(၁)
ဘဲဥကလေး သုံးနှစ်သားအရွယ်။
မော်လမြိုင်မှ ဘကြီးဇနီး (အကြီးသီ)က ပုသိမ်မြို့သို့ အလည်အပတ်ရောက်လာသည်။ အတိသဉ္စနာဂရ၊ ကုသိမရဠ၊ ပုသိမရဠ၊ နာဂ၀ုလ္လ၊ မင်းသားကျွန်းခေါ် ကော့သမိန် အစရှိသည့်အမည်အမျိုးမျိုး ခေါ်တွင်သည့် ပုသိမ်ဒေသမှာ လည်စရာ ဖူးစရာ ဘုရားတွေက စုံလင်လှသည်။
"မုဠောအစ ပုသိမ်က"ဟု ပြောစမှတ် ပြုကြသည့် အတိုင်း အတွင်းမုဠော ငါးဆူ၊ အပြင်မုဠောလေးဆူ စုစုပေါင်း မုဠော ကိုးဆူရှိလေသည်။ ထိုမုဠောကိုးဆူကို မဇ္စိုမဒေသ၊ ပါဋလိပုတ်ပြည့်ရှင် သီရိဓမ္မာသောကမင်းကြီးက သာသနာ သက္ကရာဇ် ၂၃၉ ခုနှစ်တွင် ပထမဆုံးစ၍ တည်ထားသည်။ ကောဇာသက္ကရာဇ် ၄၅၇ ခုနှစ်တွင် ဒုတိယမြောက် မွမ်းမံပြုပြင်သော ဒါယကာမှာ ပုဂံပြည့်ရှင် အလောင်းစည်သူမင်းဖြစ်၏ ။ ကောဇာသက္ကရာဇ် ၆၂၅ ခုနှစ်တွင် တတိယ မွမ်းမံသူမှာ ပုသိမ် ၃၂ မြို့ကို အစိုးရသော သမုဒ္ဒယောသမင်းနှင့် ဥမ္မာဒန္တီမိဖုရားတို့ ဖြစ်ကြသည်။ ထို့နောက်ပိုင်းတွင် မင်း၊ မြို့စား၊ မြို့ဝန်တို့သာမက ရဟန်းရှင်လူ ပြည်သူအများ ၀ိုင်းဝန်းပြုပြင်ထိန်းသိမ်း စောင့်ရှောက်ခဲ့ကြသည်။
မုဠော ကိုးဆူအနက် အတွင်းငါးဆူမှာ ရွှေအာဏာ၊ ထူပါရုံ၊ ရွှေမုဠော ဘွဲ့တော် သုံးမည်ရ ဘုရားကြီး၊ တကောင်းဘုရားခေါ် မင်္ဂလာစေတီတော်၊ မဟာဗောဓိ စေတီတော်၊ ဆုတောင်းပြည့်ခေါ် သုမင်္ဂလာစေတီတော်နှင့် ကျိုက်ပိမြို့ဟောင်း သုမနစေတီတော်များ ဖြစ်ကြသည်။ အပြင် မုဠော လေးဆူမှာ ကွင်းချောင်းမှ သုမနစေတီတော် ဒါးကချောင်း လက်ယာဘက်ကမ်းမှ ရွှေမြင်တင်ခေါ် သီရိဝဏ္ဏ စေတီတော်၊ ကျောက်ချောင်းကြီးအ၀င် ကမ်းနဖူးမှာ ခိပ္ပဿ စေတီတော်၊ ငါးသိုင်းချောင်း တစ်ဖက်မှ ဖိုးတော်ဘုရားကြီးခေါ် အကျော်ဇေယျပဿထ စေတီတော်တို့ ဖြစ်ကြ၏ ။
(၂)
ဘွဲ့သုံးမည်ရ ရွှေမုဠော ဘုရားကြီးကား ပုသိမ်မြို့သို့ ရောက်လာသူတိုင်း မပျက်မကွက် ၀င်ရောက်ဖူးမြော်ရစမြဲ ဖြစ်သည်။
မော်လမြိုင်မှ ဧည့်သည်တွေနှင့် ရောက်သွားကြသည့်နေ့က တိုက်တိုက်ဆိုင်ဆိုင် ဘုရားရင်ပြင်တော်ပေါ်မှာ လွန်စွာစည်ကားလှသည်။ ပန်းရထားပျံ စက်သီးနှင့် ဆွဲတင်ပြီး စေတီတော်ကြီးကို ရွှေသင်္ကန်းကပ်လှူပူဇော်လျက် ရှိသည်။ ဆိုင်းဝိုင်းကြီးက ဟီးထလျက် ခြိမ့်ခြိမ့်သဲသဲ သွေးထဲမှ မြောက်ကြွလာအောင် တီးမှုတ်ပေးလျက် ရှိသည်။
ဘကြီး ဇနီးက ကောက်ကာငင်ကာ-
"ဟဲ့ …ဘဲဥကလေး သွားကစမ်း" ဟုဆိုသည်။
သုံးနှစ်သား ကလေးကလည်း ဘာဆိုဘာ အကြောက်အလန့်မျှမရှိ။ ဂီတသံကြောင့်လည်း စိတ်တွေ မြူးကြွနေပုံရသည်။ ဆိုင်းဝိုင်းကြီး ရှေ့သို့ ရဲရဲတင်းတင်း တက်သွားပြီး ၀ံ့ဝံ့စားစား ကပြသည်။
ဖြူဖြူဖွေးဖွေး ၀၀ကစ်ကစ်နှင့် ချစ်စရာကောင်းလှသည့် ကလေးလေးက အရွယ်နှင့်မလိုက်အောင် အချိုးကျန ကပြလိုက်သောအခါ ဘုရားလာကြသူတွေအားလုံး ရင်သပ်ရှုမော အံ့သြချီးမွမ်းခဲ့ရလေတော့သည်။
(၃)
ဘဲဥကလေးသည် ကျောင်းစနေတော့ ပုသိမ်မြို့ ဥမ္မာဒန္တီလမ်းရှိ အမှတ်၂၀ အခြေခံပညာ မူလတန်းကျောင်းမှာ ဖြစ်သည်။
ပြည်တော်သာအိမ်ရာနှင့် တစ်ကွေ့လေးပဲ ခြား၍ ဘာမှအလှမ်းမဝေးကွာ။ အစဦးတစ်ရက်မှာ ဦးထွန်းမြင့်နှင့် ဒေါ်မြရင်တို့ လင်မယားနှစ်ယောက်ကျောင်းအုပ်ဆရာကြီး ဦးအုန်းကြည်ထံ ကိုယ်တိုင်သွားအပ်နှံသည်။ ၀န်ထမ်းများဖြစ်၍ အမြဲလာမကြည့်နိုင်ပါ။ စောင့်ရှောက်ထားပေးပါဟု မေတ္တာရပ်ခံရသည်။
ထိုစဉ်က ကျော်မြင့်လွင်ကလေးသည် ငါးနှစ်ပြည့်ရန် နှစ်လလိုသေးသည်။ ကျောင်းဆရာကြီးလက်ထဲ အပ်နှံပြီး နောက်နေ့တွေက စ၍ အိမ်နီးနားချင်း ၀န်ထမ်းသားသမီးများအချင်းချင်း အကြီးအငယ် ဖေးမပြီး ကျောင်းတက် ဆင်းကြသည်မို့ သူ့ဘာသာအဆင်ပြေကာ နေတော့သည်။
(၄)
ကျော်မြင့်လွင်လေးသည် ကျောင်းစာမညံ့။
သီချင်းကတော့ ငယ်စဉ်လေးကတည်းက ပါရမီ ဗီဇအစွမ်းအစပြခဲ့သည်။ သုံး-လေးနှစ်သား အရွယ်လောက်ကပင် သန်းထွန်းလေး၏ "မမေ့သောအညာ" "မမပုသိမ်သူ" "မန်းကေသီ" တွေ အစအဆုံး အလွတ်ဆိုနိုင်နေပြီ။
အိမ်မှာက ယိုးဒယားဘက်မှ ၀င်လာသော One Band ရေဒီယိုလေး တစ်လုံးရှိရာ ရေဒီယို နားထောင်ရမည်ဆိုလျှင် သူဘယ်သောအခါမျှ မငြီးငွေ့။ ၀င်းဦး သီချင်းတွေလည်း သူ သိပ်နှစ်သက်သည်။ တောသားကြီး ခင်မောင်ရင်ဆိုလျှင်လည်း အသည်းစွဲ။ သန်းထွန်းလေးက သူကောင်းစွာ စွဲလန်းကျင်လည်သည့် နယ်ပယ်ထဲမှာ ရှိနေသည်။
ကျောင်းကျန်းမာရေးဆေးခန်းသို့ ချီပိုးခေါ်သွားလျှင် ဟိုက ဆရာဝန်၊ ဆရာမ ၀န်ထမ်းများက
"ဘဲဥကလေး သီချင်းတစ်ပုဒ်လောက် ဆိုပြပါဦး" ဆိုလျှင် အကျအနပင်
"မွေးဌာနီ--
အညာရပ်ဆီသို့
ရော်ရည်မျှော်မှန်း
စိတ်ဝယ်တမ်းတ
မှန်းဆကာရည်
တမ်းတပါသည်" အစချီပြီး စိတ်ပါလက်ပါ ဆိုတတ်သည်။
"လှည်းလမ်းကြောင်း တစ်လျှောက် ဖုန်လုံးကြီးတွေ တလိပ်လိပ်တက်ကာ မြင်ယောင်သေးတော့သည်။ အညာဌာနီ.. တစ်ခါလာမည်..ကျွန်တော့်အတွက်တော့ မေ့မရပါလေပြီ.."
အားလုံးပင် လက်ခုပ်တီးပေးမိကြသည်။ လက်ခုပ်သံစည်းဝါးထဲမှာ ကလေးငယ် သီဆိုသည့် သီချင်းအချို့က လွမ်းစရာ။
"ကျုံးတော်မယ်..ရွှေကြာတင့်တယ်..ခုချိန်ဝယ်..ဗေဒါဝံ့ထည်..နန်းတော်မြို့ရိုးကြီးနဲ့ ရင်တားပစ္စင်စုံညီ… တောင်ပြင်တံခါးဝကို..ကျွန်တော်တွေးကာ..ငေးမိသည်.."
ကလေးလေးပင် ဖြစ်လင့်ကစား အသံအဖြတ်အတောက် အဆွဲအငင် အရှိုက်အသွင်း အားလုံးမှန်ကန်နေသောကြောင့် အားလုံးအံ့သြရသည်။
လေအတိုက်မှာ ကြွေလိုက်သည့် လက်ပံပွင့်တွေ လေယဉ်ပမာတ၀ဲဝဲ လွင့်ရတာ။ ရိုးတံကြဲကြဲနေပူထဲတွင် ရွှေခြေကျင်းနှင့် တစ်မျိုးလေး လှကြသော ရွှေညာသူ ညိုပြာချောတို့ စက်ဘီးလေးများ ကိုယ်စီ စီးသွားကြတာ အတွေးမှာ တကယ်မြင်ယောင်လာစေသည်။
ကြားသူတိုင်း ထိရှ ခံစား နှစ်သက် ချီးမွမ်းကြသည်။
"မမ ပုသိမ်သူ" ဆိုလျှင်လည်း …
"ဂီတကိုလည်း ချစ်လေသူ မမပုသိမ်သူ ။ ကျန်းမာရေးလည်း လိုက်စားသူ မမပုသိမ်သူ ။ ရွှေမုဠောဘုရားမှာ လပြည့်လကွယ် နံနက်တိုင်း မေမြို့ပန်းကပ်လှူ … ကျွန်တော့်မမ … မမ ပုသိမ်သူ။ ပုသိမ်ထီးလေးနဲ့ ရုံးသွားရုံးပြန် ယဉ်တယ်တမူ … ပုသိမ်ထိပ်ထား အလှဘွဲ့ကိုလည်းယူ" ဟု ပီပီပြင်ပြင်ဆိုပြတတ်သည်။
"သိကျွမ်းရတာ အမြဲဂုဏ်ယူပါတယ်…. မမ ပုသိမ်သူ" ဟု ဆိုလိုက်လျှင်ဖြင့် အားလုံး ရယ်မောရွှင်ပြ သဘောကျကြလေတော့သည်။
(၅)
အမေဒေါ်မြရင်က ပွဲအလွန်ကြိုက်သူမို့ ကျော်မြင့်လွင်လေး အပါအ၀င် ကလေးတွေ အားလုံး ပွဲကြိုက်ကြသည်။ တစ်ခါတစ်လေလည်း တစ်ညလုံးစာ ဖျာဝယ်ကြည့်ကြသည်။ များသောအားဖြင့်တော့ တစ်ဝက်ကျမှ ဖြတ်ပြီး ၀င်ကြည့်ကြသည်။ ထိုအချိန်ကျလျှင် ပွဲတစ်ဝက်ပဲကျန်သည်။ မိုးလင်းအထိ မကြည့်နိုင်သူ ပရိသတ် အချို့တ၀က်တို့ အိမ်ပြန်ကြပြီ ဖြစ်၍ ရုံပွင့်နေပြီ။
အဖေက ကလေးတွေကို စက်ဘီးနှင့် တစ်တွဲပြီး တစ်တွဲပို့ပေးသည်။
ကျော်မြင့်လွင် ကလေးကတော့ အဆို အက အငို အပြောတွေနှင့် ခမ်းနားမြိုင်ဆိုင်စွာ တင်ဆက်သည့် နောက်ပိုင်းဇာတ်ထုပ်ကြီးတွေကို သိပ်ကြိုက်သည်။ ပွဲသိမ်း၍ မိုးလင်းလုနီး ဝေလီဝေလင်းမှာ မျက်လုံးတွေ ဖန်စပ်ပြီး သားအမိတစ်တွေ ပြန်လာကြစဉ်လမ်းတွင် ဇာတ်ထဲက စာသားအပိုင်းအစတွေကို ကျော်မြင့်လွင်ကလေးက သံနေသံထားနှင့် ရွတ်ဆိုပြတတ်သည်။
(၆)
အတန်းထဲမှာ ဘယ်တုန်းကမှ မညံ့ခဲ့သော ကျော်မြင့်လွင်ကလေးသည် ဒုတိယတန်းကျတော့ ဘာကြောင့်မှန်းမသိ။ အမှတ်တွေ နည်းသွားသည်။
ရီပို့ကတ်ကို စစ်ကြည့်သောအခါ လစဉ်စစ် စာမေးပွဲတွေမှာ အမှတ်တွေထိုးကျပြီး ပထမအစမ်းစစ်၊ ဒုတိယ အစမ်းစစ်တွေ၌ အမှတ်တွေက ကောင်းနေကြပြန်သည်။ သို့ဖြစ်၍ အဖေက-
"ဘယ်လိုဖြစ်တာလဲ။ ဘာကြောင့်လဲ "ဟု အကျိုးအကြောင်း မေးမြန်းကြည့်သည်။
ထိုအခါကျမှ မျက်စိ အဝေးမှုန်နေတာ ပေါ်ပေါက်လာတော့သည်။
လစဉ်စစ် စာမေးပွဲတွေမှာ မေးခွန်းကို အတန်းတွင်းကျောက်သင်ပုန်းပေါ်တွင် ရေးပေးထား၍ ထိုင်ခုံနေရာမှ လှမ်းမမြင်ရ။ ထထ သွားကြည့်၊ ပြန်ပြန် လာပြီး ဖြေရသည်။ အချိန်က မမီ။
သင်္ချာဆိုလျှင် ကျကို ကျနေတော့သည်။
ပထမ၊ ဒုတိယ အစမ်းတွေကျတော့ မေးခွန်းကို လှိမ့်ပြီး တစ်ယောက်ချင်းကို တစ်ရွက်စီ ဝေငှပေးကာ စစ်ဆေးသောကြောင့် ကောင်းကောင်း မြင်ရသည်။ ထိုအခါ အမှတ်တွေလည်း ထိပ်ဆုံးမှာပဲ ရှိတော့သည်။
(၇)
မျက်စိ မှုန်သည့် ပြဿနာ အရင်းအမြစ်ကို ဖြေရှင်းဖို့က ထိုအချိန်အခါက ပုသိမ်မြို့မှာ မျက်မှန် လုပ်မရသေး။ သို့ဖြင့် ရန်ကုန်သို့ အကူးတကန့် ခေါ်လာရသည်။
ပန်းဆိုးတန်း ကုန်တိုက်မှာ မျက်စိ စစ်ဆေးသည်။ စစ်ကြည့်လိုက်တော့ ပါဝါက လေးရာ နီးနေပြီ။ စစ်ပေးသည့် ပုဂ္ဂိုလ်က “ကလေးကိုဒီလောက်အထိ ကြာအောင် ပစ်ထားရကောင်းလား” ဆိုပြီး ဆူပူ အပြစ်တင်သေးသည်။
မျက်မှန် ရဖို့ကတော့ဖြင့် နောက်ထပ် ခြောက်လ နီးပါး ထပ်မံ စောင့်စားရသေးသည်။ ထိုအချိန်မှ စ၍ ကျော်မြင့်လွင်ကလေးလည်း မှန်ထူထူနှင့် ကူကြည့်ရသည့် ဘ၀သို့ ကျရောက်ခဲ့ရတော့သည်။ သွားလေရာရာ ကလေးတွေ ကြားထဲမှာ မျက်မှန်ထူ တ၀င်းဝင်းမို့ ထင်းခနဲ သိသာနေတော့သည်။
(၈)
တတိယတန်း ရောက်သောအခါ ကျောင်းမှာ ပုံပြော ပြိုင်ပွဲ ကျင်းပသည်။ အတန်းပိုင် ဆရာမကလည်း အတန်းထဲမှာ ပုံပြင် ထပြောနေကျ ကျော်မြင့်လွင်လေးကို ပုံပြော ပြိုင်ဖို့ ရွေးချယ် လိုက်လေသည်။
အိမ်ပြန် လာပြီး ထိုအကြောင်းကို ပြောပြတော့ အဖေနှင့် အမေကလည်း သဘောကျသည်။ ဦးထွန်းမြင့်က စိတ်ကူးတစ်ခု ရ၍ "ကြွက်ကလေးက သေးပေမယ့် ခြင်္သေကို ကယ်တင်သော" ပုံပြင် တစ်ပုဒ်လုံးကို နဘေလေးတွေ၊ ကာရန်လေးတွေနှင့် စပ်ဟပ်ပြီး အစအဆုံး ပြန်ရေးပေးသည်။
ကျော်မြင့်လွင်လေးက အဆိုပါ အဖွဲ့အနွဲ့ကို စိတ်ပါလက်ပါ သေသေချာချာ လေ့ကျင့်သည်။ ပုံပြင် ပြိုင်ပွဲတွင် သူ ပြောသည့် အသံက အသံနေ အသံထား အဖိအဖော့ အဆွဲအငင် မှန်ကန်သည်။ စိတ်ဝင်စားအောင် ဆွဲဆောင် သွားနိုင်သည်။ ပုံပြင် ဖွဲ့စည်း ထားပုံကလည်း ကာရန်နဘေလေးတွေ ဖြစ်၍ ကြားနေကျ အတိုင်း မဟုတ်ဘဲ အဆန်းတကြယ် ဖြစ်နေသည်။
ဤသို့ဖြင့် ပထမဆု ရရှိခဲ့လေသည်။
(၉)
လေးတန်း စာမေးပွဲ အောင်မြင် ပြီးတော့ အမက ၂၀ မှ အထက ၃ သို့ ပြောင်းသည်။ အထက ၃ ကလည်း ပြည်တော်သာနှင့် ဘာမျှ သိပ်မဝေး။ တစ်ရက်ပဲ ကျောင်းသွား အပ်ပြီး နောက်ပိုင်းမှာ လိုက်ပို့စရာ မလိုတော့ချေ။
ကျော်မြင့်လွင်လေးသည် ရန်မဖြစ်တတ်။ စာတော့ ဖတ်သည်။ သတင်းစာတွေ့ သတင်းစာ ဖတ်သည်။ အိမ်မှာ အဖေ ဖတ်သမျှ မဂ္ဂဇင်း လိုက်ဖတ်၊ ၀တ္ထု လိုက်ဖတ်သည်။ အိမ်မှာက ပုဂံစာအုပ်တိုက်ထုတ် ဆရာ မြသန်းတင့်၏ စစ်နှင့် ငြိမ်းချမ်းရေးလို ဂန္တ၀င်စာအုပ်တွေ ရှိသည်။ အင်္ဂလိပ် ဂျာနယ်များ ဖြစ်သော ညူးစ်ဝိခ်၊ တိုင်းမ်စ်၊ ရီးဒါးဒိုက်ဂျက်စ် စာအုပ်တွေ ရှိသည်။ စာအုပ်နှင့် ပတ်သက်လျှင် ဘာစာအုပ်ပဲ ဖတ် ဘာစာအုပ် မဖတ်နှင့် ဆိုသည့် ကန့်သတ်ထားချက် မရှိချေ။
သူ့ကို ကျူရှင် မထား။ High School Grammer စာအုပ်ကို ညက်ညက်ကြေအောင် Cover to Cover အဖေ ကိုယ်တိုင် သင်ပေးထားခဲ့သည်။ ဤသို့ဖြင့် တော်တော် ကောင်းသည့် အခြေခံများကို ရရှိ သွားခဲ့သည်။
(၁၀)
၁၉၇၅ ခုနှစ်။ ကျော်မြင့်လွင်လေး ၁၂ နှစ်သား အရွယ်။
ပုသိမ်မြို့တွင် ထူးထူးခြားခြား ကြုံရသည်။ ရှေးဦးစွာ မေလ ၃ ရက် စနေနေ့တွင် သုံးရက် တိုင်တိုင် ပင်လယ်ငှက်ကြီးများ အုပ်လိုက်အုပ်လိုက် ပျံဝင် လာကြသည်။ ဧရာမ ပင်လယ်ငါးကြီး နှစ်ကောင်ကလည်း ပုသိမ်မြစ်ထဲ အထိ ၀င်လာသည်။ ရွှေမုဋ္ဌော ဘုရား ရင်ပြင်တော်ပေါ်အထိ ရောက်အောင် လိပ်တွေ၊ လိပ်တွေ အစုအဝေးလိုက် တက်လာကြပြန်သည်။ ပင်လယ်ရေပြာများကလည်း ပုသိမ်ဆိပ်ကမ်းတစ်လျှောက် ပြာနှမ်းစွာ ရောက်ရှိ ဖြစ်ပေါ်နေခဲ့သည်။
မကြုံစဖူးမို့ ကျော်မြင့်လွင်လေးတို့ တစ်မိသားစုလုံး အပါအ၀င် ပုသိမ် မြို့သူမြို့သားများ အံ့အားတွေ သင့်ပြီး အဆန်းတကြယ် အထူးအဆန်း သွားကြည့်ရသည်။
(၁၁)
မေလ ၇ ရက် ဗုဒ္ဓဟူးနေ့မှာတော့ ပုသိမ်မြို့တွင် စံတင်လောက်အောင် မကြုံစဖူး ထူးကဲလှသည့် လေမုန်တိုင်းကြီး ကျရောက်ခဲ့သည်။ ထိုစဉ်က လေတိုက်နှုန်းမှာ တစ်နာရီ မိုင်တစ်ရာ (အချို့ အဆိုအရ မိုင် ၁၂၀) နှုန်းမျှ ရှိသည်။
ကျော်မြင့်လွင်လေးက မုန်တိုင်းကို ကြောက်ရကောင်းမှန်း မသိ။ တရွှီရွှီ တ၀ီဝီ မြည်နေသည့် လေတိုက်သံကိုပင် ကြမ်းတမ်းစူးရှသော ဂီတသံစဉ် တစ်ခုလို သဘောထားသလား မပြောတက်။ သစ်ပင် ပြိုလဲကျသံ၊ အမိုး လန်ထွက်သံ၊ လေထဲက အသံ၊ မြေပြင်က အသံများကို တွေးတွေးဆဆ နားစွင့်နေခဲ့သည်။
ထိုစဉ်က ထူးထူးခြားခြား ပဲပြုတ်သည် အဒေါ်ကြီး တစ်ယောက်က မနက် မိုးလင်းတိုင်း ဈေးရောင်း မပျက်ခဲ့။ ကျော်မြင့်လွင်လေးကလည်း တစ်နေရာရာ သွားစရာ ရှိလျှင် အလန့်အကြောက် မရှိ။ မိုးထဲလေထဲ သွားပေး လာပေးသည်။ ပဲပြုတ်သည် အဒေါ်ကြီး အသံ ကြားရချိန် အိမ်ပြင်ထွက် ဈေးဝယ်ဖို့ ကျော်မြင့်လွင်ပဲ ဆင်းသွားတတ်သည်။
ခြောက်နှစ်သား ကျော်မြင့်လွင်၊ပုသိမ် ဗဟို ဓါတ်ပုံတိုက်
ကျော်မြင့်လွင်နှင့် ညီမလေး မိမိုး
ကျိုက္ခမီဘုရား
မိသားစု သိုက်သိုက်ဝန်းဝန်း
ညီအစ်ကို မောင်နှမတွေ ဗုံကလေးများ တန်းစီထားသည့်ပမာ
အခန်း (၄)
မွေ့လျော်ရင်း ရုန်းကန် အားပြိုင်ခြင်း
(၁)
ကျော်မြင့်လွင်လေး ခုနှစ်တန်း အောင်သည့်နှစ်။
နွေရာသီ ကျောင်းပိတ်ရက်တွင် ဘင်ခရာ တီးဝိုင်းရှိ၍ မိဘတွေက ထည့်ပေးထားလိုက်သည်။ တီးဝိုင်းကို ဦးဆောင် ဖွဲ့စည်းသူ ဦးကျောက်စိမ်းသည် ယခင်တရုတ်တီးဝိုင်းတွင်
