“ဟင်.. အဲလိုကြီးလား”

“ဟင်.. အဲလိုကြီးလား” ကျွန်တော် အံ့ဩတကြီးမေးလိုက်တာကို မအံ့ဩတဲ့ပုံစံနဲ့ ကျွန်တော့ မိတ်ဆွေ စာရေးဆရာက မျက်လုံး တစ်ချက်လှန် ကြည့်တယ် ကိုယ့်လူရေ။ သူ့ပုံစံက ကျွန်တော် ဒီလိုမေးလာမယ် ဆိုတာ သိပြီးသားဆိုတဲ့ ပုံမျိုးပေါ့။


“ကိုယ်လည်း အိပ်မက်များလားလို့ ကိုယ့်ကိုယ်ကိုယ် ပြန်ဆိတ်ကြည့်ရတယ်။ ဒါပေမယ့် အိပ်မက်မဟုတ်ဘူး၊ တကယ်ကွ”  အင်း.. ဒီလိုဆို ခက်ချေပေါ့။


အရင်က ကြားဖူးဖတ်ဖူးတဲ့ စကားငှားသုံးရရင် 'ကြားရ ကြားရ နားဝမှာမသက်သာပါ့လား' လို့ပဲဆိုရမလား၊ 'တော်ရှာပါတယ် အေ့ တော်ရေ့' လို့ပဲပြောရကောင်းမလား။ ကိုယ့်လူလည်း စဉ်းစားကြည့်နိုင်အောင် ပြောပြရရင် ဇာတ်လမ်းလေးက ဒီလို..ဒီလို။


စစ်ကိုင်းတိုင်းဒေသကြီးထဲက မြို့လေးတစ်မြို့ ဖြစ်ပြီး ကားနဲ့ဆိုရင် ခက်ခက်ခဲခဲ ခရီးနှင်ရတဲ့ ကလေးမြို့ဆီကို စာရေးဆရာ ဇော်ခိုင်ဦးနဲ့ အခြား စာရေးဆရာ တစ်ဦး၊ စာရေးဆရာမ တစ်ဦးတို့ စာပေဟောပြောပွဲ ဖိတ်လို့ ရောက်သွားကြပါသတဲ့။


ပွဲက ကလေးမြို့က ကားအသင်း တစ်သင်းရဲ့ ကထိန်အောင်ပွဲအဖြစ် အောင်ရတနာကျောင်းတိုက်မှာ ကျင်းပခဲ့တာပါ။ ပြီးခဲ့တဲ့ နိုဝင်ဘာလ သုံးရက် နေ့ကပေါ့။


အဲဒီမှာ ဟောပြောပွဲည မရောက်ခင် နေ့ခင်းပိုင်းမှာ လက်ဖက်ရည်ဆာလာတဲ့ စာရေးဆရာအပေါင်းဟာ မြို့ခံတစ်ယောက်နဲ့အတူ မြို့ထဲက လက်ဖက်ရည်ဆိုင် တစ်ဆိုင်ဆီကို ထွက်ခဲ့ကြပါရော။


မြို့ထဲက စည်ကားတဲ့ လက်ဖက်ရည်ဆိုင်ဆိုတော့ လူတွေကလည်း စုစုခဲခဲ စည်စည်ကားကားပေါ့လေ။


စာရေး ဆရာတို့လည်း ၀င်ထိုင်ကြတာပေါ့။ ဒီမှာပဲ စာရေးဆရာတို့ ထိုင်ထိုင်ချင်း ဆိုင်ရှင်အမျိုးသမီးက ကောင်တာကနေ ကိုယ်တိုင် ကိုယ်ကျ ထလာပြီး စာရေးဆရာတို့ အုပ်စုထဲက စာရေးဆရာမကို ထောင့်ချိုးအကွယ်လေးကို ပြောင်းထိုင်ဖို့ လာပြောပါသတဲ့။
အလို၊ ကလေးမြို့က လက်ဖက်ရည်ဆိုင်များဟာ ကက်စတန်မာ စိတ်ကြိုက် ထိုင်ချင်တိုင်း ထိုင်လို့ မရလေရော့သလား။
လက်ဖက်ရည်သောက်သူတွေ များလွန်းလို့ ၀ိုင်းမှာ လူထပ်ဖြည့်ချင်တာကြောင့်များလား။ ဒါမှမဟုတ် တနယ် တရပ်ကလာရတဲ့ စာရေးဆရာမမှန်း သိပြီး လေသင့်ရာထိုင်မိရင် လေစိမ်းမိမှာ စိုးရိမ်လို့ ဂရုတစိုက်ပြုမူလေရော့ သလား။
ဒီမှာပဲ စာရေးဆရာ ဇော်ခိုင်ဦးက ဆက်ပြောပြတော့ ကျွန်တော်လည်း 'ဟင်.. အဲလိုကြီးလား' လို့ မေးမိတာပါပဲ။


