အမေနှင့် ဓာတ်ပုံများ
(၁)
ဧရာဝတီမြစ်ထဲက လှမ်းကြည့်လျှင်ပင် မတ်စောက်မြင့်မားသော မြစ်ကမ်းပါးတွေကို တွေ့နေရလေသည်။ ရွှေညိုရောင် မြစ်ကမ်းပါးသည် ဧရာဝတီကို မြင့်မားသောအရပ်မှ ငုံ့ကြည့်နေသည်။ စိမ်းကြည်သော ဧရာဝတီရေဦးသည် မြစ်ကမ်းပါးဆီသို့ ဦးတည်တိုးဝင်၍ ကွေ့ကာတိမ်းကာ အဝေးဆီသို့ ဆက်လက်စီးဝင်သည်။ မြစ်ကမ်းပါး၏ သက်ရင့်ကျောက် မြေလွှာသည် အထစ်ထစ် အရစ်ရစ်ထကာ လွှသွားတွေပါသော မုန့်လှီးဓားဖြင့် ပျော့တွဲနေသော မုန့်တုံးကို လှီးဖြတ်ထားသလို ခုံးခုံးရုံးရုံး လှပနေသည်။ မြစ်ရေသည် ကမ်းပါးယံအောက်ခြေကို ထိစပ်နေခြင်းမရှိ။ မြစ်ကမ်းနှင့် ကမ်းပါးအောက်ခြေကြားမှာ လူသွားစရာ သဲကြမ်းလမ်းကလေးရှိသည်။ သည်လမ်းက မြစ်နားတန်းရွာကလေးတွေဆီ သွားလို့ရသည်။ သံကိုင်းဘက်မှ ခုတ်မောင်းလာသော မော်တော်သည် မြစ်ကွေ့ကျောက်ကမ်းပါးမြင့်မြင့်ကို တွေ့ရလျှင်ပင် ရေနံချောင်း ရောက်တော့မည်ကို သိနိုင်သည်။ သို့မဟုတ် ညောင်လှဆိပ်ကမ်း ရောက်တော့မည်ကို သိနိုင်သည်။ ကမ်းပါးမြင့်မြင့်ကြီးတွေနှင့် ယှဉ်ကာ မော်တော်သည် စက်ရှိန်သတ်ရင်း ဝင်လာတတ်သည့်အခါတိုင်း အမေ့မွေးရပ်မြေနှင့် စပ်လျဉ်း၍ ခံစားမှုသည် တိုးထိလာရမြဲ။ ရေစပ်စပ် သဲပြင်ပေါ်သို့ ထိုးချထားသော ကုန်းပေါင်ကတစ်ဆင့် ညောင်လှဆိပ်ကမ်းကို ခြေချမိသည့်အခါတိုင်း သည်ဒေသ သည်ပတ်ဝန်းကျင်၏ ရနံ့တွေက တိုးဝင်လာတတ်သည်သာ။ ညောင်လှဆိပ်ကမ်းမှာ ရေနံချောင်းမြို့တွင်းသို့ သွားဖို့ မြင်းလှည်းတွေ ရှိသည်။ မော်တော်ကားတွေ ရှိသည်။
ညောင်လှမှ ရေနံချောင်းသို့ သွားရာလမ်းသည် တောင်ကုန်း၊ ချိုင့်ဝှမ်း၊ ရေနံစင်၊ ရွှေရောင်မြက်ခင်းများ၊ နီညိုရောင် ကျောက်စရစ်မြေ၊ အဝေးမှ ရေနံမျှော်စင်များ၊ ငွေရောင်သံကန်များ၊ ဝါးကပ်မိုးအိမ်ကလေးများဖြင့် လှပနေတတ်သည်။ ကျွန်တော်က ဈေးသက်သာသော မော်တော်ကားကို စီးလေ့မရှိ။ ခရီးသည်တွေ၊ ကုန်တွေ ညပ်သပ်နေတတ်ကာ ဘာမှခံစားလို့မရ။ တစ်ခါတလေမှ ရောက်ရသော သည်ရေ သည်မြေ၏ အလှတွေကို အနည်းငယ် လျော့ပါးသက်သာသော ငွေကြေးဖြင့် မလဲချင်။ မြင်းလှည်းကို တစ်ယောက်တည်းငှားကာ သွားလေ့ရှိသည်။ အဆင်းတွေမှာ တရွေ့ရွေ့ ထိန်းဆင်းရသော၊ အတက်တွေမှာတော့ တမော့မော့ ရုန်းတက်ရသော သည်ဒေသ၏ ပထဝီဝင်ကို အပြည့်အဝ ခံစားချင်လို့ ဖြစ်သည်။ ကားလမ်းနှင့် ယှဉ်ကာ ဧရာဝတီသည် တစ်ခါတစ်ခါ ဖွေးခနဲ ပေါ်လာတတ်သည်။ အဆင်းကွေ့တွေမှာ မြင်းလှည်း (မြင်းရထားဟု ခေါ်ကြပါသည်။) ဘီးထဲကို မြင်းရိုက်ကြိမ် ကလန့်သံ တောက် … တောက် … တောက် … တောက်သည် သည်ဒေသ၏ ဂီတဖြစ်သည်။
အမေ့ကို သည်ဒေသမှာ မွေးသည်။ နှစ်ပေါင်းများစွာ သည်ဒေသမှာ နေထိုင်ခဲ့သည်။ အမေက သူမ၏ ငယ်ဘဝတွေကို ပြန်ပြောတိုင်း သည်ဒေသ၏ ရေ၊ မြေ၊ လေ၊ အိမ်ခြေတွေအကြောင်း ပါတတ်သည်သာ။ ဧရာဝတီ၊ ဘီအိုစီ အလုပ်သမားတန်းလျား၊ ရေနံစင်နှင့် ပိုက်လိုင်းများ၊ ထနောင်းနှင့် တမာတန်းတွေအကြောင်း ပြော၍မဝနိုင်။ တစ်နှစ်မှတစ်ခါ၊ နှစ်နှစ်မှတစ်ခါ ကျဲကျဲပါးပါး ရောက်ဖြစ်သော သည်နေရာကို မြင်းလှည်းဖြင့် ဖြတ်သန်းရတိုင်း အမေ့ကို သတိရပါသည်။ အမေ့ကို သတိရတိုင်း အမေပြခဲ့ဖူးသော ဓာတ်ပုံများကိုလည်း သတိရပါသည်။ အထူးသဖြင့်မူ … ။
* * *
(၂)
အမေ့အကြောင်းက သိပ်များများစားစား (ထူးထူးခြားခြား) ပြောစရာ မရှိလှပါ။ အမေသည် သာမန်ဆင်းရဲသော မိသားစုတစ်ခုထဲမှ မွေးဖွားလာသူသာ ဖြစ်သည်။ အနေသည် သစ်တောအုပ်ထဲက သာမန် သစ်ရွက်တစ်ရွက်သာ ဖြစ်ပါသည်။ သစ်ရွက်တစ်ရွက်ဆိုပေမယ့် အညာနွေထဲမှာ ရဲရဲပီပီရှိတတ်သော ‘ထနောင်းရွက်’ ကလေးနှင့် နှိုင်းရမည်ထင်သည်။ အမေ့ကို ညောင်လှမှာ မွေးသည်။ နောက်တော့ နှစ်ပေါင်းများစွာ ကြာသောအခါ အဖေ့အလုပ်ရှိရာ ရန်ကုန်ကို ပြောင်းလာရသည်။ အမေ့ဘဝခရီးက ဒါပဲဖြစ်သည်။ အမေသည် စကားသိပ်ပြောလှသူ မဟုတ်။ အဖေနှင့်ကမူ လုံးဝပြောင်းပြန် အချိုးကျသည်။ အမေ၏ ညိုညက်သော အသားအရေ၊ ဝိုင်းစက်ပြူးကျယ်သော မျက်လုံးတစ်စုံ၊ သနားကြင်နာတတ်သော စိတ်ဓာတ်နှင့် မျက်ရည်လွယ်ခြင်းများကို အမေ့အမွေအဖြစ် ကျွန်တော် ရရှိပါသည်။ ကျွန်တော်အပါအဝင် မောင်နှမငါးယောက်ထဲမှာ အမေ ကျွန်တော့်ကို အချစ်ဆုံးဖြစ်သည် (ဟု ထင်ပါသည်) အစ်ကို၊ အစ်မတွေ အသိုက်ခွဲသွားကြပြီ။
“မင်းအမေနဲ့ ပေါင်းရသင်းရတာ ဟန်မကျပါဘူးကွာ၊ စကားက တယ်နည်းတာပဲ ကပ်စေးနှဲလိုက်တာလည်း လွန်ရော၊ မင်းအမေသေရင် ဥစ္စာစောင့်ဖြစ်မှာကွ၊ လည်ပင်းမှာ သော့ကြီး ဆွဲဆွဲထားတာ ကြည့်ပါလား”
အဖေ မကြာခဏ ပြောတတ်သည်။ အမေ့အင်္ကျီ ရင်ဘတ်တွင် တိုက်ချိတ်အကြီးကြီး တစ်ချောင်းနှင့် တွယ်ချိတ်ထားတတ်သော ‘သော့’ တစ်ချောင်းကို ရည်ညွှန်း၍ အဖေက စတတ်ခြင်းဖြစ်သည်။ ကျွန်တော် မှတ်မိသည့် အရွယ်ကတည်းက အမေ့ရင်ဘတ်ကသော့ တစ်နေ့ တစ်ရက်မှ ဖြုတ်ထားတာ မတွေ့ရဘူးချေ။ အဖေက သုံးသလောက် ဖြုန်းသလောက် အမေက နှမြောတတ်သည်။ အဖေငယ်ငယ်က ဖဲရိုက်သည်။ အရက်ကလေးဘာလေးလည်း သောက်ချင်သည်။ အမေ အမှတ်တရပြောပြသော အဖြစ်အပျက်တစ်ခုကို ကျွန်တော် သတိရနေတတ်သည်။ ထိုနေ့က အဖေ ဖဲရှုံးလာသည်။ အရက်တွေလည်း မူးလာသည်။ အမေဆွဲထားသော ဆွဲကြိုးနှင့် လက်ကောက်ကို တောင်းသည်။ အမေက မပေး။ မပေးတော့ အဖေက ရိုက်သည်။ ဆွဲကြိုးနှင့် လက်ကောက်မပေးတော့ အမေ့သေတ္တာကို ရန်ရှာလာသည်။ အမေ့ရင်ဘတ်က ချိတ်ဖြင့် တွယ်ထားသော သော့ကို ထိချင်လာသည်။ အမေက သူ့သော့ကို အထိမခံ။ ဆွဲကြိုးကို ချွတ်မနေတော့ဘဲ ဆွဲဖြတ်လိုက်သည်။ လက်ကောက်ကို ချွတ်သည်။ အဖေ့လက်ထဲကို ထည့်ပေးလိုက်သည်။ ထိုအခါကျမှ အဖေ ငြိမ်သက်သွားသည်။ နှမြောတွန့်တိုတတ်သော အမေက ရွှေတွေကို ရက်ရက်ရောရော ပေးတော့ အဖေကပင် အံ့သြသွားသည်။ ထိုနေ့က အဖေ ရွှေတွေ ဖဲရှုံးပစ်သည်။ အဖေ ထွက်သွားတော့မှ အမေငိုသည် … တဲ့။
“အမေက ရွှေတွေဘာဖြစ်လို့ ပေးလိုက်တာလဲဗျ”
ထိုစဉ်က ကျွန်တော့ကို မမွေးသေးသော်လည်း အမေပြောပြတော့ ကျွန်တော်က နှမြောတသစွာ အမေ့ကို အပြစ်တင်နေခြင်းဖြစ်သည်။
“အဲဒါတွေက သူရှာထားတဲ့ ပစ္စည်းတွေပဲဟာ၊ သူ ယူသွားခွင့်ရှိတာပဲ”
“နောက်လည်း အဲသလိုလုပ်တာပဲလား အမေ”
“ဟင့်အင်း … နင့်အဖေ အဲဒီတစ်ခါပဲ လုပ်တာပါ၊ စိတ်ထိခိုက်သွားသလား မသိပါဘူးဟယ်၊ နောက်တော့ ဖဲမရိုက်တော့ပါဘူး”