်တီးမှုတ် လာခဲ့သူဖြစ်၍ ဂီတကို အခြေခံကျကျ ကောင်းစွာ တတ်ကျွမ်းသည်။ နုတ်စ်များနှင့် စနစ်တကျ သင်ပြပေးနိုင်သည်။
ကျော်မြင့်လွင်လေးက ဘင်ခရာဝိုင်းမှာ ပလွေ မှုတ်သည်။ သူ့ကို ကြည့်ရတာ သိပ်ကို စိတ်ပါလက်ပါ ရှိလှသည်။ ထူးထူးခြားခြား မြူးကြွနေခဲ့သည်။ သင်တန်းက သင်ယူလာသမျှ အိမ်မှာ ပြန်လာပြီး အားရပါးရ တီးမှုတ်ပြတတ်သည်။ သင်တန်းက ဒရမ်တီးလည်း သင်ပေးသည်။
ရေဒီယိုမှ မြန်မာ့အသံ အင်္ဂလိပ်ပိုင်း၏ နောက်ဆုံး အစီအစဉ် ဖြစ်သော Local talent အစီအစဉ်မှာ ပုလဲ၊ နွဲ့ယဉ်ဝင်း၊ ညိုညိုရိမ်၊ ဘိုဘိုဟန် တို့ကို စွဲစွဲ မြဲမြဲ နားထောင်တတ်လာသည်။
(၂)
ဆရာ ဦးကျောက်စိမ်းက ပါရမီ ဓာတ်ခံ ရှိသော ကျော်မြင့်လွင်လေးကို ချက်ချင်း မျက်စိ ကျခဲ့သည်။ ကျော်မြင့်လွင်လေးဘက်ကလည်း လိုလိုချင်ချင် ရှိနေ၍ သူ့ကို ဂီတပညာတွေ များစွာ သင်ပေးခဲ့သည်။
ငပုတော ဘက်မှာ ဘင်ခရာတီးဝိုင်း ဖွဲ့ဖို့ သင်တန်း သွားပေးရသော အခါမှာတော့ ကျော်မြင့်လွင်က ဆရာ့ လက်ထောက်ဖြစ်နေပြီ။ အချို့ သင်ခန်းစာတွေဆို ဆရာက မသင်ပြ။ သူ့ကိုပဲ ပြသ ပေးစေခဲ့သည်။
(၃)
ကျော်မြင့်လွင်(ဘဲဥ) နှင့် ညီမလေး မိုးတို့ အကြီး နှစ်ယောက် တစတစ အရွယ် ရောက်လာသည်နှင့် အမျှ အငယ်လေးတွေကို သူတို့ပဲ တာဝန်ယူ ထိန်းပေးကြသည်။
အဖေ၊ အမေတို့က မနက် အလုပ်ဆီ ထွက်သွား။ ညနေ အလုပ်ဆင်းအပြီး သမ ဆေးခန်း ၀င်ထိုင်၊ ည ၇ နာရီလောက်မှ အိမ်ပြန် ရောက်လာတတ်သည်။ ညီအစ်ကို မောင်နှမတွေ တစ်ယောက်ကို တစ်ယောက် ဆင့်ကဲ ဆင့်ကဲ ထိန်းပေးထားကြသည့်အတွက်ကြောင့် အဆင်ပြေရလေသည်။
ပြည်တော်သာ ရပ်ကွက်ကလည်း ၀န်ထမ်း မိသားစုတွေချည်းသာ။ အားလုံး ကိုယ့်နည်းနှင်နှင် ဘ၀တူတွေ ဖြစ်၍ စည်းလုံးကြသည်။ သို့ဖြင့် အရပ်ကို ဆွေမျိုးလို သဘောထားပြီး အပ်နှံ ထားရသည်။ သူ့အိမ် ကိုယ်ကြည့်၊ ကိုယ့်အိမ် သူကြည့်နှင့် ၀ိုင်းကြ ၀န်းကြစမြဲ ဖြစ်သည်။
(၄)
ကျော်မြင့်လွင် ကိုးတန်း အတက်မှာ ရှင်ပြုဖြစ်သည်။
ထိုစဉ်က ဦးထွန်းမြင့်၏ ဘကြီးလည်း ပုသိမ်မှာ တာဝန်ကျနေသည်။ ဘကြီး၏ ခယ်မများ ဖြစ်ကြသော ဒေါ်ခင်စိန်၊ ဒေါ်မြခင်တို့မှာ အပျိုကြီးများ ဖြစ်ကြ၏။ ဤအဒေါ်တွေက ကျော်မြင့်လွင်ကို လွန်စွာ ချစ်ကြသည်။
တစ်နေ့တော့ -
"ဘဲဥကို ရှင်လောင်း ဒကာအနေနဲ့ ငါတို့ပဲတာဝန်ယူပြီး သင်္ကန်း စည်းပေးချင်တယ်။ မင်းတို့က မိဘတွေ။ ဘယ်တော့ ထပ်ပြုပေးပေးရတယ်။ ဒီတစ်ခေါက်တော့ ငါတို့ပဲ ကမကထ လုပ်ပါရစေ" ဟု ဆိုရှာကြသည်။
ဤသို့ဖြင့် ဒီဇင်ဘာကျောင်းပိတ်ရက်တွင် ပုသိမ်မြို့ ကုန်သည်လမ်း မရမ်းကျောင်းတွင် ကိုရင် ၀တ်ဖြစ်ခဲ့၏။ အခြား ဒုလ္လဘ ရဟန်း နှစ်ပါးလည်း အဖော် ပါသည်။
ကျောင်းက မိုးကုတ် ၀ိပဿနာ အခြေခံသော ကျောင်းဖြစ်သည်။ အမရပူရမြို့ မင်္ဂလာတိုက်ဟောင်း ကျေးဇူးတော်ရှင် အဂ္ဂမဟာ ပဏ္ဍိတ မိုးကုတ်ဆရာတော် ဘုရားကြီး၏ လမ်းစဉ် အတိုင်း လိုက်နာသည်။ သို့ဖြစ်၍ ကျော်မြင့်လွင် ရှင်ပြုပြီးနောက် တစ်ဆက်တည်းပင် တရားစခန်း ဆယ်ရက် ၀င်ရသည်။.
တရားစခန်းတွင် ပဋိစ္စသမုပ္ပာဒ် လည်ပုံ၊ ဖြတ်ပုံကို ကျေညက်အောင် သင်ကြား ပြသပေး၍ ကျော်မြင့်လွင်လေးမှာ အခြေခံကောင်းတွေ ရရှိလာခဲ့သည်။ ဗုဒ္ဓတရားတော်၏ အကြောင်းအကျိုး ဆက်စပ် ဆင်ခြင်ရပုံ သဘော အနှစ်သာရကို အတော်လေး သိမြင်သွားခဲ့သည်။
(၅)
ဆယ်ရက် ပြည့်၍ လူထွက်လာခဲ့ရသော်လည်း တရား ဓမ္မ၏ အရသာကို သူ မမေ့။
"အဖေတို့၊ အမေတို့၊ ကျွန်တော်တို့ အားလုံးက သံသရာ ခရီးသည် ရေမျောလာတာနဲ့ တူတယ်။ ကျွန်တော်တို့ မျောလာတဲ့ သံသရာမြစ်နားမှာ အမြစ်က ရေလှိုက်စားထားလို့ မခိုင်ဘဲနဲ့ အရွက်တွေ အကိုင်းတွေက ရေဘက်ကို ကိုင်းပြီး ယိုင်နေတဲ့ ခန္ဓာငါးပါး သစ်ပင် ရှိတယ်" ဆိုသော စကားမျိုးတွေ ပြောတတ်လာခဲ့သည်။
"သံသရာ ခရီးသည်ကလည်း မျောလာခဲ့တာ အတော် ကြာပြီ။ မျောလာတဲ့ ပုဂ္ဂိုလ်က အားကိုးရာ ရှာမှာပဲ။ ရှာတဲ့ အခါကျတော့ ဖျတ်ဆို ခန္ဓာငါးပါးထဲက ရူပက္ခန္ဓာ ဆိုတဲ့ကမ်းနား သစ်ပင်ကို ဆွဲလိုက်တယ်။ ဆွဲတဲ့ လူကလည်း တအားကုန် အပေါ်တက်ချင်လို့ တဏှာ၊ ဥပါဒါန်နဲ့ တအားဆွဲ။ ဟိုဘက်ကလည်း အမြစ် မရှိတော့ သစ်ပင်ရော မြေစိုင်ပါ ဆွဲတဲ့သူအပေါ် ပြုတ်မကျဘူးလား"ဟု သူမေးတတ်လာသည်။
အိမ်က လူတွေ စိတ်မျက်စိထဲ ကွင်းကွင်းကွက်ကွက် ပေါ်လာအောင် သူ ရှင်းပြနိုင်သည်။
တစ်ဆက်တည်း -
"အဲဒီလို ပြုတ်ကျတဲ့ အခါကျတော့ နဂိုက အမျောသမားအပေါ်မှာ သစ်ပင်ကြီး တစ်ခုလုံးနဲ့ မြေစိုင်တွေပါ ပိကျလာတော့ မြုပ်သွားဖို့ပဲ ရှိတော့တာပေါ့၊ သံသရာ မြစ်ကြီးထဲမှာ အမျောသမား ဆိုတာက အပေါ်ပိုင်း ဟိုဘ၀၊ ဒီဘ၀တွေ ပြောင်းလဲကျင်လည်ရတာ၊ အမြုပ်သမား ဆိုတာကတော့ အပါယ်လေးဘုံကို သွားရတာ၊ အမြုပ်သမားဘ၀က တစ်ခါ ရုန်းကန် တက်လာပြန်တော့ အမျောသမား အဖြစ် ရောက်ရပြန်တာပဲ၊ ကဲ၊ အဖေတို့၊ အမေတို့ စဉ်းစားကြည့်။ ဘယ်လောက် ကြောက်စရာ ကောင်းသလဲ၊ ဒါဖြင့် နိဗ္ဗာန်ဆိုတဲ့ သောင်ကမ်းကို ရှာပြီး တက်နိုင်မှပဲ မျောလိုက်၊ မြုပ်လိုက် ဘ၀ကနေ လွတ်နိုင်တော့မှာပေါ့" ဟု တရားချသည်။
ရှင်လူထွက်စ ကျော်မြင့်လွင်သည် အဖေနှင့် အမေကို တရားစခန်းဝင်ဖို့ချည်းပဲ တစ်ချိန်လုံး တိုက်တွန်းသည်။
(၆)
အဖေနှင့်အမေကတော့ တရားဓမ္မဘက်ခြေဦး မလှည့်ဖြစ်။ မလှည့်နိုင်အားသေး။
ကိုယ့်အလုပ်ထဲမှာပဲ ကိုယ်ပျော်နေကြသည်။ ကျောင်းကျန်းမာရေအလုပ်ကလည်း သူတို့လိုပင်ကိုသဘာဝ အေးအေးလူလူများနှင့်ကိုက်သည်။
အားရက်ဆို ပုသိမ်မြို့အနီးဝန်းကျင်က ကျေးရွာတစ်ရွာရွာဘက်သို့ ထွက်ပြီး ကျောင်းကျန်းမာရေး ဆရာဝန်အဖွဲ့နှင့် ဆေးသွားကုပေးကြသည်။ ထိုအခါကျလျှင် သွားဆရာဝန်ကလည်း ပါတတ်သည်။ ရွာဘုန်းတော်ကြီးကျောင်းဇရပ်တစ်ဆောင်မှာ အခြေချပြီး ကျန်းမာရေးပညာပေး ဟောပြောဆေးကုပေးကြသည်။
နှုတ်ခမ်းကွဲကလေးတွေ၊ မွေးရာပါ နှလုံးဝေဒနာရှင်ကလေးလေးတွေ ရန်ကုန်အထိ သွားရောက်ပြီး ဆေးကုသမှုခံယူနိုင်အောင် စီစဉ်ပေးရသည်။
တစ်ခါတစ်လေကျတော့ အချို့သောကလေးငယ်များခမျာ ညစ်ပတ်ပေတူးနေသော အင်္ကျီကိုပင်လဲစရာ မရှိတာနှင့် ကြုံရသည်။ ထိုအခါ ပုသိမ်ဈေးထဲက အင်္ကျီ ၀ယ်လာပေးရသည်။ အဲသလိုအလုပ်ထဲမှာ ပျော်နေမိကြသည်။
တစ်ဘက်မှာက သားသမီးတွေအရေး၊ စားဝတ်နေရေး။ ဘ၀ထဲမှာ မွေ့လျော်စွာ ရုန်းကန်နေကြသည်ဆိုတော့ သားက တရားစခန်းဝင်ဖို့ပြောလည်း ကိုယ့်မှာ အချိန်မပေးနိုင်သလို ဖြစ်ခဲ့ရလေသည်။
(၇)
ထိုကာလတွင် လူငယ်တွေအကြားမှာ ဂီတာအကြီးအကျယ်ခေတ်စားနေပြီ။
ကျော်မြင့်လွင်က ဂီတာလိုချင်သော်လည်း အိမ်ကိုမ၀ယ်ခိုင်းရဲ။ တစ်ခါမှလည်း ဖွင့်မပြော။ ကျော်မြင့်လွင်က ကျောင်းဘင်ခရာတီးဝိုင်းမှာကတည်းက ဂီတ
အခြေခံနုတ်စ်များအထိ ပိုင်နိုင်တတ်ကျွမ်းထားသူမို့ ဂီတာတီးဖို့ ဘာအခက်အခဲမျှမရှိ။ သူငယ်ချင်းတွေ ဒေါင်ဒေါင်ဒင်ဒင်တီးခတ်သီဆိုနေတာကို သူ့အနေနှင့် အလိုက်သင့်ပင် တီးခတ်သီဆိုနိုင်ခဲ့သည်။
သို့သော် ကိုယ်ပိုင်မရှိတော့ လက်ဆုပ်လက်ကိုင်မရ။
(၈)
ကိုးတန်းစာမေးပွဲပြီးသောအခါ ရန်ကုန်မြို့သို့ အလည်အပတ်သွားခဲ့သည်။ ဦးထွန်းမြင့် အစ်မ ဒေါ်ညွန့်ညွန့်၏ ခင်ပွန်းက ရန်ကုန်မီးရထား (STI)အချက်ပြနှင့် ကြေးနန်း အင်စပက်တာ။
အဆိုပါ ဦးလေးနှင့် အဒေါ်တို့အိမ်ကို ကျော်မြင့်လွင်သွားဖြစ်တော့ ညီအစ်ကိုဝမ်းကွဲတော်စပ်သူ ကိုအောင်မျိုးဆန်းဆီမှာ ဂီတာတစ်လုံးရှိနေသည်။ ကျောင်းပိတ်ရက်လည်း ကျောင်းပိတ်ရက်မို့ သူတို့ညီအစ်ကိုနှစ်ယောက် ဂီတာလွတ်လွတ်လပ်လပ်တီးခွင့် ရရှိခဲ့ကြသည်။
ဂီတာပေါ်မှာ သူအရူးအမူးဖြစ်နေတာကို ကြည့်ပြီး ပုသိမ်ပြန်မည်ဆိုတော့ ထိုဂီတာအဟောင်းအနွမ်းလေးကို သူနှင့်အတူ ထည့်ပေးလိုက်ကြသည်။
(၉)
ကျော်မြင့်လွင် ဆယ်တန်းအတက်နှင့်ဂီတာ။
တွေ့ကြပါချေပြီ။
ဂီတာတစ်လုံးနှင့် သူငယ်ချင်းအပေါင်းအသင်းတွေနှင့်။ တရုန်းရုန်းဖြစ်စပြုလာသည်။ ထိုအခါ သူ့တုန်းက ဂီတ၀ါသနာပါလှပါသည်ဆိုသော ဖခင်ဦးထွန်းမြင့်ပင် လက်မခံနိုင်။
ကျော်မြင့်လွင်က သားကြီး သြရသလည်းဖြစ်သည်။ စာတော်ပြီးသား၊ ထူးချွန်ပြီးသားဖြစ်သည်။ သားကို ဆရာဝန်၊အင်ဂျင်နီယာပဲ ဖြစ်စေချင်သည်။ အထူးသဖြင့်ကတော့ ကိုယ်တွေက ကျန်းမာရေးဝန်ထမ်းများပီပီ သားကိုဆရာဝန်ပို၍ ဖြစ်စေချင်သည်။ သူ့မှာက ဖြစ်ထွန်းနိုင်လောက်သည့် အရည်အချင်းမျိုးရှိထားသည်ဟုလည်း ယုံကြည်သည်။
ယခုလို ဂီတာတစ်လုံးနှင့် ထွေးလုံးရစ်ပတ်လုပ်နေလို့ကတော့ ဘာဆိုဘာမျှဖြစ်လာလိမ့်မည် မဟုတ်။ လမ်းလွဲသွားဖို့ပဲ ရှိသည်ဟု ဦးထွန်းမြင့်ယူဆသည်။
(၁၀)
သားကိုမျက်ခြည်မပြတ် ကြည့်နေရင်း ကြည့်နေရင်း မျက်စိနောက်နေခဲ့ရာ။ တစ်နေ့မှာတော့ဖြင့် ဦးထွန်းမြင့်က သူ့စိတ်ကို သူဆက်ပြီး မထိန်းနိုင်တော့ချေ။ ကျော်မြင့်လွင်ကိုခေါ်သည်။ သတိဆွဲလက်ပိုက်ရပ်ခိုင်းလိုက်သည်။
"ကဲ၊ ရှင်းရှင်းပဲ ငါမေးမယ်ကွာ၊ ဒီဂီတာအလုပ်နဲ့ မင်းတစ်ဘ၀လုံး ထမင်းစားမှာလား၊ တခြား ဆရာဝန်၊ အင်ဂျင်နီယာ အလုပ်မျိုးတွေနဲ့ ထမင်းစားမှာလား" ဟု ဆိုင်းမဆင့် ဗုံမပါ မေးလိုက်သည်။
ဦးထွန်းမြင့်မေးပုံက အတော်လေးတော့ နိုင့်ထက်စီးနင်းဖြစ်နေသည်။ သို့သော် အဖေက အဖေ။ သားက သားဖြစ်သည်။ သူက အဖေဖြစ်နေ၍ အဖေတစ်ယောက်၏ သားကြီး သြရသအပေါ်မှာ ထားရှိသော မျှော်လင့်ချက်နှင့်ဇောတို့မှာ လောကတံထွာသမာရိုးကျ ဤထုံးစံလမ်းကြောင်းပဲရှိသည်။ သားတစ်ယောက်ကို ဝေးလံခက်ခဲပြီး ကွေ့ကောက်သလောက် သေချာရေရာခြင်း မရှိသည့်လမ်းကြောင်းအတိုင်း သူတွန်းမပို့နိုင်။
"ပြောကွာ၊ ပြော။ ဒီဂီတာအလုပ်နဲ့ မင်းနဲ့ဖြစ်မလား။ မဖြစ်ဘူးလား။ မင်းအခုချက်ခြင်းစဉ်းစားပြီးတော့ ပြော၊ မဖြစ်ဘူးဆိုရင်တော့ စာပဲကြိုးစားရမယ်"
(၁၁)
ကျော်မြင့်ခမျာ ခက်ဖွယ်ဖြင့် ကြုံရရှာပြီ။ အခြေအနေက သမင်ဆယ်လှမ်း၊ ကျားတစ်လှမ်းအနေအထား။ ထိုအချိန်မှာ ကျော်မြင့်လွင်က အသက် ၁၅ နှစ်အရွယ်။ တကယ့်ကလေးသာသာ လူလားမြောက်ဖို့ အားယူစအချိန်။ သူ့မှာပြောစရာ စကားတွေ ရှိတော့ရှိသည်။ သို့သော် မပြောပြတတ်။ ပြီးတော့ ပြောလည်းမပြောရဲ။ အဖေပြောနေတာလည်း မှန်သည်ဆိုတာ သူသိသည်။ သို့ပေမယ့် အခြားတစ်ဘက်မှာလည်း စဉ်းစားစရာ ရှိရမည်။
အဖေကဖြေဖို့ ဖိအားပေးလွန်းလာသောအခါမှာတော့ အားမတန်မာန်လျှော့ပြီး -
"ကျွန်တော်စာပဲ ကြိုးစားပါတော့မယ်" ဟု သဘောတူလိုက်သည်။ အဖေက -
"အေး၊ ဟုတ်ပြီ၊ မင်းစကား မင်း ကတိတည်ပါစေ၊ ဂီတာကိုတော့ အခုအချိန်ကစပြီး ယတိပြတ်အဆက်ဖြတ် ထားလိုက်တော့" ဟုဆိုသည်။
နောက်မှ ကိုယ်လိုချင်တာဖြစ်ချင်တာ တစ်ဘက်သတ်ကြီး ကတိစကားရပြီးပြီဆိုတော့ အောင်နိုင်သူပီပီ လေသံအတန်ငယ်လျှော့၍ -
"မင်းကွာ၊ လောလောဆယ် ဂီတာကို ခဏအသာထားပြီး စာပဲကြိုးစားလိုက်စမ်းပါ၊ ဂီတအနုပညာကတော့ကွာ အဖေလည်း ၀ါသနာပါတာပဲ။ ဒါပေမယ့် အလုပ်တွေ၊ အကိုင်တွေနဲ့ အခြေတကျဖြစ်ပြီဆိုတဲ့အခါကျရင် မင်းကြိုက်သလောက် လိုက်စားစမ်းပါ" ဟုဆိုလေသည်။
(၁၂)
ထိုနေ့ ထိုရက်မှစ၍ အိမ်မှာ ကျော်မြင့်လွင် ဂီတာမတီးရတော့ပြီ။
အနည်းဆုံး အဖေအိမ်မှာ ရှိနေစဉ် ဂီတာမတီးရ။
(၁၃)
အဖေ့ကိုကြောက်၍ ဘာမျှပြန်ပြီး နှုတ်လှန်ထိုးမပြောခဲ့သလို တကယ်လည်း ပီဘိလူငယ်ကျော်မြင့်လွင် ကလေး၏ စိတ်ထဲမှာ ဂီတမှ ဂီတဟူသော အစွဲအလမ်းမျိုး မရှိသေး။ ဂီတာကို သူခုံမင်တာမှန်သည်။ သို့သော် သူလည်း သူ့ဥာဏ်အထွာနှင့် သူစဉ်းစားတတ်သည်။
ဂီတအလုပ်ချည်းသက်သက် တစ်လက်တည်းကိုင်ပြီး သွားရလျှင် ဘ၀မှာ မည်မျှ ကြမ်းတမ်းပင်ပန်း ဆင်းရဲနိုင်သည်၊ ဘယ်လောက်မရေမရော ဖြစ်နိုင်သည်ကို သူသိသည်။ အမေနှင့် နှစ်ယောက်တည်း အေးအေးဆေးဆေး တွေ့တော့ -
"သားသိပါတယ် အမေရာ။ အဖေ့ကို ပြောပြနေရင် ထပ်ရှည်နေမှာ စိုးလို့ပါ။ သားကလည်း ဒီဂီတာ တစ်ခုတည်းနဲ့တော့ အသက်မွေးဝမ်းကျောင်း မလုပ်ပါဘူး"ဟု ဆိုသည်။
(၁၄)
အမေနှင့် သားကတော့ ဘာမဆို ထိုးသွင်းနားလည် ဝေမျှနိုင်ကြသည်။
အဖေမရှိချိန်။ လွတ်လွတ်လပ်လပ် ကာလကလေး တစ်ခုမှာ ကျော်မြင့်လွင်က -
"အမေ သီချင်းလေး ဘာလေး မဆိုတတ်ဘူးလား၊ သားက ဂီတာတီးပေးချင်တာ" ဟု ဆိုသည်၊ သားကပြောလွန်းတော့ Local Talent အစီအစဉ်မှ လာနေကျ London Bridge, River of No Return သီချင်းတွေ အမေဆိုပြသည်။
အမေက သီချင်းဆို၊ သားက ဂီတာတီး။ တကယ်ပဲ ပျော်စရာဖြစ်ခဲ့သည်။ သီချင်းဆုံးတော့ ကျော်မြင့်လွင်က အားရပါးရ -
"အမေက သီချင်းဆို ကောင်းတာပဲ။ လျှိုထားတာကိုး" ဟုမှတ်ချက်ချသည်။
(၁၅)
စာကလည်း တအားဖတ်သည်။ ကျော်မြင့်လွင်ကို ကြည့်လိုက်လျှင် မျက်မှန်ထူထူနှင့် စာအုပ်တစ်တွဲနှင့် အမြဲတွေ့ရမည်။ အိမ်ကစာဖတ်တာနှင့် ပက်သက်ပြီး လုံးဝမကန့်သတ်။ ဖတ်ချင်တာဖတ်၍ ရသောကြောင့် အိမ်မှာ ရှိရှိသမျှ စာအုပ်အားလုံး သိမ်းကျုံးဖတ်သည်။ ရရာကနေ ငှားရမ်းရှာဖွေပြီးတော့လည်း ဖတ်ရှုသည်။
ဂီတာကတော့ အိမ်မှာချုပ်ချယ်ထား၍ အပြင်မှာပဲ သွားတီးလေတော့သည်။ သူငယ်နှပ်စား ကလေးငယ်လေးလည်း မဟုတ်၍ အိမ်ထဲမှာ လှောင်ပိတ်ထားဖို့ဆိုတာ မဖြစ်နိုင်။ ဂီတာကို သူငယ်ချင်းအိမ်မှာ သွားထားပြီးတီးသည်။
မိဘတွေက သူဘယ်မှာ ဂီတာတီးမှန်း၊ သူဘယ်လောက်တတ်နေမှန်း၊ ဘယ်လောက်တော်နေမှန်း မသိကြ။ ဒါပေမယ့် ပုသိမ်ကတော့ အရင်သိသွားသည်။
(၁၆)
ပုသိမ်မြို့သည် ဂီတအနုပညာမှာ အစဉ်အလာရှိသော မြို့ဖြစ်၏ ။