“အဲဒီဆိုင်မှာ ထိုင်နေတဲ့သူတွေက အနည်းဆုံး အယောက် ၄၀ လောက်ရှိတယ်။ တီဗီတစ်လုံးနဲ့ ဇာတ်ကားပြနေတာကို ၀ိုင်းကြည့် နေကြတာ။ အစပိုင်းတော့ ကိုယ်လည်း ရိုးရိုးဇာတ်ကားပဲ ထင်နေတာပေါ့။ နောက်မှ ညစ်ညမ်းဇာတ်ကားမှန်း သိရတာ” တဲ့။


ဪ.. ဒီမိုကရေစီနိုင်ငံတော်သစ်ကြီးအဖြစ် အသွင်ကူးပြောင်းရာမှာ လွတ်လပ်ခေတ်မီစွာ ပါဝင်နေကြလေရော့သလား။
မြို့လယ်ကောင်မှာ ဟင်းလင်း ဖွင့်ထားပြီး ယောက်ျားမိန်းမ၊ အများသူငါ ဥဒဟို ၀င်ထွက်သွားလာနေကြတဲ့ နေ့ခင်းကြောင်တောင် မွန်းလွဲ ၂ နာရီ အချိန်လောက်ကြီးမှာ ဒွေးနှစ်ဖော်ဟ၀ှာပြုနေတာကို ပြတဲ့သူ ကပြ၊ လက်ဖက်ရည်သောက်ရင်း အားပေးနေသူတွေ ကလည်း အားရ ပါးရပါပဲတဲ့။


မျက်နှာတွေ ရှိန်းဖိန်းတက်လာလို့ စာရေးဆရာတို့ လူသိုက် ထပြန် ပြေးရပါပေါ့။
ဘာကြောင့်လဲ။
ဘာကြောင့် ဒီလို ရဲရဲ တင်းတင်း လုပ်ရဲတာလဲ။
ဘာကြောင့် ဒီလို ရဲရဲ တင်းတင်း လုပ်ခွင့်ရနေတာလဲ။
သူတို့ကို တားမယ့်သူတွေကရော။


မဟုတ်မမှန်တာ လုပ်ဖို့အရှက် အကြောက်ကြီးပါတယ်ဆိုတဲ့ မြန်မာ လူမျိုးတွေကြားမှာ ဒီလိုလူတွေ ဘယ်လောက်များနေပြီလဲ။


“တော်တော်ကို မျက်နှာပူစရာ၊ ရှက်စရာ ကိစ္စပါပဲ။ ကောင်တာထိုင်တဲ့ ဆိုင်ရှင် အမျိုးသမီးမျက်နှာကလည်း အပြောင်းအလဲမရှိ ပုံမှန်ပဲ။ ကျွန်တော်တို့နဲ့ ပါလာတဲ့ မြို့ခံကို မေးကြည့်တော့ 'ဟုတ်တယ် အစ်ကိုရေ၊ ဒီလို ဇာတ်ကားတွေပြမှ ဆိုင်တွေက လူစည်လို့ ပြရတာ' တဲ့။


