ဆယ့်နှစ်ကြိုးဝတ္ထုတိုများ - နေဝင်းမြင့် (အပိုင်း-၂)

                                      

နင် အင်မတန်ပလီတယ် ဆိုရင်ဖြင့် ခံရမှာပါ မလွဲ

(၁)

ဘူတာရုံကလေးက ခပ်မြှောင်မြှောင်ကလေးဆင်းပြီး ဝါးတံတား ခနော်နီခနော်နဲ့ကို ဒယီးဒယိုင်နဲ့ ကူးဖြတ်လာတဲ့ ကိုမှန်ကင်းကို ဝိုင်းကြည့်နေကြတဲ့ ကလေးတွေက …

“ဦးမှန်ကင်းကြီး မိန်းမခိုးလာပြီ အဖေရေ”

အော်လိုက်ကြတဲ့ကလေးတွေဆိုတာ ပွက်ပွက်ကိုညံသွားတော့တယ်။

ကလေးတွေက အဖေရေ လို့သာ အော်ကြတာ၊ ထွက်ကြည့်တော့ အမေတွေချည်း ထွက်ကြည့်တယ်။ အဖေတွေက ထွက်ကြည့်လို့လည်း မြင်ရတာမှမဟုတ်တာ။ သည်တဲစုကလေးတွေမှာ နေကြတဲ့ အိမ်ထောင်ဦးစီး ဆိုတဲ့ ယောက်ျားသား ဆယ့်လေးငါးယောက်ဟာ မျက်မမြင်တွေချည်းပဲ။

ဒါပေမဲ့ ကိုမှန်ကင်း မိန်းမခိုးလာတယ် ဆိုတော့ သူတို့လည်း မမြင်ရပေမယ့် ထွက်ကြည့်ကြတယ်။ မျက်နှာလေးတွေကလည်း ပြုံးလို့ရွှင်လို့။

သူတို့အားလုံးက ဆရာကြီး လို့ ခေါ်ကြတဲ့ ဦးကျီးညိုကတောင် ‘ဟ … မှန်ကင်းကြီးရ … နှစ်ယောက်သား တွဲလို့၊ ဟုတ်လှချေလား ငါ့လူရ’ တဲ့ လှမ်းအော်တယ်။

ဟုတ်လှချေလား သာ အော်တာ သူလည်း မြင်ရတာမဟုတ်ဘူး။ တကယ်က နှစ်ယောက်တည်းလည်း မဟုတ်ဘူး။ ဖိုးငိုလည်း ပါသေးတာ။ မနက်က ခုနစ်နာရီခွဲကောင်နဲ့ လိုက်သွားတုန်းက ကိုမှန်ကင်းရယ် ဖိုးငိုရယ် နှစ်ယောက်တည်း။ မယ်ဒလင်နဲ့ သွပ်လွယ်ဘူးကလေးတော့ ပါတာပေါ့လေ။ အခုညနေ ပြန်လာတော့ သုံးယောက်။ ကိုမှန်ကင်းကို မိန်းမ တစ်ယောက်က တွဲလို့။

တွဲတယ် ဆိုပေမယ့် မိန်းမက ရှေ့က ကိုမှန်ကင်းက အဲဒီမိန်းမ ပခုံးကို ကိုင်ရင်း စမ်းစမ်း စမ်းစမ်းနဲ့ ပြန်လာတာ။ ဖိုးငိုကတော့ ဟိုးဝေးဝေးနောက်က ကြံချောင်းတစ်ချောင်းစုပ်ရင်း လိုက်လာတယ်။

ကိုမှန်ကင်းကတော့ မယ်ဒလင်ကလေး ကျောမှာကပ်တဲ့ပြီး ‘ဘူတာက ဆင်း၊ နည်းနည်း လမ်းလျှောက်၊ ဝါးတံတားကလေး တွေ့လိမ့်မယ် ဖြတ်၊ တဲစုကလေး တွေ့လား၊ ခေါင်စောက်စောက်တဲကလေး တည်းတည့်ကိုသွား’ လို့ နောက်ကလိုက်ရင်း တတွတ်တွတ်နဲ့ လမ်းပြတယ်နဲ့တူပါတယ်။ ရှေ့ကမိန်းမက လူစိမ်းဆိုပေမယ့် သွားနေလိုက်တာ ဖြောင့်လို့။

တဲလေးပေါ် ရောက်တော့ ကိုမှန်ကင်းက မယ်ဒလင်ကို ကျောသိုင်းထားရာက ဖြုတ်ပြီး ထရံမှာညှပ်ထားတဲ့ နှီးချောင်းမာမာကလေးမှာ ချိတ်တယ်။ သူ ခိုးလာတဲ့ မိန်းမကို လှမ်းပြီး ရေတစ်ခွက် ခပ်ပေးစမ်း တဲ့။ ရောက်ရောက်ချင်း ပိုင်စိုးပိုင်နင်း ခိုင်းနေတဲ့ ကိုမှန်ကင်းကို လာကြည့်ကြတဲ့ ကလေးတွေနဲ့ မိန်းမတွေက သဘောတွေကျလို့။ ကိုမှန်ကင်းရဲ့ တဲကလေးဆီကို ကသုတ်ကရက် လိုက်လာကြတဲ့ မိန်းမတွေထဲက တစ်ယောက်က …

“အောင်မာ အမောအပန်းများ ဖြေပါစေဦးတော့။ မင်းနှယ် … ၊ ငါ့ညီမ … မလုပ်နဲ့။ သူ့ဟာသူ ခပ်သောက်လိမ့်မယ်” တဲ့။

ကိုမှန်ကင်းကတော့ အိအိဖိုင့်ဖိုင့် ကိုယ်ခန္ဓာကြီးကို တသိမ့်သိမ့် ဖြစ်သွားအောင် ရယ်ရင်းက …

“မယားနေစ ဆင်သေမှ ဗျ”

ဆိုတော့ မိန်းမတွေက ဝိုင်းရန်တွေ့ကြတာ ကက်ကက်လန်ရော။ ခဏနေတော့ ကိုမှန်ကင်းက ဖိုးငိုကို လှမ်းခေါ်တယ်။ ဖိုးငိုက ကြွပ်ကြွပ်အိတ်နဲ့ ဝယ်လာတဲ့ ထမင်းသုံးထုပ်ကို သူ့ရှေ့မှာ လာချတယ်။

တကယ်က ဖိုးငိုက ကိုမှန်ကင်းရဲ့သား မဟုတ်ဘူး။ ဘာမှလည်း မတော်ဘူး။ သူ့လို ဘဝတူမျက်မမြင်ထဲက တစ်ယောက်ရဲ့ သားပဲ။ အသက်က ရှိလှမှ ဆယ်နှစ်သာသာပဲ။

ကိုမှန်ကင်းမှာက လူတွဲမရှိဘူး။ တစ်ယောက်တည်းသမား။ လူပျိုလား ဆိုတော့လည်း မဟုတ်ဘူး၊ မိန်းမနဲ့လား ဆိုတော့လည်း ရှိတာမဟုတ်ဘူး။ မိန်းမကတော့ ရဖူးတာပေါ့။

ဖိုးငိုကိုပဲ လောလောဆယ် လူတွဲလုပ်နေရတယ်။ ဆရာကြီး သော့ခတ်ပြီးလွှတ်လိုက်တဲ့ သွပ်လွယ်ဘူး လည်ပင်းချိတ်ပြီး တစ်နေကုန် မီးရထားလိုက်စီးနေလိုက်တာ မှောင်မှချည်း ပြန်ရောက်တယ်။ ရောက်တော့ ပိုက်ဆံခွဲ။

ဆရာကြီးက တချို့တစ်ဝက်နုတ်ပြီး ကျန်တာ ဖိုးငိုတစ်ချိုး၊ သူနှစ်ချိုး ယူနေကျ။ ဖိုးငိုကလည်း ကျေနပ်တယ်၊ ကိုမှန်ကင်းနဲ့ထွက်ရတာ သူ ပျော်တယ်။ ပိုက်ဆံလည်း ရတယ်။

ကိုမှန်ကင်းက အဆိုကောင်း၊ အတီးကောင်း။ အသံကတော့ ခပ်အစ်အစ် ရှတတ ကွဲပြဲပြဲကြီး။ ဆိုတတ်လို့သာ နားထောင်ကောင်းတာပဲ ရှိတယ်။ ဖိုးငိုက ကိုမှန်ကင်းနဲ့ လိုက်ချင်သလို ကိုမှန်ကင်းကလည်း ဖိုးငိုမှ ဖိုးငို။ တခြားကလေး တွဲလေ့မရှိဘူး။ အဆိုလေးရတဲ့ ကလေးမတွေ ရှိတာပဲ၊ ဘယ်တော့မှ မခေါ်ဘူး။ ဖိုးငိုကိုပဲ သံယောဇဉ် ဖြစ်နေပြီကိုး။

ဖိုးငိုပေးရတာကိုလည်း သူ ဝမ်းသာတယ်။ ဖိုးငိုတို့တဲက သူ့တဲနဲ့ သိပ်မဝေးပေမယ့် ဖိုးငိုက ကိုမှန်ကင်းနဲ့ပဲ ညအိပ်တယ်။ နှိပ်ပေး နင်းပေးသေးတယ်။ မျက်နှာသစ်ဆင်းတာ၊ ရေအိမ်ဆင်းတာကအစ ဖိုးငိုပဲ။ ဖျားလို့နာလို့ ချမ်းအေး လေး၊ လင်မော်ဂျင် လေး ပြေးဝယ်ပါဦးဟ ဆိုလည်း ဖိုးငိုပဲ။

ဖိုးငိုလာချပေးတဲ့ ကြွပ်ကြွပ်အိတ်ထဲက အင်ဖက်နဲ့ထုပ်ထားတဲ့ ထမင်း သုံးထုပ်ကို ကိုမှန်ကင်းခိုးလာတဲ့ မိန်းမက ဖြေတယ်။ မီးဖိုချောင်က ပစ္စည်းပစ္စယလေး၊ ပန်းကန်ခွက်ယောက်လေးတချို့ကို ဖိုးငိုက လိုက်ပြတော့ အဲဒီမိန်းမက လိုက်ကြည့်တယ်။

သူက ကိုမှန်ကင်းရဲ့ အိမ်ရှင်မ ဖြစ်သွားပြီကိုး။ ကိုမှန်ကင်းကိုသာ မကဘဲ ပစ္စည်းခန်း ဆိုတာလည်း သူနဲ့ဆိုင်သွားပြီကိုး။ ကိုမှန်ကင်း ခိုးလာတဲ့ မိန်းမကလည်း ကိုမှန်ကင်းရဲ့ ပိုင်ဆိုင်မှုကို ခဏလေးနဲ့ မြင်သွားပြီးသား ဖြစ်ကရော။ အိပ်စရာ ခေါင်းအုံး နှစ်လုံး၊ ဖျာ တစ်ချပ်၊ သံပန်းကန် သုံး လေး ချပ်၊ ဒယ်အိုးလေး တစ်လုံး၊ သုံးဘူးဝင် ဒန်အိုးလတ်လတ် တစ်လုံး၊ ပုလင်း လေး ငါး လုံး၊ ရေညှိတက်နေတဲ့ သောက်ရေအိုး တစ်လုံးနဲ့ စစ်မတ်ခွက် ကြွေကွာ တစ်လုံး ပါပဲ။