စနစ်တကျဖွဲ့စည်းထားသော တီးဝိုင်းတွေ ရှိသည်။ Skeleton ဆိုသော ဂီတတီးဝိုင်းသည် ပုသိမ်မြို့၏ အစောဆုံးသော ဂီတတီးဝိုင်းများတွင် တစ်ခုအပါအ၀င်ဖြစ်ခဲ့၏ ။ Skeleton ၀ိုင်းမှ ကိုသြသည် နိုင်ငံကျော် E.Machine အဖွဲ့တွင် ရစ်သမ်ဂီတာ တီးခတ်ခဲ့ပြီး ယခုအခါ "ခိုင်မာ ဂီတာ" ထုတ်လုပ်နေသူဖြစ်ပါသည်။
မင်္ဂလာပွဲ၊ ဧည့်ခံပွဲတွေမှာ လိုက်လံဖျော်ဖြေပေးကြသော တီးဝိုင်းများအနက် တရုတ်လူမျိုးများဦးစီးကြသည့် ငုဝါ၊ ဖြူနီညိုပြာ၊ ရှမ်းရိုးမ တီးဝိုင်းများမှာ အသက်မွေးဝမ်းကျောင်း အဆင့်ရှိသည်။ အရှေ့တိုင်း နုတ်စ် ၀မ်း၊ တူး၊ သရီး၊ ဖိုးများနှင့် စည်းကမ်းတကျ တီးခတ်နိုင်ကြသည်။
ငုဝါ၊ ဖြူနီညိုပြာ၊ ရှမ်းရိုးမ ၀ိုင်းကြီးတွေက အပြိုင်အဆိုင် ဖြစ်ကြသလို ကရင်တိုင်းရင်းသားရပ်ကွက်ထဲက မဟူရာ အစရှိသော တီးဝိုင်းများလည်း ရှိကြသေးသည်။
(၁၇)
စနေနေ့ညနေခင်းတွေဆိုလျှင် ပုသိမ်ပန်းခြံထဲတွင် စင်တင်တီးဝိုင်းတွေက ဖျော်ဖြေပေးတတ်ကြသည်။
"ငုဝါ" ကိုတော့ဖြင့် ပုသိမ်မြို့၏ ထိုအချိန်က အကောင်းဆုံးတီးဝိုင်း တစ်ဝိုင်းအဖြစ် သတ်မှတ်နိုင်သည်။ ငုဝါ၏ တီးဝိုင်း ထောင်သူလည်းဖြစ်၊ လိဒ် ဂီတာသမားလည်းဖြစ်သူ ကိုတင်ယုသည် တီးဝိုင်းတစ်ခုလုံး၏ အချက်အချာဖြစ်ခဲ့၏ ။ သူကိုယ်တိုင် တော်တော်လေးကို အတီးအခတ်ကောင်းခဲ့သည်။
ကိုတင်ယုတို့သည် ပုသိမ်ဘူတာရုံထဲမှာလည်း စားသောက်ဆိုင်တစ်ဆိုင် ဖွင့်ထားသည်။ ပုသိမ်ဘူတာရုံဆိုတာက ကျော်မြင့်လွင်တို့ နေသောပြည်တော်သာရိပ်သာ တိုက်တန်းများနှင့် ဘာမျှ မလှမ်းမကွာ။ လက်တစ်ကမ်းမျှသာ။
များမကြာမီသော ကာလအတွင်းမှာ လူငယ်လေး ကျော်မြင့်လွင်၏ လက်စလက်နနှင့် အဆိုပါရမီတို့ကို ကိုတင်ယု ကောင်းစွာ အကဲခတ်မိသွားခဲ့သည်။ ဤသို့ဖြင့် ပုသိမ်ပန်းခြံ၏ စနေညနေ "ငုဝါ" ဖျော်ဖြေပွဲများတွင် ကျော်မြင့်လွင်တစ်ယောက် စင်မြင့်ပေါ်သို့ ရောက်ရှိလာတော့သည်။
(၁၈)
ကျော်မြင့်လွင်ကို ကိုတင်ယုက မြေတောင်မြှောက်ပေးပြီး ပုသိမ်မြို့၏ နံပတ်တစ် တီးဝိုင်း "ငုဝါ" က စင်တင်ပေးလာသောအခါ "ဖြူနီညိုပြာ" ကလည်း သူတို့ တီးဝိုင်း၏ အလှည့်ကျ ညနေတွေမှာ လာပြီး သီဆိုပေးဖို့ ကျော်မြင့်လွင်ကို ဖိတ်ခေါ်သည်။
ကျော်မြင့်လွင်အနေနှင့် ငြင်းပယ်စရာ အကြောင်းမရှိ။ သူ့ကိုယ်ထဲကို ဂီတပိုးက တိုး၍ တိုး၍ စွဲကပ်ဝင်ရောက်လာခဲ့ပြီ။ သူ့အသက်ကဖြင့် ၁၅ နှစ်၊ ၁၆ နှစ်အရွယ်။
(၁၉)
ပုသိမ်ပန်းခြံ စနေညနေ ဂီတပွဲတွေမှာ ကျော်မြင့်လွင်အဆိုများခဲ့တာက ထိုခေတ်အခါအလျောက် ခေတ်စားခဲ့သော ကိုင်ဇာသီချင်းတွေဖြစ်သည်။
သူ၏ ပထမဆုံးစင်မြင့်ဖျော်ဖြေမှု အတွေ့အကြုံမှာ ၁၉၈၀ပြည့်နှစ်က ပုသိမ်မြို့ ကမ်းနားလမ်းတွင် ဘိုတင်ယုတို့ ငုဝါတေးဂီတနှင့် ကိုင်ဇာ၏ "အကောင်းဆုံးက ဂီတာတီးနေမယ်" သီချင်းကို သီဆိုခဲ့ဖြင်းဖြစ်သည်။
(၂၀)
သီချင်းသာဆိုရတာ အဖေ့ကို ပေါ်ပေါ်ထင်ထင် အသိမခံရဲ။ ခိုးကြောင်ခိုးဝှက်နှင့်သာ ဆိုရသည်။ သို့သော် ပုသိမ်ဆိုတာ တကယ်တမ်းတော့ ဘာမျှ ကျယ်ဝန်းလှသည်မဟုတ်။ တစ်ဆင့်စကား၊ တစ်ဆင့်နားနှင့် ကျော်မြင့်လွင် သီချင်းဆိုတာ ကောင်းလှကြောင်း အဖေအပါအ၀င် တစ်အိမ်သားလုံး သိထားနေနှင့်ခဲ့ကြပြီ။
ဦးထွန်းမြင့်က ကိုယ့်သားသီချင်းသီဆိုဖျော်ဖြေတာကို နားလည်းနားထောင်ချင်သည်။ ပေါ်တင်ကြီး သွားအားပေးလျှင် တစ်ဖက်က တားမြစ်ပိတ်ပင်ထားသော ရှေ့စကားနှင့် နောက်လုပ်ပုံတို့ မညီညွတ်သလို ဖြစ်ရတော့မည်။ ဂီတဘက်ကို မြှောက်ပေးလိုက်သလို ဖြစ်ခဲ့လျှင် ပညာရေး၏ စည်းဘောင် ကာလနား ပျက်သွား ရလိမ့်မည်။
သို့ဖြစ်၍ လူမသိအောင် သွားနားထောင်ကြသည်။
တွေးကြည့်လျှင် ရယ်စရာပင်ကောင်းနေသည်။ ကျော်မြင့်လွင်ကလည်း အိမ်ကသိမှာစိုး၍ တိတ်တခိုးဆိုရသည်။ အိမ်ကလည်း ကျော်မြင့်လွင် သိမှာစိုး၍ မှောင်ရိပ်ခို၊ လူလုံးဖျောက်ပြီး နားထောင်ခဲ့ကြသည့်ဖြစ်ပုံမှာ အဆန်းပင်။
(၂၁)
ဆယ်တန်းစာမေးပွဲကိုတော့ ဘာအခက်အခဲမျှ မကြုံရဘဲ လွတ်လွတ်ကျွတ်ကျွတ်ပင် အောင်သွားသည်။ သို့သော် တစ်ဖက်တွင် တီးဝိုင်းနှင့် တေးသီချင်း ဂီတတွေနှင့် ယှက်နွှယ်နေ၍ အမှတ်ကဖြင့် ဘယ်လိုမျှ မကောင်းနိုင်။
မိဘတွေက ကျန်းမာရေးဝန်ထမ်း အသိုင်းအ၀ိုင်းဖြစ်၍ သားကိုဆရာဝန်တော့ ဖြစ်စေချင်ကြသည်။ ဆယ်တန်း အမှတ်နည်းတာက မကျေနပ်ချင်စရာ။ ဘယ်လိုပဲဖြစ်ဖြစ် ပုသိမ်ဒေသကောလိပ်ကျောင်းသားဘ၀တွင် ဇီဝဗေဒဘာသာတွဲ ယူဖြစ်ခဲ့သည်။
သို့သော် ကျော်မြင့်လွင်စိတ်က အနုပညာဘက်ကိုသာ ပိုပြီး တိမ်းညွှတ်နေသည်။ ကောလိပ်ကျောင်းသားဘ၀သည် ဆယ်တန်းလိုမျိုး ပညာရေးဘက်တွင် လတ်တလော အနီးကပ် ဦးတည်ရည်မှန်း ထားစရာလည်း မလို။ ဖတ်ချင်သည့် စာအုပ်တွေ ဖတ်သည်။ ကဗျာတို ကဗျာစတွေ စမ်းသပ်ရေးဖွဲ့သည်။ ဂီတာကတော့ အရူးအမူးပင်ဖြစ်တော့သည်။
(၂၂)
ဘိုတင်ယုတို့ "ငုဝါ" လို စင်မြင့်ပွဲတွေ အပြင်ကြုံလေရာမှာ ဂီတာတီးသည်။ သူငယ်ချင်းအိမ်၊ လယ်ကွင်း၊ ကောက်ရိုးပုံ၊ ထောင်ကွင်းထဲက သစ်ပင်အောက်၊ အစရှိသဖြင့် နေရာ အမျိုးမျိုးပြောင်းရွှေ့ပြီး တေးသီချင်း ဂီတထဲမှာ မွေ့လျော်နေတော့သည်။
ကျော်မြင့်လွင်ထံတွင် ဂီတနှင့် ပက်သက်၍ လက်ဦးဆရာများ ဖြစ်ကြသော ပုသိမ်အနောက်မြို့နယ်၊ လမ်းစဉ်လူငယ် ဘင်ခရာတပ်ဖွဲ့မှ ဆရာဦးကျောက်စိမ်းနှင့် ဆရာ ဦးစန်းတင့်တို့ ခင်းပေးခဲ့သည့် အခြေခံကောင်းတွေ ရှိခဲ့သည်။ သို့ဖြစ်၍ ဂီတကို အပေါ်ယံ ၀ါသနာပါရုံမဟုတ်။ နုတ်စ်နှင့် စနစ်တကျတီးတတ်အောင် နက်နက်ရှိုင်းရှိုင်း လိုက်စားခဲ့သည်။
ငုဝါမှ ဘိုတင်ယုသည် နုတ်စ်ကျွမ်းကျင်သူဖြစ်၍ သူ့ထံမှ ပညာတွေကို အသင်၊ အမြင်၊ အကြားနည်းမျိုးစုံနှင့် ရအောင်ယူခဲ့သည်။
သီချင်းလေးတွေလည်း စပ်းသပ်ရေးဖွဲ့ကြည့်ခဲ့သည်။ ထုံးစံအတိုင်း ရှိပြီးသား သံစဉ်ပေါ်မှာ စာသားထည့်ရသော ကော်ပီပုံစံကို အရင်ဆုံးလုပ်ကြည့်သည်။ သူပထမဆုံး ရေးဖွဲ့ခဲ့သော ကော်ပီသီချင်းမှာ ABBA / Hastamanana သီချင်းအလိုက်ဖြစ်သော "ကန္တာရ နှလုံးသား" ။
၁၉၇၉ ခုနှစ် (အသက် ၁၆ နှစ်) တွင်ရေးခဲ့သည်။
(၂၃)
ဂီတနှင့် အနုပညာဘက်ကိုချည်းပဲ စိတ်ကတိမ်းညွတ်နေသောအခါ ၁၉၇၉ - ၈၀ ခုနှစ် ဒေသကောလိပ် ပထမနှစ် စာမေးပွဲမှာ ကျရှုံးသွားခဲ့တာ အဆန်းဟူ၍ မဆိုသာတော့ပါ။
၁၅နှစ်သား ကိုရင် ကေသ၀၊ ပုသိမ် ရွှေမုဌောဘုရား
၁၉၇၇ ခုနှစ် ဒီဇင်ဘာ ၃၁
အခန်း(၅) ရေစုန် အမျော ရေဆန် အတက်
(၁)
၁၉၈၁ ခုနှစ်။
ဦးထွန်းမြင့်နှင့် ဒေါ်မြရင်တို့ တိုင်ပင်ခဲ့ကြသည်။ သူတို့၏ နှစ်ဖက် မိဘတွေက အသက်ကြီးကြပြီ။ ပုသိမ်- မော်လမြိုင် ကူးချည်သန်းချည် သွားလာရတာ မလွယ်ကု။ မော်လမြိုင်မှာသာ ဆိုလျှင် အနီးကပ် ကြည့်ရှုစောင့်ရှောက် ပေးနိုင်လိမ့်မည်။ သို့ဖြင့် မော်လမြိုင်သို့ ပြောင်းရွှေ့ရန် လျှောက်လွှာတင်လိုက်ကြတော့သည်။
ပထမဆုံး ပြောင်းရွှေ့ခွင့် ရသွားတာက ဦးထွန်းမြင့်။ ဒေါ်မြရင်အတွက်ကျတော့ မော်လမြိုင် ကျောင်းကျန်းမာရေးမှာ နေရာလပ် မရှိ။ ဆေးဘက်ကိုတော့လည်း ယခုအချိန်ကျမှ ပြန်မ၀င်ချင်။ တစ်ဖက်တွင် ကလေးတွေက ရှိသေးသည်။ လုပ်သက်ကလည်း ၂၄ နှစ်ပင် ရှိပြီ။ သို့ဖြင့် အစာအိမ် ရောဂါကို အကြောင်းပြပြီး Invalid ပင်စင် ယူလိုက်သည်။
သည်လိုနှင့် တစ်မိသားစုလုံး မော်လမြိုင်သို့ အသိုက်အမြုံ ပြောင်းဖြစ်သွားတော့သည်။
(၂)
မိဘနှင့် ညီအစ်ကို မောင်နှမတွေ အားလုံး မော်လမြိုင်သို့ ရောက်သွားကြပြီ ဖြစ်သော်လည်း ကျော်မြင့်လွင် ပုသိမ်မြေနှင့် ရေစက် မကုန်သေးချေ။
ပြောင်းရွှေ့ချိန်က နိုဝင်ဘာလ ဖြစ်၍ ကျော်မြင့်လွင်၏ ကျောင်းချိန်နှင့် ကန့်လန့် ဖြစ်နေသည်။ သို့ဖြင့် စာသင်နှစ် တစ်နှစ် ပြီးအောင်နေဖို့ ပုသိမ်မှာ ထားခဲ့ရတော့သည်။
အဆောင်မှာနေ။ ပိုက်ဆံ ပို့ပေးမည်။ သည်ကြားထဲ အရေးပေါ်အသုံးလိုလျှင် သူ့ကို ပဉ္စင်းတက်ပေးမည့် အဒေါ်ကြီးများ ရှိသည်။ လိုချင်တာရှိလျှင် သွားယူ သုံးထားဖို့ မှာခဲ့ရသည်။
ဤသို့ဖြင့် အိမ်အမိုး အရိပ်အောက်မှ လွတ်မြောက်သွားပြီး မိမိဘာသာ ဆုံးဖြတ် လှုပ်ရှားရမည့် အဆောင်သို့ ရောက်ရှိသွားတော့သည်။
သူ ပထမဆုံး နေထိုင်ခဲ့တာ “သီတာဦး” အဆောင်။
(၃)
မိဘများ၏ အုပ်ထိန်းမှုအောက်က လုံးလုံးလျားလျား လွတ်မြောက် သွားသောအခါ သူ နေချင်သလို လွတ်လွတ်လပ်လပ် နေဖြစ်သွားသည်။ တစ်လစာအတွက် ပေးထားသည့် ပိုက်ဆံကို တစ်ရက်တည်းနှင့်လည်း သုံးချင် သုံးပစ်သည်။
အဆောင်နေ လူငယ်ချင်းချင်း အပေါင်းအသင်း ပေါင်းစုံတွေနှင့် အသာက်အစားလေးက ပါလာသည်။ အချိန်တိုတို အတွင်းမှာပင် သူ အသောက်အစားဖက်တာ ကျောင်းပရိဝုဏ်ထဲရှိ လူတွေအားလုံး သိကုန်ကြသည်။
အပေါင်းအသင်းများနှင့် ဂီတာ တီးနေရလျှင် ပြီးရော။ ကျောင်းတက်ရက်က မမှန်။ သူစိတ်ပါသော အတန်းတွေပဲ ရွေးတတ်သည်။ ရေလည်း ချိုးချင်မှ ချိုးသည်။ ဆံပင် ခွေကောက်ကောက်တွေကလည်း တွန့်လိပ် ရှည်လျား လာခဲ့သည်။
ဤအကြောင်းတွေကို ပထမတော့ မော်လမြိုင်ရှိ မိဘများ မသိကြ။ နောက်တော့ ပုသိမ်မှ အဒေါ်ကြီးတွေက စာရေးပြီး တိုင်တောကြသည်။
“ဘဲဥလေးကို မင်းတို့သည်အတိုင်း ပစ်ထားတော့မလား၊ ပြန်ခေါ်မယ်ဆိုလည်း ခပ်မြန်မြန်ခေါ်လိုက်တော့၊ ကြာရင် နစ်သွားလိမ့်မယ်၊ ဟိုတစ်နေ့က အိမ်လာတာ ညှဉ်းသိုးသိုးနဲ့။ ဆံပင်တွေလည်း အရှည်ကြီး” ဟု လှမ်းပြီး သတိပေးကြသည်။
(၄)
သည်အတိုင်း စခန်း ဆက်သွား၍ မဖြစ်တာ သူတို့ သဘောပေါက်ကြသည်။ မော်လမြိုင်ကို ရောက်ကာစ။ ချက်ခြင်းလည်း လာမခေါ်နိုင်။ ကျောင်း စာသင်နှစ် တစ်နှစ် မပြီးခင် ခေါ်လို့လည်းမဖြစ်။ သို့ဖြင့် စာရေးပြီး ဆုံးမရသည်။ ခေတ္တ ခဏ ဖြစ်စေ ပြန်လာဖို့ ခရီးစရိတ် ပို့ပြီး လှမ်းခေါ်ရသည်။
သို့သော် ကျော်မြင့်လွင်က ပုသိမ်မြေမှာ လွတ်လွတ်လပ်လပ် အတောင်ပံ ဖြန့်၍ ပျံသန်းနေခဲ့ပြီ။
ထိုအရသာကို သူသိသွားခဲ့ပြီ။
မိဘတွေဆီ ပြန်လိုက်မသွား။
ပိုက်ဆံ မပို့ဘဲထားလျှင် လက်ထဲ ငွေပြတ်ပါက အကျပ်အတည်းကြုံပြီး ပြန်လာမှာပဲ ဆိုတာလည်း မရ။ အခက်အခဲ ကြားမှ ဖြစ်သလို ကြံဖန်ပြီး နေသည်။ သူငယ်ချင်းတွေနှင့် ရှိ အတူတူ၊ မရှိ မတူတူ အပြားလိုက် ချထားသည်။ သူ့လက်ထဲမှာ ဖေါသီခဲ့စဉ် အတွန့်အဆုတ် မရှိ။ ကျွေးမွေးခဲ့သည့် သူ့စိတ် ဓါတ်ကိုသိသော သူငယ်ချင်းများက သူ့ကိုကြည်ဖြူကြသည်။ လုံးဝ ပြတ်လပ်ပြီဆိုလျှင် ငှက်ပျော်သီး စား၊ ရေသောက်ပြီး ဗိုက်မှောက်နေတတ်သည်။
အဆောင်လည်း အတည်တကျ မရှိ။ သီတာဦး အဆောင်မှ နီလာမြိုင်အဆောင် နံဘေးရှိ ခေတ္တရာ အဆောင်သို့ ရောက်သွားသည်။ အဲသည့်နောက်တော့ သူငယ်ချင်းများ ရှိရာ တစ်ဆောင်ပြီး တစ်ဆောင် ရွှေ့ပြောင်းနေတော့သည်။
သည်လိုနှင့် ပထမနှစ် စာမေးပွဲ ထပ်ကျပြီး External ကျောင်းသား ဖြစ်သွားခဲ့တော့သည်။
အဲသလို ကြုံရသည့်တိုင် ကျော်မြင့်လွင်က မော်လမြိုင်သို့ လိုက်မသွား။ ပုသိမ်မှာပဲ တုံးပေကတ်သတ် နေခဲ့သည်။
(၅)
ဂီတာ တီးလိုက်၊ သီချင်း ရေးလိုက်၊ ကဗျာတွေ၊ စာတွေ သီဖွဲ့လိုက်နှင့် သူ့ဘာသာ တည်ဆောက်နေသည်။ ထိုအချိန်မှာ သူဖြစ်နေပုံ ကိုအပေါ်ယံကြော ကြည့်၍ ဆုံးဖြတ် မရနိုင်။ သူ၏ အတွင်းထဲမှာက အလျှံတညီးညီး အရှိန်အဟုန် ပြင်းစွာ တောက်လောင်လျက် ရှိသည်။
သီချင်းတွေကို မရေးရလျှင်မနေနိုင်လောက်အောင် ရေးဖွဲ့ချင်သည့် စိတ်ပြင်းပြနေခဲ့သည်။ သူ့အနီးအနားမှာ သီချင်းဆိုမည့် လူလည်းမရှိ။ သူ့သီချင်း သူဆိုဖို့ပဲ ရှိသည်။ သူ့သီချင်း သူပြန်ဆိုဖို့ ဆိုတာကလည်း ရက်ကောဒင်းတို့ ဘာတို့အထိ ဘာရည်ရွယ်ချက်မျှ မရှိ။ သူ့ဘာသာ ဆာလောင်မွတ်သိပ်နေခြင်း ပြေပျောက်ဖို့သာ ဖြစ်သည်။ သူ့မှာ ရှိသော ဂီတဗေဒ အသိပညာသည် ပြည့်စုံ လုံလောက်ပြီဟု ဘယ်လိုမျှ မပြောနိုင်။ သို့သော်လည်း သူ့မှာ လူငယ် တစ်ယောက်၏ အင်အား ကြီးမားလှသော စိတ်ဇောမာန် တွန်းအား ရှိသည်။ ထိုတွန်းအားက သီချင်းကောင်းလေးတွေ ဖြစ်အောင်ရေးချင်နေခဲ့သည်။
ထိုစိတ်ဓာတ် ခွန်အားနှင့်ပင် သီချင်းတွေကို သူ ရေးဖြစ်ခဲ့သည်။
(၆)
ကျော်မြင့်လွင် သီချင်းစ ရေးတော့ ကော်ပီသီချင်းလေးတွေပဲ ဖြစ်သည်။ ပင်ကိုရေး သီချင်းများ ဖွဲ့သီနိုင်ရန် အတွက် တေးသွား ဖွဲ့စည်းမှု၊ အဆိုပါ တေးသွားများ အပေါ်တွင် မိတ်ဖက်သံများ တည်ဆောက်မှု၊ ဂီတ ဖန်တီး စီစဉ်ခန့်ခွဲမှု၊ တီးမှုတ် သီဆိုမှု အတတ်ပညာ နည်းစနစ်များ လိုအပ်သည်။ ထိုအရာများအတွက် ကျော်မြင့်လွင် သင်ယူခဲ့ရသော ကျောင်းနှင့် သင်တန်း မရှိခဲ့။
နိုင်ငံခြား တေးသွားများ၊ သီချင်းများကို သူလိုက်ပြီး တီးခဲ့၊ ဆိုခဲ့သည်။ ကော်ပီသီချင်းများ အပါအ၀င် နိုင်ငံခြား သီချင်းများကို ဤကဲ့သို့ သီဆို တီးခတ်ခြင်းသည် သူ့အတွက် ဂီတပညာ သင်ယူ လေ့လာမှု ဖြစ်လာသည်။ ဂီတကျောင်း တတ်ရောက် သင်ကြားမှု ဖြစ်လာသည်။
နိုင်ငံခြား သီချင်းများ၊ ကော်ပီ သီချင်းများ တီးခတ် သီဆိုကြရင်း အတွေ့အကြုံတွေ သူ ရလာသည်။ နည်းစနစ်တွေ ရလာသည်။ ဂီတ အသိပညာနှင့် သီအိုရီများ ရမှန်း မသိ ရလာခဲ့သည်။ ထိုအခြင်းအရာ အားလုံးကို အသုံးပြုပြီး ကိုယ်ပိုင်သံစဉ် သီချင်း ဘက်သို့ ကူးပြောင်း ရေးဖွဲ့နိုင်သည်အထိ တဖြည်းဖြည်းချင်း သူ အားကောင်း လာခဲ့သည်။
(၇)
သူ ပထမဆုံး ရေးဖွဲ့ဖြစ်ခဲ့သော ကိုယ်ပိုင်သံစဉ် သီချင်းက “ ဝေးသွားတဲ့အခါ ”။
“ဝေးသွားတဲ့အခါ…မင်းအနားမှာ….
