‘လက်ရှိလူငယ်တွေက အရမ်းအလုပ်လုပ်ကြပါတယ်။ ရည်ရွယ်ချက် ကြီးကြီးတွေလည်း ထားတတ်ကြပါတယ်။ ဒါပေမယ့် ကိုယ့်အိပ်မက်တွေကို ဘယ်လို အကောင်အထည် ဖော်မလဲဆိုတဲ့ တိကျတဲ့စနစ်ကျနမှုရှိဖို့ လိုပါတယ်’လို့ ပြောခဲ့သူကတော့ ကာတွန်းအော်ပီကျယ် ပဲဖြစ်ပါတယ်။ အင်ဂျင်နီယာ တစ်ယောက်ဖြစ်ခဲ့သူ ကာတွန်းအော်ပီကျယ်က သူကျင်လည်ရာ ပတ်ဝန်းကျင်မှ အမြီးအမောက် မအပ်စပ်တဲ့ အရာတွေကို ကာတွန်းအနုပညာကို အသုံးပြုပြီး သရော်ဟန်ဖြင့် တင်ပြကာ လျှောက်လှမ်းခဲ့သလို လူသားတစ်ဦးအနေဖြင့်လည်း မိမိပတ်ဝန်းကျင်၊ မိမိရှင်သန်ရာ နေရာတွေရဲ့ ကောင်းကျိုးတွေအတွက်လည်း တတ်စွမ်းသမျှ အားထုတ်လုပ်ကိုင်လျက်ရှိတဲ့ အနုပညာရှင် တစ်ဦးလည်းဖြစ်ပါတယ်။ ဒီအတွက်ကြောင့် ကာတွန်းအော်ပီကျယ်ရဲ့ခံယူချက်နဲ့ သူရဲ့အမြင်စတာတွေကို မေးမြန်းဖြစ်ခဲ့သည့် အခါဝယ် . . .
မေး- ဆရာအနေနဲ့ အရင်က Satire တွေကို အဓိကတင်ပြခဲ့ပေမယ့် နောက်ပိုင်း တခြားနယ်ပယ်တွေမှာလည်း ပါဝင်လုပ်ကိုင်ဖြစ်ခဲ့တဲ့ ဆရာရဲ့ခံယူချက်ကို သိပါရစေ။
ဖြေ - လုပ်တာကတော့ ကာတွန်းဆွဲတာ တစ်ခုတည်းပဲ။ အရင်ကတော့ လောကကြီးရဲ့ ကမောက်ကမ ဖြစ်နေ တာတွေကို စေတနာနဲ့ ဖော်ပြထောက်ပြခဲ့တာ။ အဲဒီထောက်ပြတာ တစ်ခုတည်းတင် ကာတွန်းက အစွမ်းထက် တာမဟုတ်ဘူး။ Information ပေးတာတို့၊ Educate လုပ်တာတို့၊ Communicate လုပ်လို့လည်း ရတယ်။ အားသာချက် အားနည်းချက်ရှိတယ်။ ဥပမာ ပတ်ဝန်းကျင် ထိန်းသိမ်းရေး ဆို ကာတွန်းတစ်ခုတည်းနဲ့ အပြည့်အစုံသိအောင် တင်ပြလို့ မရဘူး။ ဒါပေမယ့် မိတ်ဆက်ပေးလို့တော့ ရတယ်။ နောက်ကာတွန်းက အရုပ်ပါတယ်။ ပေါ့ပေါ့ပါးပါးဖြစ်တယ်။ ဒါကြောင့် ကာတွန်းကို အသုံးပြုတာပါ။ အရင်လို သရော်တာ ထောက်ပြတာတင် မဟုတ်ဘဲ တခြားနေရာတွေမှာလည်း သုံးလို့ရတယ်ဆိုတာ သိတဲ့အတွက် တခြား Field တွေမှာလည်း လုပ်ပေး ဖြစ်တာပါ။ ပြောရမယ်ဆိုရင် တစ်နေရာကို သွားတဲ့အခါ လူကြုံပါး လိုက်သလိုပေါ့။ ကိုယ့်အနေနဲ့ မယူသွားဘဲ တချို့လူတွေလို လက်ဆွဲ အိတ်လေး ပေါ့ပေါ့ပါးပါးနဲ့ သွားချင်တာပေါ့။ ဒါပေမယ့် ဟိုကလူတွေ အဆင်ပြေပါစေဆိုပြီး ယူသွားပေးတယ်။ ဒီလိုသဘောပဲ။ အနုပညာရှင် တစ်ယောက်အနေနဲ့ ကိုယ့်အနုပညာတစ်မျိုးတည်း လုပ်ရင်ရတယ်။ ဒါပေမယ့် အခြေအနေအရ လုပ်သင့်တဲ့ အချိန်ဖြစ်တဲ့အတွက် ဒါတွေကိုပဲ လုပ်တဲ့ သဘောပါ။