ကိုမှန်ကင်း ပိုင်တာ ဒါပဲ။ ကိုမှန်ကင်းခိုးလာတဲ့ မိန်းမကလည်း ဒါလောက်ပဲ မျှော်လင့်ထားပုံပဲ။ ကိုမှန်ကင်းလိုလူဆီက သည့်ထက် ဘာမှ မျှော်လင့်မထားဘူး ဆိုတဲ့ မျက်နှာမျိုးပဲ။ သံပန်းကန်နှစ်ချပ် ယူပြီး ထမင်းတွေ ထည့်တယ်၊ သောက်ရေတစ်ခွက် ခပ်ပြီး ကိုမှန်ကင်းရှေ့ ချပေးတယ်။ ဖိုးငိုနဲ့ ကိုမှန်ကင်းကိုသာ ချပေးတာ၊ သူကတော့ မစားဘူး။

“အစ်ကို … စားလေ” ဆိုတော့ ကိုမှန်ကင်းက ပြုံးပြုံးကြီးနဲ့။ “မကြည်လည်း စားလေ” တဲ့။

မကြည် ဆိုတဲ့ နာမည်ကို သိကြတော့ ဝိုင်းကြည့်နေကြတဲ့ မိန်းမတွေက ဖိုးငိုကို စ တယ်။

“နင်စားပြီး မြန်မြန်ပြန်တော့။ ကိုမှန်ကင်းနဲ့ နင်နဲ့ ကနေ့ ဘာမှ မပတ်သက်တော့ဘူး။ မကြည် ရောက်လာပြီ” တဲ့။

ဖိုးငိုကလည်း သူ့ဆရာသမား မိန်းမရလာတယ် ဆိုတော့ ပျော်နေပုံပဲ။ နှစ်ယောက်သား သံယောဇဉ်ဖြစ်နေကြတာ မှန်ပေမယ့် ကိုမှန်ကင်း မိန်းမရလာပြီ ဆိုတော့ သူ ဆက်နေလို့ မကောင်းတော့ဘူး ဆိုတာ ဖိုးငိုကလည်း သိပုံပေါ်တယ်။

“ကျုပ် ပြန်မှာပါဗျာ” တဲ့။

မိန်းမတွေက ရယ်တော့ ကိုမှန်ကင်းက မျက်နှာမကောင်းဘူး။ မပြန်ပါနဲ့ကွာ တဲ့၊ တို့နဲ့ပဲ နေပါ တဲ့ ပြောရှာပါတယ်။ ဖိုးငိုက မနေချင်ဘူး ပဲ ပြောပြီး ထမင်းဆက်စားတယ်။ ကိုမှန်ကင်း ထမင်းစားပြီးတော့ မကြည်က နောက်ဖေးဘက် ပန်းကန်ထွက်ဆေးတော့ မိန်းမတစ်ယောက်က မကြည်ကို ဘယ်ကခေါ်လာတာလဲ တဲ့ တိုးတိုးလေး မေးတယ်။

ကိုမှန်ကင်းက မဖြေပါဘူး၊ ဖိုးငိုကပဲ ဖြေတယ်။

“ပုဇွန်တောင်ဘူတာမှာ တွေ့တာပါဗျာ။ ဦးမှန်ကင်းနဲ့ခင်တဲ့ သူ့အဖွဲ့ဟောင်းကလူတွေ ထည့်ပေးလိုက်တာ။ ဦးမှန်ကင်းကလည်း ခေါ်လာရော”

အဲဒါ ကိုမှန်ကင်းနဲ့ မကြည်တို့ တွေ့ကြပုံပဲ။ သံယောဇဉ် ဖြစ်ကြပုံပဲ။ ညားကြပုံပဲ။

ခဏနေတော့မှ မကြည် ပြန်ဝင်လာတယ်။ လာကြည့်ကြတဲ့ မိန်းမတွေရော ဖိုးငိုရော ပြန်တော့မှ ကိုမှန်ကင်းက ခေါင်းရင်းဘက်က မှိုတောင်တက်နေတဲ့ ဝါးပတ္တလားဆီ ထသွားတယ်။ မကြည်က မီးတိုင်ခွက်ကလေး ထွန်းတယ်။ ကိုမှန်ကင်းက ပတ္တလားရွက်ပေါ် တင်ထားတဲ့ လက်ခတ်ကို ကောက်ကိုင်ပြီး ဟိုစမ်းဒီစမ်း တီးတယ်။ တော်တော်ကလေး တီးပြီးတော့မှ …

“နင် ဘာသီချင်းရသလဲ”

“ရပါတယ်”

“အာယားမ ရလား”

“အင်း”

ကိုမှန်ကင်း သူနဲ့တစ်သက်လုံး တွဲရမယ့်မိန်းမ သီချင်းဘယ်လောက်ရသလဲ ဆိုတာ ရောက်ရောက်ချင်း စာမေးပွဲစစ်တယ်၊ တစ်ပုဒ်ပဲ မေးကြည့်ရသေးတယ်၊ ရတယ် ဆိုတော့ ကိုမှန်ကင်း ကျေနပ်သွားတယ်။

အာယားမသီချင်း ခြေဆင်းလေး အသံပြလိုက်တော့ မကြည်က ဝင်ဆိုရော။

“သူငယ် ရေဆိပ် တောင်ထိပ်သစ်ပင် ဥယျာဉ်ပန်းမန် ရေကန်ရေတွင်း ယမင်းပျိုစစ် ဝတ်စားသစ်နှင့် ပြူလှစ်ရိပ်ငြိမ် လူ့စည်းစိမ်ဝယ် အချိန်သာတောင်း ညနေစောင်း တဲ့ရှင် …”

ကိုမှန်ကင်းက သံကျလေးတွေပဲ လိုက်ခေါက်နေတာ။ ခြေဆင်းသက်သက်ကိုး။ မကြည်က အသံတော့ကောင်းပါရဲ့၊ အသံက မခိုင်ဘူး။ ယိုင်ချင်တယ် ဆိုတာ သူ သတိထားမိတယ်။

“ခရာဘယ်တင် အမှာစကားနဲ့ ပြရပါတော့ … ရတနာတင်ဟာ အာယားမရယ်လို့ ကာလသားက မုန်းချင်မုန်းပစေတော့ …”

ကိုမှန်ကင်းက ပတ္တလားကြောင်လေး သူ့မှာရှိပေမယ့် အရင်ညတွေက တီးဖြစ်တာ မဟုတ်ဘူး။ တစ်နေ့လုံး ရထားပေါ်မှာ မယ်ဒလင်တီးနေရတော့ အိမ်က ပတ္တလားကြောင်ကို မတီးဖြစ်တာ ကြာပြီ။

ကိုမှန်ကင်းမိန်းမခိုးလာတဲ့ညပဲ သီချင်းသံလေးနဲ့ ပတ္တလားသံလေးနဲ့ ဆိုတော့ ဘေးကတဲတွေက သဘောတွေကျလို့။ မကြည်ကလည်း မဆိုးဘူး ပေါ့။ ဘယ်ကဘယ်လို ဘာမှန်းမသိပေမယ့် သူ့ဟာနဲ့သူတော့ တွဲလို့ဖြစ်တာပဲ ပေါ့။

“နင် အင်မတန်ပလီတယ် ဆိုရင်ဖြင့် ခံရမှာပါမလွဲ … ညည်း အင်မတန်ပလီတယ် ဆိုရင်ဖြင့် ခံရမှာပါမလွဲ … အားလုံး မှန်ကြတာပါပဲ …”

အဲသည်နေရာရောက်တော့ ကိုမှန်ကင်း ဝါးပတ္တလားကို ရပ်လိုက်တယ်။

“နင့်ဟာက အသံတွေ ယွင်းနေတယ်ဟ။ ပတ္တလားအကျနားထောင်။ နေဦးဟ … ငါ့ပတ္တလားကလည်း နည်းနည်းတော့ ကြောင်နေတယ်။ ဆိုပေါက် … ဆိုပေါက် … ဒီမှာကြည့် …”

ကိုမှန်ကင်းက ခြေဆင်းအချပိုဒ်ကို ဆိုပြတယ်။ မကြည်ကလည်း လိုက်ဆိုတယ်။ ဒါပေမဲ့ မကြည်က သူဆိုနေကျအဆိုက အသားကျနေတော့ တော်တော်နဲ့ပြင်လို့မရဘူး။ ခဏခဏ ပြန်ဆိုပြတယ်။ မကြည်က ခဏခဏ မှားတော့ …

“နင် အရင်က ဘယ်လိုဆိုခဲ့တာတုံး” ဆိုတော့၊ မကြည်က …

“အို … အစ်ကိုကလည်း …” တဲ့။

အရင် ဘယ်လိုဆိုခဲ့တာတုံး ဆိုတာက မကြည် အရင် တွဲနေကျ ဆိုနေကျလူက သင်မထားဘူးလား လို့ မေးတာမျိုး ဖြစ်နေတာကိုး။ နင်ရဖူးခဲ့တဲ့ လင်တွေက ဒီလိုပဲ သင်ထားသလား ဆိုတဲ့ အဓိပ္ပာယ်မျိုး ဖြစ်နေတာကိုး။ ကိုမှန်ကင်းက သူ့စကားမှားသွားမှန်း သိတော့ သီချင်းတိုက်တာ ရပ်လိုက်ရော။ လက်ခတ်ကလေး ပတ္တလားရွက်ပေါ် အသာတင်တယ်။

ကိုမှန်ကင်းက မျက်စိသာမမြင်တယ်၊ မီးခွက်ထွန်းထားမှန်း သိတယ်နဲ့ တူပါရဲ့ …

“မကြည် … နင့်မီးခွက်ကြီးက မပူဘူးလား။ မှုတ်လိုက်ပါလား” တဲ့။

* * *

(၂)

ကိုမှန်ကင်းက သူ့တဲစုလေးမှာ လူချစ်လူခင်တော့ များတယ်။ သည်နေရာကလေးက အစုကို သူရောက်လာတာ ရှိလှမှ အလွန်ဆုံး တစ်နှစ်သာသာပေါ့။

အရင်က ပုဇွန်တောင်ဘက်မှာ နေတယ်။ သူ့အုပ်စုကလေးနဲ့ သူ နေတာပါပဲ။ အခုနေသလိုပါပဲ။ နောက်တော့ အပေါင်းအသင်းမင်ပြီး သည်မှာ နေဖြစ်တော့တာ။

ပထမ ရောက်စကတော့ အတွဲရယ်ဘာရယ် မရှိပါဘူး၊ တစ်ကိုယ်တော်ပဲ မြို့ပတ်ရထားပေါ် ကြုံသလိုလိုက်သွားတာပဲ။ ခြေထောက်ကလေးနဲ့ စမ်းစမ်းပြီး တစ်တွဲပြီးတစ်တွဲ ကူးနေတာပဲ။ လက်ကလည်း တီး၊ ပါးစပ်ကလည်း ဆို ပဲ။

ဘုရားလမ်းဘူတာလောက် ရောက်တော့ ဆင်း၊ အင်းစိန်ရထား ပြောင်းစီး၊ တာမွေလောက် ကန်ပဲ့လောက်မှာ ပြန်ဆင်း၊ လမ်းဘေးမှာ ထမင်းဝယ်စား၊ ဘူတာတစ်ခုခုမှာ ခဏနား၊ နှစ်ချက်ခွဲလောက် ရထားပြန်တက်ပြီးရင် မိုးကြီးချုပ်မှ ပြန်ရောက်ရော။ ရလည်း ရတယ်။ မရဘူးဆိုတဲ့နေ့ ခုနစ်ဆယ်လောက် ရတယ်။