အမေက ကျွန်တော့်ကို ‘နင်’ ဟု သုံးတတ်ပါသည်။ အမေက စိတ်ကူးရသည့်အခါ ငယ်ဘဝတွေကို ပြောပြတတ်သည်။ အဖေကတော့ အမေ့ကို စိတ်လိုလက်ရ စတတ်သည်။ ထိုအခါမျိုးတွင် အမေက ပြုံးသည်ဆိုရုံကလေး ပြုံးကာ အဖေ့ကို ငေးကြည့်နေတတ်သည်။ ဤသို့ဖြင့် အဖေနှင့် အမေတို့ ချစ်ခရီးသည် နှစ်ပေါင်းများစွာ တင်းရစ်ခိုင်မြဲခဲ့သည်။
“မင်းအမေက ညောင်လှသူကွ၊ ညောင်လှဘီအိုစီမှာ မွေးတာ၊ အဖေက ရေနံတွင်း တစ်တွင်းမှာ စက်ဆရာပေါ့၊ ညနေဘက် အလုပ်အားတဲ့ အချိန်ကလေးဆို အဖေက ညောင်လှကို စက်ဘီးကလေးနဲ့ လာရတာ၊ မင်းအမေတို့နေတဲ့ ညောင်လှဘီအိုစီတန်းလျားက မြို့နဲ့ တော်တော်လှမ်းသား၊ အဖေကသာ ပိုးရတာပါကွာ၊ မင်းအမေက ဘဝင်က ခပ်မြင့်မြင့်ရယ်”
“အဖေက မယ်ဒလင်လေးနဲ့ သွားသွားကြူရတာ၊ ဟိုသီချင်းဟာကွာ … ဘာတဲ့ ‘ဂုဏ်မြင့်သူဟာ တကယ်မေတ္တာစစ်နဲ့၊ ချစ်ရဲ့သားနဲ့၊ ငြင်းပယ်တော်မူ အားတယ်၊ အဟုတ်မေတ္တာစစ်နဲ့ ချစ်ရဲ့သားနဲ့ ငြင်းပယ်တော်မူအားတယ်၊ အထင်တော်လွဲလို့ရယ် ချစ်တဲ့သူရယ် မခွဲနိုင်ရှာရက်တယ်’ အဲဒီသီချင်းကို ဘီအိုစီညောင်ပင်အောက်ကနေ ဆိုတာ၊ မင်းအမေက လှည့်တောင်မကြည့်ဘူးကွ”
အဖေက အသံနေအသံထားတွေနဲ့ ဆိုပြတော့ အမေက မျက်လုံးတွေ မှေးစင်းနေအောင် ရယ်မောနေတတ်သည်။ အမေက မာနကြီးကြောင်း၊ နောင်တော့ အဖေ့ကို ရိုးသားမှန်းသိ၍ လူကြီးတွေက ပေးစားခဲ့ကြောင်း၊ အမေက မိဘစကားကို နားထောင်ကာ အဖေနှင့် လက်ထပ်ခဲ့ကြောင်းများကို အဖေက စီကာစဉ်ကာ ပြောတတ်သည်။
အခုတော့ အမေလည်း ခုနစ်ဆယ်ကျော်ပြီ။ အဖေက အမေ့ထက် နှစ်နှစ်ကြီးသည်။ သားသမီးတွေက အိမ်ခွဲသွားကြပြီ။ အငယ်ဆုံးဖြစ်သော ကျွန်တော်သာ အိမ်မှာကျန်ရစ်နေသည်။ နှစ်ပေါင်းများစွာ ကြာမြင့်သော်လည်း မပြောင်းလဲတာ တစ်ခုရှိသည်။ အမေ့ရင်ဘတ်မှာ တိုက်ချိတ်ကြီးနှင့် တွယ်ချိတ်ထားသော သော့တစ်ချောင်း။
* * *
(၃)
ထိုနေ့က အိမ်မှာ အမေနှင့် ကျွန်တော် နှစ်ယောက်ပဲရှိသည်။ ပြီးတော့ ထိုနေ့က မှတ်မှတ်ရရ အိမ်ရှေ့က ပိတောက်ပင်တွေ ပိတောက်တွေ ပွင့်နေသည်။ မိုး၏ ရှေ့ပြေးရနံ့တချို့ ဝေ့ဝဲနေသော နွေနှောင်း၏ ရက်တစ်ရက် ဖြစ်လေသည်။ အမေက ပြတင်းဝက ပိတောက်ရှုခင်းတွေကို ကြည့်နေသည်။ ပြီးတော့မှ တစ်ခါမှ မဆိုဘူးသည့် စကားတွေကို အမေဆိုသည်။
“ဂျပန်တွေကို တော်လှန်တာ နှစ်ပေါင်း ဘယ်လောက်ကြာပြီလဲ သား”
“နှစ်ပေါင်း လေးဆယ်ကျော်ပြီ အမေ”
“နှစ်ပေါင်း လေးဆယ်တောင် ကျော်သွားပြီလား”
ထို့နောက် အမေ စကားပြတ်သွားသည်။ အမေက သူ့အခန်းထဲကို ဝင်သွားသည်။ ပြီးတော့ ရင်ဘတ်ကသော့ကိုဖြုတ်ကာ အမေ အပျိုဘဝကတည်းက ပါလာသော သံမဏိ သေတ္တာကြီးကို ဖွင့်သည်။ အဝတ်အစားတွေအောက်က ကျောက်ကာသေတ္တာ အနက်ကလေးတစ်လုံး ထုတ်သည်။ ကျောက်ကာသေတ္တာကလေးကို ဖွင့်လိုက်တော့ အထဲမှာ ငွေဖလားလေးတွေ၊ ငွေကွမ်းဘူး၊ ငွေထုံးဘူးကလေးတွေ၊ နောက် အမေငယ်ငယ်တုန်းက ဇာပန်းထိုးသည့် ဇာထိုးအပ်တွေ၊ ပန်းထိုးအပ်တွေလည်း ပါသည်။ ရောင်စုံချည်လုံးကလေးတွေ ငွေဒင်္ဂါးကလေးတွေ၊ ကြေးနီပြားညိုညိုကလေးတွေ၊ နောက် ဂျပန်ငွေစက္ကူတချို့။
သည်ကျောက်ကာ သေတ္တာအနက်ကလေးကို ကျွန်တော် တစ်ခါမှ မမြင်ဘူးချေ။ အဖေပင် မြင်ဖူးလိမ့်မည် မထင်။ သေတ္တာကလေးက အလျား ရှစ်လက်မ၊ အနံ ငါးလက်မလောက် ရှိသည်။ သေတ္တာထဲက ပစ္စည်းကလေးတွေကို အမေ တယုတယထုတ်သည်။ သေတ္တာကလေးထဲမှာ ခင်းထားသော စက္ကူကလေးကို ဖယ်လိုက်တော့ ဓာတ်ပုံဟောင်းကလေး သုံးပုံ ထွက်လာသည်။ အမေက တစ်ပုံ အရင်ပြသည်။ အမျိုးသမီးတစ်ယောက်၏ပုံ ဖြစ်သည်။ ဆယ်နှစ်အရွယ် မိန်းကလေးတစ်ယောက်နှင့် ယှဉ်ကာ မတ်တတ်ရပ်နေသည်။ နောက်မှာ တန်းလျားခန်းတွေ။
“ရပ်နေတာ နင့်အဘွားပေါ့၊ အမေ့အမေက ဒေါ်သော့တဲ့၊ အသား ဖြူဖြူကလေးနဲ့ သိပ်လှတာ သားရဲ့”
“ရပ်နေတဲ့ကောင်မလေးက ဘယ်သူလဲ”
“အဲဒါ အမေလေ၊ အမေ ကိုးနှစ်သမီးတုန်းက အမေ့အမေနဲ့ ရိုက်ထားတာ”
ဓာတ်ပုံထဲက သားအမိနှစ်ယောက်လုံး ဓာတ်ပုံအရိုက်ခံနေသည်နှင့် မတူ။ ကင်မရာကို အထူးအဆန်းလို ကြည့်နေကြပုံမျိုး ဖြစ်သည်။
“နောက်ကတန်းလျားက ညောင်လှက အမေတို့နေခဲ့တဲ့ ဘီအိုစီတန်းလျား၊ အမေ ငယ်ငယ်ကတည်းက နေခဲ့တာ”
အမေက နောက်တစ်ပုံ လှမ်းပေးသည်။ မိန်းမပျိုတစ်ယောက် ဖြစ်သည်။ ဆံတောက်သိမ်းစ လှပသော မိန်းမပျိုတစ်ယောက် ဖြစ်သည်။ မေးစေ့ကို လက်ထောက်ထားသည်။ အင်္ကျီလက်တွေက ပွယောင်းယောင်း။ နောက်ခံပန်းချီကားက ဧည့်ခန်းတစ်ခန်း၏ပုံ ဖြစ်သည်။ မိန်းမပျိုက ပြုံးနေသော်လည်း အသက်မပါလှချေ။
“အဲဒါ အမေ့သူငယ်ချင်း မြစိန်၊ အမေ့ရဲ့ အချစ်ဆုံးသူငယ်ချင်း၊ ရန်လည်းအဖြစ်ဆုံး သူငယ်ချင်းပေါ့၊ အမေ့အနွံအတာလည်း သိပ်ခံရှာတယ်၊ ဒီဓာတ်ပုံက အမေနဲ့သူ တစ်နေ့တည်းရိုက်တာ၊ ရေနံချောင်းကို သွားရိုက်တာလေ၊ အဖေ မသိအောင်ရိုက်တာ၊ အပြန်မိုးချုပ်လို့ အဖေ့အရိုက် ခံရသေးတယ်”
အမေက စိတ်ပါလက်ပါ ပြောနေခြင်းဖြစ်သည်။ ဝမ်းပန်းတသာ ရှိနေပုံလည်းရသည်။ တစ်ဆက်တည်းမှာပင် ဝမ်းပန်းတနည်း ရှိနေပုံလည်း ရသည်။ အခန်းတွင်းမှာ ပိတောက်ရနံ့တွေ ရှိနေသည်။ လေသည် မိုးငွေ့တွေကို သယ်ဆောင်စပြုလာပြီ။
“ဟောဒီပုံကိုကြည့်စမ်း သား”
အမျိုးသားတစ်ယောက်ပုံ ဖြစ်သည်။ ဓာတ်ပုံအနားတွေ ဖွာလန်နေသည်။ ဓာတ်ပုံထောင့်မှာ ဆေးသားတွေ ကွာကျနေပြီ။
ချောမောသည်ဟု မဆိုသာသော်လည်း ညိုလဲ့သော မျက်ဝန်းနှင့် နှုတ်ခမ်းများက ပြတ်သားကြည်လင်ဟန် ရှိသည်။
“ဒါက ဘယ်သူလဲ အမေ”
“နောက်ဘက်မှာကြည့်”
ဓာတ်ပုံနောက်မှာ စာတန်းကလေးတစ်ကြောင်း။ မင်ရောင်က နှစ်ပေါင်းများစွာကို ဖြတ်သန်းခဲ့သည့် မင်ရောင်။
‘အသက်နှင့် ထပ်တူထပ်မျှ ချစ်ရပါသော မြသို့’
၁၃၊ ၃၊ ၁၉၄၅
ကျွန်တော် အမေ့မျက်နှာကို နားမလည်နိုင်သလို ကြည့်နေမိသည်။ အမေက ပြုံးသည်ဆိုရုံကလေး ပြုံးနေသည်။
“အဲဒါ အမေ့ငယ်ရည်းစားပေါ့၊ ကိုဘအေး တဲ့၊ ဂျပန်တော်လှန်ရေးထဲကို ပါသွားတာ၊ ပြန်မလာတော့ဘူး”
“ဘယ်လိုပြန်မလာတာလဲ အမေ”
“သူတို့ သူငယ်ချင်းသုံးယောက် ထွက်သွားကြတာပဲ၊ ကိုဘအေး ရယ်၊ ကိုကံမောင် ရယ်၊ ကိုပိုက်တင် ရယ်၊ ကိုပိုက်တင်ကတော့ စစ်ကြီးပြီးတော့ ရန်ကုန်ရောက်သွားတယ် ဆိုလား၊ ကိုကံမောင်ကတော့ ရွာကို ပြန်ရောက်လာတယ်၊ ဒါပေမယ့် ဦးနှောက်ပျက်စီးပြီး ရောက်လာတာ၊ ဘာမှ မပြောနိုင်တော့ဘူး၊ ကိုဘအေးကတော့ သရက်မှာ ဆိုလား၊ ပျဉ်းမနား ဆိုလား ကျဆုံးသွားတယ်တဲ့”