မေး - ပရိသတ်ကို လွှမ်းမိုးမှုအား ကောင်းတဲ့ အနုပညာရှင်တွေအနေနဲ့ ကိုယ်တင်ပြမယ့် ကိစ္စတွေအပေါ် ဘယ် လိုမျိုး ပြင်ဆင်သင့်ပါသလဲ။
ဖြေ - ကျွန်တော်စောစောက ပြောသလို ကာတွန်းကိုအသုံးပြုပြီး တခြား Field တွေကို တင်ပြတယ်ဆိုတာက မိတ်ဆက်တဲ့ သဘောပဲ။ ပညာရှင်တွေလောက် ထဲထဲဝင်ဝင် မသိဘူး။ ဒါပေမယ့် အဲလို မိတ်ဆက်ပေးနိုင်ဖို့ အတွက် စာတွေဖတ်ရတယ်။ ပညာရှင်တွေကိုလည်း မေးမြန်းရတယ်။ အနုပညာရှင်တွေနဲ့ လူမှုရေးပဲဖြစ်ဖြစ်၊ ပတ်ဝန်းကျင် ထိန်းသိမ်းရေးပဲဖြစ်ဖြစ် တခြားဘယ်ကိစ္စမှာမဆို ပါဝင်တယ်ဆိုရင် သာမန်ထက်တော့ အာရုံစိုက် ကြတယ်။ လိုက်လုပ်မယ်လို့ ပြောတာတော့ မဟုတ်ဘူးနော်။ ဆွဲဆောင်မှုတော့ ရှိတယ်ပေါ့။ ဒါပေမယ့် အနု ပညာရှင်အနေနဲ့က အင်ဖော်မေးရှင်း ပဲဖြစ်ဖြစ်၊ ဗဟုသုတပဲဖြစ်ဖြစ် ဖြန့်ဝေမယ်ဆိုရင် ကိုယ်လုပ်မယ့်အကြောင်း အရာကို နည်းနည်းတော့ သိထားသင့်တယ်။ အဲလိုမဟုတ်ရင် ကိုယ်လုပ်တဲ့ဟာက အမှားဖြစ်နိုင်တာပေါ့။ ပေး ချင်တာတခြား ဟိုကရလိုက်တာ တခြား ဖြစ်သွားနိုင်တယ်။ ဥပမာ ရေကာတာ တစ်ခုစီကို အနုပညာရှင် တစ်စုက ခဏသွား၊ ရေကာတာကြီး ဘယ်လိုကောင်းတယ်. . . ဆိုပြီးတေးရေးတဲ့သူက ရေးပေး၊ ဆိုတဲ့သူက ဆို ကြတယ်။ ဒါပေမယ့် ဘယ်လိုပတ်ဝန်းကျင် ထိခိုက်တယ်။ သဘာဝ ရေမြေတောတောင်အပေါ် ဘယ်လို သက်ရောက်မှု ရှိတယ်ဆိုတာ မသိဘဲ ရေကာတာကြီးကောင်းတယ်၊ ကောင်းတယ် ပြောတာလိုမျိုးတွေပေါ့။ ပြောရ မယ်ဆိုရင် ကောင်းမွန်သော၊ မှန်ကန်သော၊ အကျိုးရှိသော Message ရောက်ဖို့ဆိုတာ အနုပညာရှင်မှာ လည်း တာဝန်ရှိတယ်။
မေး - စာပေဟောပြောပွဲတစ်ခုမှာ ဆရာက နှမ်းတစ်စေ့နဲ့ ဆီဖြစ်တဲ့ အကြောင်းကို ဟောပြောခဲ့ပါတယ်။ ဆရာ ရဲ့ ယုံကြည်မှုနဲ့ပတ်သက်ပြီး ဆရာရင်ထဲမှာ ပြောချင်တဲ့ စကားများရှိရင် ပြောပြပေးပါ။