မောင့်ရဲ့ချစ်လိပ်ပြာ…ဟိုသည်ပျံဝဲလို့နေချင်တာ။
ကြင်နာသူမေ့ရင်ထဲမှာ နားခိုခွင့်ပြုပါ။
ဟိုတုန်းက…တို့များ ရဲ့ချိုမျက်ဝန်းလွှာ၊
နွေအိမ်မက်များထဲမှာ တွေ့ကြမယ်နော်
သီးခြား ကမ္ဘာ တစ်ခုမှာ ”
လူငယ်တစ်ယောက်၏ အတွေးပီပီ စာသားလေးတွေက သန့်ရှင်း လတ်ဆတ်နေသည်။ သံစဉ်က ချစ်စရာ ကောင်းပြီး ဆန်းကြယ်သည်။ ထူးဆန်းသော အားကောင်းမှု တစ်ရပ်လည်း ထိုသီချင်းထဲမှာ ကိန်းဝပ်နေခဲ့သည်။
“ ဝေးသွားတဲ့အခါ ” ကို ရေးဖြစ်ခဲ့တာ ၁၉၈၂ ခုနှစ်။ သူ၏ အသက် ၁၉ နှစ်။
“ ဝေးသွားတဲ့အခါ၊ နှလုံးသားမှာအမြဲတမ်း သတိရနော်၊ ကြင်နာခဲ့ဖူးတဲ့ အချိန်အခါများ ပြန်လည်ကာ ရယူဖို့ရာ မဖြစ်နိုင်တော့တဲ့အခါ ရင်ထဲမှာ ပြန်တမ်းတ မြင်ယောင်လိုက်ပါ ”
ရင်ခုန်သံနွေးထွေးစွာ…
မှေးစက်မပျော်တဲ့ မေ့စက်ရာထက်မှာ။
(၈)
ကဗျာ ရေးသောအခါမှာတော့ သူ့ကလောင်အမည်ကို သူ့ဘာသာ “ ချစ်မှူးကျော် ” ဟု ပေးထားသည်။ ပထ၀ီဌာနမှ လက်ထောက်ကထိက ဦးဝင်း၏ ညီ၊ ဦးမြင့်စိန်နှင့်က သူတို့ လူငယ်တွေ ရင်းနှီးနေကြသည်။ ကျော့်မြင့်လွင်၏ ကလောင်အမည်ကို ကြားတော့ ဦးမြင့်စိန်က-
“ မင်းကွာ၊ တစ်ချိန်လုံးဒီလောက် သောက်နေတာ။ ချစ်မှူးကျော် လုပ်မနေစမ်းပါနဲ့၊ သျှပ်မှူးကျော်ပဲ ထားလိုက် ”
ဟု ဆိုသည်။
သို့ဖြင့် သူ၏ ကလောင်အမည်က တကယ်ပဲ သျှပ်မှူးကျော်ဟု ခေါ်တွင် သွားတော့သည်။
ပုသိမ် ဒေသကောလိပ် ပရိဝုဏ်ထဲမှာ သျှပ်မှူးကျော်၊ ကိုကျော့မှူး၊ အရိုင်းဖြူ (ကိုတင်အောင်) တို့၏ မြကဗျာစာအုပ်ကလေး ထွက်ပေါ် လာခဲ့ဖူးသည်။ စာကူးစက် မင်ရနံကလေး သင်းပျံ့နေသော ထိုကဗျာစာအုပ်သည် ကောလိပ်ကျောင်းသား လူငယ်တို့၏ ရင်ခုန်သံပဲ ဖြစ်ခဲ့သည်။
ပုသိမ်ဒေသ ကောလိပ်နှစ်လည် မဂဇင်းထဲမှာလည်း “ သျှပ်မှူးကျော် ” အမည်နှင့် စာတွေ၊ ကဗျာတွေ ရေးခဲ့သည်။
ငယ်စဉ်ကတည်းက ရင်းနှီးခဲ့သူတွေက သူ့ကို “ ဘဲဥ ” ဟု ခေါ်တတ်ကြသည်။ ယခုတော့ ကောလိပ်ဝန်းကျင်မှာ သူ့ကို ခင်မင်သူတွေက “ ကိုသျှပ်” ဟုသာ ခေါ်ပြောကြလေသည်။
(၉)
သူ့ကို ခင်မင်သူတွေလည်း ပေါများသည်။ သူသည် သူခိုင်ခိုင်မာမာ သိထားသော အကြောင်းအရာ၊ သူ စွဲစွဲမြဲမြဲ ယုံကြည်ထားသည်တို့နှင့် ပတ်သက်လာလျှင် အလျှော့ မပေးတတ်။ ငြင်းခုံစရာ ရှိလျှင် ပြင်းပြင်းထန်ထန်ပင် ငြင်းတတ်ခုံတတ်သည်။
ထဲထဲဝင်ဝင် ရင်းနှီး ခင်မင် သွားပြီဆိုလျှင် သူ့ ၀သီက စကားပြောလျှင် ပွင့်လင်းလွတ်လပ် ပြောတတ်သည်။ အကြောင်း မသိလျှင် အပေါ်စီးက ငေါက်ငမ်း ပြောဆိုလေသလား ထင်ရသည်။ တကယ်တမ်း သူ၏ စိတ်ရင်း အမှန်ကို သိသူတွေက ထိုအပေါ်ယံ ကိစ္စများကို အပြစ် မမြင်။ အပေါင်းအသင်းတွေ အပေါ်မှာ သူဘယ်လောက် သံယောဇဉ် ထားတတ်ကြောင်း၊ အနစ်နာ ခံတတ်ကြောင်းတွေ သိကြသည်။
သူ ကံကောင်းတာက သူ့ကို နားလည်သူ အပေါင်းအသင်းများ မရှားပါးခဲ့ခြင်း ဖြစ်သည်။
(၁၀)
ကျောင်းပရ၀ုဏ်ထဲမှာ ကဗျာလိုလို၊ စာလိုလိုနှင့် နေရာတကာ ပလွှားပလွှား နေခဲ့သူမဟုတ်။ မထင်မရှား မသိမသာဘဲ ဖြတ်သန်းဖို့ ကြိုးစားခဲ့သူ ဖြစ်သည်။ သို့သော် သူတို့၏ “ မြ ” ကဗျာ စာအုပ်လေးကတော့ဖြင့် ပုသိမ် ဒေသကောလိပ် ပတ်ဝန်းကျင်တွင် ပျံ့နှံ့သွားခဲ့သည်။
“ အခါတစ်ပါး၌
သူမ၏ လက်ဝယ်….ထက် “ မြ ”သော မြှားတစ်စင်း တည်၏။
သို့သော် လေး မရှိ။
ထိုရော အခါ
ငါ၏ လက်ဝယ်….ချို “ မြ ” သော စောင်းတစ်အိုး တည်၏။
သို့သော်ကြိုး မရှိ”
(၁၁)
သူ၏ “ မနှင်းဖြူ ” နှင့် “ စင်သီယာ ” ကဗျာတွေ အကြာင်းကိုလည်း ပုသိမ်ဒေသကောလိပ်မှာ လူပြောများခဲ့သည်။
“ ငါ့ ကဗျာ ဘယ်မှာလဲ၊ မရဲတရဲ မေးခွန်း၊ တိုးတိတ်လွန်းမှာ သိတယ်။ နယ်မချဲ့ပါနဲ့ ဝေဒနာ၊ ငါ မနေတတ်ဘူး၊ အရူးတစ်ယောက်ရဲ့လွမ်းချင်းကို မင်းဘာကြောင့် နားထောင်ချင်တာလဲ၊ အသည်းမှာ စွဲတဲ့ မြားချက်ဟာ လူမသိဘဲ အသက်သေစေတယ်။ နွေမှာ ဖြစ်တဲ့ မိုးတိမ်ဟာ မုတ်သုံ မလာခင် အိပ်စက်ရဦးမယ်။ မင်းရဲ့ နောက်ဆုံး ရယ်မောသံမှာ ငါ သေခဲ့ပြီ စင်သီယာ၊ ငါ့ကဗျာ ဘယ်မှာလဲ။”
“ စင်သီယာ၊ ငါ မပြောတော့ဘူး၊ မင်းဦးနှောက် နွံအိုင်တောမှာ ဘောဂဗေဒ ဇယားချပ်တွေ၊ မျက်တောင်ခတ်တဲ့ ကိန်းဂဏန်းတွေ၊ “ ငွေ…ငွေ ” …ငွေ (မင်းတို့) ဆိုနေကျ သီချင်းတစ်စမို့ ငါ အလွတ် ရနေပြီ၊ ဒီ အမှိုက်ပုံထဲ ငါ့ကို မဆွဲနဲ့ စင်သီယာ၊ ငါ မလာနိုင်ဘူး၊ စူးစူးဝါးဝါး အော်ဟစ်၊ ချွေးမိုးအောက် နစ်ပါစေ၊ မင်းပြုံးနေ စင်သီယာ၊ ငါ မပြောတတ်ဘူး”
(၁၂)
ဤသို့ဖြင့် ပုသိမ်ဒေသကောလိပ် ပရ၀ုဏ်တစ်ခွင်တွင် ကျော်မြင့်လွင်ကို သျှပ်မှူးကျော် အမည်ကို အစွဲပြုပြီး သျှပ် သို့မဟုတ် ကိုသျှပ် ဟုသာခေါ်ကြတော့သည်။ ငယ်ငယ်ကတည်းက ခေါ်လာခဲ့ကြသော ဘဲဥ အမည်ကိုပင် သျှပ်က လွှမ်းမိုးသွားခဲ့သည်။
“ မြ ” ကဗျာစာအုပ် အတွက်နှင့် ကိုအောင်မင်း၊ ကိုတင်အောင် (အရိုင်းဖြူ) ကိုကျော့မှူး (သံယောဇဉ် သမားလေး မောင်ဖိုးကျော်) တို့ ဘာမဟုတ်ဘဲ ဗျာများခဲ့ရသေးသည်။ သျှပ်မှူးကျော်လည်း သူ၏ ကဗျာ များစွာတို့ကို အဆောင် ရေအိမ်ထဲသို့ အတွန့်အဆုတ် မရှိ အပြေးအလွှား ပစ်ချခဲ့ရသည်။
(၁၃)
ကျော်မြင့်လွင် ခေါ်၊ ဘဲဥ ခေါ် ကိုသျှပ်သည် ပုသိမ်ကောလိပ်တွင် အလွန် ဟောဟောဒိုင်းဒိုင်း ပွင့်လင်းသူ ဖြစ်သည်။ သို့သော် သူ့မှာ တော်တန်ရုံ ခင်မင်သူများပင် မသိခဲ့ကြသေးသော အမည် တစ်ခုကလည်း ရှိနေခဲ့သေးသည်။
(၁၄)
"ရှုမ၀ ရုပ်စုံမဂ္ဂဇင်း" ဆိုတာ ထိုခေတ်ထိုအခါက ဟိတ်ကြီးလှသည်။ စာပေသြဇာ လွန်စွာ ကြီးမားသော ရှားရှားပါးပါး မဂ္ဂဇင်း သုံးလေးစောင်ထဲမှာ တစ်စောင် အပါအ၀င် ရပ်တည်နေခဲ့သည်။ အယ်ဒီတာတွေက ဆရာ မောင်ဆွေတင့်၊ ဆရာ မောင်မြင့်မြတ်နှင့် ဆရာ ကျော်စိန်မင်းတို့ ဖြစ်ကြလေသည်။
"ရှုမ၀ ရုပ်စုံမဂ္ဂဇင်း" ကို ကဗျာ၊ ၀တ္ထုတွေ ပို့ခဲ့သည်။ "ရှုမ၀" အတွက် သူ၏ ကလောင်အမည်က "လင်းထက်"။
ရှုမ၀ရုပ်စုံလို အထင်ကရ မဂ္ဂဇင်းကြီးမှာ ကဗျာ၊ ၀တ္ထုတွေ ပါခဲ့သော်လည်း ထိုကိစ္စကို ပုသိမ် ဒေသကောလိပ်ဝန်းကျင်မှာ သိသူ အလွန် နည်းခဲ့သည်။
ကျော်မြင့်လွင်ကို ပုသိမ် ဒေသကောလိပ်တွင် လင်းထက် အမည်နှင့် ခေါ်သူ ထိုအချိန်က မရှိခဲ့ချေ။ သူသည် လိုအပ်လာသောအခါ အကန့်ခွဲခြား ဖုံးဖိ သိုဝှက် ထားတတ်သူ ဖြစ်သည်။ မလိုအပ်လျှင် နှုတ်က ဖွင့်ဟ မနေချင်။
(၁၅)
လူက ထင်ထင်ရှားရှား မနေပြခဲ့သော်လည်း သူ၏ လူငယ် နှလုံးသား တစ်ခုလုံးမှာ အနုပညာ မီးတွေက အလျှံတညီးညီး စွဲကပ် တောက်လောင်နေခဲ့တာတော့ သေချာသည်။
"အမေ……….သားတော့ မီးလောင်နေပြီ
လူတွေကတော့ ရယ်မှာပဲ
သားရင်ထဲမှာ ကဗျာ…ကဗျာ…ကဗျာ…
သက်သာရာ ရမလား လို့ပါ
(ဒီတစ်ခါတော့ဖြင့်) ၀မ်းရေစပ်ရင်လည်း
နည်းနည်း ခွင့်လွှတ်ပါ အမေ
သားတော့ မီးလောင်နေပြီ။"
နားလည်ရ ခက်ခဲသော သူ၏ ခံစားချက် အချို့ကို အမေ့ထံတိုင်တည်ဟန်ဖြင့် တစ်စွန်းတစ်စ ဖွင့်အန် ထုတ်ပြလိုက်သည့် ကဗျာ ဖြစ်လေသည်။
အခန်း (၆) စံရိပ်ငြိမ် ၆ လမ်း
(၁)
ပုသိမ် ဒေသကောလိပ် External ကျောင်းသား ဘ၀တွင် ရန်ကုန်၊ ကမာရွတ်မြို့နယ်၊ စံရိပ်ငြိမ်၊ ၆ လမ်းရှိ ဒေါ်ကြည်ကြည်ဝင်း၏ အဆောင်သို့ သူ ရောက်ရှိ သွားခဲ့သည်။ စံရိပ်ငြိမ်၊ ၆ လမ်းမှာ သူ ကွန်းခိုခဲ့သော အဆိုပါ ကာလသည်လည်း ထူးခြားလျှက် ရှိနေပြန်သည်။
အဆောင်သာ ဆိုရသော်လည်း သစ်သား အိမ်ကလေး တစ်လုံးသာ။
အိမ်မျက်နှာစာမှာ နှစ်တစ်လက်မ သစ်သားတန်းတွေ ခပ်ကျဲကျဲ ရိုက်ကာ ထား၍ အထဲကို လှမ်းမြင်နေရသည်။ အပေါ်ထပ်မှာ အိမ်ပိုင်ရှင်နေပြီး အောက်ထပ်မှာ သူတို့ အဆောင်သားတွေ နေကြသည်။
အဆောင် အရှေ့ရှိ တရုတ်စံကားပင်ကြီးကတော့ဖြင့် ဖြူဆွတ်သော အပွင့်တွေနှင့် ဖွေးဖွေးလှုပ်၍ နေတော့သည်။ မြေပြင်ပေါ်မှာ ပန်းကြွေတွေကလည်း ပြန့်ကြဲလျက်။
(၂)
ကိုယ့်အိမ်မှာတုန်းက ကိုသျှပ်သည် အကြီးဆုံး ဖြစ်၍ သူ့မှာ ညီငယ်၊ ညီမငယ်တွေလည်း ရှိခဲ့သည်။ သူ့ထက် ကြီးသော အစ်ကို၊ အစ်မတွေကို လိုချင်သော်လည်း မရသာခဲ့။ ပုသိမ်မှာ တွဲခဲ့သော အပေါင်းအသင်းတွေ အားလုံး သူနှင့် အရွယ် တူချင် တူ၊ မတူလျှင် သူ့ထက် အသက် ငယ်ရွယ်ခဲ့ကြသည်။
ယခုတော့ သူ့ထက် အသက်ကြီး၊ ၀ါကြီးသူတွေကို တစ်သိုက် တစ်မြုံကြီး တွေ့ရပြီ။ အစ်ကို ငတ်မွတ် တောင့်တသော သူ့အတွက် ခင်မင် တွယ်တာစရာပဲ ဖြစ်ခဲ့သည်။
ထိုအချိန်တုန်းက စံရိပ်ငြိမ် ၆ လမ်း အဆောင်ကလေးမှာ နေထိုင်ကြသူတွေ အချင်းချင်းကလည်း "အရင်းအနှီးဆုံး နှလုံးသားများ" အဖြစ် တည်ဆောက်ထားခဲ့ကြသည်။ သူတို့တစ်တွေသည် သွေးသားအရ ညီအစ်ကို မတော်စပ်ခဲ့ကြလင့်ကစား ဘ၀နှင့် ခံယူချက်တွေမှာ ညီအစ်ကိုများပမာ ဖြစ်ခဲ့ကြဖူးသည်။
(၃)
ကျော်မြင့်လွင်က ထိုအဖွဲ့ထဲက အချို့ကို ပုသိမ်မှာကတည်းက သိထား ကျွမ်းထားပြီး ဖြစ်သော်လည်း အချို့ကိုတော့ အခုမှ မိတ်ဆက် ရသည်။ မည်သို့ဆိုစေ အားလုံး နှင့် ဝေးလှမ်း ခြားနားခြင်း မရှိ။ သူစိမ်း မဆန်။
"သူ့ နာမည်က ကျော်မြင့်လွင်တဲ့။ သျှပ်မှူးကျော် နာမည်နဲ့ ကဗျာတွေ ရေးတယ်။ ဟောဒီက အရိုင်းဖြူတို့နဲ့ တွဲပြီး ကဗျာစာအုပ်လည်း ထွက်ဖူးတယ်။ ပညာ အရည်အချင်းကတော့ ဘိုင်အို အတွဲနဲ့ ပထမနှစ် နှစ်ခါ ကျပြီး အိတ်စတာနယ် ဖြစ်နေပြီ" ဟု သူ၏ ဂုဏ်ပုဒ်တွေကို ဖော်ပေးကြသည်။
သူ့ကို ကြည့်လာကြသည့် အကြည့်တွေထဲမှာ အထင်သေးသော အငွေ့အသက် ဘာတစ်ခုမျှ မပါ။ မေတ္တာ ဓာတ်ဖြင့် နွေးထွေး၍သာ နေကြသည်။ လမ်းပျောက်နေသော သူ့ကို လမ်းကူ ရှာပေးဖို့၊ တိမ်းစောင်းနေသော သူ့ကို ပြန်ပြီး တည့်မတ် ပေးကြဖို့သာ စိတ်ကူးကြပုံ ပေါ်သည်။ လှိုက်လှဲစွာပင် လက်ကမ်းပြီး သူ့ကို ကြိုဆိုခဲ့ကြသည်။
အနက်ရောင် လေးထောင့် မျက်မှန်ကိုင်းထဲမှ သူ၏ မျက်လုံးတွေကတော့ဖြင့် တောက်ပနေကြသည်။ ဘာတွေဝေ တွန့်ဆုတ်မှုမျှ မရှိ။ သူ လုပ်ချင်ရာ တစ်ခုတည်းကိုသာ ခေါင်းထဲ ထည့်ထားပုံ ရသည်။ ပြတ်သားစွာ ဆုံးဖြတ်ထားပြီး ရှေ့ကို တည့်တည့်ကြီး ဆက်သွားမည့် အသွင် သဏ္ဍာန်က ထင်ရှားလျက် ရှိတော့သည်။
(၄)
စံရိပ်ငြိမ် ၆ လမ်း၊ ဒေါ်ကြည်ကြည်ဝင်း အဆောင်သား အများစုက ဧရာဝတီတိုင်းသားတွေ။ ရန်ကုန်မြေမှာ တစ်ကိုင်းတည်း လာပြီး နားနေမိကြခြင်း ဖြစ်သည်။ ကျော်မြင့်လွင် အပါအ၀င် သူတို့ အားလုံး ခုနှစ်ယောက်။
ပုသိမ်သား ပန်းချီဆရာ ကိုနေမျိုးဇော်က ကဗျာ ရေးလျှင် မင်းညိုစင် အမည်ဖြင့် ရေးသည်။ ကျော်မြင့်လွင်ထက် အသက် ဆယ်နှစ်လောက် ပိုကြီးသော ကိုနေမျိုးဇော်က သူ့ကို ညီငယ် တစ်ယောက်၊ လက်တွဲဖော် အပေါင်းအသင်း တစ်ယောက်လို နွေးထွေးခဲ့သည်။
လူပုံ ပိန်နွဲ့နွဲ့၊ စကားပြောလျှင် နူးညံ့ ချိုသာသော ကိုနေမျိုးဇော်က ပရိယာယ် မာယာ မကြွယ်ဝ။ ပျော့ပျောင်း နူးညံ့ပုံ ရသော်လည်း ဆုံးဖြတ်မိလျှင် နောက်မဆုတ်မည့် လူစားမျိုး ဖြစ်သည်။ သူက လွယ်လွယ်နှင့် ပြောင်းတတ် ပြင်တတ်သူမျိုး ဟုတ်ဟန် မတူ။ အခြေအနေနှင့် ရာသီဥတုကိုပင် ထည့်တွက်မည့်သူမျိုး မဟုတ်ချေ။
ထိုအချိန်မှာ ကိုနေမျိုးဇော်က ရှုမ၀ရုပ်စုံမဂ္ဂဇင်းတွင် ကဗျာသရုပ်ဖော်ပုံများ လစဉ် ရေးဆွဲလျက် ရှိပြီး မိုးဝေမဂ္ဂဇင်းနှင့်လည်း အဆက်အသွယ် ရှိသည်။ သူတို့ အဖွဲ့ထဲမှာ စာပေ အနုပညာလောကနှင့် အနီးစပ်ဆုံး လူဟု ဆိုရမည်။
ကိုနေမျိုးဇော်၏ ငယ်သူငယ်ချင်း ဖြစ်သူ ကိုမောင်မောင် (ကဗျာဆရာ အရိုင်းဖြူ) နှင့် ကျော်မြင့်လွင်တို့က ပုသိမ်၊ ပြည်တော်သာ တစ်ရပ်ကွက်တည်း သားတွေ။ ကဗျာစာအုပ်လည်း အတူတူ ထွက်ဖူးသည်။