“ဒီဓာတ်ပုံက အမေ့ကို သူ မသွားခင်က ပေးခဲ့တာလား”
“အေး … ဟုတ်တယ်၊ သူ မသွားခင်က ကြိုပေးခဲ့တာ၊ အခုန အမေ့သူငယ်ချင်း မြစိန်နဲ့အတူသွားရိုက်တဲ့ အမေ့ဓာတ်ပုံကိုလည်း သူ ယူသွားတယ်၊ တော်လှန်ရေးက သူ ပြန်မလာတော့ဘူးဆိုရင် သူ့ဓာတ်ပုံကို တစ်သက်လုံး သိမ်းထားလိုက်ပါတော့တဲ့၊ အမေ့ဓာတ်ပုံကတော့ စစ်မြေပြင်မှာပဲ ကျနေခဲ့ပြီ တူပါရဲ့”
“ထွက်သွားတဲ့နေ့က အမေနဲ့မတွေ့ဘူးလား”
“တွေ့တာပေါ့၊ မြစိန်ပဲ အမေ့ကို လာခေါ်တာ၊ ညောင်လှမြစ်ဆိပ်က ကမ်းပါးထိပ်ကို အမေရောက်သွားတော့ သူတို့သုံးယောက်ပါတဲ့ လှေကလေးက မြစ်ဆိပ်ကနေ ထွက်နေပြီ၊ လှေပေါင်းမိုးထဲက လက်ပြသွားရှာတယ်၊ အမေက ကမ်းပါးထိပ်က သူတို့လှေကလေး အဝေးမှာ ပျောက်သွားတဲ့အထိ အမေ ကမ်းပါးထိပ်မှာ ရပ်နေမိတယ်၊ အဲဒါ နောက်ဆုံး မြင်လိုက်ရတာပါပဲ”
“ဒီဓာတ်ပုံကို အဖေက ဘာပြောလဲဟင်”
“ဟင့်အင်း … ဒီဓာတ်ပုံအကြောင်း နင့်အဖေ မသိဘူး၊ အမေ တစ်ခါမှ မပြခဲ့ဘူး”
အမေက ကျောက်ကာသေတ္တာလေးထဲကို ပစ္စည်းတွေ ပြန်ထည့်သည်။ ဓာတ်ပုံဟောင်းကလေးတွေကို တယုတယ ပြန်ထည့်သည်။
ပိတောက်ရနံ့သည် လေထဲတွင် ဝေ့ဝဲနေသည်။
* * *
(၄)
အမေဆုံးသွားတာ ကြာခဲ့ပြီ။ မိုးရက်တစ်ရက်မှာ ဆုံးခဲ့ခြင်းဖြစ်သည်။ နှစ်လည်ရက် တစ်ရက်မှာတော့ အမေ့ကို ရည်စူး၍ ဆွမ်းကျွေးချင်သည်ဟု အဖေပြောသည်။ ရပ်ဝေးက သားသမီးတွေကိုလည်း မှာသည်။ အမေ ကျန်ရစ်ခဲ့သော ထဘီအင်္ကျီ တချို့ကိုလည်း နွမ်းပါးသူတွေကို ပေး ပေးဖို့ အဖေ စီစဉ်သည်။ ထိုနေ့က အမေ့သေတ္တာကို နှစ်ပေါင်း လေးဆယ်လောက်အတွင်း ပထမဆုံးအကြိမ် အဖေဖွင့်သည်။ ဤသို့ဖြင့် နောက်ဆုံးတော့ အမေ့ ကျောက်ကာသ္တောကလေးကိုလည်း ဖွင့်ဖြစ်သွားကာ ဓာတ်ပုံဟောင်းတွေကို အဖေ တွေ့သွားခဲ့သည်။
ကျွန်တော်က အဖေ့ကို အကဲခတ်နေမိသည်။ အဖေက ဓာတ်ပုံတွေကို တစ်ပုံချင်းကြည့်သည်။ ဓာတ်ပုံနောက်က စာကိုဖတ်သည်။ နောက်တော့ ပြုံးလေသည်။
“ဒါ ဘယ်သူလဲကွ”
“အမေ့ ငယ်ရည်းစားလို့ ပြောတာပဲ”
“ဟေ … မင်း ဘယ်သူပြောလဲ”
“အမေ ပြောခဲ့ဖူးတာပဲ”
အဖေက ဘာမှမပြောတော့ဘဲ ဓာတ်ပုံကလေးတွေကို ကျောက်ကာသေတ္တာထဲသို့ ပြန်ထည့်သည်။ ပြီးတော့ သေတ္တာထဲ ပြန်ထည့်သည်။ အတော်ကြီးကြာမှ စကားစပြောသည်။
“မင်းကွာ သိရက်သားနဲ့၊ မင်းအမေ မြေချတဲ့နေ့က ပြောဖို့ကောင်းတယ်”
“ဘာကိုလဲ အဖေ”
“သြော် … ဓာတ်ပုံတွေလေကွာ၊ မင်းအမေ မြေမြှုပ်တဲ့နေ့က သည်ဓာတ်ပုံကလေးတွေ သူနဲ့အတူ ထည့်ပေးလိုက်ရင် သူ သိပ်ဝမ်းသာရှာမှာ”
အဖေက အလေးအနက် ပြောနေခြင်းဖြစ်သည်။ အပြင်ဘက်မှာတော့ မိုးတွေညိုရီနေသည်။ ကျွန်တော်က အမေ့ရင်ဘတ်က သော့ကလေး၊ စစ်မြေပြင်မှာ ကျန်ရစ်ခဲ့သော အမေ့ရဲ့ဓာတ်ပုံကလေး၊ ပြီးတော့ မျက်ရည်လွယ်တတ်သော အမေ့မျက်ဝန်းများကို လွမ်းနေမိလေသည်။
(အိပ်မက်ဖူး၊ ၁၉၉၀ ခု၊ ဇန်နဝါရီလ၊ အမှတ်-၇)
* * * * *
ဗုဒ္ဓဟူးသမီး
(၁)
မလုံးတင် ကားကြီးဂိတ်ကိုရောက်တော့ နေတော်တော်မြင့်နေပြီ။ ခါတိုင်းတော့ သည့်ထက်စောတယ်။ သူ့အလုပ်ကလည်း တကယ်တော့ နောက်ကျလို့ မကောင်းဘူး။ ကနေ့တော့ ဘာရယ်မဟုတ်ဘူး။ ဟိုဟာလေးလုပ် ဒီဟာလေးလုပ်ရင်းနဲ့ကို နောက်ကျသွားတာ။ ပြီးတော့ သူ့အိမ်လေးရှိတဲ့ မြို့သစ်ကနေ အဲဒီကားကြီးဂိတ်ကို သွားဖို့က ဘတ်စ်ကား တစ်ထောက်စီးရသေးတာ။ အဲဒီဘတ်စ်ကားကလည်း လိပ်ကမှမြန်ဦးမယ်။ လူဆိုတာကလည်း အမြဲတမ်း ကျပ်ညပ်နေတတ်တယ်။ ဟိုနားထောက် ဒီနားထောက်ကလည်း တစ်မျိုး၊ မှတ်တိုင်ရယ်လို့တောင် မဟုတ်တော့ဘူး။ လမ်းမှာ တားသမျှ ရပ်ပေးတောကလည်း လူပေါက်စေ့။ တစ်ခါတလေများ လူသာ ဆင်းပြေးလိုက်ချင်သေးတယ်ဆိုတဲ့ ကားမျိုး။ အဲဒီမနက်က ရှစ်နာရီမခွဲတခွဲလောက်မှ ကားကြီးဂိတ်ကိုရောက်တယ်။ မလုံးတင် ရင်တွေ တအားခုန်နေတယ်။ ခါတိုင်း ဒီနေရာကို ခုနစ်နာရီခွဲဆို ရောက်နေကျ။ ဒီနေ့ တစ်နာရီခွဲလုံးလုံးကို နောက်ကျနေပြီ။ ထင်တဲ့အတိုင်းပဲ ကားတွေကလည်း နေပူကြီးထဲမှာ တန်းစီထားလိုက်တာ အတောင့်။
ရှစ်နာရီခွဲဆိုပေမယ့် နေကတော့ တော်တော့်ကို နေပူနေပြီ။ အရင်က ဒီနေရာလေးမှာ ကုက္ကိုပင်ကြီးတွေရှိတော့ တော်သေးတယ်။ အခုတော့ လမ်းချဲ့လို့ဆိုလား ကုက္ကိုပင်ကြိးတွေ မရှိတော့ဘူး။ သစ်ပင်တွေ မရှိကြတာလည်းကြာပြီ။ မြန်ဆန်လိုက်တာ မပြောနဲ့တော့။ မနေ့တစ်နေ့ကပဲ ရှိသေးတယ်။ မြေစာပင်ကလေး တစ်ပင်ကို မြေပွပွထဲက ဆွဲနှုတ်လိုက်သလို မြန်တာ။ မလုံးတင် ရောက်သွားသွားချင်းပဲ ထိပ်ဆုံးက ဘတ်စ်ကားပေါ်ကို နောက်ပေါက်ကနေ တက်လိုက်တယ်။ နေရာတော့ မရှိတော့ဘူး။ နောက်နား ခပ်ကျကျမှာ မတ်တတ်ရပ်ရင်းက လူတွေကို အကဲခတ်တယ်။ ဝတ်စုံတွေနဲ့ ရုံးသူရုံးသားတွေက များနေတယ်။ တခြားခရီးသည်တွေလည်း ပါတာပါပဲ။ သူ့လိုပဲ မတ်တတ်ရပ်နေသူတွေကလည်း အလယ်အူကြောင်းမှာ နှစ်ထပ်လောက် ဖြစ်နေတယ်။
“ကိုင်း … သောက်ကြဦးမလား၊ ရေခဲရေအေးအေးလေး ငါးမူးတည်းပါ”
ရေနွေးအိုးကြီးကြီးထဲကို ရေခဲရေထည့်ပြီးတော့ ကားပေါ်ကို လူတစ်ယောက် တက်လာတယ်။ ရေနွေးအိုးနှုတ်သီးမှာ ပလတ်စတစ်ရေခွက် သုံးလေးခွက်လည်း ချိတ်ထားတယ်။ ဘယ်သူမှလည်း မသောက်ပါဘူး။ ရေခဲရေသည်က တိုးရင်းဝှေ့ရင်း သူ့အနားကို ရောက်လာတယ်။ ရေခဲရေသည်က သူ့ကိုမတွေ့အောင် တစ်ဖက်ကိုလှည့်ဖို့ ကြိုးစားနေတုန်းမှာပဲ သူ့ကိုပြုံးပြီး နှုတ်ဆက်နေပြီ။ သည်တော့မှ သူလည်း တင်းတိတ်တွေနဲ့ မည်းချိတ်နေတဲ့ သူ့မျက်နှာပေါ်က နှုတ်ဆက်ပြုံးကလေး ပြုံးရင်းက မေးကလေးကို ဆတ်ပြလိုက်တယ်။ ရေခဲရေသည်ကလည်း သည်အမူအရာရဲ့ အဓိပ္ပာယ်ကို မေးလိုက်တာပဲဆိုတာ သိတဲ့ပုံနဲ့ …
“ခင်ဗျား နောက်ကျလို့ ပြောနေတယ်” လို့ တစ်ခွန်းပဲပြောပြီး ဆင်းသွားတယ်။ အဲသည်စကားကြားတော့ မလုံးတင် ရင်တွေခုန်လာပြန်ရော။ တချို့ကလည်း လူကျပ်နေပေမယ့် အလျင်လိုတယ်နဲ့ တူပါရဲ့။ သည်ကားပေါ်ကိုပဲ မဆံ့ရင်ကာ အတင်းတက်တယ်။ တချို့ကတော့ နောက်ကားထွက်မှာကို စောင့်နေကြတယ်။ ကားတွေက ငါးမိနစ်တစ်စီး ပုံမှန်ထွက်နေကျကိုး။ ရုံးချိန်ကလည်း ရုံးချိန်ဆိုတော့ နောက်ကဘတ်စ်ကားတွေပေါ်က ထိုင်ခုံတွေ လူပြည့်နေတာတောင် ပလက်ဖောင်းပေါ်မှာ လူတွေ အပြည့်ရှိနေသေးတယ်။
“အိပ်ချင်ပြေလေး အမူးအမော်ကောင်းတယ်၊ အာခံတွင်းမှာရှင်းတယ်၊ အိပ်ချင်မှာ ပြေတယ်၊ ဆီး၊ လိမ္မော်၊ နာနတ်၊ စတော်ဘယ်ရီ၊ ဒူးရင်း အရသာငါးမျိုးနဲ့ ပြုလုပ်ထားတဲ့ မွှေးမွှေးလေးတော်ဖီ၊ နှစ်ခုကိုမှ တစ်ကျပ်”