ဖြေ - ဟုတ်တယ်။ နှမ်းတစ်စေ့ကို ခြစ်ကြည့် ဆီလေးတက်လာတာတွေ့ ရမယ်။ ဆိုလိုချင်တာက လူတွေက နိုင်ငံရေးပဲဖြစ်ဖြစ်၊ ပတ်ဝန်းကျင် ထိန်းသိမ်းရေးပဲဖြစ်ဖြစ်၊ သဘာဝ ဘေးအန္တရာယ်နဲ့ ပတ်သက်တာပဲ ဖြစ်ဖြစ် တစ်ယောက်ချင်းစီက အသိစိတ်ဓာတ်ရှိရှိ ပါဝင်သင့်တယ်။ ပါဝင်မှလည်း အောင်မြင်နိုင်မှာပါ။ ယာဉ် တစ်စီးနဲ့ခရီးသွားသလို အဲဒီယာဉ် နွံနစ်သွားရင်လည်း အားလုံးဝိုင်းတွန်း ရမယ်။ ပျက်ရင်လည်း ဒီလိုပဲ။ ထိုင်ခုံမှာ အခန့်သားထိုင်နေရုံနဲ့ ခရီးက တွင်မှာ မဟုတ်ဘူးလေ။ ပြည်သူလို့ ပြောလိုက်တာနဲ့ တစ်ယောက်ချင်း မပါတော့သလို ဖြစ်နေတယ်။ ပြည်သူဆိုတာ တစ်ယောက်ချင်းအားလုံး ပေါင်းထားတာ။ အမှန်တော့ တစ်ယောက်ချင်းစီ စုထားတာ။ ထမင်းပန်းကန်တစ်ခုမှာ ထမင်းစေ့တွေ စုထားတယ်ဆိုရင် ကောင်းတာပေါ့။ဒါမှမဟုတ် ကျောက်ခဲစေ့လေးပဲဖြစ် ဖြစ်၊ ကြွက်ချေးပဲဖြစ်ဖြစ်ပါရင် သိပ်ဆိုးတယ်။ အားလုံး ထမင်း ဖြစ်နေသင့်တာပေါ့။
မေး - Open Minded ဆိုတဲ့ အနုပညာရှင်တွေကြားက စကားနဲ့ပတ်သက် ပြီး ဆရာရဲ့အမြင်လေးကို သိပါရစေ။
ဖြေ - အဲဒါကပြောရတာ တော်တော်ခက်တယ်။ ပွင့်ပွင့်လင်းလင်း ပြောတာတို့၊ ထင်သလိုလုပ်လိုက်တာနဲ့မဆိုင် ဘူး။ သူ့မှာမြင့်မြတ်ခြင်း ဆိုတာလည်း ပါနေတယ်။ အနုပညာရှင်တစ်ယောက် ရဲ့ရှင်သန်တဲ့ Life Style ပေါ်မှာ လည်း မူတည်တယ်။
မေး - ဆရာက အရင်က ခြောက်ကွက် ကာတွန်းတွေကို အများဆုံးရေး ဆွဲဖြစ်ခဲ့ပေမယ့် နောက်ပိုင်းမှာ တစ် ကွက်ကာတွန်းတွေကို ဘာကြောင့် ပြောင်းလဲရေးဆွဲခဲ့ပါသလဲ။
ဖြေ - လွန်ခဲ့တဲ့အနှစ် ၃၀ လောက်က ဆွဲဖြစ်တာပါ။ ကိုယ့်ပြောချင်တာတွေ က ကွေ့ဝိုက်၊ ဝေ့၀ိုက်ပြီး ပြောရမယ့် အတွက် ရေးဖြစ်တာပါ။ ဒီ့နောက်ပိုင်းတော့ တစ်ကွက်တည်းနဲ့ ထိထိ ရောက်ရောက်ပြောနိုင်ရင် တစ်ကွက် ကာတွန်းဆွဲတယ်။
မေး - လက်ရှိတစ်ကွက် ကာတွန်းတွေနဲ့ပတ်သက်ပြီး ဆရာဘယ်လိုမျိုး သုံးသပ်ပေးချင်ပါသလဲ။
ဖြေ - ခုတစ်ကွက် ကာတွန်းတွေမှာ လူနှစ်ယောက်ရပ်ပြီး ပြောတဲ့စကားလုံးဟာသတွေ များနေတယ်။ ဥပမာ ကြည့်လို့ကိုမရဘူး။ မျက်စိကျိန်းနေ လို့ဆိုတာမျိုး။
မေး - ဆရာကော်မစ်ရေးဆွဲဖို့ ကြိုးစားခဲ့ဖူးတယ်လို့ သိရပါတယ်။ ဆရာရှေ့အနာဂတ်မှာ ဘယ်လိုအရာတွေ လုပ်ဆောင်ဖို့ စီစဉ်ထားပါသလဲ။