ကိုသီဟန်သွင်က ပုသိမ်ကောလိပ် ကျောင်းသားဘ၀ နှစ်လည်မဂ္ဂဇင်းမှာ ကိုနေမျိုးဇော်နှင့်အတူတူ လက်စွမ်းပြခဲ့ဖူးသည်။ ဘွဲ့ရပြီး ရန်ကုန်မှာ ခြေတစ်နေရာ ချဖို့ ကြိုးစားရင်း ကဗျာတွေ၊ ၀တ္ထုတွေ ရေးဖွဲ့သည်။
ဝတ္ထုတိုတွေရေးသော မောင်သုန်ကို သူတို့အချင်းချင်းက ငှက်ဆိုးဟု ခေါ်ကြသည်။ သူတို့နောင်တစ်ချိန်မှာတော့ဖြင့် "အဖေ ခေသူမဟုတ်နှင့် အခြားဝတ္ထုများ" စာအုပ်ဖြင့် အမျိုးသားစာပေဆု ရရှိသွားခဲ့သည်။
နောက်တစ်ယောက်က ပုသိမ်ကောလိပ်တွင် အနန္တလှိုင်အမည်နှင့် ကဗျာတွေ ရေးခဲ့သော ကိုသန်းဝင်း။ သူသည် ၀ိဇ္ဇာဘွဲ့ကို မြန်မာစာအဓိကနှင့် အထူးအောင်ခဲ့သော်လည်း မဟာဝိဇ္ဇာတန်းတက်ဖို့ ဝေးသွားခဲ့ရသည့် ကဗျာဆရာ အောင်ဝေးပင်ဖြစ်သည်။
ကိုအောင်ဝေးက မြောင်းမြသား။ ကိုအောင်ဝေးနှင့် ကျော်မြင့်လွင် (လင်းထက်) တို့၏ ပထမဆုံးကဗျာတွေက ရှုမ၀ရုပ်စုံမဂ္ဂဇင်း (၁၉၈၂ ခုနှစ်၊ ဒီဇင်ဘာလ) တွင် အတူတူ ပါခဲ့ကြ၍ ကဗျာဆရာသက်တမ်း အတူတူဟု ဆိုရမည်။ အသက်အရွယ်ချင်း ကွာခြားသော်လည်း သူတို့နှစ်ယောက်၏ သံယောဇဉ်ကလည်း ကြီးမားသည်။
ထို့အပြင် ပြည်မြို့မှကိုခင်မောင်လွင်လည်းရှိသည်။ သူလည်း စာသမားပင်ဖြစ်သည်။
ဤသို့ဖြင့် အခန်းမှာအမြဲနေထိုင်သူ ခုနှစ်ယောက်။ ကြုံလျှင် ကြုံသလို လာရောက်တည်းခို ၀င်အိပ်သွားကြသော သူငယ်ချင်းအပေါင်းအသင်းကဖြင့် မနည်းလှပြီ။
(၅)
ကျော်မြင့်လွင်က အခန်းမှာအသက်လည်း အငယ်ဆုံး။ လူကောင်လည်း အသေးဆုံးဖြစ်၍ သူ၏ ကဗျာဆရာနာမည်မှ ရှေ့ဆုံးအလုံးကိုယူကာ "သျှပ်ကလေး" ဟုခေါ်ကြလေသည်။
(၆)
သူတို့အခန်းကို ရောက်ရောက်လာကြသူတွေထဲမှာ ရန်ကုန်စက်မှုတက္ကသိုလ်မှ ချည်မျှင်(textile) ကျောင်းသား ကိုထွန်းဝေ (နောင်တွင် မန္တလေးအရက်ချက်စက်ရုံ) အကြောင်းကိုလည်း ထည့်ပြောမှ ပြည့်စုံမည်။ ကိုထွန်းဝေလည်း ပုသိမ်ကောလိပ်တက်ခဲ့သူဖြစ်သည်။
ထူးခြားတာက သိုင်းပြောင်းပြန်ဆရာကြီး ဦးမောင်လေး မကွယ်လွန်မီ သူ့ကိုလျှို့ဝှက်သိုင်းပညာ အတော်များများ သင်ကြားပေးထားခဲ့၍ ဆရာဖြစ် အဆင့်အထိ တက်ကျွမ်းထားသူဖြစ်နေသည်။
သူရောက်လာလျှင် စံရိပ်ငြိမ် ၆လမ်း အဆောင်သားတွေက ရတတ်သမျှ သိုင်းအကွက်တွေ သင်ယူကြသည်။ အမြဲတမ်း စူးနစ်လေ့ကျင့်ကြသည် မဟုတ်၍ သူတို့နင်းသော သိုင်းကွက်များမှာ ကိုရိုကားရားဖြစ်၍နေတော့သည်။ ပုံမကျ ပန်းမကျသိုင်းကစားခဲ့သူတွေထဲမှာ သျှပ်ကလေးလည်း ပါခဲ့သည်သာ။
ကိုထွန်းဝေကလည်း သူတို့ဆီက အနုပညာဓာတ်တွေ ကူးစက်ပြီး မယ်ဒလင်တစ်လက်နှင့် သီချင်းဆိုဖို့ ကြိုးစားနေတတ်ပြန်သည်။ သူ့လက်သံကလည်း အဆင်တော့ မပြေလှ။
(၇)
သူတို့ အဆောင်တည်ရှိရာလမ်းနှင့် မျဉ်းပြိုင်လမ်းထဲမှာ အိမ်ကျောချင်းကပ် ဓားလွယ်ခုတ်အနေအထားတွင် ကဗျာဆရာမ မအိနေထိုင်သည်။ ဆရာမ မအိက ဟင်္သာတသူ။
ကိုနေမျိုးဇော်နှင့် သူ့ထက် အသက်သုံးနှစ်ခန့်ကြီးသည့် ဆရာမ မအိတို့သည် မောင်နှမရင်းချာ မောင်လေးငယ်နှင့် အစ်မကြီးသဖွယ်။ ရဲဘော်ရဲဘက်လိုလည်း ခင်မင်ကြသည်။
ဆရာမ မအိသည် ရှုမ၀ရုပ်စုံမဂ္ဂဇင်းတွင် လစဉ်ပင်တိုင်ကဗျာ၊ ၀တ္ထုတိုတွေ ပါနေသူ။ အယ်ဒီတာချုပ် ဆရာမောင်ဆွေတင့်နှင့် တာဝန်ခံ အယ်ဒီတာ ဆရာမောင်မြင့်မြတ်တို့က မဂ္ဂဇင်းတိုက်မှာ ပညာယူဖို့ ဖိတ်ခေါ်ခဲ့ကြသည်။
ဤသို့ဖြင့် ထိုအခိုက်အတန့်တွင် ဆရာမ မအိသည် ရှုမ၀မဂ္ဂဇင်းတိုက်သို့ အရောက်အပေါက်မှန်မှန်ရှိခဲ့သည်။ ကိုနေမျိုးဇော်ကလည်း ကဗျာ၊ ၀တ္ထု၊ သရုပ်ဖော်ပုံတွေအတွက်
အလုပ်လာယူ၊ ပြန်လာအပ်။ မဂ္ဂဇင်းတိုက်မှာ ကြုံကြိုက်တိုင်း ဘတ်စ်ကားစီးပြီး သူတို့အတူတူပြန်လာဖြစ်ကြတာများသည်။
(၈)
ကျော်မြင့်လွင်နှင့် ဆရာမ မအိ၏ ညီမအငယ်ဆုံးလေးတို့က ပုသိမ်ကောလိပ်အတူတူတက်ဘက်တွေ ဖြစ်နေကြပြန်သည်။
"မအိက ညီမလေးနဲ့ တူတယ်နော်" ဟု ကျော်မြင့်လွင်က ဆိုသောအခါ မအိရင်ထဲ လှုပ်ရှားသွားသည်။
"တော်တော် တူသလား" ဟု ကသောကမျောပင် မေးမိသည်။
"အင်း နည်းနည်းမဟုတ်ဘူး။ တော်တော့်ကိုဆင်တာ" ဟု ကျော်မြင့်လွင်က အလေးအနက်ထားပြီး မှတ်ချက်ချသည်။
ဆရာမ မအိကတော့ သူ့ညီမလေးနှင့် ရုပ်ချင်းဆင်တူသည်ဟု ပြောသံကြားရတိုင်း စိတ်ထဲမှာလွန်စွာ ကြည်နူးမိစမြဲ။ သို့ဖြစ်၍ ကျော်မြင့်လွင်၏ မှတ်ချက်မှာ ကျေနပ်သွားခဲ့သည်။
ဆရာမ မအိက ကိုယ့်ထက်အသက်အများကြီး ကြီးသော ကဗျာရေးဖော်အစ်မကြီးကို ကလောင်နာမည် အတိုင်းပဲ "မအိ" ဟုခေါ်သော လင်းထက်ကိုလည်း အပြစ်မမြင်။ ဒါကိုက ရိုးသားဖြူစင်ပွင့်လင်းသလောက် ခိုင်မြဲသော မေတ္တာဓာတ်၏ ပြယုဂ်တစ်ရပ်ဟုပင် ဆိုနိုင်စကောင်းသည်ထင်မိသည်။
(၉)
စံရိပ်ငြိမ် ၆ လမ်းက သူတို့အခန်းမှာ စည်းကမ်းကတော့ အလွန်တင်းကျပ်သည်။ အရက်မသောက်ရ၊ ဖဲမရိုက်ရ၍ အခြားကိစ္စကား စကားထဲပင် ထည့်ပြောမရတော့ပြီ။
သူတို့အထဲမှာ ငွေကို ဖောဖောသီသီသုံးနိုင်သည့်သူ တစ်ယောက်မျှ မရှိ။ ဘိုင်ကျနေကြတာပဲ များသည်။ သို့သော် သူတို့တစ်တွေ စိတ်ကူးယဉ်လိုက်ကြလျှင် စာပေ၊ ကဗျာ၊ အနုပညာနှင့် ပက်သက်ပြီး မြင့်မြင့်မားမားတွေချည်းသာ။ ဖြစ်နိုင်လျှင် မဂ္ဂဇင်းတစ်စောင်ထုတ်ဖို့ကလည်း အမြဲပါသည်။
လူငယ်တွေပီပီ ကမ္ဘာကြီးကို အကောင်းဘက်ပြောင်းလဲပစ်ဖို့ ရိုးသားလှသည့်အိပ်မက်များကို သူတို့မက်ခဲ့ကြသည်။
(၁၀)
ကဗျာဖွဲ့သူ ဖွဲ့၊ ၀တ္ထုရေးသူ ရေး၊ စာဖတ်သူ ဖတ်ပြီး ညအိပ်လေ့မရှိကြသည့် သူတို့အခန်းကို "ဇီးကွက် တိုင်းပြည်" ဟုလည်း ခေါ်ကြသည်။
ကဗျာဆရာ ကိုအောင်ဝေးက ကဗျာမရေးခင် သူ၏ ကဗျာစာသားတွေကို အသံထွက်ပြီး ရွတ်နေတတ်သည်။
ကိုနေမျိုးဇော်၏ စားပွဲမှာ ပန်းချီဆေးတွေ၊ စုတ်တံ၊ ကလောင်၊ မင်အိုး၊ ပန်းချီစာရွက်တွေနှင့် ပြည့်ကျပ်နေသည်။ ပန်းချီရုပ်ပုံပေါ်တွင် တင်ထားသော ဆေးသားထူထူကို ဓားပါးကလေးနှင့် တရှဲရှဲ ခြစ်ထုတ်နေသည့် အသံကိုကြားရမည်။ မိုးလင်းသည်အထိ သူအလုပ်လုပ်ပြီးလျှင် ကရင်သင်တိုင်း အနီးဝတ်ကာ ခင်ဝမ်း၏ "ဘယ်တော့များလဲ…နှင်းရယ်" သီချင်းကို ဂီတာတစ်လက်နှင့်တိုးဖွဖွကလေး ညည်းညူနေတတ်သည်။
ကိုခင်မောင်လွင်ကလည်း ဆေးလိပ်ကိုခဲပြီး ၀တ္ထုတိုတွေ ဖိရေးသည်။ စက်မှုတက္ကသိုလ်မှ သိုင်းဆရာ ကိုထွန်းဝေ ရောက်လာလျှင်တော့ဖြင့် ကိုခင်မောင်လွင်ရေးထားသော ၀တ္ထုတိုတွေကို ယူဖတ်ပြီး "ကျွန်ုပ်၏ ချစ်သူသည်ကား ထိုလူကြီး၏ ရင်ခွင်တွင် မှေးစက်နေပေတော့သည်" ဆိုသောဝါကျကို ပြန်၍ ရွတ်ပြတတ်သည်။
(၁၁)
ကဗျာဆရာ၊ စာရေးဆရာ၊ ပန်းချီဆရာ ဖြစ်ဖို့ စိတ်ကူးအိပ်မက်များနှင့် ထုံမွှမ်းထားကြသည့် ထိုအခန်းတွင် ကျော်မြင့်လွင်၏ သီချင်းဂီတ ကိစ္စမှာ အတန်ငယ် မှေးမှိန်လျက်ရှိသယောင် ထင်ရသည်။
အစ်ကိုကြီးတွေကလည်း လမ်းတစ်ဝက်မှာ ယောင်ချာချာနှင့် ခရီးမရောက်နိုင်သေးဟု သူတို့ယူဆသော သျှပ်ကလေးကို "ကျောင်းပြီးမှ လုပ်ချင်တာ လုပ်" အယူအဆဖြင့် ၀ိုင်းဆုံးမကြသည်။ အနုပညာထက် ကျောင်းစာဘက်မှာ ပိုအားသန်ဖို့ လမ်းပြခဲ့ကြ၊ လက်တွဲခေါ်ကြသည်။
ရန်ကုန်တက္ကသိုလ်ထဲတွင် ပုသိမ်ကောလိပ်မှ ပြောင်းရွှေ့လာကြသော ဆရာများစွာရှိကြရာ အစ်ကိုကြီးတွေနှင့် ထိုဆရာတွေက ရင်းနှီးကြသည်။ သူ့ကိုကျောင်းထဲခေါ်သွားပြီး ဇီဝဗေဒဘာသာတွဲနှင့် သက်ဆိုင်သောဆရာများနှင့် တွေ့ပေး၊ မိတ်ဆက်ပေးကြသည်။ စာတွေမေးဖို့ ဆရာများထံ လွှတ်သည်။ အခန်းမှာ နေချင်တိုင်း နေမရ။ စာကျက်ရသည်။
နောက်ပိုင်းဆိုလျှင် အစ်ကိုကြီးတွေက ညနေခင်း လက်ဖက်ရည်ဆိုင်ထိုင်ရာသို့ပင် သူ့ကိုမခေါ်။ သူ့အတွက် ပါဆယ်ဆွဲပေးပြီး စာကိုသာ ကျက်စေကြသည်။ ကျော်မြင့်လွင်ကလည်း အစ်ကိုကြီးတွေကိုချစ်သည့် စိတ်ကြောင့် တတ်နိုင်သမျှ လိုက်လုပ်ခဲ့တာ မဆန်းကြယ်ဟု ဆိုနိုင်သလို အံ့သြစရာဟုပင် ဆိုချင်လည်း ဆိုနိုင်သည်။
(၁၂)
အစ်ကိုကြီးတွေ၏ စေတနာက သူ့အပေါ်ကြီးမားလှသော်လည်း သူ့ရင်ထဲရှိ အလျှံတညီးညီး မီးလျှံကို သူတို့ အပြည့်အ၀မမြင်နိုင်ကြ။ ဒါလည်း အဆန်းတော့ မဟုတ်။ သူကိုယ်တိုင်ပင် ထိုမီးလျှံ၏ အတိုင်းအဆကို သူမသိ။
အစ်ကိုကြီးတွေ အသီးသီး အသက အသက အပြင်ထွက်သွားကြပြီး သူတစ်ယောက်တည်းကျန်ရစ်တော့မှ သူ့ကိုယ်ပိုင် စိတ်ကူးများကို လွတ်လပ်စွာ သွန်ချသည်။ ရှိစုမဲ့စုနှင့် ဂီတာလေးတစ်လုံးဝယ်ထားတာက သူ၏အဖော်မွန် ဖြစ်သည်။ အဆိုပါ သူ၏ တိတ်တခိုးအဖော်ဂီတာလေးနှင့် သူ့အကြားရှိ ကြီးမားအားကောင်းလှသော အဆက်အသွယ်ရစ်ပတ် နှောင်ဖွဲ့မှုကို အခန်းထဲရှိ ဘယ်သူမျှ အတိအကျမသိကြ။
သူက အငယ်ဆုံးဖြစ်နေတာလည်း တစ်ကြောင်းဖြစ်သည်။ သို့ဖြစ်၍ သူသိထားသမျှ ဂီတကို ထုတ်ဖော်မပြချင်။ နောက်တစ်ခုက သူသည် လူအုပ်ထူထူထဲမှာ ဓားတ၀င့်ဝင့် မလုပ်တတ်သူ။ အချိန်ရသမျှ ဓားကိုထက်မြအောင် သွေးထားပြီး မလိုအပ်ချိန်တွင် ဓားအိမ်ထဲမှ လုံးဝ ဆွဲမထုတ်တတ်သူလည်းဖြစ်သည်။
(၁၃)
စံရိပ်ငြိမ် ၆ လမ်း၊ အဆောင်ခန်းလေးမှာ သူက သူများတွေလို ကဗျာရေး လိုက်ရေးသည်။ ၀တ္ထုရေး လိုက်ရေးသည်။
စာတွေ ကဗျာတွေ ရေးဖို့ဆိုလျှင် ကျောင်မြင့်လွင်သည် နေရာမရွေး သီးခြား အချိန်အခါမရွေး သူ့စိတ်ထဲမှာ ရင့်မှည့်ပြီးဆိုလျှင် တစ်ခါတည်းထိုင်ပြီး အပြီးလက်စဖြတ်တတ်သည်။
သမိုင်းဝင်ကင်တင်းရှိ ဦးတင်အောင်၏ "ရွှေကြယ်ကဖီး" ကို ကိုခင်မောင်လွင်တို့ အမိုးပြန်မိုးပေးကြသော ညတုန်းက သူတို့စံရိပ်ငြိမ်အဆောင် ၀ိုင်းတော်သားတွေလည်း လိုက်ပြီး ၀ိုင်းကူကြသည်။ ကျော်မြင့်လွင်သည် တတ်အားသရွေ့ လုပ်ပေးပြီးနောက် အချိန်ရသခိုက်ကလေးတွင် ဆိုင်ထဲမှ အပြင်ထုတ်ထားသော ခုံတစ်လုံးပေါ် ကုန်းပြီး စာရေးနေခဲ့သည်။
ကိုသီဟန်သွင်က "ဘာတွေရေးနေတာလဲကွ" ဟုမေးရာ မျက်မှန်ကို တစ်ချက်ပင့်မော့ကြည့်ပြီး ရှုမ၀ကို ပို့ဖို့ ၀တ္ထုရေးနေသည်ဟု ခပ်အေးအေးပင်ပြန်ဖြေသည်။
ရှုမ၀မှာ ၀တ္ထုပါဖို့ဆိုသည်မှာ အတော်ပင် မလွယ်သောကိစ္စ။ သည်ကောင်လေး။ သူမို့ စဉ်းစားရဲသည်ဟုတွေးပြီး ကိုသီဟန်သွင် ပြုံးမိလိုက်သေး၏။သို့သော် ဘာမျှ မကြာလိုက်။ ကျော်မြင့်လွင်၏ "လင်းထက်" ကလောင်အမည်နှင့် "မြတ်နိုးခြင်းအားဖြင့် ကြင်နာသည်ဖြစ်၍" ဆိုသော ၀တ္ထုတိုက ရှုမ၀ချစ်ကိုယ်တွေ့ ကဏ္ဍ၌ ပါလာသည်။
ထိုအခါကျမှ ကိုသီဟန်သွင်လည်း "သျှပ်ကလေးကို လျှော့တွက်၍မရ" ဟူ၍ သူ့ခြေစလက်စကို အသိအမှတ် ပြုလိုက်ရတော့သည်။
"လင်းထက် ၏ မြတ်နိုးခြင်းအားဖြင့် ကြင်နာသည်ဖြစ်၍"
(က)
၁၉၈၂ ခုနှစ်၊ ဇူလိုင်လထုတ် ရှုမ၀ရုပ်စုံမဂ္ဂဇင်းတွင် ပါရှိခဲ့သော သူ၏ ၀တ္ထုတိုကလေးမှာ ဂုဏ်အဆင့်အတန်းချင်း မတူညီ၍ ကွေကွင်းသွားကြရသော ချစ်သူနှစ်ဦး၏ ဘာမျှ မဆန်းပြားသည့် သမားရိုးကျ အချစ်အလွမ်ဇာတ်လမ်းကလေး တစ်ပုဒ်ဟု အလွယ်တကူ မှတ်ချက်ချမိချင်လည်း ချမိနိုင်သည်။ သို့သော် သိုင်းဝိုင်းဆက်စပ်နေသော အခြေအနေ၊ အချက်အလက်များစွာ ရှိသေးသည်။
ထိုဝတ္ထုတိုကလေးကို ရေးဖွဲ့ခဲ့စဉ်တုန်းက ကျော်မြင့်လွင်၏ အသက်အရွယ်မှာအတော်ငယ်သေးသည်။ ၁၉ နှစ်ပြည့်သည့် အချိန်နှင့် သွားတိုက်ဆိုင်သည်။ သူ့မှာရှိထားသော အတွေ့အကြုံ၊ ကျွမ်းကျင်မှုအရင်းအမြစ်များကို ထည့်၍ စဉ်းစား တွက်ဆလိုက်လျှင် မြင်ကွင်းက များစွာ ကျယ်ဝန်းသွားပေလိမ့်မည်။
ပြီးတော့ ၁၉၈၂ ခုနှစ်။ ထိုအချိန် ထိုကာလတုန်းက ရှုမ၀မှာ အတွင်းကဗျာလေး တစ်ပုဒ်လောက် ဖော်ပြခံရဖူးလျှင်ပင် စာပေဂုဏ်ကြီးမားလှပြီဟူ၍ တသသ ဂုဏ်ယူခဲ့ကြသော အချိန်ဖြစ်သည်။ ရှုမ၀၏ "ချစ်ကိုယ်တွေ့ ကဏ္ဍ" မှာလည်း လူသစ်တန်းတို့အတွက် စာပေအနုပညာ သြဇာအဟိတ်မြင့်မားလှသည်။ ထိုကဏ္ဍမှာ ၀တ္ထုတိုလေး တစ်ပုဒ်ပါဖို့အရေး မနည်းမနော ကြိုးစားကြရသည်။