ကျွန်တော် ဒီလို အဖြစ်အပျက် ကြုံရတာကို တော်တော်အံ့ဩမိတယ်။ ကူးစက်ရောဂါမျိုး ဖြစ်တယ်ဆိုတာက တားမြစ်လို့ ရဦးမယ်၊ အခုလို မြန်မာ့လူ့ အဖွဲ့အစည်းရဲ့ ကုတင်ခြေရင်းကို အလွယ်တကူရောက်လာတဲ့ မဖွယ်မရာ ဇာတ်ကားတွေကို အများသူငါ လာထိုင်ကြတဲ့ လက်ဖက်ရည်ဆိုင်မှာ စီးပွားရေးကြောင့် ဖွင့်ပြထားရပါတယ် ဆိုတာမျိုးက တွေးကြည့်ရင် တော်တော်ကြောက်စရာ
ကောင်းနေပါတယ်” လို့ ရွှေအမြုတေ စာပေဆုရထားတဲ့ ဆရာ ဇော်ခိုင်ဦးက စိတ်မသက်မသာနဲ့ ပြောပါရဲ့။


ကလေးမြို့ဟာ ကားလမ်းက သွားရခက်ပေမယ့် လေဆိပ်ရှိတဲ့ မြို့ကြီး တစ်မြို့ပါ။ မြို့အရှေ့ပိုင်းမှာ မြန်မာ လူမျိုးတွေ နေထိုင်မှုများပြီး လက်ဖက်ရည်ဆိုင် အများအပြား ရှိကြောင်း၊ အဓိက လမ်းမတွေနဲ့ တစ်လမ်း၊ နှစ်လမ်းသာ ကွာဝေးတဲ့ အတွင်းပိုင်း လမ်းတွေထဲက လက်ဖက်ရည်ဆိုင် အချို့မှာလည်း အဲဒီလိုဇာတ်ကားတွေ ပြတယ်လို့ မြို့ခံက ပြောကြောင်း စာရေးဆရာကပြောပါတယ်။


အင်း၊ ခေတ်..ခေတ်။ တားမရ ဆီး မရ၊ မှန်းမရ ဆမရ၊ သူဖြစ်ချင်သလို ဖြစ်နေပါပေါ့လား။
လူမှုကွန်ရက် အင်တာနက်မှာ ဟိုလိုဒီလို ဇာတ်လမ်းတွေ ပြန့်သွားတဲ့ ဟို မင်းသမီးလေးက နာမည် မကျဘဲ ဟုန်းဟုန်းထသွားပါတယ်။
ဒီလထုတ် မဂ္ဂဇင်းတစ်စောင်မှာ ဖော်ပြထားတဲ့ ပွဲတက်လာတဲ့ အဆိုတော် သရုပ်ဆောင်မလေးတစ်ယောက် ၀တ်စားထားပုံက အပေါ်က ဇာပ၀ါပါး၊ အောက်ကရင်စည်းလေးနဲ့ ဗိုက်သားက ထင်ထင်ရှားရှား။
လမ်းပေါ်ထွက်လိုက်ရင်၊ စာစောင် မဂ္ဂဇင်းတွေထဲ ကြည့်လိုက်ရင် ကလေးမလေးတွေဝတ်တဲ့ ဘောင်းဘီကလေးတွေက အပြိုင်အဆိုင် တိုတိုလိုက်လာသလားလို့။


ဒီလိုပြောနေလို့ ကျွန်တော်ကရော ဒါတွေ မြင်ရ ရှု့ရတာ မကြိုက်ဘူးလားတဲ့။
ဟုတ်ကဲ့၊ ဒီလိုမေးလာခဲ့ရင် ကျွန်တော်ဟာလည်း သွေးနဲ့ကိုယ်၊ သားနဲ့ကိုယ် ဖွဲ့စည်းထားတဲ့ ယောက်ျားသား တစ်ယောက်ပါ လို့ပဲ ပြောပါရစေတော့ခင်ဗျ။
ဒါပေမယ့်၊ ဒါပေမယ့်ပေါ့လေ..။