တစ်ခုတော့ရှိတယ်။ ကိုမှန်ကင်း အရက်တော့ကြိုက်တယ်။ အသေကို ကြိုက်တာ။ ပြန်ရောက်ပြီဆိုတာနဲ့ ရေချိုးတယ်၊ အနားက ဘူတာရုံကလေး ဘေးမှာ တောအရက်ဆိုင်ကလေး တစ်ဆိုင်ရှိတော့ သူ့အဖို့ နီးနီးနားနား အဆင်ပြေတယ်။ နည်းနည်းလေး ထွေလာတော့မှ ပြန်လာတာ။ ပြန်လာတယ်ဆိုပေမယ့် သူ့ချည်းပြန်လာတာ မဟုတ်ဘူး။ ကလေးတစ်ယောက်ယောက်က လာကြိုမှ ပြန်လို့ရတာ။

သူလို ဘဝတူမိသားစုတွေထဲမှာ သားတွေသမီးတွေနဲ့ ဝေဝေစည်စည် ရှိနေတဲ့ မိသားစုတွေလည်း ရှိတာပဲ။ တချို့လည်း ငယ်ပေါင်း ရိုးရိုးသားသား ကျိုးကျိုးနွံနွံ သစ္စာရှိရှိပဲ။ ဘဝတူအချင်းချင်းက ခင်ကြတယ်၊ စာနာကြတယ်။ ကူညီကြတယ်။ ကလေးအချင်းချင်းလည်း သင့်မြတ်ကြတာပါပဲ။

သူ့ကလေး ကိုယ့်ကလေး ခေါ်ခိုင်း၊ ခေါ်တွဲ လုပ်နေကြတာပဲ။ ဘယ်သူ့ကလေးမှရယ် မဟုတ်ဘူး၊ ကလေးတွေကလည်း ဘယ်သူဘယ်ဝါမှရယ် မဟုတ်ဘူး၊ တြွဲ့ပီးလိုက်ပို့တာပဲ။ ရှက်တယ်ဘာရယ် မရှိဘူး။ အရက်ဆိုင်မှာ ကိုမှန်ကင်း မူးလောက်ပြီဆိုရင် ကလေး တစ်ယောက်မဟုတ် တစ်ယောက် ရောက်လာတာပဲ။

“ဦးမှန်ကင်းကြီး … ထတော့” ဆိုရင် “ဟုတ်ပါပြီဗျာ” ဆိုပြီး ထတော့တာ။ မထလို့လည်း မရဘူးလေ။ သူများတွဲမှ သူ အိမ်ရောက်မှာကိုး။

နောက်တစ်ခုက ကိုမှန်ကင်းက ဖဲရိုက်ကောင်း။ သူ့မှာ ဖဲထုပ်တစ်ထုပ် ကိုယ်ပိုင်ရှိတယ်။ သူများဖဲထုပ်နဲ့ဆိုရင်တော့ သူ လက်မခံဘူး။ သူ့ဖဲထုပ်နဲ့သာရိုက်မယ် ဆိုလို့ကတော့ မျက်စိကောင်း မကလို့ မျက်စိသုံးလုံး ပါလာပါစေ၊ လာခဲ့ ပါ။ သူ့ဖဲထုပ်ကိုလည်း သူ ဘာမှလုပ်ထားတာတော့ မဟုတ်ပါဘူး၊ ရိုးရိုးဖဲထုပ်ပါပဲ။ မှတ်ထား၊ တေးထားတာလည်း မရှိပါဘူး။ တွဲရိုက်မယ့် မျက်စိကောင်းတဲ့လူက ရိုက်တော့မယ်ဆိုရင် ကြိုက်သလို စစ်ဆေး။

မသင်္ကာဘူး ထင်ရင် မရိုက်နဲ့။ သူကိုင်တွယ်နေကျမို့ သူ့အထာကလေးနဲ့သူ သိနေတာကလွဲလို့ ဖဲထုပ်ကို ဘာမှ ပြင်ထားတာမဟုတ်ဘူး။

တကယ်ရိုက်ဖြစ်ပြီဆိုရင်တော့ ကိုမှန်ကင်းက သူ့လူယုံကို ခေါ်လာရော။ ငွေအနုတ်အသိမ်း လုပ်ဖို့၊ တစ်ဖက်ကဖဲပွင့် ကြည့်ပေးဖို့ ဒါပဲ။ ကျန်တာ သူပဲ ကိုင်တယ်၊ သူပဲ ရိုက်တယ်။ သူခေါ်လာတဲ့လူက ကိုင်ပေးတာ မဟုတ်ဘူး။ လျော်စရာရှိရင် လျော်ပေးလိုက်၊ စားစရာရှိရင် စားလိုက်၊ ဒါပဲ ခိုင်းထားတာ။

ဝိုင်းဖြစ်လို့များ ဆိုလို့ကတော့ ကိုမှန်ကင်းက ဒိုင်ပဲလုပ်တယ်။ သူများမှောက်ထားတဲ့ ဖဲချပ်တွေကို လိုက်စမ်းပြီး “ဖမ်းတယ်” လို့ အော်တော့တာ။

မျက်စိကောင်းတဲ့ ရိုက်ဖက်တွေက “အောင်မာ မှန်ကင်းရာ … သေချာမှလည်း လုပ်ပါဟ” လို့များဆိုရင် အောက်ဖဲတစ်ချပ် လက်နဲ့ပွတ်တဲ့ပြီး “ကုလားကွ” လို့ အော်လည်း အော်၊ ဖျောင်းခနဲလည်း ရိုက်ချ၊ ကြည့်လိုက် … ကုလား ပဲ။ “ပိုင်လှချေလား မှန်ကင်းရ” ဆိုတော့ “ကံပါဗျာ … မှန်ကင်းရဲ့ ကံပါ …” တဲ့ အမြဲပြောတတ်တယ်။

ဖဲရိုက်တင်ကောင်းတာ မဟုတ်ဘူး။ ကျားထိုးရင်လည်း ကိုမှန်ကင်းကို တော်ရုံလူ မနိုင်ဘူး။ ကောင်းလိုက်တဲ့ခေါင်းကလည်း မပြောနဲ့တော့။ ကျားကွက်က စက္ကူကျားကွက်ဖြစ်ဖြစ်၊ သစ်သားကျားခုံနဲ့ဖြစ်ဖြစ် မကစားခင် သူ့လက်နဲ့ လိုက်စမ်းတယ်၊ ဒါပဲ … ပြီးပြီ။

ကျားကောင်တွေ ဖြောင့်နေအောင်စီတယ်။ သစ်သားခုံဆိုရင်တော့ သူ ပိုကြိုက်တယ်။ ကျားထိုးတယ်ဆိုလို့ ရေးတေးတေးမြင်ရလို့တော့ မထင်နဲ့၊ ဘာမှကို မမြင်ရတာ။ ဝိုးဝိုးဝင်းဝင်းလောက်ပဲ မြင်ရတာ။ နေသာနေသလား၊ မှောင်နေသလားဆိုတာပဲ သိတာ။

တစ်ဖက်ကလူရဲ့ကျားက ဂျစ် ဂျစ် နဲ့ တက်မယ် ဆိုရင် သူကလည်း ဂျစ် ဂျစ် နဲ့ တက်လိုက်တာပဲ။ သူ့ကျားကောင် တစ်ဖက်ကင်းနေရာရောက်လို့ မထည့်သေးဘူး ဆိုရင်လည်း “ကင်း ထည့်” လို့ အော်ရော။ သူက ကင်းထည့်ရမယ်ဆိုရင်လည်း ကင်းထည့်ပေးလိုက်ရော။ သူက ကင်းထည့်ရမယ်ဆိုရင် တစ်ခါတလေ သုံးကွက်လောက်များ ကျော်စားသွားတာ ဒေါင်း … ဒေါင်း … ဒေါင်း … နဲ့ လူကောင်း မျက်မြင်ဆိုတဲ့လူက ပါးစပ်အဟောင်းသားနဲ့ ကျန်ရစ်ခဲ့ရော။

ကိုမှန်ကင်းနဲ့ကစားရင် တစ်ကောင်ကျ ရင်လည်း ပေးမှ၊ နှစ်ကောင်ကျ ရင်လည်း ပေးမှ၊ သရေရှုံး ရင်လည်း ပေးမှ ကစားကြတော့တာ။ ကစားရင်လည်း များသောအားဖြင့် ကိုမှန်ကင်း နိုင်တာချည်းပဲ။ ကျားနိုင်တဲ့နေ့ ဆိုရင် ဘူတာရုံဘေးကဆိုင်ကို အစောကြီးရောက်နေတတ်တယ်။ အဲဒီနေ့ ရထားမတက်တော့ဘူး။

ကိုမှန်ကင်း ဘောလုံးလည်း ကန်သေးတယ်။ ကန်တာမှ ကြေးကြေးမှ ကန်တာ။ ဂိုးကျဉ်း တစ်ယောက်ချင်း ကန်ချင်တယ် လို့ သူ့ကို တဲတွေနားက ဆိုက်ကားနင်းတဲ့ ကိုကျော်ခက အရက်ဝိုင်းမှာ စိန်ခေါ်တော့ ကိုမှန်ကင်းက သိပ်ရတာပေါ့ တဲ့။ ကြေးမပယ်ကြေး တဲ့။

မျက်နှာဝ နှစ်တောင်လောက် ကျယ်တဲ့ သစ်သားတိုင်ကလေး တစ်ဖက်တစ်ချက် စိုက်တဲ့ပြီး ကွင်းမကျယ့်တကျယ်လေးထဲမှာ ကိုမှန်ကင်းနဲ့ ကိုကျော်ခ ပိုက်ဆံကြေး ဘောလုံးကန်မယ် ဆိုတော့ ဘူတာရုံလေးဘေးက ကွင်းမှာ အဲဒီနေ့က လူတွေကို ညို့လို့။

ပွဲကြည့်ပရိသတ်ဆိုတာ ပြုံးလို့ရွှင်လို့။ ကန်မှာကလည်း ဂိုးကျဉ်း၊ ကန်မယ့်လူကလည်း တစ်ဖက်တစ်ယောက်၊ လောင်းကြေးကလည်း ငါးဆယ်ကြေး တဲ့။

ပွဲစမယ် လုပ်တော့ ဒိုင်လုပ်တဲ့ ဘူတာကစာရေးကြီးက မျက်စိကောင်းတဲ့ ကိုကျော်ခ မျက်စိကို အဝတ်စနဲ့ တင်းနေအောင်စည်းတယ်။ ကိုမှန်ကင်းက မျက်မမြင်ဆိုတော့ ကိုကျော်ခကိုလည်း မမြင်ရအောင် လုပ်ရတာလေ။ ဘောလုံးကိုလည်း ဆန်ခါကွက်ကျဲကျဲ ရက်ထားတဲ့ ဘောလုံးစွပ်တဲ့အိတ်နဲ့ စွပ်တယ်။ ဘောလုံးစွပ်မှာ ခြူကလေးတစ်လုံး မြဲနေအောင် ချည်တယ်။

လက်မှတ်စာရေးကြီးက နည်းနည်းကန်ကြည့်တော့ ခြူကလေးက တချွင်ချွင်နဲ့ ဘောလုံးပြေးရာမှာ မြည်နေရော။ အားလုံးအဆင်ပြေတော့မှ ဘောလုံးပွဲ စတယ်။