ရှုမ၀စင်မြင့်ပေါ်သို့ တက်လှမ်းကြသော စာရေးဆရာ အများစုသည် ဤလမ်းကြောင်းမှပင် အားထုတ်ခဲ့ရသည်။ ထိုစဉ်က အယ်ဒီတာအဖွဲ့၏ တင်းကြပ်သော စည်းမျဉ်းဘောင် အကန့်အသတ်ကို ထည့်စဉ်းစားမှ ပြည့်စုံမည်ဖြစ်သည်။
(ခ)
ဤ၀တ္ထုတိုလေး တစ်ပုဒ်ထဲမှာပင် သူ၏ ပါရမီ၊ သူ၏ ဖြစ်နိုင်ခြေ အလားအလာများစွာတို့ကို မြင်တွေ့နိုင်သည်။ သူက စာရေးဆရာ မလုပ်ခဲ့၍သာ စာရေးဆရာ ဖြစ်မလာခဲ့တာ။ သူ၏ ဖန်တီးနိုင်စွမ်းအား မည်မျှ ကြီးမားသွားနိုင်သည်ကို ဤလက်ရာလေးထဲမှ တစေ့တစောင်း အကဲခတ်ကြည့်နိုင်ပါသည်။
(ဂ)
ဝတ္ထုကို သူကအငြိမ့်ခန်းဖြင့်မစ။ လှုပ်၍ ဖွင့်လိုက်သည်။ အကြောင်းမှာ ဤအဖွင့်ခန်းတွင် ချစ်သူမိန်းကလေးက ယောကျာ်းလေးကို ပါးရိုက်လိုက်၍ဖြစ်၏။ သို့သော် ထိုပဋိပက္ခ အခြင်းအရာသည် နာကြည်းမှု အမျက်ဒေါသထက် မချင့်မရဲနှင့်ဝမ်းနည်းစရာပို၍ ကောင်းနေသည်။
(လင်းထက်၏ "မြတ်နိုးခြင်းအားဖြင့် ကြင်နာသည်"ဖြစ်၍ ၀တ္ထုတိုမှ ကောက်နုတ်ချက်များ)
မောင့်ထံမှ သည်သို့သော စကားမျိုး ကြားရလိမ့်မည်ဟု မြတ်စု မထင်မိခဲ့။
"မောင် မတတ်နိုင်ဘူး မြတ်စုရယ်၊ အနစ်နာခံတာ၊ စွန့်လွှတ်တာလို့လည်း မပြောချင်ဘူး၊ မောင့်ဘ၀ကို မြတ်စု နားလည်သားပဲ၊ အားလုံးအတွက် အကောင်းဆုံးဖြစ်အောင်…"
"အို . . . မောင်၊ မြတ်စု . . . မြတ်စု . . ."
မောင် မြတ်စုကို မချစ်ဘူးဟု ပြောလိုက်ချင်သည်။ မရ။ မြတ်စုနှုတ်တို့ ဆွံ့ချေသည်။ မျက်ရည်များသည် ပါးပြင်သို့ စီးကျလာသည်။
မောင် မြတ်စုကို ဥပေက္ခာပြုလွန်းသည်။ မောင်ပြဿနာကို ရှောင်ဖယ်သည်။ မောင်ကိုယ်လွတ်ရုန်းသည်။ မြတ်စု စိတ်၌ မောင့်ကို စွဲချက်ပေါင်းများစွာ တင်၏ ။ မောင့်ကို မြတ်စု စိတ်နာသည်။ စိတ်မှ နာကြည်းမှုသည် လက်သို့ရောက်၏ ။ မြတ်စု မောင့်ပါးကို ပြင်းထန်စွာ ရိုက်သည်။
"မောင်…ရယ်"
မောင့်ကို ရိုက်မိသည့်အတွက် မြတ်စု ရုတ်ချည်း နောင်တရသည်။
မောင့်မျက်နှာကို မျက်ရည်များကြားမှ ရီဝေစွာ တွေ့ရသည်။ မြတ်စု မောင့်လက်မောင်းကို တင်းကျပ်စွာ ဆုပ်ကိုင်လိုက်မိသည်။ နာကြည်းမှုများ နေရာတွင် ကြေကွဲမှုများဝင်လာ၏ ။ မြတ်စုတစ်ချက်ရှိုက်သည်။
"မြတ်….. မြတ်စု မှားသွားတယ် မောင်၊ မောင့်ကို မြတ်စု တောင်းပန်ပါတယ်"
"မလိုပါဘူးကွယ်၊ တောင်းပန်ရမှာက မောင်ပါ၊ မောင့်မှာသာ အပြစ်ရှိတာ"
"မဟုတ်ဘူး၊ မဟုတ်ဘူး၊ မြတ်စုကိုက ကံဆိုးတာ"
(ဃ)
အဖွင့်ကားချပ်ကို စိတ်လှုပ်ရှားစရာ ကောင်းအောင် ထိုသို့ ဖွင့်ပေးလိုက်ပြီးမှ မြတ်စုနှင့် မောင်တို့ တွေ့ဆုံခဲ့ကြပုံဆီသို့ နောက်ကြောင်းပြန် (Flashback) သွားသည်။ ဘ၀ချင်း ဆန့်ကျင်ဘက်လို ဖြစ်နေကြသောအလှ ဘုရင်မလေး မြတ်စုနှင့် အနုပညာသမား မောင်တို့ကို စာဖတ်သူနှင့် ကနဦး စတင် မိတ်ဆက် ပေးခဲ့သည်။
မြတ်စုနှင့် မောင်သည် ပုသိမ် ဒေသကောလိပ်တွင် တွေ့ခဲ့ကြ၏။ သည်တုန်းက မြတ်စုသည် ပထမနှစ် ကျောင်းသူ၊ မောင်သည် ဒုတိယနှစ် ကျောင်းသား ဖြစ်၏။ မောင်က အဖြူရောင် ကော်လံကတုံး ရှပ်အင်္ကျီနှင့် ပုဆိုး ဖရိုဖရဲနှင့် ရှမ်းလွယ်အိတ် အစုတ်နှင့် မသေမသပ် ရှိသည်။ မောင့်ကို တွေ့ရတိုင်း ဖွာလန်ကျဲနေသော ဆံပင်၊ အိပ်ရေးမ၀သော မျက်လုံး၊ တည်သော မျက်နှာနှင့် ဖြစ်သည်။ ကျောင်း၌သာ တွေ့ရသည်။ မောင် အတန်းတက်သည် ဟူ၍ မရှိ။
သင်္ချာမိသားစု မောင်မယ်သစ်လွင် ကြိုဆိုပွဲနေ့က မြတ်စုနှင့် မောင် သိကျွမ်းရသည်။ သည်ပွဲတွင် မြတ်စုသည် အလှဘုရင်မ သရဖူကို လက်ခံရသည်။ အခမ်းအနား အပြီး၌ မြတ်စု ရင်းနှီးသော ဆရာ ဦးသန်းထွန်းက မြတ်စုနှင့် မောင့်ကို မိတ်ဆက် ပေးသည်။
"မြတ်စု…ဒါ ဒုတိယနှစ်က မောင်ညီညီ၊ အနုပညာအသင်းရဲ့ တွဲဖက် အတွင်းရေးမှူးပေါ့"
(င)
အဲသည်နောက်မှာတော့ မြင်ကွင်းကို အနီးကပ် ဆွဲယူလာသည်။ မောင်နှင့် မြတ်စုတို့ အကြောင်း အသေးစိတ် ပုံဖော် ဖွဲ့နွဲ့ပြခဲ့သည်။ သူတို့ နှစ်ယောက် အကြားရှိ ခြားနား ဝေးကွာလှသော အတိုင်းအတာကို ဆန့်ထုတ် ပြလိုက်သည်။ ဤသို့ဖြင့် ၀တ္ထုကလေးမှာ ဇာတ်ရှိန် ရလာပြီး မချင့်မရဲ ဖြစ်စရာ ကောင်းလာသည်။
အများက မောင့်ကို ဆက်ဆံရေး မပြေပြစ်သူ၊ စကားပြော ဘုကျသူ အဖြစ် မြင်ကြ၏။ မြတ်စုကမူ သည်သို့မဟုတ်။ မောင်သည် စကားပြော ရိုးသား ပွင့်လင်းသူဟု ထင်သည်။ မောင်နှင့် ရင်းနှီးကျွမ်းဝင်ပြီး နောက်ပိုင်း ကာလများ၌ မောင့်အပေါ် ကရုဏာ သက်မိသည်။
မောင်သည် မြစ်ဝကျွန်းပေါ် မြို့ငယ်ကလေးတစ်မြို့မှ ဖြစ်၏။ မောင့် ဖေဖေသည် မကျန်းမာ၍ အငြိမ်းစား ယူထားသော အစိုးရ အမှုထမ်းတစ်ဦး ဖြစ်သည်။ သူ၏ အငြိမ်းစား လစာငွေသည် လေးယောက်သော မိသားစုအတွက် မည်သို့မျှ မပြည့်စုံနိုင်ချေ။ မောင့်မေမေသည် အိမ်စရိတ် ဖြည့်ရန် ဈေးဗန်း ခေါင်းရွက်ရ၏။ မောင့်ညီငယ်သည် အထက်တန်းကျောင်းသား ဖြစ်သည်။ မောင် ဆယ်တန်း အောင်သည့် နှစ်က အိမ်၏ စီးပွားရေး အခြေအနေအရ ကျောင်းဆက် မတက်နိုင်ခဲ့ပေ။ မောင်သည် တောက်တိုမည်ရ အလုပ်ကြမ်းများကို လုပ်၍ အိမ်စရိတ် ဖြည့်ရင်း ငွေစုသည်။ သည်လိုနှင့် နောက်တစ်နှစ်မှာ မောင် ကျောင်းဆက်တက်နိုင်ခဲ့သည်။
"အိမ်မှာ ကျန်ခဲ့တဲ့ မိသားစု ပင်ပင်ပန်းပန်း ရှာဖွေနေချိန်မှာ ကျွန်တော်က ဒီမှာလာပြီး စိတ်ချမ်းသာ နေနိုင်မလား၊ မိသားစုရဲ့ ဒုက္ခတွေကို ခဏဖြစ်ဖြစ် မေ့အောင် ကြိုးစားနေတာဟာ လူ မဟုတ်ဘူး မြတ်စု။ ဒါဟာ မေ့ထားနိုင်စရာ ကိစ္စမှ မဟုတ်တာ"
မြတ်စုဘ၀က သည်သို့မဟုတ်။ မြတ်စုဖေဖေက ဌာနဆိုင်ရာ အကြီးအကဲတစ်ဦး ဖြစ်ပြီး ပုသိမ်ကောလိပ်နှင့် အတော်အတန် ဝေးသော ကန်သုံးဆင့် အရာရှိရိပ်သာတွင် ၀င်းနှင့် ခြံနှင့် တိုက်နှင့် ကားနှင့် နေရသည်။ ဖေဖေ့ဘက်မှ ရာထူး အရှိန်အ၀ါနှင့် မေမေ့ဘက်မှ စည်းစိမ်ဥစ္စာ ပေါင်းစည်းမှုသည် တစ်ဦးတည်းသောသမီး မြတ်စုအတွက် တောင့်တတိုင်း ပြည့်စေသည်။
အနားမှ လူများကို ကျော်၍ မောင့်ကို ဘာကြောင့် စိတ်ဝင်စားခဲ့ရသည့်အကြောင်း တစ်ခါတစ်ခါ စဉ်းစားမိသော် ဘာမျှ မပြတ်သားဘဲနှင့် မြတ်စု ရင်ခုန်ခဲ့ဘူးသည်။ မောင်နှင့် မြတ်စု တတွဲတွဲ ဖြစ်လာသောအခါ သူငယ်ချင်းများက တိုးတိုးတိတ်တိတ် စကြ၊ နောက်ကြသည်။ မြတ်စု မည်သို့ ပြန်ပြောရမည် မသိ။ မောင် နေနိုင်လွန်းသည်။
(စ)
ဤအခန်းကတော့ "လင်းထက်" ၏ လက်စွမ်းပြဟုပင် ဆိုရမည်။ သူ၏ အရေးအဖွဲ့မှာ မာယာ ပရိယာယ် ပါသည်။ နည်းဗျူဟာ မြောက်သည်။ ရုတ်တရက် မထင်မှတ်ဘဲနှင့် လှည့်ကွက်ထဲ ရောက်သွားနိုင်။ ထောင်ချောက် မိသွားနိုင်လောက်အောင် ဆင်ပြီး ရေးတတ်သည်။
ဖတ်ကြည့်ပြီး အကဲဖြတ်နိုင်ဖို့ ကောက်နုတ် ဖော်ပြလိုက်ပါသည်။
ကျောင်း အနုပညာ အသင်းမှ ပဒေသာကပွဲ တစ်ခု ပြုလုပ်သည်။ မြတ်စု အပျိုတော်အကကို တာဝန် ယူရသည်။ မြတ်စု စင်မြင့်ပေါ်၌ ကနေသည်ကို မောင် ခန်းမအ၀မှ ကြည့်နေခဲ့၏။ နတ်ဒိုးသံက တက်ကြွဖွယ်ရာ ဆူညံနေသည်။ ရင်၌ စည်းထားသော ပုဝါနှင့် ဦးခေါင်းထက်မှ ရှာပန်းနီစတို့သည် စူးရဲ တောက်ပနေ၏။ သီချင်းသံက "ကိုကြီးကျော်ရေ၊ ကိုကြီးကျော်ရေ…" ဆိုသောအခါ ကျောင်းသားများ၏ "ဝေး" အသံက ဟိန်းထွက် လာသည်။ မြတ်စု မျက်နှာသည် လှပစွာ ပြုံးနေခဲ့၏။ မောင်အခန်းအ၀မှ လှည့်ထွက် သွားသည်။
မြတ်စု ဘာရယ်မသိ ပျော်မိသည်။ ကပွဲ ပြီးတော့ မြတ်စု မောင့်ကို လိုက်ရှာသည်။
"စင်ပေါ်မှာ မြတ်စု ဘာဖြစ်လို့ အရမ်း ပြုံးရတာလဲ"
"သြော်. . . ဒါလား၊ စင်ပေါ်မှာ ကတဲ့သူက မဲ့နေလို့ ဖြစ်မလား"
"အောက်က လူတွေ အော်ဟစ်နေတာကျတော့ရော"
"အိုး. . . ဒါ ပရိသတ်ပဲလေ"
မောင့် ခြေလှမ်း တုံ့ခနဲ ရပ်၏။ မြတ်စုပါ အလိုအလျောက် ရပ်မိသည်။ မောင် တစ်စုံတစ်ခု ပြောချင်ဟန် ရှိသည်။ ကဗွီးညိုများ လေတိုးသံကို တရီးရီး ကြားနေရ၏။
"မြတ်စုကို ကျွန်တော် ချစ်တယ်"
(ဆ)
လင်းထက် ရေးဖွဲ့ပြခဲ့သော မောင်နှင့် မြတ်စုတို၏ ချစ်သူဘ၀မှာ ရင်ခုန်စရာထက် လှိုက်မောစရာကောင်းသည်ဟုသာ ဆိုရမည်။
မောင်သည် ချစ်သူများဖြစ်ခဲ့ကြသည့်တိုင် မြတ်စုကို မယုယတတ်။ သူများချစ်သူများကဲ့သို့ ချစ်ခွန်းမဖွဲ့တတ်။
တစ်ခါတစ်ရံ၌ ကန်သုံးဆင့်၏ ညနေခင်းများကို မောင်နှင့်အတူ လမ်းလျှောက်ရင်း ခံစားခဲ့ကြဖူး၏ ။ ကဗွီးညိုများ လေချွန်သံ၊ ယူကလစ်ပင်တန်း၏ သင်းပျံ့သော ရနံ့မြေနီလမ်းနှင့် ကန်လယ်တံတားဖြူတို့သည် မြတ်စုအတွက် ရင်ခုန်ပျော်ရွှင်စရာများ ဖြစ်ခဲ့ဖူးလေသည်။ ထိုအချိန်ကလေးများတွင် မောင့်အရယ်အပြုံးကို ရှားပါးစွာ မြင်ရတတ်၏။ မောင့်ကျန်းမာရေးမှာလည်း အားရလောက်အောင်မကောင်း။ မောင်ရယ်၊ မျက်တွင်းတွေ ကျလိုက်တာ။ ညဥ့်နက်အောင် ကဗျာတွေ မရေးနဲ့နော်။ ဆေးလိပ်သောက်တာလည်း လျှော့ဦး။ အတန်းလည်း တက်ပါကွယ်။ စာတွေ မလိုက်နိုင်ပဲ နေဦးမယ်။ မောင့်စာအုပ်တွေလည်း အလွတ်ချည်းပဲ။ မြတ်စု ကူးပေးမယ်ဟု ပြောလျှင် မောင်သည် ကျိုးနွံစွာ နားထောင်တတ်သည်။
တစ်ခါတစ်ရံ၌မူ မောင်နှင့်အတူ ကင်တင်းရှိ ဦးပြုံးလက်ဖက်ရည်ဆိုင်သို့ လိုက်ထိုင်ခဲ့ဖူးသည်။ ထိုဆိုင်၌ မောင့်သူငယ်ချင်းများ အမြဲလိုရှိသည်။ သူတို့သည် အကြောင်းအရာပေါင်း များစွာကိုပြောဆိုတတ်ကြ၏။ သူတို့စကားဝိုင်းတွင် ဆာရီယယ်လစ်ဇင်း၊ ရိုမန်တစ်ဇင်း၊ အိပ်ဇစ်စတဲင်ရှယ်လစ်ဇင်းစသော "ဇင်း"ပေါင်းများစွာကိုလည်း ကြားရတတ်ပါသည်။ မြတ်စုက မောင်တို့ အုပ်စုကို လက်ဖက်ရည်တိုက်သူဖြစ်၏။ မောင့်သူငယ်ချင်းများက "မမြတ်စုပါမှ ကျွန်တော်တို့ လက်ဖက်ရည် သောက်ရတာ၊ မဟုတ်ရင် ရေနွေးကြမ်းပဲ သောက်ရတယ်"ဟု ရယ်လျက်ပြော၏။ မောင်က ပြုံးနေတတ်သည်။ သူတို့၏ ကဗျာများသည် အချစ်ကို မဖွဲ့။ ဘ၀ကိုသာ ဖွဲ့၏ ။ မောင်က -
"ဘ၀ထဲမှာသာ အချစ်ရှိတာ၊ အချစ်ထဲမှာ ဘ၀မရှိဘူး မြတ်စုရဲ့"ဟုဆိုတတ်သည်။
(ဇ)
အဲ့သည်နောက်တော့ အေးချမ်းစွာရှိခဲ့သော ရက်စွဲများ ကုန်ဆုံးသွားမည့်အချိန်သည် မမျှော်လင့်စွာပင် ရောက်ရှိလာခဲ့၏ ။
မြတ်စုနှင့် မောင့်အကြောင်းကို အိမ်က သိသွားခဲ့သည်။ မြတ်စုကလည်း မောင့်ဘ၀အကြောင်းကို အမှန်အတိုင်းဖွင့်ပြောပြသည်။ မြတ်စု ဖေဖေနှင့် မေမေသည် လုံးဝသဘောမတူ။ မောင့်ကိုအဆက်ဖြတ်ရန် ခါးသီးစွာဆို၏။ မြတ်စု မနာခံချေ။
သို့သော် သိပ်မကြာ။ ဖေဖေကိုယ်တိုင် ကားနှင့် ကျောင်းသို့လိုက်လာသည်။ သည်မှာ မြတ်စုနှင့် မောင့်ကို မတူမတန်ပြော၏။ မောင်ကား ခွန်းတုံ့မလှန်။ အံကြိတ်၍ စူးရဲစွာ ကြည့်လျက်နေ၏။ ကားကို တစ်ရှိန်တိုး မောင်းထွက်လိုက်ချိန်၌ မောင့်ထံမှ တောက်ခေါက်သံကို မသဲမကွဲ ကြားခဲ့ရသည်။
(စ်)
ခွဲခွာခြင်း ခံလိုက်ရသော ချစ်သူနှစ်ဦး၏ အကြား၌ အခက်အခဲ အတားအဆီးများ ပို၍ ပို၍ ကြီးမားလာသည်ကို "လင်းထက်" က ညင်ညင်သာသာနှင့် သပ်သပ်ရပ်ရပ် ရေးဖွဲ့ပြပြန်သည်။
မောင်နှင့်ဆက်သွယ်ရန် နည်းအမျိုးမျိုးဖြင့် ကြိုးစားသည်။ မရချေ။ အခြေအနေသည် အကျပ်အတည်း၌ ရှိသည်။ မြတ်စုအား ဖေဖေ့မိတ်ဆွေ အရာရှိကြီး တစ်ဦး၏သား ကိုသန်းဆွေနှင့် လက်ထပ်ပေးရန် စီစဉ်သည်။ ကိုသန်းဆွေသည် စက်မှုတက္ကသိုလ်မှ ဘွဲ့ရပြီး ဆည်မြောင်းဦးစီးဌာနမှ အရာရှိငယ် တစ်ဦးဖြစ်လေသည်။ မြတ်စု အကျောက်အကန် ငြင်းသည်။ မိဘများကား အားလုံးကို ချည်ပြီးတုပ်ပြီး ဖြစ်နေတော့၏။ မြတ်စုကို ကျောင်းတက်ခွင့်ပင် မပေးတော့ချေ။ သည်အကြောင်းကိုမူ သူငယ်ချင်းများမှတဆင့် မောင့်ထံရောက်စေသည်။ မောင့်ထံမှမူ အတုံ့အပြန်မရှိ။ မောင် မည်သည့်အကြောင်းကြောင့် သည်မျှ နေစိမ့်သနည်း။