ကားက မထွက်နိုင်သေးဘူး။ ခရာသံလည်း မကြားရသေးဘူး။ ငါးမိနစ်လည်း ကျော်လောက်ပါပြီ။ ခရာမှုတ်ဖို့နေနေသာ ဂိတ်မှူးနဲ့ဒရိုင်ဘာ စကားများနေတယ်နဲ့ တူပါရဲ့။ အသံတွေ ကားပေါ်က ကြားနေရတယ်။ အဲသည်တုန်းမှာပဲ ကောင်လေးတစ်ယောက် ကားပေါ်တက်လာတယ်။ ကောင်လေးဆိုပေမယ့် သုံးဆယ်လောက်ရှိရော့မယ်။ လက်ထဲမှာလည်း စာရွက်တွေနဲ့ …
“ကိုင်း … တစ်နည်းအားဖြင့် ခရီးသွားကြမယ့် ကျွန်တော့်အစ်ကို၊ အစ်မများ၊ ကျွန်တော့်မိဘများ ကျွန်တော့်ကြောင့် စိတ်အနှောင့်အယှက်၊ ကိုယ်အနှောင့်အယှက် ဖြစ်ကြတယ်ဆိုရင် တောင်းပန်ပါတယ်ဗျာ၊ အချိန်လည်း သိပ်မရဘူး၊ ကားကလည်း ထွက်တော့မယ်၊ တခြားမဟုတ်ပါဘူး၊ နက္ခတ်ဗေဒ သိပ္ပံနည်းကျ ဗေဒဝိဇ္ဇာဆရာကြီး ဦးကြည်ရဲ့ ဒီနှစ် တပေါင်း တန်ခူး တစ်လစာ ဟောစာတမ်းတွေပါ၊ များများလည်း မပါပါဘူး၊ ကိုယ့်မွေးရက်ကလေးကိုသာ အမိန့်ရှိပါ၊ ကျွန်တော် နေရာအရောက် လာပို့ပါ့မယ်၊ ဟောစာတမ်းတစ်စောင်မှ တစ်ကျပ်၊ ဟုတ်ကဲ့ … ဒီနှစ်သင်္ကြန်က တန်ခူးလထဲမှာ မကျဘူးတဲ့၊ ကဆုန်လထဲမှာ ကျသတဲ့၊ ဒီနှစ်မှာ အင်္ဂါနဲ့ စနေသားသမီးများကို အသေသာ ကပ်ထားကြတော့ … တစ်ကျပ်ဆိုလို့ မမှန်ဘူးထင်ရင် ကျွန်တော့်မိဘများ ပိုက်ဆံတစ်ပြားမှ ပေးမသွားနဲ့၊ နမူနာ စာရွက်တောင်း၊ ထိပ်ဆုံးသုံးကြောင်းကို ဖတ်ကြည့်၊ မှန်ကန်တယ်၊ တိုက်ဆိုင်တယ်ဆိုမှ ဝယ်ကြည့်၊ တနင်္ဂနွေသားတွေက သူတစ်ပါးအမြင်နဲ့ မတူဘဲ ဆန့်ကျင်ပြောဆိုတတ်လို့ အမှတ်အတေးများ ခံရတတ်သတဲ့၊ တနင်္လာသားများကတော့ စီးပွားရေး မကောင်းတတ်သေးပေမယ့် သင်တန်းများတော့ တက်ရကိန်းရှိသတဲ့၊ ဗုဒ္ဓဟူးသားသမီးများ အတွက်ကတော့ ၄၊ ၁၊ ၇ စတဲ့ ဂဏန်းနဲ့သာထီထိုး၊ ထီဆုကြီးများတောင် ပေါက်ကိန်းရှိတဲ့အချိန်လို့ ဟောစာတမ်းမှာ အတိအလင်း ဟောထားပါတယ်၊ မိမိရဲ့ လူမှုရေး၊ အိမ်ထောင်ရေး၊ စီးပွားရေး၊ ကျန်းမာရေး၊ ပညာရေး”
မလုံးတင် မျက်လုံးတွေက ဟိုဟိုသည်သည် ကြည့်နေရာက ဟောစာတမ်းရောင်းတဲ့ ကောင်လေးဆီကို ရောက်သွားတယ်။ ကားပေါ်မှာ လူကများနေတော့ ကောင်လေးကို ရုတ်တရက် မမြင်ရဘူး။ ကောင်လေးကလည်း စာရွက်ထပ်ကို ခေါက်ချိုးကိုင်ထားရင်းက ပြောနေတာ။
“ကိုင်း … အလိုရှိတဲ့ ကျွန်တော့်မိဘများ တိုက်ဆိုင်ရင် လှမ်းသာခေါ်လိုက်၊ တစ်စောင်မှ တစ်ကျပ်ထဲ၊ နိုင်ငံကျော် ဗေဒဝိဇ္ဇာဆရာကြည်ရဲ့ ဟောစာတမ်း၊ ဒီတစ်လစာထဲ ငွေတစ်ကျပ်ဆိုတာ ကွမ်းစား၊ ဆေးလိပ်သောက် ကျပျောက်သလောက်ပဲရှိတယ်၊ ယတြာကောင်းတော့ မင်းလောင်းကျေသတဲ့၊ မိမိရဲ့ကံကြမ္မာ ဂြိုဟ်စီးဂြိုဟ်နင်း၊ ဘေးအန္တရာယ် ကြိုတင်သိရှိနိုင်တဲ့အပြင် ယတြာထူးများလည်း ပါတယ်”
မလုံးတင်က လူတွေကြားမှာ ရှေ့ကို နည်းနည်းတိုးထွက်လိုက်တယ်။ စုတ်ပြတ်ညစ်သယောင်းနေတဲ့ သူ့ကို အဝတ်အစား သစ်လွင်တောက်ပနေကြတဲ့ ကားစီးသူတချို့က မနှစ်မြို့သလို ကြည့်နေတာကို သူသိသားပဲ။ ရေမချိုး မိုးမချိုး သူ့ကိုယ်က နံစော်နေတာလည်း သူ့ဟာသူ သိတယ်။ အမြီးတိုနေတဲ့ ရာဘာဖိနပ်မှာ ချည်ထားတဲ့ သံကြိုးအစတွေက သူများခြေထောက်တွေကို ထိုးမိလို့ ကားပေါ်ရောက်တိုင်း အပြောခံရတာကလည်း ခဏခဏဆိုတော့ ဖိနပ်ကိုလည်း သတိထားရသေးတယ်။ ဒါပေမယ့် မတတ်နိုင်ဘူး။ နောက်နားကနေ ရှေ့ကိုတိုးနိုင်သလောက် တိုးတယ်။
“ဗုဒ္ဓဟူးသမီး … ဗုဒ္ဓဟူးသမီး”
“ဟောစာတမ်းတစ်စောင်ပေးပါ”
ရုတ်တရက် အော်လိုက်တဲ့ သူ့အသံကြောင့် သူ့ကို လူတွေက ဝိုင်းကြည့်ကြတယ်။ မလုံးတင်ကတော့ ဒါကို ဂရုမစိုက်ပါဘူး။ သူ့လက်ထဲက ကျပ်တန် နွမ်းနွမ်းကလေးကို လှမ်းပေးရင်းက ဟောစာတမ်းကောင်လေး လှမ်းပေးမယ့် ဟောစာတမ်းတစ်ရွက်ကို လက်ကမ်းလိုက်တယ်။
“ကိုင်း … ဟောဒီက အဒေါ်ကြီးကလည်း ဗုဒ္ဓဟူးသမီးအတွက် ဟောစာတမ်းတစ်စောင်တဲ့၊ ဟုတ်ကဲ့ လာပါပြီ၊ မွေးနေ့မွေးနံကိုပြော၊ ကြာသပတွေး ဟုတ်ကဲ့၊ ဟောဒီကလည်း ကြာသပတေး တစ်စောင်တဲ့၊ ကြာသပတေး သားသမီးများကလည်း ဒီလထဲမှာ ဘဝခြေလှမ်းသစ်တွေ စရလိမ့်မတဲ့၊ ဆီ၊ ဆန်၊ ဆေး အင်္ဂါနံ အရောင်းအဝယ်များ ကောင်းနိုင်သတဲ့ခင်ဗျာ၊ စနေ၊ ဟုတ်ကဲ့ ရမယ်၊ နိုင်ငံကျော်ဗေဒဝိဇ္ဇာ ဆရာကြည်ရဲ့ ဟောစာတမ်းတွေ၊ မမှန်ရင် ငွေတစ်ကျပ်ကိုမပေးနဲ့၊ ကျွန်တော် ဒီဘတ်စ်ကားဂိတ်မှာ ရောင်းလာတာ လေးလကျော်ပြီ၊ မမှန်ရင် သြော် … ဟုတ်ကဲ့၊ စနေပဲနော်၊ စနေသားသမီးများကတော့ ကောင်းလွန်းလို့တောင် ယတြာချေရမယ့်လ၊ မိတ်သစ်ဆွေသစ်များက ကြည့်ရှုလိမ့်မယ်။ ငွေရေးကြေးရေး မလိုချင်ပါဘူး ဆိုတာတောင် အိမ်ဝအထုပ်နဲ့ ရောက်လာမယ့် အချိန်တဲ့ခင်ဗျား”
မလုံးတင်ကတော့ သူ့လက်ထဲ ရောက်လာတဲ့ ဗုဒ္ဓဟူးသားသမီးအတွက် ဟောထားတဲ့ ဟောစာတမ်း စာရွက်ကြမ်းကြမ်းကို လှမ်းယူရင်း နောက်ကို ဆုတ်ဆုတ်လာတယ်။ အပေါက်ဝများကို တိုးထွက်လာပြီး အဝနားမှာ ရပ်ရင်းက ဟောစာတမ်းကို ဖတ်ဖို့ကြိုးစားတယ်။ ဒါပေမယ့် လူကကျပ်နေလို့ ဘယ်လိုမှ ဖတ်လို့မရဘူး။ အဲသည်တုန်းမှာပဲ ကားထွက်ခရာတုပ်သံ ရှည်ရှည်ကြီးက ဆောင့်ဆောင့်အောင့်အေင့် ထွက်လာတယ်။
***
(၂)
သည်နေ့တော့ ကားကြီးဂိတ်ကို မလုံးတင် အစောကြီး ရောက်နေပြန်ရော။ နေစရာ နားစရာမရှိလို့ ဂိတ်မှူးရဲ့ သစ်သားတဲကလေးဘေးမှာ ဝင်ထိုင်တယ်။ အဲသည်နေရာက အရိပ်ကလေးရှိတာကိုး။
စောစောထွက်လာလို့ ဘာမှလည်း မစားရသေးဘူး။ သူ့လက်ထဲ ပိုက်ဆံလေးနှစ်ကျပ်ပဲ ကျန်တယ်။ တစ်ကျပ်က သူပြန်ရင် လမ်းစရိတ်လုပ်ဖို့။ ကျန်တဲ့တစ်ကျပ်နဲ့ သူ ဘာဝယ်စားရင် ရမလဲလို့ လိုက်ရှာတယ်။ ခက်တာက ဒီနေရာမှာ တစ်ကျပ်တန်မုန့်ရယ်လို့ ရောင်းတဲ့ဆိုင်ကို မရှိတာ။ လက်ဖက်ရည်ဆိုင်၊ မုန့်ဟင်းခါးဆိုင် စတဲ့ ဆိုင်တွေတော့ရှိတယ်။ သည်ဆိုင်တွေကလည်း သိတဲ့အတိုင်း ဘာစားစား အနည်းဆုံး ပိုက်ဆံငါးကျပ်တော့ပါမှ မဟုတ်လား။ ခါတိုင်းတော့ ထမင်းကြမ်းမစားဖြစ်ရင်တောင် သူ့အိမ်ကအထွက် လမ်းထိပ်မှာရောင်းတဲ့ ကောက်ညှင်းထုပ်ကလေး တစ်ထုပ်လောက်တော့ စားခဲ့တာချည်းပဲ။ ကနေ့မစားဖြစ်ဘူး။ ရင်ထဲက တော်တော့်ကို ဆာလာတယ်။ နည်းနည်းစောသေးလို့လား မသိဘူး။ ကားကလည်း နှစ်စီးလားပဲ ရှိသေးတယ်။ ကားဂိတ် သစ်သားအိမ်ကလေးရဲ့ အရိပ်မှာထိုင်ရင်းက ဟိုဟိုသည်သည်ကြည့်တယ်။ ခါတိုင်း ကားကြီးတွေပေါ်မှာ တက်ရောင်းတဲ့ ဂွေးချိုသီး တုတ်ထိုးသည်၊ ဆီးတော်ဖီသည်၊ ရေခဲရေသည်တွေတောင် မလာသေးဘူး။ ဘာပဲဖြစ်ဖြစ် တော်ဖီပြားလေးနှစ်ပြားကို တစ်ကျပ်နဲ့ ဝယ်စားမယ်လို့ သူ စိတ်ကူးတယ်။ ဒါပေမယ့် ဘာသည်မှ မရောက်သေးတာ။ သူ နာရီဝက်လောက် ဆက်ထိုင်နေတယ်။ အဲသည်တုန်းမှာပဲ သူ့ဘေးကို လူတစ်ယောက် ရောက်လာတယ်။ ကျပ်တန်နွမ်းနွမ်းလေးတွေ နှစ်ထပ် သူ့ကို ရုတ်တရက် လှမ်းပေးတယ်။ သူက အလိုက်သင့်ယူလိုက်ရင်း ကျပ်တန်တွေကို ထည့်တယ်။ ခါတိုင်းလိုပါပဲ၊ ကျပ်တန် အရွက်နှစ်ဆယ်ပါပဲ။