ကိုယ်ခန္ဓာ ဖိုင့်ဖိုင့်၊ အသားဖြူဖြူ ကိုမှန်ကင်းကြီးက ဘောင်းဘီအပွ တိုတိုကြီး ဝတ်ထားတော့ တကယ့် ဘောသမား ဆိုက်ပဲ။ ဒိုင်က ဘောလုံးကိုမြှောက်ပြီးလည်း ချလိုက်ရော ပြေးပြီးလုလိုက်ကြတာ၊ ဘောလုံးက ပြေးချင်တဲ့နေရာပြေးတော့ ခြူသံကိုနားထောင်ပြီး နှစ်ယောက်သား လိုက်လုလိုက်ကြတာ လဲကြ ကွဲကြနဲ့။ ဘောလုံးနားရောက်လို့ ချိန်ကန်တော့လည်း ဘောလုံးကိုထိတယ် မရှိဘူး။ လေပဲ ကန်မိတော့ ကွင်းဘေးကလူတွေက တဝါးဝါးနဲ့။

“ဟုတ်ပြီကွ … မှန်ကင်းကွ … ရှေ့မှာ နည်းနည်းတိုးဦး … ဟုတ်ပြီ … ကန် … ကန်တော့” ဆိုတဲ့ အသံတွေဆိုတာ ညံလို့။

နာရီဝက်လောက်အထိ ဘယ်သူမှ ဂိုးမရသေးဘူး။ တစ်ခါတော့ ကိုမှန်ကင်း ဘောလုံးရသွားတယ်။ သူသွင်းရမယ့် ဂိုးတိုင်ဘက်ကို ဘယ်လိုမှတ်ထားသလဲ မသိဘူး။ လှည့်ပြီးသား ဖြစ်သွားရော။

ကိုကျော်ခ လာလုတော့ ဘောလုံးကို အသာလေး နောက်ဆွဲလိုက်တော့ ကိုကျော်ခ အရှိန်နဲ့ လဲရော။ သည်တော့မှ ကိုမှန်ကင်း သူ့ခြေခုံပြားကြီးနဲ့ မြေလှိမ့်ကန်လိုက်တာ ဘောလုံးက ခြူသံတချွင်ချွင်နဲ့ ဂိုးပေါက်ထဲ တည့်တည့်ကြီး ဝင်သွားတော့တယ်။

“ဂိုး …” လို့လည်း ဝိုင်းအော်ရော ပွဲလည်း ပြီးရော။ တစ်ဂိုးဂိန်းကိုး။

ကိုမှန်ကင်းက အဲသလိုလူမျိုး။ မကြည်နဲ့ညားတော့ ကိုမှန်ကင်း ကျားမထိုးဖြစ်တော့ဘူး၊ ဖဲမရိုက်ဖြစ်တော့ဘူး၊ ဘောလုံးလည်း မကန်ဖြစ်တော့ဘူး။ ရသမျှပိုက်ဆံလေး ကျစ်ကျစ်စုတယ်။ အရက်ကလေးတော့ သောက်သေးတယ်။ ညနေဘက် ပြန်ရောက်ရင် အရက်လေး သောက်လိုက်၊ ပတ္တလားလေး တီးလိုက်၊ သီချင်းလေး ဆိုလိုက် နဲ့။

* * *

(၃)

မကြည် သူ့ဆီရောက်လို့ ဆယ်လလောက်နေတော့ ကိုမှန်ကင်း အိပ်ရာထဲ လဲတယ်။ အသည်းရောင် အသားဝါ ဖြစ်တာ တဲ့။

ဝဝဖိုင့်ဖိုင့်ကိုယ်ခန္ဓာကြီး ဆိုတာ စိန်ခလုတ်နဲ့တိုက်ချတဲ့ သင်္ဘောသီးစိမ်းလို လုံးပါးပါးသွားလိုက်တာ အရိုးပေါ်အရေတင်ပဲ ကျန်တယ်။ စုဆောင်းထားတဲ့ ပိုက်ဆံလေးလည်း ဆေးဝယ်သောက်ရတာနဲ့၊ ဆေးထိုးရတာနဲ့ တစ်တိတစ်တိနဲ့ ပွန်းလှပြီ။ စုထားတဲ့ငွေထုပ်ကလေးလည်း လျော့လိုက်လိုက်လာပြီ။

ဖြစ်ခါစ နှစ်ပတ်လောက်တော့ မကြည်လည်း ပြုစုပါသေးတယ်။ နောက်တော့ ဆရာကြီးက ငွေကုန်မှန်းသိတော့ ကိုတင်ဖေ ဆိုတဲ့ မျက်မမြင်တစ်ယောက်နဲ့ တွဲပေးလိုက်ရော။

မကြည် တစ်နေ့လုံး ရထားနဲ့လိုက်နေရတော့ အိမ်မှာ ကိုမှန်ကင်း တစ်ယောက်တည်း။ ဖိုးငိုလေး ပြန်ခေါ်ခိုင်းပြီး ခိုင်းချင်တာလေး ခိုင်းရတယ်။ မကြည်အတွက်ရလာတဲ့ ပိုက်ဆံလေးနဲ့ စားနေရတော့ ကိုမှန်ကင်းလည်း ကြာတော့ အားနာလာတယ်။

သက်သာတယ်၊ နာလန်ထတယ် ဆိုပေမယ့် နောက်တစ်လလောက်တော့ နားရဦးမှာ သေချာတယ်။ မကြည်ကလည်း တစ်နေကုန်ပင်ပန်းလို့ တဲ့ ပြန်လာတာနဲ့ ရေချိုး၊ ထမင်းစား၊ အလှလေးပြင်ပြီး ဘူတာမှာ သွားသွားထိုင်နေတတ်တယ်။

တစ်ညတော့ မိုးကြီးသာချုပ်ရော မကြည်နဲ့ တင်ဖေက ပြန်မလာဘူး။ နောက်ဆုံးရထား သူတို့ဘူတာရုံကလေးက ထွက်သွားတဲ့ အသံသာ ပျောက်သွားတယ်၊ မကြည်နဲ့ တင်ဖေ ပြန်မလာဘူး။

တော်တော်လေးမှောင်တော့မှ ဆရာကြီးက လူတွဲကလေးနဲ့ ကိုမှန်ကင်းဆီ ရောက်လာတယ်။ ဒီသတင်းကြားတဲ့ မိန်းမနဲ့ ကလေးတွေလည်း ရောက်လာကြတယ်။

တင်ဖေက မိန်းမတော့ မရှိဘူး၊ ဒါပေမဲ့ ကလေးတွေကျန်ရစ်ခဲ့တယ်။ တင်ဖေ့သားသမီးတွေကလည်း မျက်စိသူငယ်နားသူငယ်နဲ့ ထိုင်နေကြတယ်။ ကိုမှန်ကင်းရဲ့ ဘဝတူသူငယ်ချင်းတွေကလည်း ဒေါသဖြစ်တဲ့လူက ဖြစ်၊ မူးတဲ့လူ မူး။

ကိုမှန်ကင်းကတော့ ငေါင်းစင်းစင်းကြီး။ ပိုက်ဆံ တစ်ပြားမှ မကျန်တော့တဲ့ အိတ်ရှုံ့ကလေး ဘေးချပြီး ငေါင်းစင်းစင်းကြီး ထိုင်လို့။ ခဏနေတော့မှ ဖိုးငိုကို “အရက်တစ်လုံး သွားဝယ်စမ်း” တဲ့။ သူ့နာမည်ပြောခဲ့ တဲ့။

အသည်းရောင်အသားဝါရောဂါနဲ့ နာလန်ထစလူက အရက်ပြင်းတွေ သောက်မယ်ဆိုတော့ ဖိုးငိုက ကလေးပေမယ့် တားတယ်။ ကိုမှန်ကင်းကလည်း “သွားသာဝယ်” တဲ့။ “သေပစေ” တဲ့။ ဖိုးငိုကတော့ “ဝယ်မပေးဘူး” ပဲ ငြင်းတယ်။

ဆရာကြီးနဲ့ တခြားလူတွေကလည်း အတင်း တားတယ်။ ဆရာကြီးက ကိုမှန်ကင်းကိုပဲ အပြစ်တင်တယ်။

“မှန်ကင်းရာ … မင်းမိန်းမ တင်ဖေနဲ့တွဲပေးလိုက်တာ မင်းငွေကုန်မှန်း သိလို့ပါကွာ။ စေတနာပါ။ ဘယ်ကမိန်းမများ မင်းတွေ့လာတာလဲ ငါ့ကောင်ရာ … မျက်စိမမြင်တဲ့ယောက်ျားကို သေတစ်ပန်သက်တစ်ဆုံး ရှာကျွေးတဲ့ မိန်းမတွေ အများကြီးကွ။ ဆင်းရဲပေမယ့် သစ္စာမပျက်ကြဘူး။ အချစ်မပျက်ကြဘူး။ ကလေးတွေ မြေးတွေနဲ့ … မင်းအတွေ့ပဲ။ တို့အထဲမှာ မင်းက အကင်းအပါးဆုံး။ ဖဲရိုက်မလား၊ ကျားထိုးမလား၊ ဘောလုံးကန်မလား … မင်းကျမှ ခံရတယ်လို့ကွာ။ အေးလေ … ဘောလုံးက ခြူပါတာကိုးကွ၊ မိန်းမက ခြူမှမပါတာ”

ဆိုတော့ ကိုမှန်ကင်း ဘာမှမပြောတော့ဘူး။ အရက်လည်း မဝယ်ခိုင်းတော့ဘူး။ ခေါင်းရင်းထရံကိုမှီရင်း ထိုင်နေလိုက်တာ လူတွေအားလုံး ပြန်ကြတဲ့အထိပဲ။ ညဥ့်တော်တော်နက်တဲ့ အထိပဲ။

တော်တော်လေး တိတ်ဆိတ်သွားပြီ ဆိုတော့မှ ကိုမှန်ကင်း ပတ္တလားဆီကို ဖင်ရွှေ့ပြီး သွားတယ်။ ပတ္တလားလက်ခတ်ကို ကိုင်ပြီး ထင်းခွဲခြမ်းခွဲသလို တဖြောင်းဖြောင်းနဲ့ ရိုက်ရိုက်တီးတယ်။

နဂိုကအသံကြောင်နေတဲ့ ပတ္တလားက ကြောက်စရာအသံတွေ ထွက်လာတော့မှ သူဆိုနေကျ ခပ်ရှရှ အစ်တစ်တစ် အသံမျိုး မဟုတ်ဘဲ အသံနက်ကြီးနဲ့ …

“နင် အင်မတန်ပလီတယ် ဆိုရင်ဖြင့် ခံရမှာပါမလွဲ … ညည်း အင်မတန်ပလီတယ် ဆိုရင်ဖြင့် ခံရမှာပါမလွဲ … အားလုံး မှန်ကြတာပါပဲ …” လို့ ကျုံးအော်ရော။

ပထမတော့ တဲစုကလေးက မျက်မမြင်တွေရော၊ မိန်းမတွေရော၊ ကလေးတွေရော လန့်နိုးကုန်ကြတယ်။ နောက်တော့လည်း အမှောင်ကြီးထဲမှာ တဲစုကလေး ငြိမ်သက်သွားပြန်ရော။

(ရင်ခုန်ပွင့် မဂ္ဂဇင်း၊ အမှတ် ၅၀၊ ၁၉၉၀ ပြည့်နှစ် - ဒီဇင်ဘာလ)

* * * * *

 

တိုက် ၁၃၊ အခန်း ၄

(၁)