မင်္ဂလာရက်သည် လျင်မြန်စွာ နီးကပ်လာ၏ ။
(ည)
အဲ့သည်နောက်တော့ မြတ်စု၏ စွန့်စားခန်းဖြစ်သည်။ ထိုစွန့်စားခန်း၏ ရလဒ်က သမားရိုးကျဆန်သည်ဟု ဆိုနိုင်သည့်တိုင် ရိုးစင်းလွန်း၍ပင် တစ်မျိုးဆန်းပြားနေခဲ့သည်။
"ခဏနေရင် မြတ်စု ထွက်လာတာအိမ်ကလူတွေ သိကုန်လိမ့်မယ်။ မြတ်စု …. မြတ်စုတို့ ပြေးကြရအောင်"
မောင့်မျက်နှာပေါ်တွင် ဖတ်ရှုမရနိုင်သော အရိပ်များ အားပြိုင်နေကြသည်။ မောင်သည် နှုတ်ခမ်းကို တင်းတင်းစေ့၏။
"အားလုံးအတွက် အကောင်းဆုံးဖြစ်အောင် ကြိုးစားပါလားကွယ်၊ မြတ်စု အိမ်ကိုပြန်ပါတော့၊ မောင်ဘာမှ မတတ်နိုင်ဘူး မြတ်စုရယ်"
မောင့်ထံမှ သည်သို့သော စကားမျိုး ကြားရလိမ့်မည်ဟု မြတ်စုမထင်ခဲ့မိ။
(ဋ)
ဤအခန်းကတော့ နိဂုံးဖြစ်သည်။ တစ်နည်းအားဖြင့် နိဒါန်းကို အစအခန်းကိုပင် ပြန်ပြီး ကောက်၍ ဆက်ရေးထားခြင်းလည်းဖြစ်သည်။ ဤသို့ဖြင့် ဇာတ်လမ်းကို အတတ်ပညာပါပါ ပြီးပြည့်စုံစွာ ဖွဲ့နွဲ့အဆုံးသတ်လိုက်သည်။
မြတ်စုရင်၌ တင်းကျပ်မောလိုက်လွန်းသည်။ မောင်လည်း ထို့အတူအမျှ ရှိကောင်းရှိလိမ့်မည်။ မြတ်စု တစ်ချက်ရှိုက်ပြီး ထိုင်ရာမှထ၏ ။ မောင့်ကိုတစ်ဘ၀လုံးအတွက် ကြည့်သည်။ တစ်ဘ၀လုံးအတွက်။
စက်ဘီးကို တအားနင်း၍ မောင့်ရှေ့မှ ပြေးထွက်ခဲ့သည်။ မျှော်လင့်ချက်ကား နွေ၌ဖြစ်သော မိုးတိမ်ကဲ့သို့ လေနှင်ရာ မျောလွင့်သွားခဲ့ပြီ။ အိပ်မက်ဆိုးတစ်ခုသာ ဖြစ်လိုက်ပါတော့ဟု ရိုးစင်းစွာ ဆုတောင်းမိသည်။ အိပ်မက်လည်း မဟုတ်ပြန်ချေ။
(၁၄)
၁၉၈၂ ခုနှစ် ဒီဇင်ဘာလထုတ် ရှုမ၀မဂ္ဂဇင်းတွင် "လင်းထက်" ၏ ကဗျာတစ်ပုဒ်ကို ပုံနှိပ်ဖော်ပြပေးခဲ့ပြန်သည်။
"စံပယ်ဖြူအိပ်မက်"
လှိုင်းခတ်သံဂီတ …ချိုမြမပီပြင်၊
သည်ရင်ကြယ်ပြာ၊ လပြာ၊ ကောင်းကင်ပြာ
ရောင်လွှာမြူးပြက်၊ လျှပ်လက်သလို အို … လှလိုက်တာ။
သဲသောင်ခုံလား၊ ရေစွယ်လားလေ ခြေသံဖွဖွ၊ ကြားနေရ
မွှေးမြသန့်စင်၊ အာရုံမြင်ရနံ့သင်းပျံ့နေဆဲ၊ ရင်ထဲမှာ
စကားတိုးတိုး၊ မြူခိုးဝေ စံပယ်ရေ … စံပယ်ဖြူ
ဘယ်သူများလဲ၊ မေးလိုက်ဆဲမှာ
သည်းသည်းလှုပ်လှုပ်၊ ငှက်တစ်အုပ်
ရုပ်ခြည်းပျံပြေး၊ ဟိုး အဝေးကို။
သည်အိပ်မက်မှ မောင်နိုးထလည်း
တမ်းတတပ်မက် ရုန်းမထွက်ချင် သက်ဦးမြတ်မွန်
ရွာလွန်ရွက်တိုက် ပြေးလိုက်ရှာဖွေ …
စံပယ်ရေ … စံပယ်ဖြူ ဘယ်သူများလဲ၊
ဘယ်မှာလဲကွယ် ရင်ထဲမေးမိဆဲပါမေ။
(၁၅)
ရှုမ၀မှာ ၀တ္ထု၊ ကဗျာတွေပါ၍ ရှုမ၀ ပန်းချီဆရာ ကိုနေမျိုးဇော်၊ ရှုမ၀ ကဗျာဆရာမ မအိတို့နှင့် သွေးသားရင်းချာပမာ ပို၍ နီးကပ်လာခဲ့သလို သူ၏ အင်္ဂလိပ်စာဝါသနာကြောင့် စံရိပ်ငြိမ် ၆ လမ်း အဆောင်သားထဲမှ အစ်ကိုကြီး ကိုသီဟန်သွင်နှင့် ပို၍ ရင်းနှီးသွားခဲ့သည်။
ကျော်မြင့်လွင်မှာ အဖေ့အမွေဖြစ်သော J-C Nestfield Grammer စာအုပ် တစ်အုပ်နှင့် ရေဒီယိုလေးတစ်လုံး အတူတူပါလာသည်။ လုပ်စရာမရှိလျှင် အဆိုပါ Nestfield Grammer ကိုပင် အသံထွက်၍ ဖတ်ဖတ်နေတတ်သည်ဟု ကိုသီဟန်သွင်က ဆိုသည်။
စံရိပ်ငြိမ် ၆ လမ်း အဆောင်ကလေးမှာ အင်္ဂလိပ်သတင်းစာယူ၍ နံနက်ခင်း သတင်းစာလာလျှင် ခေါင်းကြီးပိုင်း သတင်းများ၊ အရေးကြီးသော သတင်းများကို ဖြတ်၊ မသိသော အင်္ဂလိပ် စကားလုံးများကို အဘိဓာန်၌ရှာ၍ ကျက်သည်။ ရေဒီယိုလာသောအခါ အင်္ဂလိပ်ဘာသာအစီအစဉ်တွင် ထိုသတင်းများကိုပြန်နားထောင်သည်။ သည်လို ရေဒီယိုနှင့် အင်္ဂလိပ်စာ သင်တန်းကျောင်း တစ်ခုသဖွယ် တက်နေကြရင်း ကိုသီဟန်သွင်နှင့် သျှပ်ကလေး ကျော်မြင့်လွင်တို့ ပိုတွဲမိကြသည်။
(၁၆)
စံရိပ်ငြိမ်နှင့် ဘာမျှအလှမ်းမဝေးသော ရန်ကုန်တက္ကသိုလ်ထဲသို့လည်း မကြာခဏ သူတို့အတူ ရောက်ကြသည်။ နာမည်ကျော် ဦးချစ်လက်ဖက်ရည်ဆိုင်မှာ ထိုင်ဖြစ်ကြသည်။
ကျောင်းထဲတွင် သတ္တဗေဒဌာနမှ ဆရာ ဦးတင်သန်းကိုတော့ဖြင့် အင်္ဂလိပ်စာ လေ့လာလိုက်စားမှုနှင့် ပက်သက်၍ သူတို့အားကျလေးစားခဲ့ကြသည်။ ဆရာဦးတင်သန်း၏ လမ်းညွှန်မှုနှင့်ပင် ဆိပ်ကမ်းသာလမ်းမှ မစ္စက် ပါလမာဘကျော်ထံသို့ သူတို့နှစ်ယောက် ရောက်ရှိသွားကြသည်။
မစ္စက် ပါလမာဘကျော်သည် ဗြိတိန်နိုင်ငံသား၊ အိုင်ယာလန် အမျိုးသမီးကြီးဖြစ်၏။ သူဖွင့်ထားသော သင်တန်းတွင် အင်္ဂလိပ်လိုပဲပြောသည်။ မြန်မာလို လုံးဝမပြော၍ အင်္ဂလိပ်စာ ပိုပြီး တိုးတက်လိမ့်မည်ဟု ဦးတင်သန်းက လမ်းညွှန်လိုက်သည်။ ထိုသင်တန်းမှာ သူတို့နှစ်ယောက် အချိန်အတန်ကြာအထိ တက်ခဲ့ကြသည်။ ဆရာမကြီးက သူတို့နှစ်ယောက်ကို ဘိုနာမည်များလည်း ကိုယ်စီမှည့်ခေါ်ပေးခဲ့သည်။ ကိုသီဟန်သွင်က ရော့ဒ်နီ (Rodney)၊ ကျော်မြင့်လွင်က စတီဖင်ဆင် (Stephenson)။
(၁၇)
ထိုအတောအတွင်း ကျော်မြင့်လွင် ရှိစုမဲ့စု ၀ယ်ထားသော ဂီတာလေး အခိုးခံလိုက်ရသည်။
ထိုနေ့က အခန်းမှာ ထုံးစံအတိုင်း သူတစ်ယောက်တည်း ကရင် သင်တိုင်းရှည်ကြီး ၀တ်ပြီးအိပ်၍ ကျန်ခဲ့သည်။ များသောအားဖြင့် သူအိပ်လျှင် ဂီတာကို ပွေ့ဖက်အိပ်နေကျ။ တိုက်ဆိုင်ချင်တော့ ဂီတာကတစ်ခြား၊ လူတစ်ခြား ဖြစ်နေခဲ့ပုံရသည်။ အခန်းတံခါးကလည်း ခါတိုင်းလိုပင် ပွင့်လျက်သား။
ဘယ်လောက်အထိ အိပ်မောကျသွားသည်မသိ။ သူငယ်ချင်းတစ်ယောက်ရောက်လာသည့်အတွက် သူထလိုက်ရတော့မှ ဂီတာမရှိတော့တာ သိရသည်။
အခန်းထဲရှိ စာအုပ်တွေ၊ အင်္ကျီအ၀တ်အစားတွေ ဘာတစ်ခုမျှမပျောက်။ အခန်းဖော် အစ်ကိုကြီးတွေ ပြန်ရောက်လာကြသည့်အခါ ဂီတာပျောက်၍ မှိုင်တွေချနေသည့် သူ့ကို-
"မင်းက အအိပ်ကြီးတာကိုးကွ၊ သူခိုးက ဂီတာယူမသွားခင် သီချင်းတစ်ပုဒ်တောင်မှ ထိုင်တီးပြသွားသေးလား မသိဘူး" ဟုဝိုင်း၍ သြဘာပေးကြလေသည်။ သို့သော် သူစိတ်အရမ်းထိခိုက်မှန်းလည်း သိကြသဖြင့် နှစ်သိမ့် ပေးကြပြန်သည်။
(၁၈)
ရန်ကုန် ရက်စွဲများက ရွေ့လျားသွားသည်။ အဆောင်ရှေ့ တရုတ်စံကားပင်ကြီးမှ အပွင့်တွေက ဖွေးဖွေးလှုပ်အောင် ပွင့်ဝေပြီး အညှာညောင်းသောအခါ တစ်ပင်လုံး ကြွေကျကုန်သည်။ ထိုအတောအတွင်းမှာ သင်းကွဲငှက်များသဖွယ် အသိုက်အမြုံတွေလည်း ရွေ့ပြောင်းသွားကြလေသည်။
ပထမဆုံးအဖြစ် ဆရာမ မအိက ရေမြေတောတောင် ခြားနားရာ ဟိုးအဝေးကြီးဆီသို့ မရပ်မနားထွက်ခွာ သွားခဲ့သည်။ သူယုံကြည်ရာ လမ်းကို သူလျှောက်ဖို့ ဆုံးဖြတ်ချက် ချလိုက်ခြင်းဖြစ်သည်။ ထိုလမ်းသည် ကြမ်းတမ်းလိမ့်မည်ဆိုတာ သိသိနှင့်ပင် ထွက်သွားခဲ့သည်။
"တောင်ပေါ်ပွင့်တဲ့ မေ့ရဲ့ နှင်းဆီ သင်းရီထုံမွှေး ရနံ့အေးမြဲ နီရဲပွင့်ဖတ် ချစ်မြတ်နိုးတတ် ရင်ခုန်တတ် … သူ။ ကမူချိုင့်ဝှမ်း၊ တောင်စဉ်တောင်တန်း ဖြတ်သန်းရဲရင့် အပွင့်ဝေငှ မျိုးစေ့ချသူ"
နောက်တော့ ကိုနေမျိုးဇော်လည်း တောင်ပေါ်လမ်းအတိုင်း လိုက်ပါသွားခဲ့ပြန်သည်။ ဂန္ဓာရီမဟာမြိုင် ကျင့်စဉ်ကို ကျင့်ကြံဖြတ်သန်းဖို့ သူဆုံးဖြတ်ခဲ့သည်။
သူအိပ်ပျော်နေတုန်းမှာမှ ကိုနေမျိုးဇော်က တိတ်တိတ်ကလေး ထွက်သွားခဲ့ရက်သည်။ နှုတ်ဆက်စကားပင် မဆိုခဲ့။ ပြက္ခဒိန်နောက်ကျောတစ်နေရာမှာ "ညီလေးရေ၊ ကိုယ်သွားပြီ" ဆိုသည့် စာသားလေးပဲ ချန်ထားရစ်ခဲ့သည်။ ထိုစာရွက်ကလေးကိုပင် တမြတ်တနိုး သူသိမ်းထားခဲ့သည်။
နောက်ထပ် ရက်အတန်ကြာတော့ မန္တလေးက လူကြုံဆိုလား၊ ဘယ်လို ရောက်လာမှန်းမသိ။ သူမရှိတုန်း အဆောင်ခန်းက သူ့ခုတင်မှာ စာတစ်စောင်လာထားသွားသည်။ ကိုနေမျိုးဇော်၏ လက်ရေးလှလှလေးနှင့် -
"ညီလေးရေ" အစချီပြီး ဆုံးမစကားလေးတွေ ရေးပို့ထားတာ ဖတ်ရပြန်သည်။
(၁၉)
သူ့စိတ်ထဲမှာ အခုမှပဲ အရမ်းကို ထိခိုက်သွားသည်။ သွေးတစိမ့်စိမ့်ယိုစီးကျသလိုမျိုး နာကျင်လာခဲ့သည်။ ခိုင်မြဲသည့် သံယောဇဉ်ကြိုးတွေက အနေဝေးသွားသည့်အခါ ဆွဲဆန့်ထွက်ပြီး ဖျစ်ညှစ်ဆုပ်ကိုင်သည်။ ဘယ်အခါကျမှ ပြန်တွေ့ကြမှာလဲ။ ဘယ်တော့လဲ။ ဘာမှ သေချာခြင်းမရှိတော့ပြီ။
များမကြာမီ ကိုသီဟန်သွင်လည်း ပြည်မြို့အရှေ့ဘက် ၀က်ထီးကန်တွင် တွဲဖက်ကျောင်းဆရာ သွားလုပ်တော့မည် ဆိုသည်။
ဒါဆို သူလည်း စံရိပ်ငြိမ်မှာ မနေပျော်တော့ပြီ။
ဒဏ်ရာရ ငှက်တစ်ကောင်ပမာ အသိုက်ရှိရာ ပုသိမ်သို့ ရင်ခွင်ပြန်လည် ပြောင်းရွှေ့လာခဲ့သည်။
ပုသိမ်ကန်တော်ကြီး
အခန်း(၇) အပေါင်းအသင်းများနှင့် ငြိမ်းချမ်းရေးကမ်းခြေမှာ
(၁)
ပုသိမ်ဒေသကောလိပ် ပတ်ဝန်းကျင်သို့ ပြန်ရောက်လာသော ကျော်မြင့်လွင်မှာ စာပေ၊ ကဗျာ အသိုင်းအ၀ိုင်းအပြင် ဂီတအပေါင်းအသင်းတွေလည်း ရှိသေးသည်။
တော်တန်ရုံအထင်ကြီး မလေးစားတတ်သူ သူ့အတွက် ရှားရှားပါးပါး အထင်ကြီး လေးစားသော ဂီတအပေါင်းအသင်း တစ်ဦးက ၀င်းမြင့်ဦး (ကိုတူး) ဖြစ်သည်။ ကိုတူးက ပုသိမ်ကမ်းနား၊ ကွင်းတန်းမှာ နေသည်။ ကိုတူး ဖခင် ဦးမြသောင်းက ကျောင်းဆရာ။
ကိုတူးသည် အငြိမ်သမားဖြစ်၍ စကားများများမပြော။ သူ့စိတ်ထဲမှာ ဘာမဆို စဉ်းစားတွက်ချက်ကြည့်ပြီး စိတ်ပါမှ လုပ်တတ်သူဟု ဆိုကြသည်။ "ငုဝါ" တီးဝိုင်း ဘိုတင်ယုဆီမှာ ဂီတာတီးကြ၊ ဂီတာပညာ ဆည်းပူးကြကတည်းက ကိုသျှပ်နှင့် အတူတူ။ ထိုစဉ်က ပုသိမ်တွင် ပတ်ကားနုတ်စ်နှင့် တီးတတ်သူ သုံးလေးယောက်သာ ရှိခဲ့ကြရာ ငုဝါ ဘိုတင်ယု၊ ကိုတူးနှင့် ကိုသျှပ်တို့ အပါအ၀င်ဖြစ်ကြသည်။
"ဘိုတင်ယုဆီက နုတ်စ်တွေ ငါတို့ သွားခိုးရတာ" ဟု ကိုတူးနှင့် ကိုသျှပ်တို့ပြောဖူးသည်။
ကိုတူးက စာလည်းတအားတော်သည်။ နောက်တော့ ပုသိမ်ဒေသကောလိပ်မှ ရန်ကုန်တက္ကသိုလ်ရောက်သွားပြီး အင်္ဂလိပ်စာမေဂျာတက်ခဲ့သည်။ တကယ်ဆို သူ့အမှတ်က အတော်လေးကောင်းသည်။ အခြားအသက်မွေးဝမ်းကျောင်း တက္ကသိုလ်တစ်ခုခုတက်မယ်ဆိုလျှင် တက်၍ ဖြစ်နိုင်သည်။ သို့သော်အင်္ဂလိပ်စာကိုပဲ လိုက်စားလို၍ အင်္ဂလိပ်စာမေဂျာ တက်ခဲ့ခြင်းဖြစ်သည်။
(၂)
နောက်ထပ် ဂီတသူငယ်ချင်းတစ်ယောက်က လှမျိုးစု (ပေါက်ပေါက်)ဖြစ်သည်။ ပေါက်ပေါက် ဖခင်က ပုသိမ်တိုင်းကောင်စီမှ ဖြစ်သည်။ ပြည်တော်သာ ၀န်ထမ်းအိမ်တွေ နားမှာဖြစ်၍ ကိုသျှပ် ညီမ မိမိုးတို့ တစ်တွေနှင့်လည်း ခင်ကြသည်။ ရင်းနှီးသူတွေက သူ့ကို မိပေါက်ဟု ခေါ်ကြလေသည်။ ငယ်စဉ်က သွေးအားနည်းရောဂါ ရှိ၍ ဖြူဖတ်ဖြူရော်လေး ဖြစ်သည်။ သို့သော် သီချင်းဆိုတာ အသံသိပ်ကောင်းသည်။ ပုသိမ် တီးဝိုင်းများ ဖြစ်ကြသည့် ငုဝါ၊ ဖြူနီညီုပြာတို့မှာ သီချင်းဆိုနေကျ။
တစ်ကြိမ်မှာတော့ ပြည်ထောင်စု အလံတော် ပုသိမ်မြို့ကိုရောက်ရှိလာစဉ် မြို့က ပွဲလမ်းသဘင်တွေနှင့် ကြိုဆိုသည်။ ရန်ကုန်မှ Success တီးဝိုငးလည်း ပါလာခဲ့သည်။
Success ၏ အဆိုပါ စင်တင်ဖျော်ဖြေပွဲမှာ မိပေါက်သီချင်း တက်ဆိုသည်။ တကယ့်အခမ်းအနားပွဲကြီးမှာ အထင်ကရ တီးဝိုင်းနှင့် မြို့ခံထဲက တက်ဆိုနိုင်ဆိုတာ နည်းသည့် စိန်ခေါ်မှုမဟုတ်။ ပါရမီ မရင့်ဘဲ စဉ်းစားဖို့ မဖြစ်နိုင်။ သို့သော် မိပေါက်ကတော့ သပ်သပ်ရပ်ရပ်ပင် တင်ဆက်သွားနိုင်ခဲ့သည်။
(၃)
ပြည်တော်သာ ၀န်ထမ်းအသိုင်းအ၀ိုင်းတွင် နေထိုင်ခဲ့စဉ်ကတည်းက ခင်မင်နေခဲ့ပြီး ဒေသကောလိပ်မှာ ဆက်လက် သိကျွမ်းရင်းနှီးဖြစ်ခဲ့သူ တစ်ဦးက မြင့်သန်းဖြစ်သည်။ မြင့်သန်းသည်လည်း ဂီတ၀ါသနာကြီးမားသူ။ နောင်သောအခါ ဇင်မှူးသန့် အမည်ဖြင့် "ဆံပင်ရှည်ရှည် ကောင်လေး" တေးစီးရီးကိုပင် ထုတ်ဖြစ်ခဲ့သည်။
မြင့်သန်းလိုက်ပြီး မိတ်ဆက်ပေးသည့် အတွက်ပင် ကိုသျှပ်၏ သီချင်းဂီတအပေါင်းအသင်း အသိုင်းအ၀ိုင်းမှာ ပို၍ ကျယ်ဝန်းလာသည်။ ထိုအပေါင်းအသင်းအသစ်များထဲမှ အချို့သည် သူ၏ တစ်ဘ၀လုံးအတွက် အရေးပါ အရာရောက်လာမည့် လက်တွဲဖော်မိတ်ဆွေရောင်းရင်းများ ဖြစ်ကြတော့သည်။