“ညနေကျ ကျွန်တော့်ကိုစောင့်ဦး၊ ပြောစရာရှိလို့”
“အေး … အေး … ”
ဒါပဲ။ ပြောသွားတဲ့စကားက ဒါပါပဲ။ ဒါပေမယ့် သူ့ရင်တွေ တုန်လိုက်တာ၊ ဘာပါလိမ့်။
ခါတိုင်း တစ်ခါမှ ဒီလိုမပြောဖူးဘူး။ မနက်ဘက် ဒီလိုပဲ ငွေနှစ်ဆယ်၊ တစ်ခါတစ်ခါ သုံးဆယ်လောက် ပေးထားပြီးရင် ထွက်သွားတာပဲ။ ပြီးရင် ဘာဆက်လုပ်ရမလဲဆိုတာ သူ သိပြီးသားပဲ။ ဘာတွေပြောရမလဲ ဆိုတာလည်း သူ သိနေသားပဲ။ အထူးအဆန်းလုပ်လို့။ ညနေကျ စောင့်ဦးတဲ့၊ ဘာပါလိမ့်။ သူ့ခေါင်းထဲ အဲဒီအတွေးတွေ ခဏနေတော့ မရှိတော့ပြန်ဘူး။ လောလောဆယ် မုန့်ကလေးတစ်ဖဲ့စားရဖို့ပဲ အာသီသပြင်းနေတယ်။ သူ့လက်ထဲမှာ အဲသည်လူပေးသွားတဲ့ ကျပ်တန်အနွမ်းကလေး ရွက်နှစ်ဆယ် ရှိနေပေမယ့် သူ့ပိုက်ဆံမဟုတ်ဘူး။ ဒါပေမယ့် လက်လှည့်ကလေး ခဏတစ်ဖြုတ် သုံးမယ်ဆိုရင်တော့ သုံးနိုင်ပါတယ်။ အဲဒါလည်း သူပဲ ဆပ်ရမှာပဲ၊ သူ့ပိုက်ဆံထဲက ကုန်မှာပဲ။
မနီးမဝေး ဆိုင်တန်းတွေဆီ မုန့်ဟင်းခါးဟင်းရည်သည် ကလေးရောက်လာတော့ သူ ထလိုက်တယ်။ အကြော်မပါရင် သုံးကျပ်၊ တစ်ပွဲတလေတော့ စားပစ်လိုက်မယ်လို့ သူစိတ်ကူးတယ်။ ဒါဆို ညနေကျ သူအိမ်ပြန်ရင် ခုနစ်ကျပ်ပဲရတော့မယ်။ ကားခကတော့ သူ့မှာ သပ်သပ်ချန်ထားတဲ့ တစ်ကျပ်ရှိသေးတယ်။ မုန့်ဟင်းခါးတစ်ပွဲစားဖို့ သူ့စိတ်တွေ လွန်ဆွဲနေတယ်။ ဒါပေမယ့် သူ မစားဖြစ်တော့ဘူး။ ရပ်ထားတဲ့ ရှေ့ကားပေါ်မှာ လူတွေပြည့်နေပြီ။ သူ့စိတ်ကို သူချိုးနှိမ်ရင်းက တံတွေးကို မျိုချလိုက်တယ်။ ခဏနေတော့ ဆီးတော်ဖီသည် ရောက်လာတယ်။ သူ အရမ်းဝမ်းသာသွားတယ်။ တစ်ကျပ်ဖိုး သုံးခုရအောင်တောင်းပြီး ကမန်းကတန်း ဝါးပစ်လိုက်တယ်။ ကားဂိတ်ရေအိုးစင်က ရေတစ်ခွက်ကို နှုတ်ခမ်းဘေးက ရေတွေစီးကျသွားတဲ့အထိ သောက်တယ်။ ဝမ်းထဲမှာ နည်းနည်းတော့ ငြိမ်သွားတာအမှန်ပဲ။ နောက် ခဏနေတော့ ထုံးစံအတိုင်းပဲ ဘတ်စ်ကားနောက်ပေါက်က တိုးတက်လိုက်တယ်။
“ကျွန်တော့်မိဘများ ခရီးသွားရင်း လမ်းသွားရင်း မိမိကံကြမ္မာကို မိမိဆန်းစစ်နိုင်ဖို့ နိုင်ငံကျော် ဗေဒဝိဇ္ဇာ ဆရာကြည်ရဲ့ ဟောစာတမ်းတွေကို ရောင်းချပေးပါတယ်၊ ဟောစာတမ်းတစ်စောင်မှ တစ်ကျပ်ပါ၊ မိမိရဲ့ မွေးနေ့မွေးနံလေးတွေကို ပြောရင် နေရာအရောက် ကျွန်တော်လာပို့ပါ့မယ်၊ သောကြာသမီးများအတွက်ကတော့ ဒီလထဲမှာ အကောင်းအဆိုး ရောထွေးနေဦးမတဲ့၊ ထင်တာတွေဖြစ်မလာလို့ စိတ်မောလူမော ဖြစ်နေရမှာတဲ့၊ ဗုဒ္ဓဟူးသားသမီးတွေကတော့ အလုပ်အကိုင် အပြောင်းအရွှေ့ မြင်သတဲ့၊ ထိခိုက်ရှနာတွေလည်း ရှိသတဲ့၊ နိုင်ငံကျော် ဆရာကြည်ရဲ့ ဟောစာတမ်းတွေ၊ မမှန်ရင် တစ်ပြားမှမပေးနဲ့”
မလုံးတင်က ဟောစာတမ်းရောင်းတဲ့ ကောင်လေးကိုပဲ လိုက်ကြည့်နေတယ်။ ခဏနေတော့ သူ့ချွေးခံထဲကို လက်နှိုက်လိုက်တယ်။ ကျပ်တန်အထပ်တွေထဲက တစ်ရွက်ကိုပွတ်ပြီး နှိုက်ယူရင်းက လက်တွေကို တဆဆ လုပ်နေတယ်။ ကောင်လေးက တဖြည်းဖြည်းနဲ့ ကားအူကြောင်းဘက်ကို ရောက်လာတယ်။
“ဗုဒ္ဓဟူးသမီး တစ်စောင်ပေးပါဟဲ့ ကောင်လေး”
“ပြီးခဲ့တဲ့အပတ်က နင့်စာရွက်ဝယ်ပြီး ထီထိုးတာ ခုနစ်ရာဆု ပေါက်တယ် ကောင်လေးရဲ့၊ တစ်ရွက်ပေးပါဦး”
ဟောစာတမ်း ကောင်လေးတောင် ရုတ်တရက် ကြောင်သွားတယ်။ ကားပေါ်က လူတွေကလည်း ကိုယ့်စိတ်နဲ့ကိုယ်၊ ကိုယ့်စကားနဲ့ကိုယ် ရှိနေရင်းက မလုံးတင်စကားကြောင့် ခဏလေး တိတ်သွားတယ်။
“ကိုင်း … ဟောဒီမှာခင်ဗျား၊ ဗုဒ္ဓဟူးသမီးက တစ်စောင်အားပေးပါပြီ၊ ပြီးခဲ့တဲ့အပတ်က အစိုးရ အောင်ဘာလေသိန်းဆုကိုလည်း ကျွန်တော့်ဟောစာတမ်းမှာပါတဲ့ နံပါတ်နဲ့ တိုက်ထိုးတာ ခုနစ်ရာဆု ပေါက်သတဲ့ခင်ဗျာ၊ ကိုင်း … ရော့ … ဒေါ်ကြီး၊ ဗုဒ္ဓဟူးသမီးအတွက် ဒီလဟောစာတမ်းမှာလည်း နံပါတ်တွေပါတယ်၊ ဗုဒ္ဓဟူးက ၄၊ ၁၊ ၇ နဲ့ စတဲ့ ဂဏန်းတွေ ဒီလအကျိုးပေးမတဲ့၊ ကျေးဇူးတင်ပါတယ်ဗျာ၊ ကျွန်တော်တို့ကလည်း ဝမ်းသာပါတယ်၊ ကိုင်း … ထီတွေလည်း ပေါက်ကုန်ပြီခင်ဗျ၊ သောကြာနံ ဟုတ်လား၊ ဟုတ်ကဲ့ လာပါပြီ၊ ကဲ … သောကြာတစ်စောင်တဲ့၊ ခင်ဗျာ … စနေ ဟုတ်ကဲ့၊ စနေသားသမီးများကလည်း ရပ်ဝေးက မိတ်ဆွေများရဲ့ အထောက်အပံ့ရမယ်တဲ့၊ အကျိုးပေးဂဏန်းတွေလည်း ပါတယ်ဗျာ၊ သိချင်ရင်တော့ တစ်ကျပ်တည်းပါ”
မလုံးတင်က ဟောစာတမ်း စာရွက်ကလေးကိုကိုင်ရင်း ဘတ်စ်ကားနောက်ပေါက်ကို မယောင်မလည် တိုးတိုးသွားတယ်။ ဂိတ်တဲထဲက ခရာတုပ်ပြီးလို့ ဝူးခနဲ ကားစက်နှိုးတော့မှ ကားပေါ်က မသိမသာ တိုးဆင်းလိုက်တယ်။
ဒီကားနောက်က လူပြည့်နေတဲ့ ဘတ်စ်ကားရဲ့ နောက်ပေါက်ကို ကားစီးခရီးသည် တစ်ယောက်လို သူ အတင်း တိုးတက်လိုက်ပြန်ရော။ သိပ်မကြာခင်မှာပဲ ကားရှေ့ပေါက်က ဟောစာတမ်းကောင်လေး တက်လာတာကို သူကြည့်နေတယ်။ ကောင်လေး တက်လာတော့မှ ချွေးခံအင်္ကျီစထဲက ကျပ်တန်လေးတစ်ချပ်ကို အသာနှိုက်ယူလိုက်တယ်။ ရှေ့နားကို မသိမသာ တိုးတိုးသွားလိုက်တယ်။ ပေရေနေတဲ့ သူ့ကို လူတွေက နှာခေါင်းရှုံ့ရင်း ဖယ်ပေးကြတယ်။ မတိုးလို့ကလည်း မဖြစ်ဘူးလေ။
“ဗုဒ္ဓဟူးသမီး တစ်စောင်ပေးပါ”
လို့ ပြောရင်း ဟောစာတမ်းတစ်စောင် ဝယ်ရဦးမှာကိုး။ ဒါ သူ့ အလုပ်ကိုး။
* * *
(၃)
မီးတွေတောင်ထွန်းပြီ။ ကက်ဆက်သံတွေက ညံတုန်း။ ဘတ်စ်ကားတွေလည်း ကျဲသွားပြီ။ ရန်ကုန်ဘက်ကိုထွက်မယ့် ဘတ်စ်ကားဆိုတာ မရှိသလောက်ပဲ။ ဆာလိုက်တာလည်း မပြောနဲ့တော့၊ အူတွေတောင် လိမ်နေပြီထင်ပါရဲ့။
သူ မြို့သစ်ကို ပြန်ရဦးမှာ။ မြို့သစ်ကားတွေကလည်း ပုရွက်တွင်း တစ်တွင်းကို လူတွေ ခဲခဲလှုပ်နေတတ်တာ။ သူ ပြန်လို့မဖြစ်သေးဘူး။ ချိန်းထားတဲ့ လက်ဖက်ရည်ဆိုင်ကလေး ရှိရာကို သူ သွားတယ်။ ထင်တဲ့အတိုင်းပဲ။
လူကျဲကျဲ လက်ဖက်ရည်ဆိုင်ကလေးရဲ့ ထောင့်တစ်ထောင့်မှာ သူ့ကိုစောင့်နေတဲ့ ဟောစာတမ်းကောင်လေးကို တွေ့တယ်။ ဘေးနားမှာလည်း မိန်းမငယ်တစ်ယောက်။ နှုတ်ခမ်းနီတွေရဲလို့။ ‘နေပါဦး၊ ဒီကောင်မကို ငါသိပါတယ်’ လို့ မလုံးတင် စဉ်းစားတယ်၊ စဉ်းစားလို့မရဘူး။ ပြည်တည်တည်မျက်နှာနဲ့ ကောင်လေးရဲ့ လက်တွေကို ဆုပ်ချေနေတယ်။ ဆေးဆိုးထားတဲ့ လက်သည်းချွန်ချွန်တွေနဲ့ ကောင်လေးရဲ့ လက်ဖဝါးတွေကို ကုတ်ခြစ်ပေးနေတယ်။ တစ်ခါတစ်ခါ ကောင်လေးရဲ့ လက်မောင်းတွေကို ထုလားထုရဲ့။
