … ။

* * *

(၄)

ပထမတော့ ကိုကျောက်စီ ပန်းလာမရောင်းတဲ့ နှစ်ရက်လောက်ကို တန်းလျားစုကလူတွေက သတိမထားမိကြဘူး။ ပန်းမရတဲ့နေ့တွေမှာ ကိုကျောက်စီ လာလေ့မှမရှိတာကိုး။

ကိုကျောက်စီ သောက်နေကျ တာဇံဆိုင်ကလေးကိုလည်း နှစ်ရက်လောက် မရောက်ဖြစ်ဘူး။ ဒါလည်း ကိုမောင်ကွန့် ဆိုင်ဘက် လှည့်နေတာ ဖြစ်မှာပဲ လို့ တွက်လို့ ရနိုင်တာကိုး။

ကိုကျောက်စီ နှစ်ရက်လောက် ပန်းလာမရောင်းတာဟာ ဘာမှလည်း ထူးဆန်းတာမဟုတ်ဘူး။ ဒါပေမဲ့ မဟုတ်ဘူး … အဲသည်ညနေမှာပဲ ချောက်ချားဖွယ် သတင်းတစ်ခုက တန်းလျားခန်းကလေးတွေဆီကို ရောက်လာတယ်။

ကိုကျောက်စီဟာ သူ့တဲကလေးထဲမှာ သေနေတာ နှစ်ရက်ရှိပြီ ဆိုတဲ့သတင်းပဲ။ တိုက်တိုက်ဆိုင်ဆိုင် ယန္တရားကြီးကို စက်နှိုးဖို့ရောက်လာတဲ့ အော်ပရေတာက အလောင်းကိုတွေ့တာ လို့လည်း ဆိုတယ်။ မြေကော်ယန္တရားကြီးကို စက်နှိုးဖို့များ မရှိရင် ကိုကျောက်စီရဲ့ ရုပ်အလောင်းဟာ ဘယ်လောက်အထိ လူမသိသူမသိ ရှိနေမလဲတောင် မသိနိုင်ဘူး။

သည်သတင်းကိုကြားစက တန်းလျားကလူတွေဟာ ငြိမ်သက်သွားကြတယ်။ အင်္ကျီမပါ ဘာမပါနဲ့ မိုးကလေးတဖြောက်ဖြောက်ကြားမှာ ပုဆိုးကြမ်းကလေးခြုံပြီး တင်းတင်းတောင့်တောင့် သေနေတဲ့ ကိုကျောက်စီကိုလည်း သွားကြည့်ကြဖို့ စိုင်းပြင်းကြတယ်။ ကိုကျောက်စီရဲ့ မိခင်ဌာနက တာဝန်ရှိတဲ့လူတွေလည်း ရောက်နေကြတယ်။

ဝမ်းဗိုက်ကြီးဟာ ကျောက်ပျဉ်တစ်ချပ်လို မာကျောစူထွက်နေတဲ့ ကိုကျောက်စီရဲ့ ရုပ်အလောင်းကိုလည်း သယ်ဆောင်သွားကြတယ်။ တန်းလျားကလူ တော်တော်များများဟာ ကိုကျောက်စီရဲ့ တဲကလေးရှိရာ ရောက်နေကြချိန်မှာတော့ အလောင်းမရှိတော့ဘူး။ ဒါပေမဲ့ လူတော်တော်များများရဲ့ မျက်လုံးတွေက ကိုကျောက်စီရဲ့ တဲကလေးနဲ့ ပတ်ဝန်းကျင်ကို အကဲခတ်မိသွားကြတယ်။

ဘာမှတော့ မဟုတ်ပါဘူး၊ ပန်းခြောက်တွေ …
နှင်းဆီပန်းခြောက်တွေ၊ ဂန္ဓမာပန်းခြောက်တွေ၊ ဟော်လန်ဒေစီ ပန်းခြောက်တွေ၊ ဒေလီယာပန်းခြောက်တွေ၊ အင်မတန်များပြားတဲ့ ရေတမာရွက်ခြောက်တွေ၊ လွမ်းသူ့ပန်းခွေလုပ်တဲ့ ဝါးစအဟောင်းတွေ၊ ကြိမ်ခွေတွေ၊ နှီးစတွေ၊ စက္ကူရောင်စုံအစတွေ၊ ဖဲပြားအနက်စတွေ …