ဖြေ - ကြိုးစားခဲ့ဖူးတာမဟုတ်ဘူး။ အခုလည်း ကြိုးစားနေတာပဲ။ အချိန် မရသေးလို့ မရေးဖြစ်တာပဲ ရှိတယ်။ ဒါပေမယ့် ကျွန်တော်ရေးမယ့် ရုပ်ပြက လူတစ်ယောက်ရဲ့ဘ၀အကြောင်းပဲ ဖြစ်ဖြစ်၊ ဘ၀ဖြတ်သန်းမှုပဲဖြစ်ဖြစ်၊ နိုင်ငံတစ်နိုင်ငံရဲ့ အကြောင်းပဲဖြစ်ဖြစ် ဖြစ်ရပ်မှန်ကို ရေးတာမျိုးပါ။ သူ့ကို Graphic Novel လို့ခေါ်တယ်။ လုပ်ဖို့အားလည်း အားထုတ်တယ်။ အလုပ်တွေနဲ့ မအားဘူး ဖြစ်နေပါတယ်။
မေး- Graphic Novel ကို ဘာကြောင့် စိတ်ဝင်စားတာလဲ။ ဘယ်လို ထူးခြားချက်တွေကို ပေးနိုင်ပါသလဲ။
ဖြေ - အဲဒီကတော့ သူက အဲဒီရေးဆွဲခဲ့တဲ့ အကြောင်းအရာပေါ်မှာ ခေတ်တစ်ခေတ်ရဲ့ပုံရိပ်တွေ၊ အဖြစ်အပျက် တွေကို ထင်ဟပ်စေတယ်။ ဥပမာ အပြင်ထွက်လို့ အရမ်းပူတယ်ဆိုရင် အဲဒီကာလရဲ့ ရာသီဥတု၊ သဘာဝပတ် ၀န်းကျင်စတဲ့ အခြေအနေတွေ၊ ကားတွေကျပ်တယ်ဆိုပါစို့ အဲဒီလူတစ်ယောက်ဖြတ်သန်းခဲ့တဲ့ ကာလရဲ့ သယ် ယူပို့ဆောင်ရေးကို ထင်ဟပ်နေတယ်။
မေး - ဆရာရေးဆွဲခဲ့တဲ့ ကာတွန်းတွေ က ဆရာပရိသတ် လက်ထဲရောက်ရှိ ခဲ့တာရှိသလို မရောက်ရှိခဲ့တဲ့ ကာလ တွေလည်းရှိခဲ့ပါတယ်။ အဲဒီအတွက် ဆရာဒီနေရာကနေ ဘာများပြောပြချင်ပါသလဲ။
ဖြေ - မဖော်ပြဖြစ်ခဲ့တဲ့ ပုံ ၂၀၀၊ ၃၀၀ လောက် ရှိခဲ့ပါတယ်။ အခုပြန်စဉ်းစား ကြည့်လိုက်တဲ့အခါမှာ ကိုယ်ဒီလိုနေရာ က တင်ပြခွင့်မရရင် တခြားထောင့် တစ်ဖက်ကနေ ပြောင်းပြီး တင်ပြခွင့်ရခဲ့တယ်။ ကာတွန်းတစ်ခုတည်းနဲ့ ပြောချင်တာတွေ အားလုံးပြောပြလို့ မရဘူး။ ဒါ့ကြောင့် ဟောပြောပွဲတွေ ဖိတ်ရင် လိုက်ဟောဖြစ်တာ။ လူတွေ နဲ့တွေ့ပြီး ပြည့်ပြည့်စုံစုံပြောလို့ရတာပေါ့။ ခုကာလမှာ လိုအပ်တယ်ထင်လို့ ဟောပြောပွဲတွေ လိုက်တာပါ။ ကာတွန်း ဆရာရဲ့အဓိကတာဝန်က ကာတွန်းဆွဲဖို့ပါ။ ဟောတာမဟုတ်ဘူး။
မေး-အခုကာလက ဘာကြောင့်လိုအပ်တယ်လို့ ဆရာထင်တာလဲ။
ဖြေ- အဓိက က အခုကာလမှာ အပြောင်းအလဲ အနည်းငယ်ရှိတယ်။ အခုလို အပြောင်းအလဲ ကာလမှာ လူတွေ ကသတိရှိရှိနဲ့ နိုးကြားနေဖို့ လိုအပ်တယ်။
ကိုယ်ရေးအကျဉ်း
အမည် - ဦးဝင်းနိုင်
မွေးနေ့ - ၂၄-၇-၁၉၅၉
ပညာအရည်အချင်း - BE(Mech), Harvard Universityမှ MPA
စာပေလောကသို့ ၀င်ရောက်မှု - ၁၉၈၁ ခုနှစ်
အင်တာဗျူးစဉ်က ရိုက်တဲ့ပုံ ၂၀၁၁ ဧပြီ၃၀
No comments:
Post a Comment