ကံအားလျော်စွာ …
တကယ့်ကို ကံအားလျော်စွာပါပဲ။ သည်တိုက်ခန်းထဲက တစ်ခန်းခန်းကို နေထိုင်ခွင့်ရလိမ့်မည်ဟု ဘယ်တုန်းကမှ မမျှော်မှန်းခဲ့ဖူးကြောင်းကိုသာ ပထမဦးဆုံး ကျွန်မ ဝန်ခံရတော့မည်။

မောင်ကတော့ သည်တိုက်ခန်းလေးတွေထဲက အခန်းလွတ်ပေါ်လာတိုင်း ဇွဲကောင်းကောင်းနှင့် လျှောက်သည်ချည်း ဖြစ်၏။ များသောအားဖြင့် လစာနှုန်း အတန်အသင့်မြင့်မားသူကိုသာ (လုပ်ငန်းမှာ ဘယ်လောက်အရေးကြီးသလဲ၊ စက်ရုံနဲ့ နီးနီးနားနားနေဖို့ လိုအပ်တဲ့သူလား ဆိုတာကိုလည်း ထည့်တွက်လေ့ရှိပါသည်) နေရာချထားလေ့ရှိမှန်း ကျွန်မ သိထားနှင့်တော့ ရိုးရိုးစွဲစွဲ နေချင်သည့်ဆန္ဒသာ ရှိသော်လည်း ကျွန်မ မမျှော်မှန်းဝံ့ခဲ့ပါ။

မန္တလေးပုံစံ ဟု ခေါ်သော တစ်လုံး လေးဦးနေ တိုက်ခန်းနီနီကြီးတွေ အလုံးနှစ်ဆယ်လောက်ကို ကန့်လန့်တစ်လုံး ဒေါင်လိုက်တစ်လုံး စီကာစဉ်ကာ တည်ဆောက်ထားသော သည်တိုက်စုကလေးကို ‘တိုက်ဝင်း’ ဟုပဲ ခေါ်တတ်ကြသည်။

တိုက်ခန်းတွေရဲ့အဦးထိပ်က သုံးထပ်သား ဆိုင်းဘုတ်ကလေးမှာတော့ ‘ဝန်ထမ်းရိပ်သာ အမှတ် (၁)၊ ဖြတ်သန်းသွားလာခွင့်မပြု’ လို့ ရေးထားတာ ဖတ်ရဖူးသည်။

အခုတော့ ထိုဆိုင်းဘုတ်ကလေးလည်း မရှိတော့ပါ။ ‘ဝန်ထမ်းရိပ်သာ အမှတ် (၁)’ လို့လည်း ဘယ်သူမှ ရုံးဆန်ဆန် ခေါ်သံ မကြားရပါ။ ‘တိုက်ဝင်း’ ဆိုသည့် လူထုဘာသာစကားကသာ တွင်ကျယ်နေတော့သည်။

ကံအားလျော်စွာ သည်တိုက်ခန်းကလေးကို ကျွန်မတို့နေခွင့်ရသလို နောက်ထပ် ကျွန်မအတွက် ကံကောင်းတာ ရှိပါသေးသည်။ ကျွန်မတို့နေခွင့်ရသော တိုက်ခန်းလေးက ဘူတာရုံကလေးနှင့် နီးသောကြောင့် ဖြစ်ပါသည်။

ကျဲပါးသော မြို့ပတ်ရထား အပြာရင့်ရင့်ကလေးတွေ တိုက်အောက်က တဝေါဝေါဖြတ်သွားလျှင် ဘာရယ်မဟုတ်ဘဲ ကျွန်မ ပြတင်းပေါက် ဘေးကို ပြေးရပ်မိသည်သာ။

မောင်ကတော့ ဘူတာရုံနှင့်နီးနီးနေရတာကို သိပ်ကြိုက်လှပုံ မရပါ။ ဒါပေမဲ့ မောင်က ပြတင်းကဆစ်ဆင့် အနောက်ဘက် မိုးကုပ်စက်ဝိုင်းကို တစ်ဆန့်တစ်လျား မြင်နေရတာကိုတော့ တစ်စုံတစ်ရာမပြောသော်လည်း ကျေနပ်နှစ်သက်ခြင်း ဖြစ်ဟန်ရှိပါသည်။

ဘူတာရုံနှင့် နီးခြင်း ဝေးခြင်း၊ အနောက်ဘက် မိုးကုပ်စက်ဝိုင်းကို မြင်ရခြင်း မမြင်ရခြင်းတို့မှာ ကျွန်မတို့နှစ်ဦး၏ တစ်ဦးချင်း ခံစားမှုသာဖြစ်၍ မောင်နှင့်ကျွန်မကြားတွင် သိပ်တော့ ပြဿနာမရှိလှပါ။ ဘာပဲဖြစ်ဖြစ် သည်တိုက်ခန်းကလေးကို စတင်ရောက်ရှိသည့်နေ့ကတော့ ကျွန်မတို့နှစ်ဦးစလုံး စိတ်ညစ်ညူးသွားခဲ့ရတာ အမှန်ပင်ဖြစ်၏။

အဲသည်နေ့က မောင်က ဘုရားစင်မှ ဘုရားကျောင်းဆောင်ကို ပင့်ဆောင်၍ ကျွန်မက သောက်ရေအိုးသစ်တစ်လုံးကို သယ် မ လာခဲ့ပါသည်။ အဲသည်နေ့က ရက်ရာဇာဖြစ်၍ နဂါးခေါင်းက တောင်ဘက်သို့ လှည့်သည်ဟု မောင်က ကျွန်မကိုရှင်းပြသောနေ့လည်း ဖြစ်ပါသည်။

* * *

(၂)

သည်တိုက်ခန်းကလေးပေါ်ကို ကျွန်မတို့နေထိုင်ခွင့် မရှိခင်တုန်းက သည်တိုက်တွေနှင့် တော်တော်လေးလှမ်းသော ခြောက်ခန်းတွဲတန်းလျားခန်းတွေမှာ ကျွန်မတို့ နေထိုင်ခဲ့ရပါသည်။ ဆယ်ပေခန်း ကျဉ်းကျဉ်းကလေး ခြောက်ခန်းကို တစ်ဆက်တည်း ဆောက်ထားလို့ ‘တန်းလျား’ လို့လည်း ခေါ်ကြပါသည်။

ဘယ်လိုမှကို စရိုက်ချင်းမတူနိုင်သော အိမ်ထောင်စု ခြောက်စုထဲမှာ ကျွန်မတို့က တစ်စု ဖြစ်သည်။ ဘေးအစွန်ခန်းတွေကတော့ ပျဉ်ချပ်တွေ စီကာထပ်ကာ ကာရံပေးထားရုံသာမက ဘေးပြတင်းပေါက်တွေပါ ဖောက်ပေးထားသဖြင့် ဘေးခန်းမှာ နေထိုင်ခွင့်ရသူတွေက အနည်းငယ် အဆင်ပြေသော်လည်း အလယ်ခန်းတွေကိုမူ ပါးလျသော ဝါးထရံချပ်တွေကို လျော့ရဲရဲကာပေးထားပါသည်။ ကျွန်မကတော့ ရနိုင်သမျှ စက္ကူစတွေကို ကော်သုတ်၍ စိတ်ရှည်လက်ရှည် ကပ်နေတတ်၏။

မည်သို့ပင်ဖြစ်စေ တစ်ခန်းကညှော်နံ့ကို လည်းကောင်း၊ တစ်ခန်းက ဟားတိုက် ရယ်မောသံကို လည်းကောင်း၊ တစ်ခန်းက မွှန်စူးစူး အရက်နံ့ကို လည်းကောင်း၊ တစ်ခန်းက ဖဲရွက်ပွတ်သံကို လည်းကောင်း၊ တစ်ခန်းက ကြေးစည်ရိုက်အမျှဝေသံကို လည်းကောင်း တစ်ခုမဟုတ်တစ်ခု ကျွန်မ ကြားနေရသည်သာ ဖြစ်၏။

တန်းလျားလေးက ခါးစောင်းလောက်သာ မြင့်ပါသည်။ လှေကားသုံးထစ်သဖွယ် ပြုလုပ်ထားသော အုတ်ခုံလှေကားလေးပေါ်မှာပဲ ညနေစောင်းလျှင် ကျွန်မ ထိုင်နေမိတတ်သည်။ ခပ်လှမ်းလှမ်းက မီးရထားသံလမ်းတွေကို ဖြတ်ကာ ပြန်လာမည့် မောင့်ကို စောင့်ရင်း အချိန်အတော်များများကို ကျွန်မ သည်အုတ်ခုံလေးပေါ်မှာပဲ ထိုင်ရင်း ဖြုန်းတီးပစ်ခဲ့သည်ချည်း ဖြစ်၏။

မောင်ကတော့ သည်တန်းလျားကလေးကို နေချင်စဖွယ် အိမ်ကလေးတစ်ခုအဖြစ် သဘောထားနိုင်သူ ဖြစ်၏။

‘လူတွေနဲ့ ရောနှောနေထိုင်ရတော့ လူတွေအကြောင်း ပိုသိခွင့်ရတာပေါ့’ ဟု လည်းကောင်း၊ ‘တန်းလျားဆိုတာ လူ့လောကအငယ်စားလေးကွ။ စရိုက် သိပ်စုံတယ်’ ဟု လည်းကောင်း ပြောတတ်သော်လည်း ကျဉ်းမြောင်းသော သည်အခန်းကလေးတွေထဲမှာ အသက်ရှူမဝဘဲ မွန်းကျပ်နေရသော ဝေဒနာကိုသာ ကျွန်မ အမှတ်မိဆုံးဖြစ်၏။

အခန်းကျဉ်းလေး နှစ်ခန်းပါသော သည်တန်းလျားမှာ တစ်ခန်းက အိမ်ရှေ့ ဘုရားခန်း(ဧည့်ခန်း)ဖြစ်၍ နောက်တစ်ခန်းက အိပ်ခန်း ဖြစ်သည်။ နောက်ဘက်မှာတော့ ကိုယ့်အစီအစဉ်နှင့်ကိုယ် ဆွဲဆန့်ကာ အခန်းရှည်ရှည်ကလေး တစ်ဆောင် ထပ်ချဲ့ထားရသည်။ မီးဖိုနှင့် ထမင်းစားခန်း ဖြစ်သည်။

သည်တန်းလျားခန်းတွေရဲ့ သက်တမ်းက နည်းလှသည်မဟုတ်။ တစ်ကြိမ်တည်းသာ သုတ်ခွင့်ရထားခဲ့သော ရေနံချေးမည်းမည်းတို့ပင် ဖြူရော်ကြွပ်ရွသော မြေခြောက်ရောင်အဖြစ် ပြောင်းလဲနေခဲ့ပြီ။ ပြတင်းတံခါးတွေက တစ်ချပ်နှင့်တစ်ချပ် အံမကျသော်လည်း တအားဆွဲပိတ်ပစ်ဖို့ စိတ်ပင်မကူးဝံ့ပါ။

နီကြင်ကြင် ဝပ်အားနည်း မီးလုံးရောင်အောက်မှာ တစ်ခန်းက မီးခိုးတွေက တခြားအခန်းတွေမှာ ဝေ့ဝေ့ဝဲဝဲ ရှိနေတတ်တာလည်း ရှိသည်။ ညဥ့်နက်သန်းခေါင်မှ ပြန်ရောက်လာတတ်သော အိမ်လည်လွန်တစ်ဦးဦးက သူ့အခန်းတံခါးကိုသူ တဝုန်းဝုန်းထုလျှင် ကျန်အခန်းတွေက မိသားစုတွေပါ ရောယောင်နိုးနေရသည်။