(၄)
ကဗျာဆရာ၊ တေးရေးစာဆို မြင့်မိုးအောင်နှင့် စတင်တွေ့ဆုံခင်မင်ခဲ့ကြသည်မှာ မြင့်သန်းကြောင့်ဖြစ်သည်။ ထိုစဉ်တုန်း အချိန်။ မြင့်မိုးအောင်က ပုသိမ်ဒေသကောလိပ်သို့ စရောက်သည့် ပထမနှစ်။ မြင့်သန်းက ကိုသျှပ်နှင့် မိတ်ဆက်ပေးခဲ့သည်။
ထိုနေ့က ကိုသျှပ်သည် ကျောင်းလှေကားမှာ ငုတ်တုတ်ထိုင်ပြီး စာအုပ်တစ်အုပ် ဖတ်နေခဲ့သည်။ တကယ်တော့ ဆံပင်ရှည် တွန့်ကွေးကွေး၊ တောက်ပပြီး အရည်လဲ့နေသော မျက်လုံးများနှင့် မျက်မှန်ထူထူကတော့ သူ၏ သင်္ကေတဟု ဆိုရမည်။ သူ့ဆီမှာ ဖတ်စရာ စာအုပ်က အမြဲတမ်းပါသည်။ သူ့လွယ်အိတ်ထဲမှာ ကျောင်းစာအုပ်တွေအပြင် "ဘ၀အဓိပ္ပါယ်နှင့် ဘ၀သစ္စာ"လို အတွေးအခေါ်စာအုပ်တွေ၊ "ထင်းရှူးပင်ရိပ်" လို စာပေ ကဗျာစာအုပ်တွေ ရောက်နေတတ်သည်။ သူသည် စာအုပ်နှင့် မျက်စိခွာလေ့မရှိ။
မြင့်သန်းက ဖြူဖြူရှည်ရှည်၊ ပိန်ပိန်နွဲ့နွဲ့နှင့် လေတိုးလျှင် ပြိုလဲကျလေမလား ထင်မှားရသည့် မြင့်မိုးအောင်ကို အသာခေါ်ယူလာပြီး ကိုသျှပ်နှင့် မိတ်ဆက်ပေးခဲ့သည်။ မြင့်မိုးအောင်၏ အိမ်နာမည်က ဖြူဖွေး။
"ကိုဘဲဥ၊ ဒါဖြူဖွေးပါ"
ဘဲဥနှင့်ဖြူဖွေး တွေ့တွေ့ချင်းပင် ခင်မင်သွားကြသည်။ သူတို့နှစ်ယောက် သီချင်းအကြောင်းတွေ ပြောဖြစ်သည်။ ထိုစဉ်က မြင့်မိုးအောင်က ဂီတာတီးကာစ။ ဂီတ၏ မိုးကောင်းကင်ကို အားစမ်းဆဲအချိန်။
(၅)
ထိုအချိန်မှာ ကိုသျှပ်သည် ပုသိမ်ဒေသကောလိပ်၏ ပြင်ပဆောင် သီတာဦးမှာနေသည်ဆိုသော်လည်း အတည်တကျ မဟုတ်ပြန်။ သူငယ်ချင်းတွေဆီ ကပ်နေကပ်စား၊ ဂီတာတီးလိုက်၊ သီချင်းဆိုလိုက်သာ။ မော်လမြိုင်မှ မိဘများက လဆန်းရက် ငွေပို့လာသောအခါ နှမြောတွန့်တိုခြင်းမရှိ။ သူငယ်ချင်းတွေနှင့် တစ်ရက်တည်းမှာ ကုန်အောင်သုံးပစ်တတ်သည်။
အဆောင်မှာ တီးစရာ၊ ဆိုစရာမရှိပါက အနုပညာအကြောင်း ပြောဆိုကြသော ကျောင်းလက်ဖက်ရည်ဆိုင်၊ စားသောက်ဆိုင်တွေမှာ ကိုသျှပ်ရောက်နေတတ်သည်။ သို့မဟုတ်လျှင် ပြည်တော်သာတိုက်က သူငယ်ချင်း တစ်ယောက်ယောက်၏ အခန်းတွင် ကက်ဆက် အဟောင်းလေးထဲ သူ တီးခတ်သမျှ အသံတွေ သွင်းကြည့်နေလိမ့်မည်။
နောက်တော့ မြင့်မိုးအောင်တို့ အိမ် အပေါ်ထပ်သို့ သူ ရောက်ရှိ လာသည်။
(၆)
မြင့်မိုးအောင်တို့ အိမ်မှာ သူ့ အကျင့်အတိုင်း ရေမချိုး၊ ထမင်း မစားတမ်း ဂီတာ တီးသည်။ အင်္ဂလိပ် သီချင်း အသစ်တွေ နားထောင်၊ ကော့ဒ် ရှာ၊ နုတ်စ်ထုတ် လုပ်သည်။ သူက ဂီတနှင့် မွေ့လျော်နေချိန်မှာ မြင့်မိုးအောင်ကတော့ ပန်းချီ ဆွဲနေလေ့ရှိသည်။
မြင့်မိုးအောင်တို့ အိမ်ကလည်း သူ့ကို ချစ်ကြသည်။ အစစအရာရာ လိုလေးသေး မရှိ။ စောင့်ရှောက်သည်။ ဂရုစိုက်သည်။
"သား၊ ဖြူဖွေးရေ၊ မင်းသူငယ်ချင်း ဘဲဥကို ရေချိုး ခိုင်းလိုက်ပါဦးကွာ၊ ထမင်း စားရအောင်လို့"ဟု မြင့်မိုးအောင်၏ ဖခင် ပြောလျှင်တော့ဖြင့် သူက အပျင်းကြော ဆွဲနေပြီး။
"ဟာကွာ၊ မင်း အဖေကလည်း ရေမချိုးရင်ဘဲ ထမင်း မစားရတော့ဘူးလား မသိပါဘူး" ဟု ကျိတ်ပြီး အတွန့် တက်တတ်သည်။
(၇)
၁၉၈၃ ခုနှစ်၊ ဇူလိုင်လ။
ပုသိမ်မြို့၊ ဘိုကနောင် ကရင်တိုင်းရင်းသား ရပ်ကွက်။
အောင်ကျော်ဦး (ကြွက်နီ) တို့ အိမ်မှာ အောင်ကျော်ဦးနှင့် သျှပ်တို့ စတင် သိကျွမ်းခဲ့ကြသည်။
မြင့်သန်း (ဇင်မှူးသန့်) ကပင် ကိုသျှပ်ကို ခေါ်လာခဲ့ပြီး -
"ကိုသျှပ်၊ ဒါ. . .ကြွက်နီ" ဟု မိတ်ဆက် ပေးခဲ့သဖြင့် သူတို့နှစ်ယောက် လက်ချင်း ယှက်ခဲ့ကြသည်။
"ကိုဦး၊ သူက ဦးလေးကြီး (ကိုဆန်းထူး) ပေါ့" ဟုဆက်ပြီး သူတို့ ပြည်တော်သာ တစ်သိုက်ကို အောင်ကျော်ဦးနှင့် ဆုံစည်းစေခဲ့သည်။
အောင်ကျော်ဦးက ကျောင်းမှာ သူတို့ မေဂျာက လုပ်မည့် ဖဲဝဲလ်ပွဲတွင် တီးကြခတ်ကြရန် မြင့်သန်းနှင့်အတူ လုံးပမ်းနေသည့် အချိန်။ ဒေသကောလိပ် ပထမနှစ် ကျောင်းသားတွေပီပီ ဖဲဝဲလ်မှာ လက်စွမ်းပြ တီးချင်ခတ်ချင်နေခဲ့ကြသည်။
ထိုအချိန်မှာ ပထမနှစ် အိတ်စတာနယ် ကျောင်းသား ကိုသျှပ်ကို မြင့်သန်းက ခေါ်ချလာခဲ့ခြင်း ဖြစ်သည်။
တကယ်တော့ အောင်ကျော်ဦးက "မောနင်းစတား" လို တီးဝိုင်း သေးသေးလေးမှာ တီးခဲ့စဉ် သျှပ်က "ငုဝါ" မှာ တီးနေခဲ့သည်။ သိုဖြစ်၍ သူတို့ချင်း အဆက်အစပ် မရှိခဲ့ကြ။ မျက်နှာချင်း မရင်းနှီး။
ယခု လောလောဆယ် အောင်ကျော်ဦးနှင့် မြင့်သန်းတို့က "မဟူရာ" ဆိုသည့် ရောင်းတမ်း တီးဝိုင်းထဲမှ ဖြစ်သည်။ ကရင်တိုင်းရင်းသား တီးဝိုင်း ဖြစ်၍ ထုံးစံအတိုင်း ဘိုကနောင် ရပ်ကွက်တွင် အခြေပြုထားသည်။ ဘိုကနောင်သားတွေက နုတ်စ် မတတ်ကြ။ သို့သော် ဂီတာကိုတော့ လူတိုင်းလောက် နီးနီး တီးကြသည်။
(၈)
အောင်ကျော်ဦး (ကြွက်နီ) က ဂီတာတော့ မတီးတတ်။ တီးဝိုင်းမှာ ဒရမ် တီးသည်။ ယခုတော့ ကိုသျှပ်က သူတို့နှင့်အတူ ဘေ့စ် တီးမည်ဟု ဆိုသည်။
ဘေ့စ်ဂီတာနှင့် ဒရမ္မာ။
ကိုသျှပ်နှင့် ကြွက်နီ။
အခုမှလည်း စ၍ တွေ့ဖူးကြသည်။ သို့ဖြစ်၍ အဆိုပါ အတွဲအစပ်၏ ကျောရိုးတိုင်သည် ခိုင်ပါမည်လား။ သဟဇာတ ဖြစ်ပါမည်လားဟု အောင်ကျော်ဦးက သံသယ ၀င်ခဲ့သည်။ သူတို့ချင်းလည်း တစ်ခါမျှ တွဲမတီးဖူးကြသေး။ ငယ်ရွယ်သူတို့၏ ထုံးစံ။ ကိုယ်က လွဲ၍ ဖြစ်စေ၊ ကိုယ်နှင့် တွဲဖူးသူ အထာသိတွေက လွဲ၍ ဖြစ်စေ ပြင်ပလူကို အထင်မကြီး။ အကျော မခံချင်။
နှစ်ယောက် လက်ဆွဲနှုတ်ဆက်အပြီးတွင် မြွေမြွေချင်း ခြေမြင်နိုင်ရန်အတွက် ခြေရာလက်ရာကောက်ကြရတော့မည်။
"ကဲ … ကိုသျှပ်၊ ကျွန်တော်သီချင်းတစ်ပုဒ်ဆိုမယ်ဗျာ၊ တီးပေးပါလား"
ထိုသို့ စကားစလိုက်သည်။
"လုပ်လေ ခင်ဗျား ဘာဆိုမှာလဲ"
“How deep is your love”
(၉)
Bee Gees အဖွဲ့၏ ဤသီချင်းမှာ အောင်ကျော်ဦး၏ အသည်းစွဲ။
သို့သော် ယခင်က အောင်ကျော်ဦး ဆိုခွင့်မရခဲ့။ အကြောင်းမှာ သီချင်း၏ ဂီတာကော့ဒ်တွေ ခက်ခဲလှ၍ သူတို့ တီးဝိုင်းသားတွေက ထိုကော့ဒ်များကို ဘယ်သူမျှ တီးခတ်မပေးနိုင်။
ယခု ကိုသျှပ်ကို အနှီသီချင်းအား ဆိုချင်ပါသည်၊ တီးပေးပါဟု ကမ်းလှမ်းလိုက်သည်။ တကယ်တော့ ကိုသျှပ်အတွက် ဆင်ပေးလိုက်သော ထောင်ချောက်ကြီးတစ်ခုဖြစ်သည်။ သူဘာဆက်လုပ်မလဲ၊ သူဘယ်လောက် စွမ်းဆောင်နိုင်မလဲဆိုတာ စောင့်ကြည့်ရတော့မည်။
ကိုသျှပ်ကဖြင့် အေးအေးဆေးဆေးပင် -
"ကိုဦး မင်းဘေ့စ်တီး ငါရစ်သမ်တီးမယ်" ဟု ပြောရင်းဆိုရင်း ထိုသီချင်းကို ကောက်တီးလိုက်တော့သည်။
(၁၀)
ဤရွေ့ ဤမျှ ခက်ခဲလှသော ကော့ဒ်များကို ပိုင်ပိုင်နိုင်နိုင်ကြီး တီးနိုင်နေသည့် ကိုသျှပ်၏လက်စွမ်းကို တွေ့ရသောအခါ အောင်ကျော်ဦး ချက်ချင်းကြိုက်သွားရသည်။ သူတို့အဖွဲ့မှာ ဘေ့စ်လာတီးပေးတော့မည့်အတွက်လည်း အားတက်သွားခဲ့သည်။
အောင်ကျော်ဦး သီချင်းကို ဆက်ဆိုသည်။
အလယ်သံပြိုင်အပိုဒ်တွင် တစ်ချက်ဖမ်းစရာအကွက်ရှိသေးသည်။ ထိုနေရာတွင် အင်မတန်ရှုပ်ထွေးသော ဟာမိုနီအပိုင်းတွေက ဆီးကြိုနေကြသည်။ အောင်ကျော်ဦး သီချင်းဆိုလာခဲ့တာ သံပြိုင်အပိုဒ်သို့ ရောက်ပြီ။ ထိုအခါ အဆင်သင့်စောင့်နေသော ကိုသျှပ်က ယနေ့ယခုမှ သိရသော အောင်ကျော်ဦးအတွက် ဟာမိုနီကို အသာလေးနှင့် ချောနေအောင်ပင် လိုက်ပေးသွားခဲ့ပါတော့သည်။
(၁၁)
အောင်ကျော်ဦး (ကြွက်နီ) အနေနှင့် “ How deep is your love” သီချင်းကို ယခုလို စိတ်တိုင်းကျ သီဆိုလိုက်ရသောအခါ စိတ်ထဲမှာ ဘယ်လောက်အထိ နက်ရှိုင်းစွာ ခံစားလိုက်ရသည်ဆိုတာ ပြောမပြတတ်တော့လောက်အောင်ဖြစ်ခဲ့ရသည်။ ယခုလို တီးနိုင် ခတ်နိုင်သည့် ပုဂ္ဂိုလ်တစ်ယောက်နှင့် တွဲရတော့မည်ဆိုတာ အတိုင်းထက်အလွန် ၀မ်းသာမိသလို တစ်ဖက်ကလည်း မခံချင်စိတ်ကလေးကတော့ဖြင့် ပေါ်မိသည်။
ငယ်ရွယ်သူပီပီ မာနကလည်း များသေးသည်လေ။
ဘာပဲပြောပြော ကိုသျှပ်သည် Bee Gees ကို သေသေချာချာကြိုက်ထားပြီး နုတ်စ်ကိုလည်း တကယ်ပိုင်နိုင်သူ ဆိုတာကတော့ သေချာသွားခဲ့သည်။ သည်လိုနှင့် ဖဲဝဲလ်အတွက် သီချင်းတိုက်နေကြရင်း -
"ကိုသျှပ် ဘာသီချင်းဆိုမလဲ" ဟု မေးကြည့်။ ကိုသျှပ်က -
"ဝေးသွားတဲ့အခါ … နှလုံးသားမှာ အမြဲတမ်း သတိရနော် …
ကြင်နာခဲ့ဖူးတဲ့အချိန်အခါများ ပြန်လည်ကာရယူဖို့ရာ …
မဖြစ်နိုင်တော့တဲ့အခါ …"ဟုဆိုပြသည်။
(၁၂)
သီချင်းက အသစ်။
တစ်ခါမျှ မကြားဖူး၍ နားထဲမှ ရုတ်တရက် လက်သင့်ခံလိုက်ဖို့ အဆင်သင့် မဖြစ်သေး။ ကိုသျှပ်၏ လက်ရာ ကိုယ်ပိုင်သံစဉ်ဖြစ်သည်ဆို၍ သူ သီချင်းရေးတတ်မှန်းကိုတော့ သိလိုက်ရသည်။
ကိုသျှပ်က ကြွက်နီဘ၀င်မကျမှန်း ချက်ချင်းရိပ်စားမိ၍
"အချိန်အကုန်ခံပြီး ပြောမနေနဲ့၊ မနေချင်ရင်လည်း သွားနိုင်တယ်၊ ဒီလိုဆို နှုတ်ဆက်လိုက်ပါပြီ"
ပလေးဘွိုင်အဖွဲ့နှင့် သီဆိုခဲ့သော ရီတာစိုးဝင်း၏ သီချင်းကို တစ်ဆက်တည်း ဆိုပြလိုက်သည်။ ကြွက်နီ အံ့အားသင့်သွားသည်။ ကိုသျှပ်ဆိုတာ တအားကို ကောင်း၊ အိနေအောင် ကောင်းနေသည်။ ကိုသျှပ်မှာ အဆိုပါရမီ အတိမ်အနက် ဘယ်လောက်ထိ ရှိတာကို တစ်ထိုင်တည်းနှင့် ထင်းကနဲ လင်းကနဲ သိခွင့်ရလိုက်သည်။
(၁၃)
ကိုသျှပ်၏ ကိုယ်ပိုင်သံစဉ် "ဝေးသွားတဲ့အခါ" သီချင်းကို ကြားကြားချင်း နားမယဉ်ခဲ့သော်လည်း နောက်ပိုင်းမှာတော့ အောင်ကျော်ဦး၏ အနှစ်သက်ဆုံး သီချင်းတစ်ပုဒ်ဖြစ်လာသည်။ အောင်ကျော်ဦးတို့ အနေနှင့် သူတို့တီးဝိုင်း၏ ပထမဆုံးကိုယ်ပိုင်သီချင်းအဖြစ် တီးခွင့်ရခဲ့သည်မှာလည်း "ဝေးသွားတဲ့အခါ" ပဲဖြစ်သည်။
"သြော် … လွန်ခဲ့ပြီ … ဝေးသွားမှ .. ပြန်တွေးကာ
နှမြောတသ … လွမ်းနေပါသော်လည်း … မတတ်သာ။
ယောကျာ်းတို့ရဲ့ … မာန
သူမိန်းကလေးတို့ … သဘာဝ
ရင်ထဲက ပန်းတစ်ပွင့် … သော့ခတ်လုံခြုံသွား ..
ခုတော့ … ဝေးခဲ့ပြီလေ …။ ခုတော့ … ဝေးခဲ့ပြီမေ၊
ခုတော့ … ဝေးကြပြီ … တို့နှစ်ဦးသား …."
နောက်တော့ ကိုသျှပ်၏ "အခါလွန်တဲ့ မိုး" ကို တီးခွင့်ရခဲ့ကြသည်။
"နှုတ်ဆက်မျက်ရည်လေးများ …၊
အားလုံးမသိအောင်သိမ်းထား … ၊
အခါလွန်တဲ့မိုးမို့ … အငြိုးနဲ့ … ရွာ …၊
အကြင်နာစကားတွေ … အမြဲတမ်းပဲ … အိပ်မက်မှာ …
တစ်ရေးနိုးတဲ့ … ညတွေဆို … ပြန်အိပ်…မရပါ။
သူရောပဲ ကိုယ့်လိုများ … ယောင်ယမ်းတမ်းတနေမလား ..၊
ကိုယ်တွေးရင်း …တွေးရင်း ၀မ်းနည်းနေသလိုပါ…"
(၁၄)
ပြီးပြီ။
ဤသီချင်း နှစ်ပုဒ်တည်းနှင့်ပင် ဇာတ်လမ်းပြီးပြတ်ပြီ။ အောင်ကျော်ဦးတို့မှာ တစ်သက်လုံးသူများ သီချင်းတွေချည်းပဲ တီးလာခဲ့ရသည်။ အခုလို ကိုယ့်တီးဝိုင်းထဲက ကိုယ့်ကိုယ်ပိုင်သီချင်းနှင့် ကိုယ်ဆိုတော့ စိတ်ကလည်း လန်းလာကြသည်။
(၁၅)
သူတို့ တီးဝိုင်းလေးကို အောင်ကျော်ဦးက ကိုသျှပ်အား အကြောင်းပြု၍ Shore of Peace ဟု အမည်ပေးခဲ့သည်။
အောင်ကျော်ဌေး (ပထန်ကြီး) က လိဒ်ဂီတာ၊ တင်မျိုးလွင် (သာထူး)က ရစ်သမ်၊ ကိုသျှပ်က ဘေ့စ်၊ အောင်ကျော်ဦး ကြွက်နီက ဒရမ်တီးသည်။ မြင့်သန်း (ကိုမာ)က မန်နေဂျာ။ ထို့အပြင် ဇော်ဇော်အောင်(ဇာဂရ)၊ မင်းဦး (ရေချမ်း) တို့နှင့်လည်း ပေါင်းဖက်ဖြစ်သွားခဲ့သည်။
ကိုသျှပ်က တီးဝိုင်းတစ်ခုလုံးကို စနစ်တကျ Arrange လုပ်ပေးသည်။ တကယ်စင်ပေါ်တက်တော့လည်း အားလုံးက သူမောင်းထားသည့်အတိုင်း ညီနေကြသည်။
တက္ကသိုလ်အေးမောင်၏ "လေမှာ ပျံတဲ့ ငှက်တွေလို ကိုယ်တစ်ယောက် ပျံလာတယ်"
ဤသို့ဖြင့် သူတို့၏ Physics မေဂျာ တီးဝိုင်းက တစ်ကျောင်းလုံးကို သိမ်းပိုက်လိုက်ကြတော့သည်။
ဆက်ရန်.........
No comments:
Post a Comment