အဲသည်မှာတင် လူတွေဟာ ကိုယ့်အခန်းကို ကိုယ် လေရဲ့ပြင်းထန်တဲ့ အဟုန်မျိုးနဲ့ ပြန်လာကြတယ်။ ဘုရားစင်ပေါ်ကပန်းတွေ၊ နတ်စင်ပေါ်ကပန်းတွေကို ဆွဲချကြတယ်။

ဘုရားစင်၊ နတ်စင်တွေကို ရေဆေးကြတယ်။ အမွှေးနံ့သာတွေ ပက်ကြတယ်။ တောင်းပန် တိုးလျှိုးကြတယ်။ ကန်တော့ပွဲတွေ ထိုးကြတယ်။ ရေစင်အိုးတွေ၊ နတ်အုန်းသီးတွေ လဲကြတယ်။ တချို့မိန်းမတွေက ကျိန်ဆဲကြတယ်၊ တချို့မိန်းမတွေက ငိုကြတယ်၊ တချို့မိန်းမတွေက ဒေါသအမျက် ချောင်းချောင်း ထွက်ကြတယ်၊ တချို့မိန်းမတွေက နံ့သာဖြူကရမက် သွေးရင်း ပါးစပ်က တတွတ်တွတ် ရွတ်ကြတယ်။

အဲသည်ညနေက တန်းလျားကလေးမှာ ဆူညံပွက်ထသွားတာ အမှန်ပဲ။

ကိုကျောက်စီ ပန်းမရောင်းလို့ မဝယ်ဖြစ်တဲ့ တာဇံရောင်းတဲ့ မိန်းမက လွဲလို့ ကျန်တဲ့မိန်းမတွေဟာ ကြက်သီးမွေးညင်း ထကုန်ကြတယ်။

တာဇံရောင်းတဲ့မိန်းမက သူ့ဆီမှာ အရက်အကြွေးသောက်နိုင်ဖို့ အတွက် မသန့်တဲ့ပန်းတွေကို မရောင်းဘဲ ကျေးဇူးသိသွားရှာတဲ့ ကိုကျောက်စီရဲ့စေတနာကို အခုမှ သဘောပေါက်သွားတယ်။

ကျန်တဲ့မိန်းမတွေအားလုံးကတော့ စောစောကများသိရင် ကိုကျောက်စီရဲ့ အလောင်းကိုတောင် တစ်စစီ ဆုတ်ဖြဲပစ်ကြတော့မလား မှတ်ရအောင် ဒေါသတွေဖြစ်နေကြတယ်။ အဲဒီအကြောင်းကို ရက် တော်တော်ကြာတဲ့အထိ တချို့က ကြေကြေကွဲကွဲ ပြောကြတယ်။

* * *

(၅)

တန်းလျားခန်းကလေးက လူတွေဟာ သည်ဖြစ်ရပ်ကို မမေ့နိုင်ကြဘူး။

လူဆိုတာကလည်း ခက်သားပဲ။ ဘယ်လောက်ပဲကြာကြာ ကောင်းတဲ့လူတွေကိုလည်း အောက်မေ့ သတိရနေတတ်တယ်၊ ကောက်ကျစ် စဉ်းလဲတဲ့ လူတွေကိုလည်း အောက်မေ့ သတိရနေတယ် မဟုတ်လား။ တန်းလျားက လူတွေအားလုံးဟာ ကိုကျောက်စီကို သတိရနေကြတုန်းပဲ။

(မဟေသီ မဂ္ဂဇင်း၊ အမှတ် ၈၊ ၁၉၉၁ - သြဂုတ်လ)

* * * * *

credit to mmcyber (ငွေဇင်ယော်)