တချို့ကတော့လည်း ညတစ်နာရီထိုးမှ ကြာနီကန်ဆရာတော် တရားခွေကို ဓမ္မဓါနအဖြစ် ခပ်ကျယ်ကျယ် ဝေငှနေကြတာလည်း ရှိသည်။ တစ်ခါတစ်ခါ ကျိတ်၍ရန်ဖြစ်တတ်သော လင်မယားတွေဆီက ငိုသံတွေ ရောက်လာတတ်တာကတော့ ကျွန်မအတွက် ရိုးအီနေသော ဂီတ ဖြစ်လေသည်။

ဒါပေမဲ့ သည်တန်းလျားခန်းကလေးက လူတွေမှာ ချစ်စရာကောင်းသော၊ ခင်မင်နှစ်လိုဖွယ် ကောင်းသော၊ စွဲလမ်းတပ်မက်ဖွယ် ကောင်းသော စရိုက်တွေလည်း ရှိကြောင်းကို ကျွန်မ ဝန်ခံရပါမည်။ ဝိုင်းဝန်းကူညီတတ်ခြင်း ဖြစ်သည်။ လူမှုရေးတွေမှာ သိနားလည်လွန်းခြင်း ဖြစ်သည်။ ဘဝတူချင်း စာနာတတ်ခြင်း ဖြစ်သည်။

မိုးတွင်းတွေမှာ မိုးယိုတာက လွဲရင်၊ ရေအိမ်မှာ အညစ်အကြေးတွေ ပေကျံညစ်ပွနေတတ်တာက လွဲလျှင်၊ အများသုံးအုတ်ရေကန်ကရေကို ဝေးလံစွာ သယ်ယူရတာက လွှဲလျှင်၊ မိန်းမချင်း မကြာခဏ ကျယ်လောင်စွာ ရန်ဖြစ်တာက လွဲလျှင် …

တန်းလျားခန်းကလေးကို ကျွန်မ သံယောဇဉ်ရှိပါသည်။
မွန်းကျပ်သည် မှန်သော်လည်း သည်တန်းလျားခန်းကလေးကို တကယ်တမ်း စွန့်ခွာကာ တိုက်စုကလေးထဲက တစ်ခန်းကို ကျွန်မ ရရှိသည်ဟု သတင်းရောက်လာသည့်အချိန်က လှေကားအုတ်ခုံကလေးမှာပဲ ကျွန်မ မရှက်မကြောက် ငိုဖြစ်ပါသည်။

* * *

(၃)

တိုက် ၁၃၊ အခန်း ၄ …
မောင့်လက်ထဲက ရုံးမိန့်စာရွက်ကို ကိုင်ရင်းက သည်နံပါတ်တွေကို ကျွန်မ အကြိမ်ကြိမ်အထပ်ထပ် ရေရွတ်နေမိတော့သည်။ မောင်ကတော့ ရက်ရာဇာတွေ၊ ပြဿဒါးတွေ ပါသော ပြက္ခဒိန်ပေါ်မှာပဲ အာရုံရောက်နေသည်။

အင်္ဂလိပ်စာကို ရှေးခုနစ်တန်းလောက်တတ်သော ဖေဖေကတော့ ပက်လက်ကုလားထိုင်ပေါ်မှာ ထိုင်ရင်းက …

“သမီးတို့ ရတဲ့ အခန်းက နံပါတ်တွေကို ဖေဖေတော့ မကြိုက်လှဘူး။ ဆယ့်သုံးဂဏန်းက ကံမကောင်းတတ်ဘူး။ အင်္ဂလိပ်အယူကတော့ ‘ဆယ့်သုံး’ ဟာ ခိုက်တယ် လို့ကို ယုံကြည်ကြတယ်။ ‘လေး’ ဆိုတာလည်း မြန်မာလိုတော့ လေးလံခြင်း၊ စိတ်လေးရခြင်း စတဲ့ ဖိစီးနေတဲ့သဘောတွေ ပါတယ်။ မကောင်းဘူး … မကောင်းဘူး … ”

ကျွန်မကတော့ ဖေဖေ့ကိုပဲ တအံ့တသြ ငေးကြည့်နေမိ၏။ တိုက် ၁၃၊ အခန်း ၄ ဟာ မကောင်းဘူးလား။ တကယ်ပဲ ခိုက်တတ်သလား။

မောင်ကတော့ ဒါတွေကိုကြားပုံမရပါ။

“တော်သေးတယ်ဟေ့ နဂါးခံတွင်းထဲ မဝင်လို့ … နဂါးခေါင်းက တောင် လှည့်တယ်၊ ‘နတ်၊ ပြာ၊ တွဲ - တောင် … နတ်၊ ပြာ၊ တွဲ - တောင် … ’ အိမ်ဆောက်တာမဟုတ်ပေမယ့် အိမ်ပြောင်းတာလည်း ဒီလတွေ ကောင်းသားပဲ”

ဖေဖေက ပက်လက်ကုလားထိုင်မှထကာ စက္ကူဖြူဖြူကလေးပေါ်မှာ Soft Pen ဖြင့် ‘တိုက် ၁၂ - က၊ အခန်း ၃ - က’ လို့ ခပ်ထူထူကလေး ရေးကာ ကျွန်မကို လှမ်းပေးပါသည်။ ကျွန်မက နားမလည်နိုင်စွာ ဖေဖေ့ကို ငေးကြည့်နေမိ၏။

“ဆယ့်သုံး မဟုတ်ဘူး၊ ဆယ့်နှစ် ‘က’ ကြီးကွာ၊ လေး မဟုတ်ဘူး၊ သုံး ‘က’ ကြီး ကွာ။ ဘာဖြစ်သေးလဲ … သမီး စပြောင်းတဲ့နေ့ တံခါးဝမှာ အဲဒါလေးကပ်ထား။ ကြားလားသမီး … ”

ဖေဖေကတော့ ရုံးအမိန့်စာထဲက တိုက် ၁၃၊ အခန်း ၄ ကို သူ့သဘောနှင့်သူ ပြောင်းပစ်လိုက်သည်။ ကျွန်မကတော့ တိုက် ၁၃၊ အခန်း ၄ လို့ပဲ စွဲမှတ်နေမိသည်။

အဲသလိုပြောင်းလိုက်လို့ ရလို့လား။ မောင်ကတော့ ဘာမှ မပြောပါ၊ နောက်ဖေးဘက်က သူစိုက်ပျိုးခဲ့သော စားပင်ကလေးတွေကို နှမြောတသစွာ သွားငေးနေဟန်ရှိပါသည်။

“ဘာပဲဖြစ်ဖြစ်လေ၊ ရန်ကုန်လိုနေရာမှာ တိုက်ခန်းကျယ်ကျယ်ကလေး တစ်ခန်းရတာ သမီးတို့ ကံကောင်းတာပဲ။ ဥပါဒါန်ကလည်း ဥပဒ်ဖြစ်တတ်သတဲ့။ အစွဲတော့လည်း မထားနဲ့ပေါ့ကွယ်”

ကျွန်မ မောင့်နောက်ကို လိုက်သွားတော့ မောင်က ရွှေ့ပြောင်းလို့ရနိုင်သော သစ်ပင်ကလေးတွေကို လိုက်ပြသည်။ ကျွန်မ နှမြောတသအဖြစ်ရဆုံးမှာ အသီးတွေ သဲသဲမဲမဲသီးတတ်သော မာလကာသီးပင် နှစ်ပင်ကိုပဲ ဖြစ်သည်။

ကျွန်မ၏မျက်နှာရိပ်ကို ဖတ်တတ်သော မောင်က ကျွန်မရဲ့ပခုံးတွေကို အသာအယာ ဖျစ်ညှစ်ပါသည်။

“နှမြောလို့လား … တိုက် ၁၃၊ အခန်း ၄ ကျရင် ပြန်စိုက်တာပေါ့”

မောင်က သည်နံပါတ်တွေကို ကျွန်မ မုန်းတီးမှန်းသိ၍ နောက်ပြောင်လိုက်မှန်း သိသော်လည်း ကျွန်မ သိပ်မခံစားရပါ။ ကျွန်မအတွက် လက်ရှိအခြေအနေတွင် အလိုအပ်ဆုံးမှာ ပိုမိုကျယ်ပြော လွတ်လပ်သော နေရာတစ်ခုသာ ဖြစ်ပါသည်။ ကျပ်တည်းကျဉ်းမြောင်းသော သည်နေရာကလေးကို တစ်ခါတစ်ခါ သတိရသော်လည်း သည်နေရာကစွန့်ခွာဖို့ ကျွန်မ အကြိမ်ကြိမ် မျှော်လင့်ခဲ့ရသည် မဟုတ်လား။

‘ဒီမာလကာပင်လေးကို နှမြောတာတော့ အမှန်ပါပဲ၊ ဒါပေမဲ့ သူက ကျွန်မတို့စွန့်ခွာမယ့် နေရာမှာ ပေါက်နေတော့ ထားရစ်ခဲ့ရမှာပဲ မဟုတ်လား’ … မောင့်လက်တွေက ကျွန်မပခုံးကို ပိုမိုတင်းကျပ်စွာ ဖျစ်ညှစ်လိုက်မှန်း ကျွန်မ သိလိုက်ပါသည်။

* * *

(၄)

တိုက်ခန်းတွေက ဟောင်းမြင်းလှပြီ။ အဝေးကကြည့်လျှင် စီကာစဉ်ကာ လှပနေတတ်သော သည်တိုက်ခန်းတွေက အနီးကကြည့်လျှင် အတော်ပင် အကျည်းတန်နေတာကို ကျွန်မ ပထမဆုံး သတိထားမိပါသည်။

အောက်ထပ်နှစ်ခန်းက တစ်ဖက်သို့လှည့်၍ အပေါ်ထပ်နှစ်ခန်းက ဆန့်ကျင်ဘက်သို့ မျက်နှာမူထားသည်။ အတန်ငယ် မတ်စောက်သော လှေကားထစ်တွေကို တက်ရတိုင်း(နောင်တွင်) ကျွန်မ မောဟိုက်နေတတ်၏။

ပထမဆုံးအခက်အခဲမှာ သည်တိုက်ကလေးမှာနေလက်စ မိသားစုက ရုတ်တရက်ဖယ်မပေးခြင်းပင် ဖြစ်သည်။ အခြားမြို့တစ်မြို့သို့ ပြောင်းရွှေ့ရန် အမိန့်တစ်စုံတစ်ရာ ရထားပြီးဖြစ်ပါလျက် ရသလောက် တွယ်ကပ်နေသည့်သဘောမျိုး ဖြစ်သည်။ တစ်ပတ်ခန့်စောင့်သော်လည်း ပြောင်းရွှေ့ပေးမည့်အရိပ်အယောင် မပြ။ အဆိုးဆုံးမှာ ‘နေပါဦးလား။ တော်တော် ပြောင်းလာချင်ပြီလား၊ တိုက်နဲ့ သိပ်နေချင်တာပဲလား’ … ဆိုသည့် မအီမသာစကားတွေပင် ဖြစ်သည်။

ဒါပေမဲ့ ထူးဆန်းတာက အဲသည့်မိသားစု ပြောင်းရွှေ့သွားသည့်အခါ ဘယ်သူမှ မသိလိုက်ခြင်းပင် ဖြစ်သည်။ လမ်းမတန်းက ရုတ်တရက် မမြင်နိုင်သော ပြတင်းတံခါးတချို့ကို ဖြုတ်ယူသွားခဲ့သည်။ လျှပ်စစ်မီးခေါင်းနှင့် မီးခလုတ်တွေလည်း မရှိတော့။ ကြိုးစတန်းလန်းနှင့် သည်အတိုင်း ထားပစ်ခဲ့သည်။