“ဟော … ဒေါ်ကြီး လာ၊ လက်ဖက်ရည်သောက်မလား”
“အေး … သောက်ချင်တယ်၊ နင် ငါ့ကို ခေါ်ထားလို့သာ၊ နို့ဆိုရင် ငါပြန်ပြီ၊ မြို့သစ်ကားက ကျပ်တယ်ဟ၊ နောက်ရက်မှ ပေါင်းရှင်းလည်း ရတာပဲဟာ”
“သြော် … ဟုတ်တယ်၊ ဒီလိုဗျာ၊ ပြောရမှာ အားတော့နာတယ်၊ ဒီကကျွန်တော့ညီမ တောကရောက်လာတော့ ဒေါ်ကြီး လုပ်ရမယ့် အလုပ်တွေ မနက်ဖြန်ကစပြီး သူလုပ်လိမ့်မယ်၊ ဒေါ်ကြီး မနက်ဖြန်ကစပြီး မလာနဲ့တော့ ဆိုတာ ပြောမလို့”
မလုံးတင် ဘယ်လိုမှမထင်ထားတဲ့ စကားတွေ။ သူ ဒီအလုပ်ကလေးကို လွန်ခဲ့တဲ့ လေးလလောက်ကတည်းက ရထားတာ။ ဘာမှမဟုတ်ပါဘူး။ ဟောစာတမ်းကောင်လေးက ဘတ်စ်ကားရှေ့က ဟောစာတမ်း တက်ရောင်းရင် သူ့အလုပ်က လူကြားသူကြားက ဟောစာတမ်းတစ်စောင် စဝယ်ရုံပဲ။ ရန်ကုန်သားတွေဆိုတာက အခက်သားပဲ။ လူတစ်ယောက်က စဝယ်မှ လိုက်ဝယ်တတ်တာ မဟုတ်လား။ သူ့အလုပ်က ‘ဗုဒ္ဓဟူးသမီး တစ်စောင် ပေးပါဟယ်’ လို့ ပြောပြီးဝယ်ရုံပဲ။ ကောင်လေးက ဟောစာတမ်းဝယ်ဖို့ နှစ်ဆယ်မျိုး၊ သုံးဆယ်မျိုး သူ့ကို မနက်မနက် ထုတ်ပေးထားတတ်တယ်။ ညနေဘက် အလုပ်သိမ်းရင် သူ့ကို နေ့တွက်တစ်ဆယ်ပေးတယ်။ ပထမတော့ သူ့အလုပ် သူ နားမလည်ဘူး။ ဘာဖြစ်လို့ ဒီလိုလုပ်မှန်းလည်း မသိဘူး။ နောက်မှ ကောင်လေးက ရှင်းပြတယ်။ ဒါက ‘ဒလန်’ လုပ်ရတာတဲ့။ ‘ဒလန်’ ဆိုတာ ဘာမှန်းလည်း သူ မသိဘူး။ နောက်တော့လည်း လုပ်ပျော်တယ်ထင်လို့ လုပ်ရင်းက ဘတ်စ်ကားဂိတ်မှာပဲ နေကုန်နေခမ်း အချိန်ကုန်ရတော့တယ်။ တစ်နေ့လုပ်ခ တစ်ဆယ်ထဲက ဘတ်စ်ကားခ နှစ်ကျပ်နုတ်ပြီးရင် ကျန်တဲ့ရှစ်ကျပ်ကို ဘာမှမစားမသောက်ဘဲ အိမ်ပြန်ရင် ယူသွားနိုင်တာ လေးလတောင် ရှိနေပြီပဲ။ ဘာပဲဖြစ်ဖြစ် ကောင်လေးပဲ ကျေးဇူးတင်နေရသေးတယ်။ အူအလိမ်ခံပြီး နေ့လယ်ဘက် မုန့်လေးပဲလေး ဝယ်စား၊ ရေအဝသောက်ပြီး ပိုတဲ့ပိုက်ဆံလေး သူရနေတာကိုပဲ သူကျေနပ်တယ်။ အခုတော့ ဒီ ‘ဒလန်’ ဆိုတဲ့ အလုပ်ကလေးတောင် လုပ်တဲ့လူပေါ်လာပြန်ပြီ မဟုတ်လား။ ရောက်လာတဲ့ လက်ဖက်ရည်ခွက်ကိုတောင် မသောက်နိုင်တော့ဘူး။ သူ့ရင်ထဲမှာ ဆို့နေတယ်။ တစ်နေကုန် ဘတ်စ်ကားဂိတ်က နေပူကြီးထဲမှာ ကားတစ်စီးပြီးတစ်စီး တက်လိုက်ဆင်းလိုက် လုပ်ရတာထက်တောင် ပူလောင်နေသေးတယ်။
“မိုးကလည်းကျတော့မယ် ဒေါ်ကြီးရဲ့၊ အလုပ်ကလည်း ပြောင်းချင်ပြီ၊ နောက် ဟောဒီက ညီမရောက်လာတော့ ဒေါ်ကြီးလုပ်တဲ့ အလုပ်ကလေး သူလုပ်ချင်လို့တဲ့၊ အဲဒါ … ”
“နင် စဉ်းစားပါဦးဟယ်၊ ငါ့မှာက ဒီအလုပ်ကလေး … ”
“တခြားအလုပ်ပဲ ရှာလုပ်ပါဗျာ၊ ရော့ … ဒီကနေ့အတွက် တစ်ဆယ်၊ ခင်ဗျားလည်း သိပါတယ်၊ ကျွန်တော်လည်း သိပ်ကျန်လှတာ မဟုတ်ဘူး”
မလုံးတင် လက်ဖက်ရည်တောင် မသောက်တော့ပါဘူး။ စားပွဲက ထတယ်။ သူ့ဖိနပ်ဟောင်းကလေးကို စွပ်တယ်။ ပိုက်ဆံတစ်ဆယ်ကို တင်းတင်းဆုပ်ရင်းက ခဏကလေး ရပ်နေလိုက်တယ်။ တစ်ခုခု ပြောချင်ပေမယ့် ဘာပြောရမှန်းလည်း မသိဘူး။
“လက်ဖက်ရည် သောက်သွားဦးလေဗျာ၊ မှာပြီးမှ”
“မသောက်တော့ပါဘူး”
မြို့သစ် ကားဂိတ်ဘက်ကို ထွက်လာခဲ့တယ်။ မြို့သစ်ကိုသွားမယ့် ကားပေါ်မှာ လူတွေဆိုတာ တရွရွနဲ့ မွစာတက်လို့။ နောက်ကားကို စောင့်ဖို့ဆိုတာကလည်း ထူးမှာမဟုတ်ဘူး မဟုတ်လား။ လူပြည့်နေတဲ့ ဘတ်စ်ကားတွေအပေါ်ကို နေ့စဉ်နဲ့အမျှ တက်နေကျဆိုတော့ သူ့အဖို့ သိပ်တော့ ထူးပြီး ကျပ်တယ်မဟုတ်တော့ပါဘူး။ အိမ်မှာလည်း ကလေးတွေက မျှော်လှရော့မယ်။
“ဗုဒ္ဓဟူးသားသမီးတွေအတွက်ကတော့ အလုပ်အကိုင် အပြောင်းအရွှေ့ ရှိသကဲ့သို့ ထိခိုက်ရှနာတွေလည်း မြင်သတဲ့”
နေ့လည်က ကောင်လေးပြောသွားတဲ့ ဟောစာတမ်းက စာသားတွေက သူ့ကို တမင်များ ရည်ရွယ်ပြီး ပြောတာလားလို့လည်း သူ စဉ်းစားနေမိပါသေးတယ်။
“ကိုင်း … ကားခလေး အဒေါ်ကြီး”
“ဗုဒ္ဓဟူးသမီး၊ အဲ … မြို့သစ်ကွေ့ကို”
သူ့လက်ထဲက ကျပ်တန်နွမ်းကလေးကို ထုတ်ပေးတုန်းမှာပဲ ကားစက်က ဝူးခနဲနှိုးတယ်။ ဘာပဲဖြစ်ဖြစ် မနက်ကားကြီးဂိတ်ကို မလုံးတင် လာစရာမလိုတော့ဘူး။
(ဝါနီပြာပန်းချီမဂ္ဂဇင်း၊ အမှတ်-၃၊ ၁၉၉၁ ခုနှစ်၊ ဇူလိုင်လ)
* * * * *
မောင်းပုတီးကလေး
(၁)
သန်းခေါင်ကြက်တွေ တွန်တော့လည်း အမေသန်းရင် မအိပ်နိုင်သေး။ အပြင်မှာ လမင်းကြီး ထိန်ထိန်လင်းနေသည်။ သက်ကယ်ပျစ် ကျိုးကျဲကြားက လရောင်တွေ ယိုစီးနေသဖြင့် အိမ်ကလေးထဲမှာ လင်းလက်နေသည်။ အမေသန်းရင်က မှိန်းနေရာမှ ကျုံးထလိုက်သည်။ ခြေသလုံးတွေ တောင့်တင်းနေလေသည်။ တစ်နေ့လုံး မောင်းထောင်းထားရသဖြင့် ညာဘက်ခြေသလုံးက ထင်းချောင်းတစ်ချောင်းလို တင်းမာနေသည်။ ဆံပင်ကြမ်းတွေကို ဝါးဘီးကလေးနှင့် ပတ်ရစ်လိုက်သည်။ အိမ်ရှေ့ကွပ်ပျစ်ကလေးဆီ ထသွားလိုက်သည်။ လရောင်အောက်မှာ အရာအားလုံး ငြိမ်သက်နေသည်။ ငယ်ငယ်တုန်းကတော့ လရောင်အောက်မှာ သည်အချိန် ဘယ်အိပ်လိမ့်ဦးမလဲ။ အခုတော့ ရွာလယ်က ခွေးအူသံ သဲ့သဲ့မှတစ်ပါး ဘာကိုမှမကြားရ။ ငယ်ငယ်တုန်းက ဘဝတွေကို စိတ်ရောက်သွားပြန်သည်။ တိုးစိန်၊ သန်းရင်၊ ခင်မေ၊ သည်သုံးယောက်ဆိုလျှင် ရွာကတစ်တွဲတည်း မြင်သည်။ ကောက်စိုက်၊ ပဲနုတ်၊ ကောက်သင်းကောက်၊ မောင်းထောင်း။ တိုးစိန်က စလေကျွန်းချောင်းဘက်က လက်သမားတစ်ယောက်နှင့် အိမ်ထောင်ကျသွားကတည်းက ရွာကို ပြန်မလာတော့။ ခင်မေကတော့ ရွာထဲမှာရှိသည်။
အခုတော့ ခေါ်ခင်မေ။ အင်း … လယ်ပိုင်ရှင် ဒေါ်ခင်မေ၊ ကျောင်းအစ်မ ဒေါ်ခင်မေပေါ့လေ။ ရွယ်လယ်က ခင်မေတို့ တိုက်ခံအိမ်ကြီးမှာ ပဲစက်ရှိသည်။ မောင်းဆုံရှိသည်။ စပါးကျီ၊ ပဲကျီတွေရှိသည်။ ခင်မေ ပဲခင်းတွေ ပဲဆွတ်ချိန်ဆိုလျှင် သူတို့သားအမိ လိုက်နေကျ။ ခင်မေ လယ်တွေမှာ ကောက်သင်းကောက်နေကျ။ ငယ်ငယ်က ခင်မေနှင့် မောင်းထောင်းဘက်ဆိုသော်လည်း အခု အလုပ်ရှင်နှင့် အလုပ်သမား။ ဒါပေမယ့် ခင်မေက ဘဝမမေ့ဟု ဆိုရမည်။
သူတို့သားအမိကို ကြည့်သည်။ ခိုင်းစရာရှိလျှင် သူတို့၊ ပေးစရာရှိလျှင် သူတို့။ အခုလည်း သူ့မောင်းစင်မှာ သားအမိတစ်တွေ မောင်းထောင်းနေရသည်။ အိမ်ကကိုရင် ပိုးထိဆုံးတော့ ခင်မေဆီက ချေးရငှားရသေးသည်။ အခုတော့ သားအမိသုံးယောက် ရရစားစား၊ ဝါးဝါးမျိုမျို ကောက်စိုက်ချိန်စိုက်၊ ထင်းသယ်ချိန်သယ်၊ မောင်းထောင်းချိန်ထောင်း၊ ကြိတ်ထိုးချိန်ထိုး။ သူငယ်ချင်းသုံးယောက်ထဲမှာ သူတစ်ယောက်တည်း ကြီးတောင့်ကြီးမား မောင်းထောင်း ကြိတ်ထိုးနေရတုန်း ဖြစ်သည်။ မောင်းတိုင်က မောင်းပုတီးကလေးကို ကိုင်ရတွယ်ရတုန်း၊ ပုတီးပတ်တွေ မှတ်ရတုန်း။