နိုင်ငံအရေး၊ အမျိုးသားရေး လှုပ်ရှားမှုတွေကို တက်ကြွစွာလုပ်သူတွေက လုပ်နေချိန်မှာ တစ်ဖက်မှာ စီးပွားရေးကြောင့်ဆိုပြီး အရှက်တရားကို ခွာကာ မဟုတ်မဟပ်တွေကို လူမြင်ကွင်းရှေ့ ပြောင်ပြောင်တင်းတင်း လုပ်ဝံ့သူတွေကို တွေ့ရတဲ့အခါ၊ ယဉ်ကျေးမှုကို ထိန်းဖို့ဆိုပြီး တစ်ဖက်မှာ ဆို၊ က၊ ရေး၊ တီးပြိုင်ပွဲမျိုး ၀င်သူတွေက ၀င်နေချိန် မှာ တစ်ဖက်မှာ လက်ဖက်ရည်ဆိုင်ထိုင်ပြီး မောင်နဲ့ နှမ၊ သားနဲ့အမိ မကြည့် မမြင်ဝံ့တာတွေကို လူမြင်ကွင်းမှာ အုပ်စုလိုက် ၀ိုင်းကြည့် နေတာမျိုးကို ကြားရတဲ့အခါ.. ကြောက်မိ၊ အံ့ဩမိ တာတော့ အမှန်ပါပဲ။


အံ့ဩလို့မှ မဆုံးသေးဘူး၊ ကလေးမြို့က မိတ်ဆွေတစ်ယောက်နဲ့ အင်တာနက်မှာ တွေ့မိပါတယ်။


သူကလည်း ဂျာနယ် စာမျက်နှာတွေပေါ်မှာ တွေ့တွေ့နေရတဲ့ မီဒီယာသမားတစ်ယောက်မို့ ကလေးမြို့က လက်ဖက်ရည်ဆိုင် အကြောင်း ထပ်မေးမိတော့...


“ဟုတ်တယ်ဗျ။ အခုနောက်ပိုင်းတော့ အဲဒီဘက် သိပ်မရောက်ဖြစ်တော့ဘူး။ အဲဒီနားမှာ ဆိုင်နှစ်ဆိုင်က အပြိုင်ဖြစ်နေတာ၊ တခြား ဆိုင်တွေက သူတို့လောက် မဆိုးဘူး။ တစ်ဆိုင်နဲ့ တစ်ဆိုင်က ဓာတ်မီးတိုင် (၅) တိုင် လောက်ပဲဝေးတာ။ ကျွန်တော်တို့မြို့ ဖြစ်နေတော့၊ ဒီအကြောင်းကြီးကလည်း မရေးမကောင်းဖြစ်နေတာ” လို့ ပြောပါတယ်။


အဲဒီ ဆိုင်မှာ သမီးအပျိုနှစ်ယောက်ရှိပြီး တစ်ယောက်ကဘွဲ့ရလို့ သိလိုက်ရတော့ ကျွန်တော့မှာ 'ဟင်..အဲလိုကြီးလား' ဖြစ်သွားရ ပြန်ပေါ့။ အခုနောက်ပိုင်းတွေ့ရတဲ့ မှုခင်းသတင်းတွေထဲမှာ မုဒိမ်းမှုတွေကို အရင်ကထက် အတွေ့ရများလာသလားလို့။


မယုံကြည်နိုင်စရာ အဆန်းတွေလည်း ပါရဲ့၊ နိုင်ငံရပ်ခြားက သတင်းတွေဆို ပိုဆိုးပါတယ်။
တစ်နေ့က မော်ဒန်သတင်း ဂျာနယ်ထဲမှာ ဖတ်လိုက်ရတာ၊ ဒီနိုင်ငံမှာ တစ်နှစ် မပြည့်သေးတဲ့ ကာလအတွင်း ကလေးသူငယ် အမှုပေါင်း (ကလေးငယ် တွေသာဖြစ်ပြီး တခြားမပါသေးပါဘူး) ၄၄၀ ကျော်မှာ ၇၀ ကျော်က ကလေးငယ် တွေကို အဓမ္မကျင့်စော်ကားမှုတွေ ဖြစ်ကြောင်း တွေ့လိုက်ရပါတယ်။


ကျွန်တော်လေ.. အမျိုးသားရေးနဲ့ ဆိုင်တဲ့ ဒီလိုလူမှုရေး ယဉ်ကျေးမှု နယ်ပယ်သာ မကပါဘူး၊ မြန်မာတွေနဲ့ ပတ်သက်ပြီး ဘယ်နယ်ပယ် မှာပဲဖြစ် ဖြစ် 'ဟင်..အဲလိုကြီးလား' လို့ ထပ်ရေရွတ်ဖြစ်မှာကို ကြောက်မိပါရဲ့ ကိုယ့်လူရာ။

လန်းစေသော်
Myanmar News Now