မောင်က ဘုရားဆင်းတုတော်ကို ပင့်ဆောင်ရင်း ကျွန်မက ရေအိုးအသစ်ကလေးကို ချီ မ လာသည့်နေ့က ပထမဆုံး သတိထားမိတာ ပြတင်းတံခါးတချို့ မရှိတာဖြစ်သည်။ မောင်ကတော့ ရောက်ရောက်ချင်း အိမ်ရေဆေးဖို့လိုတယ်ဆိုကာ ရေချိုးခန်းထဲကိုဝင်တော့ ဘုံပိုင်ခေါင်း မရှိ။ ရေပိုက်အဆက် တော်တော်များများကို ဖြုတ်ယူသွားသည်။ ရေလာချိန်မဟုတ်သဖြင့် ရေတွေကျမနေလို့ တော်တော့သည်။

“ရေချိုးခန်းကို တော်တော် လုပ်ယူရမယ်ထင်တယ်၊ ရေပိုက်ကော၊ ပိုက်ခေါင်းကော မရှိတာ။ အဆိုးဆုံးက ဒီမှာ … ကြည့်စမ်း … ”

အိမ်သာကြွေခွက်နှင့် ကြမ်းခင်းတွေ ကွဲအက်နေခြင်း ဖြစ်သည်။ အညစ်အကြေးဆင်းရာ ကြွေပိုက်နေရာမှာလည်း သံတူရွင်းနှင့် ထိုးခွဲထားသလို ဖြစ်နေသေးသည်။ ရေအိမ်၏ခလုတ်တွေမှာ အဖုံးမရှိ။

မောင်ကတော့ ဘာမှမဖြစ်သလို ခံစားမှုမဲ့မျက်နှာဖြင့် ရှိသော်လည်း ကျွန်မ တော်တော် စိတ်ပျက်သွားမိပါသည်။

အဆိုးဆုံးမှာ တိုက်ခန်းကိုသုတ်ထားသော ဆေးရောင်တွေပဲ ဖြစ်သည်။ ပြာတောက်တောက် အရောင်တွေက သစ်လွင်တုန်းကလှပနေမည် မှန်သော်လည်း ယခုအခါ မွဲခြောက်ခြောက် အရောင်အသွေးဖြင့် ညစ်ထည်းထည်း ဖြစ်နေပြီ။ ကျွန်မကတော့ ဧည့်ခန်းရော၊ အိပ်ခန်းတွေကိုပါ အဖြုရောင် ပြောင်းပစ်လိုက်မည် စိတ်ကူးထားသည်။

“တိုက်ခန်းမျက်နှာစာက အနောက်ဘက်လှည့်နေတော့ ဘုရားစင်က တောင်ဘက်လှည့်မှ ကောင်းမယ် ထင်တယ်နော် … ”

ကျွန်မကတော့ မောင့်စကားတွေကိုပင် ကြားနိုင်စွမ်းမရှိတော့ပါ။ ပြတင်းဝမှာ သွားရပ်နေလိုက်သည်။ မောင်က ဘုရားစင်ကို အုတ်နံရံမှာမြှုပ်ဖို့ လက်သမားဆရာ ခေါ်ရမည်ဟု ပြောရင်းက အောက်ဆင်းသွားပါသည်။ ကျွန်မကတော့ တိုက်ရှေ့က သရက်ပင်အုပ်အုပ်ကလေးကို လည်းကောင်း၊ အုန်းပင်မြင့်မြင့်ကြီးကို လည်းကောင်း ငေးရင်း အဲသည့်နေရာလေးမှာပဲ အကြာကြီး ရပ်နေမိသည်။

“ညီမတို့က ဒီအခန်းကိုရသလား”

ကျွန်မ ဆတ်ခနဲ တုန်ယင်သွားမှန်း ကိုယ့်ကိုယ်ကိုယ် သိလိုက်ပါသည်။ အတန်ငယ် အသက်ကြီးရင့်နေပြီဖြစ်သော အမျိုးသမီးတစ်ဦးက ကျွန်မဘေးမှရပ်ရင်း ရုတ်တရက်မေးလိုက်ခြင်းကို ကျွန်မ လန့်ဖျပ်သွားခြင်း ဖြစ်သည်။

“သြော် … ဟုတ်ကဲ့ရှင့် … ”

“ကောင်းတယ် … ကောင်းတယ် … တို့ အိမ်နီးချင်းဖြစ်သွားပြီပေါ့။ ဒီမယ် … အခုရှုပ်မှ နောင်ရှင်း ပြောထားရဦးမယ်။ ဟောဒီ သရက်ပင် ငါးပင်မှာ ညီမတို့နဲ့ဆိုင်တာ နှစ်ပင်၊ ဟောဟိုးက သုံးပင်က အဒေါ်တို့အပင်တွေ”

“သြော် … ”

ကျွန်မက ကျွန်မပိုင်သည်ဆိုသော သရက်ပင်တွေကို ကြည့်လိုက်တော့ အသီးကင်းလေးတွေ တချို့ မြင်နေရပြီ၊ တချို့ ဖူးတုန်းပွင့်တုန်း၊ ဒါ ကျွန်မတို့ရဲ့အပင်တွေတဲ့။ အရင့်အရင် နေထိုင်ခဲ့သူတွေက အမြော်အမြင်ကြီးမားစွာ စိုက်ပျိုးခဲ့တဲ့ အပင်တွေပဲ။

“ဟောဒီတိုက်လှေကားနဲ့ တည့်တည့် မျဉ်းကြောင်းဆွဲပြီး နယ်ကန့်သတ်ထားတာ။ ဒီဘက်က အဒေါ်တို့၊ ဒီကွက်လပ်က ညီမတို့၊ ဟောဒီဘေးဘက်က အောက်ထပ်နဲ့ဆိုင်တယ်”

“သြော် … သြော် … ”

“လူတွေက ခက်ပါတယ်ကွယ်။ ညီမတို့မလာခင် နေသွားတဲ့သူတွေက သရက်ဖူးတွေကို ရိုက်ချသွားတယ်။ ညီမတို့ကလည်း မလာသေး၊ အဒေါ်တို့ကလည်း ပြောလို့မဖြစ်နဲ့။ အုန်းသီးနုနုကလေးတွေကို တက်ခုတ်သွားတာလည်း ရှိရဲ့။ လူတွေ ပြောပါတယ် … မကောင်းတာ”

“ကျွန်မတို့က ဒီအပင်တွေဟာ ကျွန်မတို့နဲ့ မဆိုင်ဘူးထင်နေတာ၊ ကိစ္စမရှိပါဘူး၊ ဒီအပင်တွေအတွက် ကျွန်မ ဘယ်လိုမှ မခံစားရပါဘူး”

“အိုကွယ် … မဟုတ်တာ … ကိုယ်နေတုန်း ကိုယ့်ဥစ္စာပေါ့။ ရှေ့လူက သက်သက်ဖျက်ဆီးသွားတာ၊ မစားရတဲ့အမဲ … လုပ်သွားတာ”

“ဟုတ်ပါရဲ့ … အခုလည်း မီးခေါင်းတွေရော၊ မီးခလုတ်တွေရော တစ်လုံးမှ အကောင်းမရှိဘူး ဒေါ်ဒေါ် … ပြတင်းတွေလည်း ဖြုတ်ယူသွားတယ်”

“အမှန်ကတော့ အခန်းအပ်ရင် သက်ဆိုင်ရာ တာဝန်ရှိတဲ့ လိုင်းမှူးတွေကို ပြန်အပ်ရတာပါပဲ။ ဒါပေမဲ့ သူတို့က တခြားမြို့တစ်မြို့ကို အပြီးပြောင်းသွားတာဆိုတော့ တဖြည်းဖြည်းဖြုတ်ပြီး ယူသွားတာ။ စနစ်တကျအပ်ခဲ့တာ မဟုတ်ဘူး။ အဒေါ်တို့လည်း တချို့ကိစ္စတွေ မြင်သားပဲ၊ မပြောသာဘူးလေ”

မောင်ပြန်လာတော့ မီးလုံးတွေ ပါလာသည်။ တန်းလျားခန်းက မီးချောင်းတွေ ဖြုတ်ယူလာခဲ့သည်။ မီးခလုတ်တွေ၊ မီးခေါင်းတွေ။

“မောင်တော့ မီးခလုတ်ကို အရောင်ကွဲသွားအောင် အဖြူကလေးတွေချည်း ဝယ်လာတယ်ဟေ့”

တစ်ဖက်ခန်းက အိမ်နီးချင်းနှင့် မောင့်ကို မိတ်ဆက်ပေးသည်။

“ကျွန်တော်တို့လည်း တဖြည်းဖြည်းပြုပြင်ရင်းနဲ့ နေသွားရမှာပဲ။ ရှေ့လူက ဖျက်ဆီးသွားလိုက်တာ တော်တော်ဆိုးတယ် အန်တီ … ”

“အင်းလေ … အခုပဲ အဲဒါကိုပြောနေကြတာ။ ပြီးတော့ ဒီအခန်းကလည်း မကောင်းဘူး။ အဒေါ်တို့က နေလာတာကြာပြီမဟုတ်လား … သိတယ် … ဒီအခန်းက ရာဇဝင်နဲ့ … ”

မောင်က ကျွန်မကို လှမ်းကြည့်ရင်းက ပြုံးသည်။
တစ်ဖက်ခန်းက အိမ်နီးချင်းဆိုသူကလည်း စကားအစကလေးတစ်စ ထားရစ်ကာ ပြန်သွားသော်လည်း ကျွန်မစိတ်ထဲမှာ တစ်နေ့လုံး နောက်ကျုနေသည်။

သည်အခန်းက ရာဇဝင်နဲ့ … သည်အခန်းက ရာဇဝင်နဲ့ …

ဘာရာဇဝင်တွေလဲ၊ ဘာမကောင်းတာလဲ။ ထိုနေ့က ပြတင်းဝမှာပဲ ကျွန်မ အကြာကြီး ရပ်နေဖြစ်သည်။ တစ်ခါတစ်ရံ တိုက်အောက်က ဖြတ်သန်းသွားသော မြို့ပတ်ရထားတွေကို ငေးရင်း၊ အဝေး ဘူတာရုံကလေးကို ရီဝေစွာ လှမ်းကြည့်ရင်း ကျွန်မ ဘယ်လောက်တွေးငေးနေသည် မသိ၊ မောင်လာခေါ်တော့ အပြင်မှာ အလင်းစတွေ လျော့ပါးသွားပြီ။

“ဒီအခန်းကလေးက ရာဇဝင်တွေနဲ့တဲ့ မောင် … ”

မောင်ကတော့ ခြောက်ကပ်ကပ် ရယ်သည်။ ကျွန်မရဲ့ နဖူးဆံစတွေကို သပ်တင်ရင်း …

“ကောင်းတာပေါ့ … ရာဇဝင်နဲ့ဆိုတာ ဒီအခန်းရဲ့ ဖြတ်သန်းမှုကို ပြတာပေါ့၊ ဒီအခန်းရဲ့ ရင့်ကျက်မှုပေါ့”

မောင်ကတော့ အရာရာကို ချေဖျက်နိုင်စွမ်းသည်။ အေးချမ်းတည်ကြည်သော မောင့်စိတ်သဘောတွေကို ကျွန်မ အားကျသော်လည်း ကျွန်မကိုယ်တိုင် မွေးမြူ၍ မရခဲ့ပါ။