လရောင်ကြည်ကြည်ထဲမှာ ရေမဲ့ ရေအိုးဟောင်းသုံးလုံးနှင့် မီးကပ် မီးချိတ်၊ ဝါးလုံးငေါင်းစင်းစင်းကို ငေးကြည့်နေမိပြန်သည်။ နွေကုန်တော့မည်။ မိုးကျတော့မည်။ သက်ကယ် မမိုးရသေး။ သည်နှစ် ကြိတ်ထိုးခထဲက ဖဲ့စုလာတာ နည်းနည်းပါးပါးတော့ ရနေပြီ။ လိုတာ ခင်မေ့ဆီ ချေးရလိမ့်မည်ထင်သည်။ ခင်မေ့ကျေးဇူးတွေကို သတိရနေရင်းက ငယ်ဘဝတွေကို စိတ်ရောက်သွားပြန်သည်။ သည်လို လရောင်ညတွေမှာ ဖန်ခုန်တမ်း၊ တွတ်ထိုးတမ်း၊ စကားထာဝှက်တမ်း၊ ဘိုင်စကုတ်အကြောင်း ပြောတမ်း။
လရောင်တလင်း ကွင်းပြင်ထဲမှာ ညဥ့်နက်သန်းခေါင်တိုင်အောင် သူရယ်၊ တိုးစိန်ရယ်၊ ခင်မေရယ်။
အဲသည်တုန်းက …
* * *
(၂)
ခါတိုင်း မနက်သုံးနာရီ သန်းရင် နိုးနေကျ။ ကနေ့ မိုးလင်းသွားသည်။ သိပ်တော့ နောက်မကျသေး။ လရောင် ရှိနေသေးသည်။ ခင်မေနှင့် တိုးစိန်ကို သွားခေါ်ရဦးမည်။ သူတို့က လာခေါ်ရတယ်လို့ တစ်ခါမှ မရှိခဲ့။ သန်းရင် တဘက်ကြမ်းကိုခြုံကာ ထွက်လာခဲ့သည်။ တစ်ယောက်က ရေတွင်းကုန်းမှာ၊ တစ်ယောက်က အနောက်ရိသာနားမှာ။ တိုးစိန်တို့ အိမ်စုကလေးတွေမှာ မီးရောင်မမြင်ရသေး။
“တိုးစိန်ရေ … တိုးစိန်”
“ဝူး … ”
“သေတုန်းပဲလား ကောင်မ၊ မိုးလင်းသွားပြီဟဲ့”
“အေး … အေး … သွားနှင့်ပါလား သန်းရင်ရေ”
“ဟင့်အင်း … မြန်မြန်လုပ်၊ ဒီကပဲစောင့်မယ်”
လမ်းပေါ်မှာ ဘယ်သူမှမရှိသေး။ လေးနာရီခွဲလောက်ရှိပြီ။ ခဏကြာတော့ တိုးစိန် ထွက်လာသည်။ ခင်မေကို သွားမခေါ်တော့ဘဲ နှစ်ယောက်သား မောင်းစင်ကို လာခဲ့ကြသည်။ သူတို့ မောင်းစင်ရှိရာ အိမ်ကြီးရောက်တော့ ခြံတံခါးကို တွန်းဖွင့်ကာ ဝင်လိုက်သည်။ အိမ်ကြီးဘေးမှ ပန်းကာ နောက်ဖေးကွက်လပ်ကျယ်ကို ဆက်လျှောက်လာကြသည်။ အိမ်ကြီးရှင်တွေ မနိုးကြသေး။ မောင်းစင်ထားရာ တမာရိပ်မှာ မှောင်မည်းနေသည်။ တိုးစိန်က ရေနံဆီမီးတိုင်ကို မီးတို့လိုက်သည်။ ထိုစဉ်မှာပင် သူတို့ကိုယ်ပေါ်သို့ ကျောက်စရစ်ခဲတွေ ဖျောခနဲ ကျလာသည်။
“အမေ့ … ”
“ဟား … ဟား … ဟား … ဟား … ”
ခင်မေ … ။ လရောင်ရိပ်မကျသည့် ပန်းချုံထဲက သရဲခြောက်ပြနေခြင်း ဖြစ်သည်။
“ညည်း မကြောက်ဘူးလား ခင်မေရယ်”
“ကြောက်ပေါင်”
မီးတိုင်ခွက်အလင်းရောင်နှင့် စပါးအိတ်တွေကို သွားမသည်။ တိုးစိန်က မောင်းစင်ဘေးမှာ ဂုန်နီအိတ်တွေ စီခင်းလိုက်သည်။ လုံးတီး၊ ဖွဲကြမ်း၊ ဆန်ကွဲ၊ စပါးခွံတွေ သပ်သပ်စီခုတ်ချဖို့ နေရာခွဲထားလိုက်သည်။ သန်းရင်က မနေ့က ကြိတ်ထိုးပြီးသား လုံးတီးနှစ်ပြည်သားလောက်ကို မောင်းခွက်ထဲ ချင်ထည့်လိုက်သည်။ မီးတိုင်ခွက် အလင်းရောင်ကြောင့် ခင်မေနှင့် တိုးစိန်တို့ အရိပ်တွေက ရှည်မျောနေသည်။ မောင်းတုံးပေါ် တင်ထားသော ခြေထောက်တွေက အသင့်။ တိုးစိန်က မောင်းတိုင်စွပ်ထားသည့် ပုတီးကုံးကလေးကို ချွတ်ယူလိုက်သည်။
“ကိုင်း … နင်း”
“ကျွီ … ”
“ဂျုံး … ”
“ကျွီ … ”
“ဂျုံး … ”
နောင်းနင်းတုံးက ဖိနင်းလိုက်သည့်အခါ ကျွီခနဲ ကျွီခနဲ မြည်သည်။ မောင်းတုံးက မောင်းခွက်ထဲကျသည့်အခါ ဂျုံးခနဲ မြည်သည်။ မောင်းတုံးကျသည်နှင့် ဆန်မဖြစ်တဖြစ် လုံးတီးတွေ ဖွားခနဲ ဖွားခနဲ မောင်းခွက်နှုတ်ခမ်းပေါ်ကို စင်ထွက်လာတတ်သည်။ ထိုအခါ သန်းရင်က ယက်ချရသည်။ မောင်းအကြွမှာ ယက်ချ၊ မောင်းကျလျှင် ဖယ်၊ နရီကိုက် စည်းကိုက်၊ မှားလို့မရ။ ငိုင်နေလို့မရ။
“ကောင်မ ခြောက်ပတ်နော်”
ပုတီးခြောက်ပတ်ကို ဆိုလိုခြင်းဖြစ်သည်။ မောင်းကျည်ပွေ့က မောင်းခွက်ထဲ ဂျုံးခနဲ တစ်ချက်ကျလျှင် မောင်းနင်းသူက ပုတီးတစ်လုံးကို ဆွဲချရသည်။ ဤသို့ဖြင့် မောင်းနင်းရင်းက ပုတီးစိပ်နေရသည်။ ပုတီး (၁၀၈)လုံးပြည့်လျှင် တစ်ပတ်။ တစ်နည်းအားဖြင့် (၁၀၈)ခါ နင်းပြီးပြီဆိုသည့် သဘောဖြစ်သည်။ မောင်းတုံးနှင့် ဆန်စေ့ တစ်ရာ့ရှစ်ခါ ထိတွေ့ပြီးပြီဆိုသည့် သဘောဖြစ်သည်။
ဤသို့လျှင် ပုတီးငါးပတ်ပြည့်လျှင် ဆန်ဖြူသည့်မောင်း၊ ပုတီးဆယ်ပတ်မှ ဆန်ဖြူသည့်မောင်းရယ်လို့ ရှိလာသည်။ အခု သူတို့မောင်းက မလှအုန်းမောင်း။ ခြောက်ပတ်မောင်း။ သူတို့မှာ နာရီမရှိ။ မှောင်ထဲတွင် ဆန်ဖြူ မဖြူ သေသေချာချာ သိနိုင်သည်မဟုတ်။ သည်တော့ ပုတီးပတ်နှင့် မောင်းထောင်းရသည်။ ပုတီးပတ်နှင့် ဆန်ဖြူချိန်ကို ကွက်တိချိန်ပြီးသား ဖြစ်သည်။
တချို့ ပုတီးပတ်များသည် မောင်းတွေကို နင်းသားတွေ မသွားချင်။ ပုတီးပတ်နည်းသည့် မောင်းမှာတော့ ‘နင်းသား’ တွေ စိတ်ချမ်းသာသည်။ သတ်မှတ်သည့် ပုတီးပတ်ပြည့်လျှင် ဆန်ချောပြီ။ ထိုအခါ ပြာရ ခပ်ရ တီးရသည်။ ဆန်ဖြူသပ်သပ်၊ ဖွဲသပ်သပ်၊ စပါးခွံသပ်သပ်။ ထို့ကြောင့် ထိုအရပ်က မောင်းစင်တွေမှာ မောင်းပုတီးကလေးတွေ ချိတ်ထားလေ့ရှိသည်။
“ကျွီ … ”
“ဂျုံး … ”
“ကျွီ … ”
“ဂျုံး … ”
ရောင်နီကလေး သွေးလာတော့မှ မီးတိုင်ခွက်ကို မှုတ်လိုက်သည်။ မနက်ခင်းကလေးမှာပေမယ့် ချွေးဥလေးတွေ သီးထနေလေသည်။
“ကောင်မ မငိုင်နဲ့နော်၊ လက်ပါသွားလို့ လင်မရဘဲနေဦးမယ်”
“လင်မရတော့ ကောင်းတာပေါ့အေ”
“ဘယ်ကောင်းပါ့မလဲအေရဲ့ … ဟီး … ဟီး … ”
“ကောင်မနော် အပျိုးပါးစပ်”
နှစ်တင်းကျသွားပြီ။ ကြိတ်ထိုးပြီး ပြာပြီး တီးပြီး ဆန်ဖြူတစ်တင်းကျကို နှစ်ကျပ် ရသည်။ တစ်နေကုန်ဆိုလျှင် ဆယ်တင်းလောက် ပြီးတတ်သည်။ တစ်ခါတစ်ခါ မောင်းပျက်လျှင်တော့ သုံးလေးတင်း။ တော်ရုံတန်ရုံ ကြိတ်ပျက်လျှင်၊ မောင်းပျက်လျှင် သူတို့ပြင်တတ်နေပြီ။ ထစ်ခနဲဆို မောင်းရှင်ကို သွားပြောလို့ကမဖြစ်။ ပြင်တတ်မှ။ ခုနစ်နှစ်သမီး၊ ရှစ်နှစ်သမီးက ထောင်းတဲ့မောင်း၊ ထိုးတဲ့ကြိတ်။ သူတို့ နားလည်နေကြပြီ။ ယောက်ျားလေးတစ်ယောက်လို ကျင်လည်နေကြပြီ။
“လင်ဆိုလို့ ညည်း ဟိုကောင်နဲ့ တွေ့သလား၊ တောင်ဖျားက ကောင်လေ”
“တွေ့သားပဲ ဈေးထဲမှာ၊ ငါလေ အူတွေယားတာ အရမ်းပဲ”
“ဟင်း … ဟင်း … မကြိုက်တဲ့လူကိုးအေ့၊ အူယားမှာပေါ့”
“ကြိုက်တဲ့လူဆို တို့တောင် သိရမှာမဟုတ်ဘူး”
“ဒါပေါ့၊ ညည်းလိုပေါ့”
“ညည်းအကောင်ကကော ပွဲတော်ရက်က ညည်းနဲ့တွေ့တာလေ”
အဲဒါပေါ့၊ အဖေနဲ့မိလို့ အရိုက်ခံရသေးတယ်”
“ကောင်းတယ်၊ ညည်းအကောင်က ခပ်ရဲရဲထဲကပါအေ”
“ရဲတာတော့ မပြောနဲ့”
“ပြောပါဦးဟယ်၊ ဘာတွေလုပ်တုန်း”