ကျွန်မကတော့ တိုက် ၁၃၊ အခန်း ၄ ရဲ့ ရာဇဝင် ဆိုတာတွေကိုပဲ သိချင်နေမိတော့သည်။ ဤသို့ဖြင့် ကျွန်မတို့ တိုက်ခန်းကလေးကို တစ်စတစ်စ ဖြည့်ဆည်း တည်ဆောက်ယူခဲ့ရသည်။ နှစ်ကာလ ကြာလာသည်နှင့်အမျှ သီးပင်စားပင်တွေ ဝေဝေဆာဆာ ဖြစ်လာခဲ့ရပြန်ပြီ။

ကျွန်မက ခပ်လှမ်းလှမ်းက ဘူတာရုံကလေးကို လည်းကောင်း၊ မောင်က တစ်ဆန့်တစ်လျား ဝေးလံသော ကွင်းပြင်ကျယ်ကျယ်ကို လည်းကောင်း၊ မနီးမဝေးက စက်ရုံမီးခိုးခေါင်းတိုင်ကလေးကို လည်းကောင်း၊ ရထားလမ်းကို ကန့်လန့်ဖြတ်သွားသော မြေနီလမ်းပေါ်က မြင်းလှည်းခြူသံ လွင်လွင်ကလေးတွေနှင့် ဂေါက်ဂက်ဂေါက်ဂက်ဖြင့် မြင်းခွာသံဂီတကို လည်းကောင်း၊ ဆောင်းဝင်စ ရာသီတွေမှာ အပြိုင်းအရိုင်း ဖူးကြသော သရက်ပွင့်တွေကို လည်းကောင်း ကျွန်မတို့ ခံစားတတ်ာကပြီ။

* * *

(၅)

သည်တိုက်ခန်းကလေးမှာ ဖြစ်ခဲ့ဖူးသော ရာဇဝင်တွေကို ကျွန်မ သိခွင့်ရခဲ့သည်မှာ သိပ်မကြာလှသေးပါ။

ပထမဆုံးနေထိုင်ခဲ့သည့် ဂီတသမား လင်မယားအကြောင်းက စရလိမ့်မည်။ စောင်းသံ၊ စည်းသံ၊ ဝါးသံ၊ မဟာဂီတ သီဆိုသံတို့ဖြင့် ဝေစည်ခဲ့ဖူးသော ကာလတစ်ခုတုန်းကတော့ ချမ်းမြေ့ဆွတ်ပျံ့ဖွယ် ကောင်းနေမည်မှန်သော်လည်း ထို ဂီတသမား ဇနီးမောင်နှံ၏ ဇာတ်သိမ်းမှာ သူတို့ချင်း တစ်သက်တာထာဝရ လမ်းခွဲကြခြင်း ဖြစ်သတဲ့။ ဒုတိယမြောက် ရောက်လာသူကတော့ အရက်ကို လွန်စွာ ခုံမင်စွဲလမ်းသော လင်ယောက်ျားနှင့် အရက်ကို လွန်စွာမုန်းတီးသည့် မိန်းမတစ်ယောက်တို့၏ ပဋိပက္ခဇာတ်လမ်းမျိုးပင် ဖြစ်၏။

တတိယအကြိမ် နှစ်ပေါင်းများစွာ လာရောက်နေထိုင်သူတွေကတော့ ကရင်အမျိုးသား ဇနီးမောင်နှ့ဖြစ်သည်ဟု ဆိုသည်။ ခရစ်ယာန် ဘာသာဝင်များပီပီ အလွန်အေးငြိမ်းသော သူတို့ဇနီးမောင်နှံကလည်း သိပ်ကြာကြာ နေခွင့်မရခဲ့။ ပြင်းထန်သော မော်တော်ယာဉ်တိုက်မှု တစ်ခုမှာ ဇနီးဖြစ်သူ ပါသွားခဲ့သည်။ ဇနီးဖြစ်သူအတွက် ဆုတောင်းစည်းဝေးပင် မလုပ်ဘဲ ရုတ်တရက်ပြောင်းရွှေ့သွားသူ ကရင်အမျိုးသားမှာ ယနေ့အထိပင် မတွေ့ရတော့ ဟု ဆိုသည်။

ဤတိုက်ခန်းပေါ်သို့ လပေါင်းများစွာ လူသူလာရောက် နေထိုင်ခဲ့ခြင်း မရှိဘဲ ချောက်ချားဖွယ် ခြောက်သွေ့နေခဲ့ဖူးသည်။ လူသူမရှိသော သည်တိုက်ခန်းထဲက လမ်းလျှောက်သံ၊ စကားပြောသံ၊ ရေချိုးသံ၊ သနပ်ခါး သွေးသံ စသဖြင့် အသံမျိုးစုံကို ရက်တော်တော်ကြာကြာ ကြားနေရသည် ဟု ဆိုသည်။

သည့်နောက်မှာတော့ တခြိမ်းခြိမ်း ရန်ဖြစ်တတ်သော လင်မယား၊ စာရိတ္တပျက်ယွင်းဖောက်ပြန်သော လင်မယား၊ လူသူပတ်ဝန်းကျင်နှင့် အလိုက်တသင့်မရှိသည့် လင်မယား စသဖြင့် တိုက် ၁၃၊ အခန်း ၄ သည် ထာဝရညစ်ထည်းနေခဲ့သည် ဟု ပြောရလောက်အောင် တိုက်တိုက်ဆိုင်ဆိုင် ဖြစ်ပျက်ခဲ့ရသော ထိုအဖြစ်အပျက်များကို ကြားစက ကျွန်မ တော်တော်တုန်လှုပ်သွားခဲ့ရသည်။

နေထိုင်ခဲ့ဖူးသော ဇနီးမောင်နှံတွေရဲ့ အသေးစိတ်အကြောင်းအရာတွေက လွမ်းမောဆွတ်ပျံ့ဖွယ်၊ ချောက်ချားကြောက်ရွံ့ဖွယ်၊ ဂုဏ်ယူအားကျဖွယ်၊ စိတ်ပျက်တုန်လှုပ်ဖွယ်၊ ရယ်မောရွှင်ပျဖွယ် စသည့် ရသများနှင့် ပြည့်နှက်နေသဖြင့် မောင်ကပင် ‘တိုက် ၁၃၊ အခန်း ၄ ဆိုတဲ့ ဝတ္ထုရှည်ကြီး တစ်ပုဒ် ကြိုးစားရေးပါလား’ ဟု ပြောယူရသည်အထိ ဖြစ်သည်။ မည်သို့ပင်ဖြစ်စေ တိုက် ၁၃၊ အခန်း ၄ မှာ နေထိုင်ခဲ့သူတွေရဲ့ ဇာတ်သိမ်းကတော့ မကောင်းသည်ချည်း ဖြစ်နေတတ်တာကိုတော့ ကျွန်မ သတိထားမိပါသည်။

ဘာပဲဖြစ်ဖြစ် ရုပ်ဝတ္ထုအရရော၊ ဖြတ်သန်းမှုအရပါ မကောင်းခဲ့သော သည်ဖြစ်ရပ်တွေမှာ တိုက် ၁၃၊ အခန်း ၄ ဆိုသည့် ကိန်းဂဏန်းတွေက ဘယ်လောက်ထိ ပါဝင်ထိုးနှက်ခဲ့ပါသလဲ။ ကျွန်မကတော့ ထို ကိန်းဂဏန်းတွေကိုသာ ရွံရှာမုန်းတီးနေမိတော့၏။

တိုက် ၁၃၊ အခန်း ၄ မှာ ကျွန်မတို့ နေသားကျသွားခဲ့ပြီ။ ဤတိုက်ခန်းကလေး၏ ရာဇဝင်ဟောင်းတွေကို တစ်ခါတစ်ရံ သတိတရ ရှိတတ်သော်လည်း မေ့နေတာက များသည်။ ဖေဖေကတော့ တစ်ခါတစ်ရံ ရောက်လာတတ်၍ သူ့ Soft Pen ဖြင့် ရေးပေးသော နံပါတ်တွေကို မေးနေတတ်သေးသည်။ မောင် အသက် ၆၀ ပြည့်သည်အထိ နေခွင့်ရလျှင်တော့ ကျွန်မတို့ နောက်ထပ် သည်တိုက်ခန်းကလေးမှာ အနှစ်နှစ်ဆယ် ကျော်ကျော်နေရလိမ့်ဦးမည်။ မောင့်စိတ်ကြိုက် ပန်းနုရောင် ဖျော့ဖျော့ကလေး သုတ်ထားသော သည်တိုက်ခန်းကလေးမှာ ကျွန်မတို့ရဲ့ ရာဇဝင်ကကော ဘယ်လိုရှိလိမ့်မလဲ …

“တိုက်ခန်းဆေးသုတ်တာရော၊ သစ်ပင်ပန်းပင်တွေရော၊ မီးကြိုး၊ မီးခလုတ်၊ ရေဘုံပိုင်ခေါင်း၊ ပိုက်လုံး၊ ကြွေခွက် … အို … ဒါတွေအားလုံး တန်ဖိုးတွေက မနည်းဘူးနော် မောင် … နယ်ကိုပြောင်းရင်လည်း အကုန်ဖြုတ်ယူသွားရအောင်”

မောင်ကတော့ သံယောဇဉ်တွေ နှစ်မထားလိုက်ပါနဲ့ကွယ်။ တို့ရှေ့က လူတွေဟာ တို့ပြောင်းလာတုန်းက တော်တော်နဲ့ ဆင်းမပေးတာတို့၊ ဖျက်လိုဖျက်ဆီး လုပ်ခဲ့တာတို့၊ မချေမငံ ပြောခဲ့ဆိုခဲ့တာတို့ကို နွယ် သတိရနေတုန်းပဲလား။ မောင်ကတော့ စိတ်ကူးထားတယ်လေ။ ပင်စင်သွားရင် နေခွင့်ရမယ့် ခွင့် လေးလတောင် မနေတော့ဘူး လို့။ ချက်ချင်းဖယ်ပေးလိုက်မယ် လို့။ ပြီးတော့ ပစ္စည်းတွေလည်း သည်အတိုင်း ထားခဲ့မှာပါပဲ။ အရေးကြီးတာ ရာဇဝင်တွေနဲ့ တိုက် ၁၃၊ အခန်း ၄ ဟာ ထာဝရ အေးချမ်းငြိမ်သက်နေဖို့၊ လှပနေဖို့ပဲ မဟုတ်လား။ လူဆိုတာ ရွေးချယ်နေကြရတယ်။ ကိုယ်က ရွေးချယ်လို့ရတာ ရှိတယ် … ကံကြမ္မာကရွေးချယ်ပေးတာလည်း ရှိတယ် … တို့ကော ဘာကိုရွေးချယ်မလဲ … ”

ကျွန်မနဖူးပေါ် ကျရောက်လာသော မောင့်နှုတ်ခမ်းနွေးနွေးရဲ့ ရှိန်းမြမြအထိအတွေ့က ကျွန်မတစ်ကိုယ်လုံးကို ပိုမိုနွေးထွေးသွားစေခဲ့တာ အမှန်ပါပဲ။ ပြီးတော့ မောင်က ကျယ်ပြောလွတ်လပ်သော ကွင်းပြင်ကို ငေးနေလိုက်သေးတယ်။

(ရင်ခုန်ပွင့် မဂ္ဂဇင်း၊ အမှတ် ၆။ ၁၉၉၁ ခုနှစ် - ဒီဇင်ဘာလ)

* * * * *

 

 

credit to mmcyber