“အို … ညည်းကလည်း”
“ဟွန်း … ညည်းက ကောင်းခန်းဆိုဖြတ်ပြီ၊ ပွဲတော်ကွင်းထဲတုန်းက ပြတဲ့ ဘိုင်စကုတ်ကျနေတာပဲ”
“ညည်း ရည်းစားထားကြည့်ပေါ့ဟဲ့”
“ပြောပါဟယ်”
မိုးလင်းပြီ။ ရောင်နီနှင့်အတူ ထင်းလှည်းအီသံတွေ လမ်းပေါ်မှာ ဆူညံနေလေသည်။ သင်္ဘောမန်ကျည်းသီး နီကွေးကွေးတွေက ညက မှက်စားထားသဖြင့် မြေမှာ ပြန့်ကျဲနေလေသည်။ တိုးစိန်တို့ စကားကောင်းနေဆဲ။ တစ်ရွာလုံးက သတင်းတွေ၊ ဇာတ်ပွဲတွေ၊ ဘိုင်စကုတ်တွေ … ။
“တိုးစိန် ပုတီးဘယ်နှစ်ပတ်ရှိပတုံး”
“ဟောတော့ … ပုတီးပတ်တွေ မေ့ကုန်ပြီ”
“ညည်းက လုပ်ပြီဟယ်၊ ပုတီးကိုင်ထားပြီး စကားများနေတာကိုး”
“နေဦး၊ သုံးပတ်လား၊ လေးပတ်လား အဲ … ”
သန်းရင်က ဆန်တွေကို ဆုပ်ယူလိုက်ကာ ကြည့်သည်။
“ဖြူပြီဟဲ့၊ ခြောက်ပတ်တောင် ကျော်ပြီပေါ့၊ ညည်းနှယ်အေ … ”
တိုးစိန်က သူ့လက်ထဲက စိပ်ပုတီးကို ကိုင်ရင်းကရယ်သည်။
“တစ်ခါတလေလည်း မှားမှာပေါ့ဟယ်၊ စိပ်ပုတီးပေမယ့် မောင်းစင်ရောက်တော့ မောင်းပုတီး ဖြစ်နေတာကိုးအေရဲ့၊ အင်းလေ … တို့က ပုတီးကိုင်ထားပေမယ့် ပြောကြတာက ပေါက်ကရကိုး … နော့ … ။
* * *
(၃)
“အမေ … အမေ ထတော့၊ သွားရအောင်”
ညက လသာထဲမှာ ငယ်ဘဝတွေကို စဉ်းစားရင်း ညဥ့်တော်တော်နက်တဲ့အထိ ထိုင်နေမိသဖြင့် မျက်လုံးတွေ ဖန်စပ်နေသည်။ မထချင်သေး။ ထင်းချောင်းတွေလို မာကျောတင်းတောင့်နေသော ခြေထောက်တွေက မလှုပ်ချင်သေး။ ဒါပေမယ့် ညတုန်းက တတမ်းတတ သတိရနေမိခဲ့သော ငယ်ဘဝတွေမှ မဟုတ်တော့ဘဲလေ။ သူတောင် အပျိုးကြီးဖားဖား သမီးနှစ်ယောက်ရဲ့အမေ ဖြစ်နေမှပဲ။
တိုးစိန်ကလည်း ရှိသေးရင် ဘွားတိုးစိန် ဖြစ်နေရောပေါ့။ ခင်မေကလည်း ဒေါ်ခင်မေဖြစ်နေပြီ။ ဘာပဲဖြစ်ဖြစ် ငယ်ဘဝတွေက ကျန်ရစ်ခဲ့ပြီ။ မထချင်လို့မရတော့။ မျက်လုံးတွေ ဇွတ်ကိုဖွင့်ကာ ရေကပြင်မှာ မျက်နှာဆင်းသစ်သည်။ ပြောင်းဖူးဖက် နှစ်လိပ်နှင့် မီးခွက်ကိုကိုင်ရင်း သမီးနှစ်ယောက်နှင့်အတူ ထွက်လာခဲ့သည်။ မိုးကလင်းဖို့ တော်တော်လိုသေးသည်။ ဝါကြန့်ကြန့် လရောင်ကြည်ကြည်ကလေး ရှိနေသေးသည်။ သူငယ်ချင်း မခင်မေတို့ တိုက်ခံအိမ်ကြီး ရွာလယ်မှာဆိုတော့ တော်တော်သွားရသည်။ ခြံဝင်းကြီးက ကျုယ်သည်။ ပဲဂိုဒေါင်၊ ပဲစက်၊ စပါးကျီ၊ ကောက်ရိုးစင်တွေကို ဖြတ်လျှောက်ကာ မောင်းစင်ရှိရာ ခြံနောက်ဘက်ကို ဝင်လာတော့ မခင်မေတို့ပင် မနိုးကြသေး။
မနေ့က သားအမိတွေ ထားခဲ့သော ကြိတ်ထိုးပြီးသား လုံးတီးတွေကို မောင်းခွက်ထဲထည့်သည်။ သမီးငယ်က ဂုန်နီအိတ်တွေ ဖြန့်ခင်းသည်။ အကြီးမက မီးတိုင်ခွက်ကလေးကို ထွန်းသည်။ အငယ်မနှင့် အမေသန်းရင်က မောင်းတုံးပေါ် ခြေတင်လိုက်သည်။ မောင်းစင်လက်ကိုင်တန်းမှာ ချိတ်ထားသော မောင်းပုတီးကို အမေသန်းရင် လှမ်းဖြုတ်သည်။
“ပေးပါ အမေရယ်၊ အမေ ပုတီးပတ်မှားကမှားနဲ့”
အမေသန်းရင်က သမီးငယ်စကားကြောင့် ရင်တွေ သိမ့်ခနဲ ခုန်သွားသည်။ သူကလည်း သူပါပဲလေ။ ပုတီးပတ်တွေ မကြာခဏ မှားတတ်သည်။ ပုတီးပတ်တွေမှားပြီး ကျော်သွားရင် ဆန်လည်းနာတယ်။ အချိန်လည်းကုန်တယ်။ လူလည်း ပင်ပန်းတယ်။ တစ်ခါတစ်ခါ သတိထားနေရင်းက ပုတီးပတ်တွေမှားသည်။ စိတ်တွေက ပျံ့လွင့်နေတတ်သည်ကိုး။ ညတုန်းကတောင် သူတို့အပျိုတုန်းက မောင်းထောင်းရင်း ပုတီးပတ်တွေမှားတာ သတိရနေခဲ့သေးသည်ပဲ။
“မမှားအောင်စိပ်ပါ့မယ် သမီးရယ်”
အမေသန်းရင်က ပထမဆုံးပုတီးလုံးကို လက်မနှင့်ပွတ်ရင်း နင်းရမည့် အချိန်ကလေးကို အသက်အောင့်ရင်း စောင့်နေလိုက်သည်။
“နင်းတော့”
“ကျွီ … ”
“ဂျုံး … ”
“ကျွီ … ”
“ဂျုံး … ”
မောင်းခွက်ထဲ မောင်းတုံးကျတိုင်း ပုတီးလုံးကလေးတွေ စိပ်စိပ်ချသည်။ အမေသန်းရင်က မျက်လုံးတွေကို မှိတ်ထားလိုက်သည်။ ပုတီးလုံးကလေးတွေကို စိတ်ချတိုင်း အနိစ္စ၊ ဒုက္ခ၊ အနတ္တလို့ နှုတ်ခမ်းတွေ လှုပ်လှုပ်နေအောင်ရွတ်ရင်း လက္ခဏာရေးသုံးပါးကို ရှုမှတ်သည်။ အနိစ္စ၊ ဒုက္ခ၊ အနတ္တ၊ အနိစ္စ၊ ဒုက္ခ၊ အနတ္တ။ မောင်းခွက်ထဲ မောင်းတုံးကျသံကို သူ မကြားရတော့။ အနိစ္စ၊ ဒုက္ခ၊ အနတ္တလို့ပဲ သူကြားနေသည်။
သူ့ဘဝမှာ ဂုဏ်တော်ပုတီးစိပ်ဖို့ အချိန်မရခဲ့။ တစ်ခါတစ်ရံ ကြုံကြိုက်လို့ တရားလေးနာရ၊ ဆွမ်းကလေး လောင်းရတာကလွဲလျှင် ဘဝကူးကောင်းဖို့ ဘာမှမလုပ်နိုင်ခဲ့။ ဘာပဲဖြစ်ဖြစ် ဂုဏ်တော်ပုတီး မဟုတ်သည့်တိုင် ရသမျှအချိန်ကလေးမှာ လက်မနှင့် လက်ညှိုးကြားမှာ ပုတီးလုံးကလေးတွေ ရှိနေတုန်းမှာ သူ့စိတ်တွေ ရှင်သန်နေဖို့ပဲလိုသည်။ လက္ခဏာရေးသုံးပါးကို ရှုမှတ်နေဖို့ပဲလိုသည်။ သူ့နားထဲမှာ အနိစ္စ၊ ဒုက္ခ၊ အနတ္တတွေပဲ လှိုင်းထနေသည်။ စိတ်ကို သည်အပေါ်မှာပဲ တည့်တည့်ကလေး တည်နေအောင် ချုပ်ဖမ်းထားဖို့ ကြိုးစားသည်။
“အမေ ပိုက်ဆံရှင်းရင် ဒေါ်ပုကြီးကို ဆန်ဖိုးပေးဦးမှ အမေရေ၊ မနေ့က တောင်းတယ်တော့”
ပိတ်ထားသော မျက်လုံးတွေ ပွင့်သွားရပြန်သည်။ စိတ်တွေ ကသောင်းကနင်း လွင့်စင်သွားပြန်သည်။ မပုကြီးကို ပေးစရာရှိသည်ပဲ။ ကနေ့ မခင်မေဆီက ပိုက်ဆံနည်းနည်းတော့ တောင်းရလိမ့်ဦးမည်။
ထိုစဉ်မှာပင် ဒေါ်ခင်မေတို့ တိုက်ခံအိမ်ကြီးပေါ်က ကြေးစည်ရိုက်သံ လွင်လွင်ကလေးကို ကြားရသည်။ ဖွင့်ထားသော ဘုရားခန်းပြတင်းဝဆီက အမွှေးတိုင်ရနံ့က နံနက်ခင်း လေပြည်ထဲမှာ ဝေ့ဝဲနေသည်။ အမေသန်းရင်က ပြတင်းဝကို လှမ်းကြည့်သည်။ နံနက်အရုဏ်မှာ ဂုဏ်တော်ပုတီးကို ကိုင်ရင်း သူတို့သားအမိကို ငုံ့ကြည့်နေသော သူ့သူငယ်ချင်း မခင်မေကို အမေသန်းရင် လှမ်းမြင်နေရသည်။
“မခင်မေ ကျေးဇူးရှင်ကြီး ကျန်းမာလို့ ချမ်းသာပါစေတော်”
အမေသန်းရင်က နှုတ်မှ တတွတ်တွတ်ရွတ်ရင်း မေတ္တာပို့သည်။ အငယ်မက သူ့ကို မျက်စောင်းထိုးရင်း သူ့လက်ထဲက မောင်းပုတီးကလေးကို ဖျတ်ခနဲ ဆွဲလုတာကို ခံရတော့မှ အမေသန်းရင် အယောင်ယောင်အမှားမှား မောင်းနင်းတုံးကို ရပ်ထားလိုက်သည်။
“ဒါ ဂုဏ်တော်ပုတီး မဟုတ်ဘူး အမေရဲ့၊ မောင်းပုတီး၊ မေတ္တာတွေချည်း ပို့မနေနဲ့ဦး၊ ပုတီးပတ်တွေ မှားကုန်ပြီ၊ အမေကလေ … ”
မျက်တောင်မွေးတွေ ကျွတ်နေသည့် အမေသန်းရင် မျက်ခမ်းစပ် မျက်လုံးအိမ်ကလေးထဲက မျက်ရည်ပေါက်တွေ ကျနေဆဲမှာပင် ကြေးစည်ရိုက်သံတစ်ချက် လွင့်မျော ရောက်ရှိလာပြန်သည်။
(အကောက်ခွန် နှစ်လည်မဂ္ဂဇင်း၊ ၁၉၉၀ ပြည့်နှစ်၊ ဒီဇင်ဘာလ)
* * * * *
credit to mmcyber (ငွေဇင်ယော်)
No comments:
Post a Comment